Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Si Jesus—Ang Dalan, ang Kamatuoran, ang Kabuhi

 KAPITULO 1

Duha ka Mensahe Halin sa Dios

Duha ka Mensahe Halin sa Dios

LUCAS 1:5-33

  • GINTAGNA NI ANGHEL GABRIEL NGA IBUN-AG SI JUAN NGA MANUGBAWTISMO

  • GINSUGID NI GABRIEL KAY MARIA NGA IBUN-AG NIYA SI JESUS

Makasiling kita nga ang bilog nga Biblia mensahe halin sa Dios. Ginhatag ini sang aton Amay sa langit para tudluan kita. Pero binagbinaga ang duha ka espesyal nga mensahe nga ginsugid sobra na 2,000 ka tuig ang nagligad. Ginsugid ini sang anghel nga si Gabriel, nga “nagatindog sa atubangan sang Dios.” (Lucas 1:19) Ano ang sitwasyon sang ginsugid sang anghel ining importante nga mga mensahe?

Mga tuig 3 B.C.E. sadto. Diin ginsugid ni Gabriel ang una nga mensahe? Sa mga pukatod sang Judea, nga mahimo malapit sa Jerusalem. Diri nagaistar ang saserdote ni Jehova nga si Zacarias. Tigulang na sila sang iya asawa nga si Elisabet, kag wala sila sing bata. Turno na ni Zacarias nga mag-alagad bilang saserdote sa templo sang Dios sa Jerusalem. Samtang sa templo sia, gulpi lang nagpakita si Gabriel sa halaran sang incienso.

Siempre hinadlukan si Zacarias. Pero, ginpakalma sia sang anghel nga nagasiling: “Indi ka magkahadlok, Zacarias, kay ang imo pag-ampo ginpamatian sang Dios, kag si Elisabet nga imo asawa magabun-ag sang anak nga lalaki kag hingalanan mo sia nga Juan.” Nagsiling pa si Gabriel nga si Juan ‘mangin halangdon sa atubangan ni Jehova’ kag ‘ihanda niya ang katawhan para kay Jehova.’—Lucas 1:13-17.

Daw indi magpati si Zacarias. Ngaa? Bangod tigulang na sila ni Elisabet. Gani ginsilingan sia ni Gabriel: “Bangod wala ka nagpati sa akon ginsiling, indi ka makahambal tubtob sa adlaw nga matuman ang akon ginhambal sa imo.”—Lucas 1:20.

Natingala ang mga tawo kon ngaa kadugay maggua si Zacarias. Sang naggua sia, indi na sia makahambal kag nagasenyas na lang. May nakita gid sia nga palanan-awon sa templo.

Sang natapos na ang pag-alagad ni Zacarias sa templo, nagpauli sia. Wala madugay, nagbusong si Elisabet! Samtang nagahulat sia nga magbata, lima ka bulan nga wala gid sia maggua sa ila balay.

Dayon nagpakita liwat si Gabriel. Kay sin-o? Sa isa ka dalaga nga si Maria, nga nagaistar sa aminhan sa rehiyon sang Galilea, sa siudad sang Nazaret. Ano ang ginsugid sang anghel sa iya? Nagsiling sia: “Nahamut-an ka sang Dios.” Ginsilingan pa niya si Maria: “Magabusong ka kag magabun-ag sing isa ka anak nga lalaki, kag hingalanan mo sia nga Jesus.” Nagsiling pa si Gabriel: “Mangin halangdon sia kag tawgon nga Anak sang Labing Mataas, . . . kag magahari sia sa panimalay ni Jacob sing dayon, kag ang iya Ginharian wala sing katapusan.”—Lucas 1:30-33.

Nalipay gid si Gabriel nga isugid ining duha ka mensahe. Samtang padayon naton nga ginabasa ang parte kanday Juan kag Jesus, mangin maathag kon ngaa importante gid ini nga mga mensahe halin sa langit.