Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Magpabilin Kamo sa Gugma sang Dios

 APENDISE

Kon Paano Pakig-angutan ang Na-disfellowship

Kon Paano Pakig-angutan ang Na-disfellowship

Masakit gid kon ang imo paryente ukon suod nga abyan ginsikway sa kongregasyon bangod indi sia mahinulsulon. Apang mapakita naton ang aton tudok nga gugma sa Dios kag katutom sa iya kahimusan kon sundon naton ang panuytoy sang Biblia kon paano pakig-angutan ang na-disfellowship. * Binagbinaga ang pila ka pamangkot tuhoy sini.

Paano naton dapat pakig-angutan ang na-disfellowship? Ang Biblia nagsiling: “Untatan ninyo ang pagpakig-upod kay bisan sin-o nga utod nga nagahimo sang seksuwal nga imoralidad ukon makagod ukon nagasimba sa mga diosdios ukon nagatamay sa iban ukon palahubog ukon manugkilkil. Indi kamo makig-upod sa ila bisan sa pagkaon.” (1 Corinto 5:11) Tuhoy sa bisan sin-o nga “wala nagapabilin sa panudlo sang Cristo,” mabasa naton: “Indi ninyo sia pagbatuna sa inyo balay kag indi sia pagtamyawa. Kay ang isa nga nagatamyaw sa iya nagapakig-ambit sa iya malaut nga mga buhat.” (2 Juan 9-11) Gani indi kita dapat makig-upod ukon makigsugilanon tuhoy sa espirituwal nga mga butang sa isa nga na-disfellowship. Ang Lalantawan, Marso 15, 1982, sa pahina 17 nagsiling: “Ang simple nga ‘Pagpangamusta’ sa isa mahimo nga amo ang una nga tikang sa paghambalanay kag ayhan sa pag-abyanay. Luyag bala naton himuon inang nahaunang tikang upod sa na-disfellowship?”

Dapat bala nga likawan gid sia? Huo, bangod sa pila ka rason. Una, mapakita naton ang pagkamainunungon sa Dios kag sa iya Pulong. Luyag naton tumanon si Jehova indi lang kon mahapos ini kundi bisan pa mabudlay ini. Ang gugma sa Dios magapahulag sa aton nga tumanon ang tanan niya nga sugo, bangod nahibaluan naton nga makatarunganon sia kag mahigugmaon, kag ang iya mga kasuguan para gid sa aton kaayuhan. (Isaias 48:17; 1 Juan 5:3) Ikaduha, maamligan kita kag ang mga kauturan gikan sa espirituwal kag moral nga kahigkuan kag mahuptan ang maayo nga reputasyon sang kongregasyon kon likawan naton ang indi  mahinulsulon nga nakasala. (1 Corinto 5:6, 7) Ikatlo, mahimo pa gani makabenepisyo ang isa nga na-disfellowship kon sundon gid naton ang mga prinsipio sa Biblia. Kon sakdagon naton ang desisyon sang hudisyal nga komite, mahimo matandog ang tagipusuon sang nakasala nga wala namati sadto sa mga panikasog sang mga gulang nga buligan sia. Kon indi na makig-upod sa iya ang iya mga hinigugma, basi pa lang ‘makamarasmas sia’ kag marealisar niya kon daw ano ka serioso ang iya sala kag magahimo sia sing mga tikang nga manumbalik kay Jehova.—Lucas 15:17.

Ano abi kon miembro sang aton pamilya ang na-disfellowship? Bangod suod ang relasyon sang mga miembro sang pamilya, mahimo matilawan gid ang pagkamainunungon. Paano naton dapat pakig-angutan ang miembro sang pamilya nga na-disfellowship? Wala diri ginatuptupan ang tanan nga kahimtangan nga mahimo mag-utwas, apang binagbinagon naton ang duha sa sini.

Sa pila ka kahimtangan, mahimo nga nagapuyo gihapon ang isa nga na-disfellowship upod sa iya pamilya. Bangod ang pag-disfellowship sa iya wala man nagbugto sang ila relasyon subong pamilya, mahimo magpadayon ang ila kinaandan nga pagsinalayo kag pagpakig-angot sa sulod sang balay. Apang bangod sang iya ginhimo, gin-utod niya ang iya kaangtanan sa espirituwal sa iya tumuluo nga pamilya. Gani, ang mainunungon nga mga miembro sang pamilya indi na makig-upod sa iya sa espirituwal. Halimbawa, kon yara ang isa nga na-disfellowship, indi sia dapat makigbahin sa pagtipon sang pamilya para sa pangpamilya nga pagsimba. Apang kon menor-de-edad pa sia, responsibilidad gihapon sang mga ginikanan nga tudluan sia kag disiplinahon. Gani ang mahigugmaon nga mga ginikanan mahimo magdumala sing pagtuon sa Biblia sa iya. *Hulubaton 6:20-22; 29:17.

Sa pila naman ka kahimtangan, mahimo nga wala nagapuyo upod sa inyo ang miembro sang pamilya nga na-disfellowship. Bisan pa kon kaisa kinahanglan kamo mag-istoryahanay tuhoy sa pila ka butang may kaangtanan sa pamilya, dapat ini limitahan. Ang mainunungon nga mga miembro sang Cristianong pamilya indi dapat mangita sing alibay agod lamang makaupod ang na-disfellowship  nga pamilya nga wala nagaistar upod sa ila. Sa baylo, ang pagkamainunungon kay Jehova kag sa iya organisasyon dapat magpahulag sa ila nga tumanon ang Makasulatanhon nga kahimusan sa pag-disfellowship. Ang ila pagkamainunungon para gid sa kaayuhan sang nakasala kag mahimo makabulig sa iya nga makabenepisyo sa disiplina. *Hebreo 12:11.

^ par. 1 Ini nga mga prinsipio sa Biblia maaplikar man sa mga disassociate ukon hungod nga nagbiya sa kongregasyon.

^ par. 2 Para sa dugang nga impormasyon tuhoy sa menor-de-edad nga na-disfellowship nga nagapuyo upod sa iya pamilya, tan-awa ang Lalantawan, Oktubre 1, 2001, pahina 16-17, kag Nobiembre 15, 1988, pahina 20.

^ par. 3 Para sa dugang nga impormasyon kon paano pakig-angutan ang na-disfellowship nga mga paryente, tan-awa ang laygay sang Kasulatan nga ginbinagbinag sa Ang Lalantawan, Abril 15, 1988, pahina 26-31, kag Marso 15, 1982, pahina 14-19.

 

Magtuon sing Dugang Pa

Ngaa May Gina-disfellowship?

Paano ang mahigugmaon nga pagdisiplina ni Jehova nakabulig sa mahinulsulon nga nakasala?