Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Magpabilin Kamo sa Gugma sang Dios

 APENDISE

Kon Paano Madaug ang Masturbasyon

Kon Paano Madaug ang Masturbasyon

Ang masturbasyon isa ka bisyo nga wala ginakahamut-an sang Dios kay ginapasundan sini ang maiyaiyahon nga panimuot kag ginahigkuan sini ang hunahuna. * Sa ulihi, mahimo tamdon sang nagahimo sini ang iban nga tawo subong palautwasan lamang sang iya kailigbon sa sekso. Para sa iya ang pagpakigsekso indi na pagpakita sing gugma, kundi isa na lang ka paagi agod malipay sia sing makadali kag mapaayawan ang iya kailigbon sa sekso. Apang, ini nga kalipay temporaryo lamang. Kay ang matuod, sa baylo nga patyon ang mga bahin sang lawas nga may huyog sa “seksuwal nga imoralidad, kahigkuan, [kag] indi mapunggan nga kailigbon sa sekso,” labi ini nga ginapukaw sang masturbasyon.—Colosas 3:5.

Si apostol Pablo nagsulat: “Mga hinigugma, tungod sining ginsaad sa aton, tinluan naton ang aton kaugalingon sa tanan nga nagapahigko sang lawas kag tagipusuon, agod mangin mas balaan kita samtang nagakahadlok sa Dios.” (2 Corinto 7:1) Kon ginabudlayan ka gid sa pagtuman sini nga sugo, indi madulaan sing paglaum. Si Jehova pirme “handa sa pagpatawad” kag sa pagbulig sa imo. (Salmo 86:5; Lucas 11:9-13) Sa pagkamatuod, ang imo nagapakamalaut sa kaugalingon nga tagipusuon kag ang imo mga panikasog nga daugon ini nga batasan, bisan pa nga nagakapaslawan ka kon kaisa, nagapakita nga maayo ang imo panimuot. Dumduma man nga “ang Dios labaw pa sa aton tagipusuon kag nakahibalo sang tanan nga butang.” (1 Juan 3:20) Nakita sang Dios indi lamang ang aton mga sala, kundi ang aton bug-os nga pagkatawo. Bangod nahibaluan niya ang tanan  tuhoy sa aton, may simpatiya sia kag ginapamatian niya ang aton tudok nga mga pagpakiluoy. Gani indi mag-untat sa imo mapainubuson kag tudok nga pagpangamuyo sa Dios, kaangay sang isa ka bata nga nagapalapit sa iya amay kon may problema sia. Pakamaayuhon ka ni Jehova paagi sa paghatag sa imo sing matinlo nga konsiensia. (Salmo 51:1-12, 17; Isaias 1:18) Siempre, dapat nga manikasog ka suno sa imo ginapangamuyo. Halimbawa, dapat mo tinguhaan nga likawan ang tanan nga porma sang pornograpiya kag ang malain nga mga kaupdanan. *

Kon nagapadayon ang imo problema sa masturbasyon, palihug isugid ini sa imo Cristianong ginikanan ukon sa isa ka abyan nga mainulikdon kag hamtong sa espirituwal. *Hulubaton 1:8, 9; 1 Tesalonica 5:14; Tito 2:3-5.

^ par. 1 Ang masturbasyon amo ang paghapulas sa kinatawo, nga sa masami nagaresulta sa seksuwal nga kaayawan.

^ par. 2 Subong isa ka praktikal nga paagi agod makontrol ang paggamit sang kompyuter sa balay, madamo nga pamilya ang nagabutang sini sa lugar nga makita sang iban nga katapo sang pamilya. Dugang pa, ang iban nga pamilya nagbakal sing computer program nga nagapugong agod indi makasulod ang malaw-ay nga mga talan-awon. Siempre pa, wala sing computer program ang bug-os nga masaligan.

^ par. 3 Para sa praktikal nga mga panugda kon paano madaug ang masturbasyon, tan-awa ang artikulo nga “Pamangkot sang mga Pamatan-on . . . Paano Ko Malandas Ini nga Batasan?” sa Nobiembre 2006 nga Magmata!, kag ang pahina 178-182 sang libro nga Questions Young People Ask—Answers That Work, Volume 1.