Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Magpabilin Kamo sa Gugma sang Dios

 KAPITULO 15

Magkalipay sa Imo Ginpangabudlayan

Magkalipay sa Imo Ginpangabudlayan

“Ang tagsa ka tawo . . . magkalipay sa tanan nga ginpangabudlayan niya.”—MANUGWALI 3:13.

1-3. (a) Ano ang ginabatyag sang madamo tuhoy sa ila trabaho? (b) Ano nga pagtamod sa trabaho ang ginapalig-on sang Biblia, kag ano nga mga pamangkot ang aton binagbinagon sa sini nga kapitulo?

PARA sa madamo karon, ang pagtrabaho indi gid makalilipay. Natak-an sila sa pagtrabaho sing inoras kada adlaw ilabi na kon wala nila naluyagan ang ila trabaho. Paano sila mabuligan agod maluyagan nila ang ila trabaho kag malipay sa sini?

2 Ginapalig-on kita sang Biblia nga tamdon sing nagakaigo ang pagpangabudlay. Ini nagasiling nga ang pagpangabudlay kag ang resulta sini mga pagpakamaayo. Si Solomon nagsulat: “Ang tagsa ka tawo magkaon man kag mag-inom kag magkalipay sa tanan nga ginpangabudlayan niya. Dulot ini sang Dios.” (Manugwali 3:13) Ginahigugma kita ni Jehova kag nagaulikid gid sia sa aton, gani luyag niya nga malipay kita sa aton trabaho kag sa mga resulta sang aton ginpangabudlayan. Agod makapabilin kita sa iya gugma, dapat magkabuhi kita suno sa iya pagtamod kag mga prinsipio tuhoy sa trabaho.—Basaha ang Manugwali 2:24; 5:18.

3 Binagbinagon naton sa sini nga kapitulo ang apat ka pamangkot: Paano kita malipay sa aton ginpangabudlayan? Ano nga sahi sang trabaho ang indi nagakaigo para sa matuod nga mga Cristiano? Paano naton mabalanse ang aton trabaho kag ang espirituwal nga mga hilikuton? Kag ano ang pinakaimportante nga hilikuton nga dapat naton himuon? Apang binagbinagon anay naton ang halimbawa sang duha ka labing maayo nga manugpangabudlay sa uniberso—si Jehova nga Dios kag si Jesucristo.

 ANG SUPREMO NGA MANUGPANGABUDLAY KAG ANG BATID NGA MANUGPANGABUDLAY

4, 5. Paano ginapakita sang Biblia nga nalipay si Jehova sa resulta sang iya pagpangabudlay?

4 Si Jehova amo ang Supremo nga Manugpangabudlay. Ang Genesis 1:1 nagasiling: “Sa ginsuguran gintuga sang Dios ang langit kag ang duta.” Sang matapos sang Dios ang pagtuga sa duta kag sa tanan nga butang sa sini, nagsiling sia nga “maayo gid” ang resulta sini. (Genesis 1:31) Buot silingon, nalipay gid sia sa tanan nga gintuga niya. Bangod si Jehova “malipayon nga Dios,” wala sing duhaduha nga nalipay gid sia sa resulta sang iya pagpangabudlay.—1 Timoteo 1:11.

5 Ang aton mapisan nga Dios wala nagauntat sa pagpangabudlay. Bisan pa madugay na nga natapos ang pagpanuga sa duta, si Jesus nagsiling: “Ang akon Amay padayon nga nagapangabudlay tubtob karon.” (Juan 5:17) Ano ang ginahimo sang Amay? Gikan sa iya puluy-an sa langit, padayon niya nga ginatuytuyan kag ginaatipan ang katawhan. Ginhanda niya ang ‘bag-o nga tinuga,’ ang hinaplas sang espiritu nga mga Cristiano nga magagahom sa ulihi upod kay Jesus sa langit. (2 Corinto 5:17) Nagapangabudlay man sia sa pagtuman sang iya katuyuan para sa katawhan—nga ang mga nagahigugma sa iya makatigayon sing kabuhi nga wala sing katapusan sa bag-ong kalibutan. (Roma 6:23) Pat-od nga nalipay gid si Jehova sa resulta sang iya pagpangabudlay. Minilyon ang nagbaton sang mensahe sang Ginharian bangod ginbuyok sila sang Dios, kag ginbag-o nila ang ila pagkabuhi agod makapabilin sila sa gugma sang Dios.—Juan 6:44.

6, 7. Ano ang ginhimo ni Jesus subong maukod nga manugpangabudlay?

6 Madugay na nga kilala si Jesus nga isa ka maukod nga manugpangabudlay. Antes sia magkari sa duta subong tawo, sia ang “batid nga manugpangabudlay” sang Dios sa pagtuga sang tanan nga butang “sa langit kag sa duta.” (Hulubaton 8:22-31; Colosas 1:15-17) Sang yari si Jesus sa duta, padayon sia nga nangin maukod nga manugpangabudlay. Bata pa sia sang natun-an niya ang pagpamanday, gani nakilal-an sia nga  “panday.” * (Marcos 6:3) Mabug-at nga trabaho ang pagpamanday kag nagakinahanglan ini sing mga abilidad—labi na nga wala pa sadto sing sirahian, de-koryente nga mga kagamitan kag balaligyaan sing mga materyales. Mahanduraw mo bala si Jesus nga nagakuha sang iya materyales—ayhan nagapamulod pa gani kag nagapanghakot sing mga kahoy pakadto sa iya ginaubrahan? Ginapanan-aw mo bala sia nga nagapatindog sing mga balay—nagapamanday sing mga balayan, nagahimo sing mga puertahan kag mga muebles? Wala sing duhaduha nga nabatyagan mismo ni Jesus ang kalipay bangod sang iya pagpangabudlay.

7 Talalupangdon gid ang maukod nga pagpangabudlay ni Jesus sa pagtuman sang iya ministeryo. Sa sulod sang tatlo ka tuig kag tunga, nangin masako gid sia sa sining importante nga hilikuton. Luyag ni Jesus nga madamo sia sing mabuligan, gani wala sia sing gin-uyang nga tion. Aga pa sia nagabangon kag nagapangabudlay tubtob sa gab-i. (Lucas 21:37, 38; Juan 3:2) Naglakbay sia “sa mga siudad kag mga baryo, nga nagabantala sing maayong balita sang Ginharian sang Dios.” (Lucas 8:1) Literal nga naglakat si Jesus sing ginatos ka kilometro sa yab-ukon nga mga dalan agod ipalab-ot ang mensahe sang maayong balita sa mga tawo.

8, 9. Paano si Jesus nakasapo sing kalipay sa iya pagpangabudlay?

8 Nalipay bala si Jesus sa iya pagpangabudlay sa ministeryo? Huo! Nagsab-ug sia sing binhi sang kamatuoran sang Ginharian kag sang nagbiya sia, ang kaumhan alanihon na. Ang paghimo sang buluhaton sang Dios naghatag kay Jesus sing kusog kag kapagsik amo nga handa niya nga ipaiway ang pagkaon agod lamang matapos ang buluhaton. (Juan 4:31-38) Hunahunaa lamang ang iya kalipay nga sang natapos niya ang iya ministeryo sa duta, nakasiling gid sia sa iya Amay: “Ginhimaya ko ikaw sa duta, kay natapos ko ang buluhaton nga ginhatag mo sa akon.”—Juan 17:4.

 9 Si Jehova kag si Jesus amo gid ang labing maayo nga halimbawa sa mga nagakalipay sa ila pagpangabudlay. Ang aton gugma kay Jehova nagapahulag sa aton nga ‘mangin manug-ilog sa Dios.’ (Efeso 5:1) Ang aton gugma kay Jesus nagapahulag man sa aton nga ‘sundon sing maayo ang iya mga tikang.’ (1 Pedro 2:21) Gani binagbinagon naton karon kon paano kita malipay sa aton ginpangabudlayan.

KON PAANO KITA MALIPAY SA ATON GINPANGABUDLAYAN

Ang pag-aplikar sang mga prinsipio sang Biblia makabulig sa imo nga magkalipay sa imo ginpangabudlayan

10, 11. Ano ang makabulig sa aton sa pagpalambo sing positibo nga panimuot sa aton trabaho?

10 Mahimo mangin bahin sang kabuhi sang matuod nga mga Cristiano ang sekular nga trabaho. Luyag naton malipay kag mangin kontento sa aton trabaho, apang mabudlay gid ini kon indi naton gusto ang aton obra. Kon amo, paano kita mangin malipayon sa aton trabaho?

11 Palambua ang positibo nga panimuot. Indi naton pirme mabag-o ang aton kahimtangan, apang mabag-o naton ang aton panimuot. Ang pagpamalandong sa pagtamod sang Dios sa trabaho makabulig sa aton nga mapalambo ang positibo nga panimuot. Halimbawa, kon ikaw ulo sang pamilya, dumduma nga bisan ano pa ang imo trabaho, nagabulig ini sa imo nga maamanan ang imo pamilya sang ila materyal nga mga kinahanglanon. Ang pag-atipan sa imo mga hinigugma importante gid sa Dios. Ang iya Pulong nagasiling nga ang bisan sin-o nga wala nagaaman para sa iya pamilya “malain pa sa tawo nga wala sing pagtuo.” (1 Timoteo 5:8) Bangod nahibaluan mo nga ang imo trabaho isa ka paagi sa paglab-ot sang imo tulumuron—nga nakabulig agod matuman mo ang responsibilidad nga ginhatag sang Dios sa imo—mabatyagan mo ang kalipay nga mahimo indi mabatyagan sang imo mga kaupod sa trabaho.

12. Ano nga pagpakamaayo ang aton matigayon kon mapisan kita kag bunayag sa aton trabaho?

12 Mangin mapisan kag bunayag. Matigayon naton ang mga pagpakamaayo kon mapisan kita kag nagaobra sing maayo.  Masami nga ginapabaloran sang mga amo ang mapisan kag sampaton nga mga empleyado. (Hulubaton 12:24; 22:29) Subong matuod nga mga Cristiano, dapat bunayag man kita sa aton trabaho. Wala naton ginakawatan sing kuarta, kagamitan, ukon tion ang aton amo. (Efeso 4:28) Natun-an naton sang nagligad nga kapitulo nga ginapakamaayo gid ang mga bunayag. Ang empleyado nga nakilal-an nga bunayag mahimo gid nga saligan. Matalupangdan man ukon indi sang aton amo ang aton kapisan, malipayon kita bangod natigayon naton ang ‘bunayag nga konsiensia’ kag napahamut-an naton ang Dios nga aton ginahigugma.—Hebreo 13:18; Colosas 3:22-24.

13. Ano ang mahimo nga mga resulta sang aton maayo nga halimbawa sa aton ulubrahan?

 13 Dumduma nga ang aton paggawi makahimaya sa Dios. Kon huptan naton ang mataas nga talaksan sang Cristianong paggawi sa aton ulubrahan, matalupangdan gid ini sang iban. Ano ang resulta? “Mapatahom [naton] ang panudlo sang aton Manluluwas, ang Dios.” (Tito 2:9, 10) Bangod sang aton maayo nga paggawi, mahimo manamian ang iban sa aton paagi sang pagsimba kag maganyat sila sa sini. Hunahunaa lamang kon ano ang batyagon mo kon ang imo kaupod sa trabaho nagpakita sing interes sa kamatuoran bangod sang imo maayo nga halimbawa! Labaw sa tanan, binagbinaga ini: May mas maayo pa bala nga padya sangsa paghibalo nga ang imo maayo nga paggawi nagahimaya kay Jehova kag nagapasadya sa iya tagipusuon?—Basaha ang Hulubaton 27:11; 1 Pedro 2:12.

MANGIN MAALAMON SA PAGPILI SING TRABAHO

14-16. Kon nagadesisyon kita parte sa trabaho, anong importante nga mga pamangkot ang dapat naton binagbinagon?

14 Wala ginadetalye sang Biblia kon ano nga sekular nga trabaho ang puede batunon ukon indi. Apang wala ini nagakahulugan nga puede naton batunon ang bisan ano nga trabaho. Mabuligan kita sang Kasulatan sa pagpili sing mapuslanon kag dungganon nga trabaho nga kalahamut-an sa Dios kag sa paglikaw sa trabaho nga wala niya nahamut-an. (Hulubaton 2:6) May duha ka importante nga pamangkot nga dapat naton binagbinagon kon nagadesisyon kita parte sa trabaho.

15 Ini bala nga trabaho nagaobligar sa aton nga himuon ang isa ka butang nga ginapakamalaut sang Biblia? Maathag nga ginapakamalaut sang Pulong sang Dios ang pagpangawat, pagbutig, kag paghimo sing mga diosdios. (Exodo 20:4; Binuhatan 15:29; Efeso 4:28; Bugna 21:8) Indi naton pagbatunon ang bisan ano nga trabaho nga magaobligar sa aton sa paghimo sini nga mga butang. Kon ginahigugma naton si Jehova, indi gid naton pagbatunon ang trabaho nga nagadalahig  sang paghimo sing mga butang nga nagalapas sa mga sugo sang Dios.—Basaha ang 1 Juan 5:3.

16 Ini bala nga trabaho nagahimo sa aton nga kakunsabo ukon nagasakdag sa malain nga buhat? Binagbinaga ini nga halimbawa. Indi malain nga mangin isa ka receptionist. Apang, ano abi kon ang isa ka Cristiano gintanyagan sini nga trabaho sa isa ka klinika nga nagapanghulog sang mga bata? Matuod, indi man sia magbulig sa paghulog sing mga bata. Pero indi bala nga ang iya trabaho nagabulig sa pagpalakat  sa klinika nga nagapanghulog sang bata—isa ka buhat nga supak sa Pulong sang Dios? (Exodo 21:22-24) Bangod ginahigugma naton si Jehova, indi kita dapat makigbahin sa mga buhat nga ginapakamalaut sang Biblia.

17. (a) Ano ang dapat naton binagbinagon kon nagadesisyon kita parte sa trabaho? (Tan-awa ang kahon nga “ Batunon Ko Bala Ini nga Trabaho?”) (b) Paano kita mabuligan sang aton konsiensia sa paghimo sing mga desisyon nga magapahamuot sa Dios?

17 Madamo pa nga pamangkot parte sa trabaho ang masabat paagi sa pagbinagbinag sang mga sabat sa duha ka importante nga pamangkot sa parapo 15 kag 16. Apang may iban pa nga butang nga dapat naton binagbinagon sing maayo kon nagadesisyon kita parte sa trabaho. * Indi naton mapaabot nga maghimo ang matutom nga ulipon sing mga pagsulundan  sa kada sitwasyon nga mahimo mag-utwas. Gani kinahanglan naton ang paghangop sa sini nga bahin. Natun-an naton sa Kapitulo 2 nga dapat naton tudluan kag hanason ang aton konsiensia paagi sa pagtuon kag pag-aplikar sang Pulong sang Dios sa aton kabuhi. “Paagi sa paggamit” sang aton “ikasarang sa paghangop,” ang aton konsiensia makabulig sa aton sa paghimo sing mga desisyon nga makapahamuot sa Dios, kag makabulig sa aton nga makapabilin sa iya gugma.—Hebreo 5:14.

MANGIN BALANSE SA IMO TRABAHO

18. Ngaa indi mahapos huptan ang espirituwal nga pagkabalanse?

18 Indi mahapos ang paghupot sing espirituwal nga pagkabalanse sa sining “katapusan nga mga adlaw” bangod sa “makahalanguyos nga mga tion nga mabudlay atubangon.” (2 Timoteo 3:1) Mabudlay mangita sing trabaho kag makapabilin sa sini. Subong matuod nga mga Cristiano, nahibaluan naton nga dapat kita mangin mapisan agod masustentuhan ang aton pamilya. Apang kon indi kita maghalong, ang mga pag-ipit sa ulubrahan ukon ang materyalistiko nga panghunahuna sang kalibutan nga mahimo mag-impluwensia sa aton, makaupang sa aton espirituwal nga mga hilikuton. (1 Timoteo 6:9, 10) Binagbinagon naton kon paano naton mahuptan ang pagkabalanse, kag mapat-od “ang mas importante nga mga butang.”—Filipos 1:10.

19. Ngaa takus gid si Jehova sang aton bug-os nga pagsalig, kag ano ang malikawan naton kon magsalig kita sa iya?

19 Magsalig sing bug-os kay Jehova. (Basaha ang Hulubaton 3:5, 6.) Indi bala nga takus gid si Jehova nga saligan? Kay man, nagaulikid sia sa aton. (1 Pedro 5:7) Mas nakahibalo sia sangsa aton kon ano ang aton kinahanglanon kag handa gid sia sa pagbulig sa aton. (Salmo 37:25) Gani dapat naton sundon ang pahanumdom sang iya Pulong: “Dapat nga ang inyo pagkabuhi hilway sa gugma sa kuarta, kag mangin kontento kamo sa mga butang nga yara sa inyo. Kay ang Dios nagsiling: ‘Indi ko gid kamo pagbayaan, kag indi ko gid kamo pagpabay-an.’” (Hebreo 13:5) Madamo sing bug-os tion nga alagad  ang makapamatuod sa ikasarang sang Dios nga amanan sila sang ila mga kinahanglanon sa kabuhi. Kon nagasalig kita sing bug-os nga indi kita pagpabay-an ni Jehova, malikawan naton ang sobra nga kabalaka sa pag-aman sa aton pamilya. (Mateo 6:25-32) Indi naton pagtugutan nga upangan sini ang aton espirituwal nga mga hilikuton, subong sang pagbantala sing maayong balita kag pagtambong sa mga miting.—Mateo 24:14; Hebreo 10:24, 25.

20. Ano ang nakapokus nga mata, kag paano mo mahuptan ini nga panimuot?

 20 Ipokus ang imo mata. (Basaha ang Mateo 6:22, 23.) Kon nakapokus ang aton mata, ang aton kabuhi indi komplikado. Ang mata sang isa ka Cristiano nakapokus sa isa lang ka katuyuan—ang paghimo sang kabubut-on sang Dios. Gani kon nakapokus ang aton mata, indi naton pag-ubuson ang aton oras sa paghingamo sang daku sing sueldo nga trabaho kag maluho nga pagkabuhi. Indi man kita magpadala sa wala-untat nga pagpanghaylo sang mga manugpasayod nga mangin malipayon lamang kita kon matigayon naton ang pinakabag-o kag pinakamanami nga mga butang. Paano mo mahuptan nga nakapokus ang imo mata? Likawi ang indi kinahanglanon nga pagpangutang. Indi pagpagamuha ang imo kabuhi bangod sang madamo nga kagamitan nga nagakaon sing daku nga tion kag atension. Pamatii ang laygay sang Biblia nga mangin kontento sa “pagkaon, kag panapton.” (1 Timoteo 6:8) Pasimpleha ang imo kabuhi tubtob posible.

21. Ngaa dapat kita magpahamtang sing mga prioridad, kag ano ang dapat naton unahon sa aton kabuhi?

21 Magpahamtang sing espirituwal nga mga prioridad, kag sunda ini. Bangod limitado lamang ang aton mahimo sa aton kabuhi, dapat magpahamtang kita sing mga prioridad. Kay kon indi, mahimo ubuson sang indi tanto ka importante nga mga butang ang aton hamili nga tion, kag mapahigad naton ang mas importante nga mga butang. Kon amo, ano dapat ang una nga prioridad naton sa kabuhi? Ang pagkuha sing dugang pa nga edukasyon amo ang prioridad sang madamo karon sa kalibutan bangod luyag nila makaobra nga may daku nga sueldo. Apang ginapalig-on ni Jesus ang iya mga sumulunod nga “padayon . . . nga unahon ang pagpangita sa Ginharian.” (Mateo 6:33) Subong matuod nga mga Cristiano, ginauna naton ang Ginharian sang Dios sa aton kabuhi. Dapat makita sa aton mga desisyon, mga tulumuron, kag mga ginahimo nga mas importante sa aton ang intereses sang Ginharian kag ang kabubut-on sang Dios sangsa materyal kag kalibutanon nga mga hilikuton.

 MANGIN MAKUGI SA MINISTERYO

Mapakita naton nga ginahigugma naton si Jehova kon ginauna naton sa aton kabuhi ang pagbantala

22, 23. (a) Ano ang panguna nga hilikuton sang matuod nga mga Cristiano, kag paano naton mapakita nga importante ini sa aton? (Tan-awa ang kahon nga “ Nangin Malipayon Gid Ako kag Kontento.”) (b) Ano ang imo determinasyon tuhoy sa sekular nga trabaho?

22 Bangod nahibaluan naton nga malapit na kita karon sa katapusan, dapat nakapokus kita sa panguna nga hilikuton sang matuod nga mga Cristiano—ang pagbantala kag pagtudlo sa mga tawo nga mangin disipulo. (Mateo 24:14; 28:19, 20) Kaangay sang aton Huwaran nga si Jesus, luyag naton mangin masako sa sining nagaluwas sing kabuhi nga hilikuton. Paano naton mapakita nga importante sa aton ini nga hilikuton? Ang kalabanan sa katawhan sang Dios makugi nga nagaalagad subong mga manugbantala sang kongregasyon. Ginaorganisar sang iban ang ila mga hilikuton agod makaalagad subong mga payunir ukon mga misyonero. Bangod ginapabaloran sang madamo nga ginikanan ang espirituwal nga mga tulumuron, ginapalig-on nila ang ila kabataan nga tinguhaan nga makaalagad sing bug-os tion. Nangin malipayon bala ining makugi nga mga manugbantala sang Ginharian bangod masako sila sa ministeryo? Huo! Ang pag-alagad kay Jehova sing bug-os kalag amo ang makahatag sing matuod nga kalipay, kaayawan, kag madamo nga pagpakamaayo.—Basaha ang Hulubaton 10:22.

23 Madamo sa aton ang nagatrabaho sing malawig nga inoras agod masustentuhan ang aton pamilya. Dumduma nga luyag ni Jehova nga mangin malipayon kita sa aton pagpangabudlay. Kon ipahisuno naton ang aton mga panimuot kag mga ginahimo sa pagtamod ni Jehova kag sa iya mga prinsipio, malipay gid kita sa aton trabaho. Apang indi gid naton pagtugutan nga maupangan sang aton trabaho ang aton panguna nga hilikuton—ang pagbantala sing maayong balita sang Ginharian sang Dios. Kon unahon naton ini sa aton kabuhi, mapakita naton nga ginahigugma naton si Jehova kag makapabilin kita sa iya gugma.

^ par. 6 Ang Griego nga tinaga nga ginbadbad “panday” ginasiling nga “sa kabilugan nagapatuhoy sa nagapamanday sing kahoy, balay man ini ukon kasangkapan ukon iban pa nga kagamitan nga human sa kahoy.”

^ par. 17 Para sa mas detalyado nga paathag tuhoy sa mga butang nga dapat binagbinagon kon nagapili sing trabaho, tan-awa ang Lalantawan, Abril 15, 1999, pahina 28-30, kag ang Enero 15, 1983, pahina 18.

Magtuon sing Dugang Pa

Paano Matigayon ang Matuod nga Kadalag-an?

Lima ka praktikal nga panugda agod mangin matuod nga madinalag-on.