Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Magpabilin Kamo sa Gugma sang Dios

 APENDISE

Magagmay nga mga Bahin sang Dugo kag mga Paagi sa Pag-opera

Magagmay nga mga Bahin sang Dugo kag mga Paagi sa Pag-opera

Magagmay nga mga bahin sang dugo. Ang magagmay nga mga bahin sang dugo naghalin sa apat ka panguna nga bahin sini—pula nga selula, puti nga selula, platelet, kag plasma. Halimbawa, ang pula nga selula may protina nga hemoglobin. Ang mga produkto nga halin sa hemoglobin sang tawo ukon sapat ginagamit sa pagbulong sa mga pasyente nga may anemia ukon naguaan sing madamo nga dugo.

Ang plasma—nga ang 90 porsiento sini tubig—may madamo nga hormone, inorganic salt, enzyme, kag nutrient, lakip na ang mga mineral kag sugar. Ang plasma may mga elemento man nga makapatugon sa pagdugo kag makabato sa balatian, kag may mga protina subong sang albumin. Kon ang isa nalatnan ukon mahimo malatnan sing balatian, mahimo sia resetahan sang doktor sing indyeksion nga gamma globulin nga ginkuha sa plasma sang mga tawo nga na-immune sa sini nga balatian. Ang mga interferon kag interleukin mahimo makuha sa puti nga selula, kag ginagamit ini sa pagbulong sa pila ka kanser kag impeksion bangod sa kagaw.

Batunon bala sang mga Cristiano ang mga pagpabulong nga nagagamit sing magagmay nga mga bahin sang dugo? Ang Biblia wala nagahatag sing espesipiko nga mga detalye parte sini, gani ang kada isa dapat magdesisyon sa atubangan sang Dios pasad sa iya konsiensia. Ang iban indi magbaton sang tanan nga magagmay nga mga bahin sang dugo, kay nagapangatarungan sila nga ang Kasuguan sang Dios sa Israel nagapatuman nga ang dugo nga ginkuha sa isa ka tinuga dapat ‘iula sa duta.’ (Deuteronomio 12: 22-24) Ang iban, bisan pa indi magpatughong sing puro nga dugo ukon sang panguna nga mga bahin sini, mahimo magbaton sing pagbulong nga nagagamit sing magagmay nga mga bahin sang dugo. Mahimo sila mangatarungan nga ang magagmay nga mga bahin sang dugo wala na nagarepresentar sa kabuhi sang tawo ukon sapat nga ginkuhaan sang dugo.

Kon nagadesisyon parte sa magagmay nga mga bahin sang dugo, binagbinaga ang masunod nga mga pamangkot: Nahibaluan ko bala nga kon indi ko pagbatunon ang tanan nga magagmay nga mga bahin sang dugo, indi ko man pagbatunon ang pila ka bulong nga makabato sa mga balatian ukon mahimo makabulig sa pagpatugon sa pagdugo? Mapaathag ko bala sa akon doktor kon ngaa batunon ko ukon indi ang isa ukon kapin pa ka magagmay nga mga bahin sang dugo?

Mga paagi sa pag-opera. Nagalakip ini sa hemodilution kag cell salvage. Sa hemodilution, ang dugo ginapagua sa lawas sang pasyente, kag ginaislan sang volume expander, kag sa ulihi ginabalik sa pasyente. Sa cell salvage naman, ang dugo nga naggua sa tion sang operasyon ginakuha kag ginabalik sa pasyente. Ang dugo nga natipon halin sa pilas, ginatinluan ukon ginasala, dayon ginabalik sa pasyente. Bangod lainlain ang ginahimo sang mga doktor sa paggamit sini nga mga pamaagi sa pag-opera, dapat pamangkuton sang isa ka Cristiano kon ano ang himuon sang iya doktor sa tion sang operasyon.

Kon nagadesisyon ka tuhoy sa sini nga mga pamaagi, pamangkuta ang imo kaugalingon: ‘Kon ang pila ko ka dugo pagguaon sa akon lawas kag mauntat sing makadali ang pagpanalaytay sini, magatugot bala ang akon konsiensia nga kabigon ini nga bahin  gihapon sang akon lawas, amo nga indi kinahanglan nga iula ini sa duta? (Deuteronomio 12:23, 24) Matublag bala ang akon nahanas-sa-Biblia nga konsiensia kon sa tion sang pagbulong, kuhaan ako sing dugo, simpunan ini sang mga bulong, kag ibalik sa akon lawas? Nahibaluan ko bala nga kon indi ko pagbatunon ang tanan nga paagi sa pagpabulong nga ginagamit ang akon dugo, nagakahulugan ini nga indi man ako magpa-blood test, magpa-dialysis, ukon maggamit sing heart-lung bypass machine?’

 Ang isa ka Cristiano dapat magdesisyon para sa iya kaugalingon kon ano ang himuon sa iya dugo sa tion sang operasyon. Amo man sini ang himuon sa medikal nga mga test kag sa bag-o nga paagi sang pagbulong nga nagalakip sa pagkuha sing diutay nga dugo, ayhan simpunan ini sang bulong kag dayon ibalik ini sa iya lawas.