Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Magpabilin Kamo sa Gugma sang Dios

 APENDISE

Pagpandong—San-o kag Ngaa?

Pagpandong—San-o kag Ngaa?

San-o kag ngaa dapat magpandong ang isa ka Cristianong babayi may kaangtanan sa iya pagsimba? Binagbinagon naton ang ginsiling ni Pablo tuhoy sini nga topiko. Nagahatag sia sing panuytoy nga kinahanglan naton agod makahimo kita sing nagakaigo nga desisyon nga nagapadungog sa Dios. (1 Corinto 11:3-16) Ginapakita ni Pablo ang tatlo ka butang nga dapat binagbinagon: (1) ang mga hilikuton nga kinahanglan magpandong ang isa ka babayi, (2) ang mga kahimtangan nga dapat niya himuon ini, kag (3) ang iya motibo sa pag-aplikar sini nga talaksan.

Ang mga hilikuton. Duha ang ginhinambitan ni Pablo: pangamuyo kag pagpanagna. (Bersikulo 4, 5) Ang pagpangamuyo isa ka matinahuron nga pagpakighambal kay Jehova. Ang pagpanagna naman sa karon nagapatuhoy sa bisan ano nga pagpanudlo sang isa ka Cristianong ministro pasad sa Biblia. Buot bala silingon ni Pablo nga dapat magpandong ang babayi sa tagsa ka tion nga mangamuyo ukon magtudlo sia sing kamatuoran sang Biblia? Indi. Depende ina sa kahimtangan.

Ang mga kahimtangan. Ginapakita sang ginsiling ni Pablo ang duha ka kahimtangan diin dapat ini himuon—sa pamilya kag sa kongregasyon. Sia nagsiling: “Ang lalaki amo ang ulo sang babayi; . . . ang tagsa ka babayi nga nagapangamuyo ukon nagapanagna nga wala sing pandong sa ulo nagapakahuya sang iya ulo.” (Bersikulo 3, 5) Sa kahimusan sang pamilya, gintangdo ni Jehova ang bana nga mangin ulo sang asawa. Dapat niya kilalahon ang  awtoridad sang iya bana, kay kon tungdan niya ang responsibilidad nga gintangdo ni Jehova sa iya bana, ginapakahuy-an niya ang iya bana. Halimbawa, kon kinahanglan nga ang asawa ang magadumala sing pagtuon sa Biblia kag yara ang iya bana, ginakilala niya ang awtoridad sang iya bana paagi sa pagpandong. Dapat niya ini himuon, bawtismado man ukon indi ang iya bana, bangod ang bana amo ang ulo sang pamilya. * Dapat man sia magpandong kon nagapangamuyo ukon nagatudlo nga yara ang iya menor-de-edad nga bawtismado nga bata nga lalaki, indi bangod sia ang ulo sang pamilya, kundi bangod sa awtoridad nga ginhatag sa bawtismado nga mga lalaki nga katapo sang Cristianong kongregasyon.

Kon tuhoy naman sa kongregasyon, si Pablo nagsiling: “Ang iban mahimo nga indi mag-ugyon sa sini, apang amo ini ang aton kinabatasan kag sang kongregasyon sang Dios.” (Bersikulo 16) Sa sulod sang Cristianong kongregasyon, ang pagkaulo ginatangdo sa bawtismado nga mga lalaki. (1 Timoteo 2:11-14; Hebreo 13:17) Mga lalaki lamang ang ginatangdo nga mga gulang kag ministeryal nga alagad kag sa ila ginhatag ang katungdanan sa pag-atipan sa panong sang Dios. (Binuhatan 20:28) Apang kon kaisa may mga kahimtangan nga ginapahimo sa Cristianong babayi ang hilikuton nga kinaandan nga ginahimo sang kalipikado kag bawtismado nga lalaki. Halimbawa, mahimo nga dumalahan niya ang miting para sa pag-alagad sa latagon bangod wala sing kalipikado kag bawtismado nga lalaki nga magahimo sini. Ukon magadumala sia sing naiskedyul nga pagtuon sa Biblia sa puluy-an bisan yara ang bawtismado nga lalaki. * Bangod ina nga mga hilikuton bahin sang hilikuton sang Cristianong kongregasyon, dapat sia magpandong agod kilalahon nga ginatungdan niya ang papel nga kinaandan nga ginatangdo sa isa ka lalaki.

Sa pihak nga bahin, madamo sing aspekto sang pagsimba nga indi kinahanglan nga magpandong ang utod nga babayi. Halimbawa,  indi sia kinahanglan magpandong kon nagakomento sa Cristianong mga miting, nagabantala upod sa iya bana ukon sa isa ka bawtismado nga lalaki, ukon nagatuon ukon nagapangamuyo upod sa iya indi bawtismado nga kabataan. Siempre pa, may iban pa nga kahimtangan nga mahimo mag-utwas, kag kon indi sigurado ang utod nga babayi sang iya himuon, mahimo nga magpanalawsaw pa gid sia. * Kon indi sia gihapon sigurado kag kon ginapahulag sia sang iya konsiensia nga magpandong, wala man sing malain kon magpandong sia, subong sang makita sa piktyur.

Ang motibo. Sa bersikulo 10, makita naton ang duha ka rason kon ngaa dapat tumanon ini sang isa ka Cristianong babayi: “Ang babayi dapat may tanda sang pagpasakop sa iya ulo bangod sa mga anghel.” Una, talupangda ang ekspresyon nga “tanda sang pagpasakop.” Ang pagpandong sang babayi isa ka paagi nga mapakita niya ang pagpasakop sa awtoridad nga ginhatag ni Jehova sa bawtismado nga mga lalaki sa kongregasyon. Gani paagi sini, mapakita niya ang iya gugma kag pagkamainunungon kay Jehova nga Dios. Ang ikaduha nga rason makita sa mga tinaga nga “bangod sa mga anghel.” Ano ang epekto sa gamhanan nga espiritu nga mga tinuga kon magpandong ang mga babayi?

Interesado gid ang mga anghel nga makita nga ginatahod ang awtoridad sang Dios sa bug-os nga organisasyon ni Jehova, sa langit kag sa duta. Makabenepisyo man sila sa mga halimbawa sang indi himpit nga mga tawo sa sini nga bahin. Kay man, dapat man sila magpasakop sa kahimusan ni Jehova—isa ka butang nga wala mahimo sang madamo nga anghel sang una. (Judas 6) Sa karon, mahimo makita sang mga anghel ang isa ka Cristianong babayi nga bisan pa mas eksperiensiado, mas madamo sing nahibaluan, kag mas maalam sangsa bawtismado nga lalaki sa kongregasyon,  nagapasakop gihapon sia sa awtoridad sang bawtismado nga lalaki. Sa pila ka kahimtangan, ang babayi isa ka hinaplas nga Cristiano nga mangin isa sa mga masigkamanunubli sang Cristo sa ulihi. Ina nga babayi magaalagad sa ulihi sa katungdanan nga mas mataas sangsa mga anghel kag magagahom sia upod sa Cristo sa langit. Maayo gid ini nga halimbawa para sa mga anghel! Isa gid ka pribilehiyo para sa tanan nga utod nga babayi nga ipakita sa minilyon ka matutom nga anghel ang ila pagkamapainubuson kag pagkamatinumanon paagi sa pagpasakop kag pagsakdag sa kahimusan ni Jehova!

^ par. 3 Sa masami ang Cristianong asawa wala nagapangamuyo sing matunog kon yara ang iya tumuluo nga bana magluwas sa pila ka indi kinaandan nga kahimtangan, pareho abi kon indi makahambal ang iya bana bangod sang balatian.

^ par. 1 Ang utod nga babayi indi kinahanglan magpandong kon nagadumala sia sing naiskedyul nga pagtuon sa Biblia bisan yara ang di-bawtismado nga manugbantala nga lalaki nga indi niya bana.

^ par. 2 Para sa dugang nga impormasyon, tan-awa ang Lalantawan, Hulyo 15, 2002, pahina 26-27, kag Agosto 15, 1977, pahina 508-512.