Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Magpabilin Kamo sa Gugma sang Dios

 KAPITULO 14

Mangin Bunayag sa Tanan nga Butang

Mangin Bunayag sa Tanan nga Butang

“Luyag namon magkabuhi sing bunayag sa tanan nga butang.”—HEBREO 13:18.

1, 2. Ngaa nalipay si Jehova kon makita niya ang aton pagpanikasog nga mangin bunayag? Iilustrar.

ANG isa ka iloy upod sa iya gamay nga bata nga lalaki bag-o lang naggua sa balaligyaan. Gulpi lang nagdulog ang bata nga ginakulbaan. Nadala niya ang gamay nga hampanganan nga ginatan-aw niya kaina sa balaligyaan. Nalipatan niya nga ibalik ini ukon pangayuon sa iya iloy nga baklon ini. Naghibi sia, gani nagpabulig sia sa iya iloy. Gin-uloulohan sia sang iya iloy kag nagbalik sila sa balaligyaan agod mauli niya ang hampanganan kag makapangayo sia sing pasaylo. Nalipay gid ang iloy sa ginhimo sang iya bata. Ngaa?

2 Nalipay pirme ang mga ginikanan kon makita nila nga ginapabaloran sang ila mga anak ang pagkabunayag. Kag nalipay man ang aton langitnon nga Amay, “ang Dios sang kamatuoran.” (Salmo 31:5) Samtang amat-amat kita nga nagahamtong sa espirituwal, nalipay sia nga makita ang aton pagpanikasog nga mangin bunayag. Luyag naton nga pahamut-an sia kag magpabilin sa iya gugma, gani masiling man naton ang ginpabutyag ni apostol Pablo: “Luyag namon magkabuhi sing bunayag sa tanan nga butang.” (Hebreo 13:18) Talupangdon naton ang apat ka panguna nga bahin sang aton kabuhi diin mabudlay kon kaisa nga mangin bunayag. Dayon binagbinagon naton ang pila ka pagpakamaayo kon bunayag kita.

PAGKABUNAYAG SA ATON KAUGALINGON

3-5. (a) Paano kita ginapaandaman sang Pulong sang Dios tuhoy sa mga katalagman sang pagdaya sa kaugalingon? (b) Ano ang makabulig sa aton nga mangin bunayag sa aton kaugalingon?

3 Una, dapat kita mangin bunayag sa aton kaugalingon.  Indi ini mahapos. Bangod indi kita himpit, madali naton madayaan ang aton kaugalingon. Halimbawa, ginsilingan ni Jesus ang mga Cristiano sa Laodicea nga gindayaan nila ang ila kaugalingon sa paghunahuna nga manggaranon sila, apang ang matuod, “imol, bulag, kag hubo” sila sa espirituwal—makaluluoy gid nga kahimtangan. (Bugna 3:17) Labi pa sila nga nabutang sa katalagman bangod sang pagdaya nila sa ila kaugalingon.

4 Dumduma man nga si disipulo Santiago nagpaandam: “Kon ang bisan sin-o nagahunahuna nga sia sumilimba sang Dios, apang wala nagarenda sang iya dila, ginadaya niya ang iya tagipusuon, kag ang iya pagsimba wala sing pulos.” (Santiago 1:26) Kon ginahunahuna naton nga nahamuot gihapon si Jehova sa aton pagsimba bisan pa ginagamit naton sing indi nagakaigo ang aton dila, ginadayaan lang naton ang aton kaugalingon. Mangin wala gid sing pulos ang aton pagsimba kay Jehova. Ano ang aton himuon agod malikawan naton ining makahalalit nga panimuot?

5 Sa konteksto sini nga bersikulo, ginpaanggid ni Santiago sa espiho ang kamatuoran sang pulong sang Dios. Ginalaygayan niya kita nga tulukon sing maayo ang himpit nga kasuguan sang Dios kag ipahisuno ang aton kabuhi sa sini. (Basaha ang Santiago 1:23-25.) Mabuligan kita sang Biblia nga mangin bunayag sa aton kaugalingon, kag mahantop kon ano ang dapat naton himuon agod mag-uswag. (Panalambiton 3:40; Hageo 1:5) Makapangamuyo man kita kay Jehova kag pangabayon sia nga usisaon kita, sa amo mabuligan kita nga makita kag matadlong ang aton mga kakulangan. (Salmo 139:23, 24) Ang pagkadibunayag isa ka malimbungon nga kaluyahon kag dapat naton ini tamdon suno sa pagtamod sang aton langitnon nga Amay. Ang Hulubaton 3:32 nagasiling: “Ginakangil-aran ni Jehova ang mga malimbungon, apang nagapakig-abyan Sia sing suod sa mga matarong.” Mabuligan kita ni Jehova nga mabatyagan ang iya nabatyagan kag tamdon ang aton kaugalingon subong sang pagtamod niya sa aton. Dumduma ang ginsiling ni Pablo: “Luyag namon magkabuhi sing bunayag.” Indi kita himpit karon, apang luyag gid naton nga mangin bunayag kag ginatinguhaan naton ini.

 PAGKABUNAYAG SA PAMILYA

Ang pagkabunayag nagabulig sa aton nga likawan ang mga buhat nga mahimo masulay kita nga taguon

6. Ngaa ang mag-asawa dapat mangin bunayag sa isa kag isa, kag ano nga mga katalagman ang ila malikawan kon himuon nila ini?

6 Ang Cristianong pamilya dapat kilala nga bunayag. Gani ang mag-asawa dapat mangin tampad kag bunayag sa isa kag isa. Dapat wala sing makasakit kag mahigko nga mga buhat sa sulod sang Cristianong pag-asawahay, subong sang pagpakita sing romantiko nga interes sa iban, likom nga pagpakigrelasyon paagi sa Internet, ukon pagtan-aw, pagpamati, kag pagbasa sing bisan ano nga porma sang pornograpiya. Likom sa ihibalo sang ila inosente nga tiayon, may pila ka minyo nga Cristiano nga nagahimo sini. Indi gid ini bunayag nga mga buhat. Talupangda ang ginsiling sang matutom nga si Hari David: “Wala ako nagapakig-upod sa madaya nga mga tawo, kag ginalikawan ko ang mga nagapakunokuno.” (Salmo 26:4) Kon minyo ka, indi gid maghimo sing butang nga magasulay sa imo nga ilikom sa imo tiayon ang imo ginahimo!

7, 8. Ano nga mga halimbawa sa Biblia ang makabulig agod matun-an sang mga anak ang balor sang pagkabunayag?

7 Kon ginatudluan sang mga ginikanan ang ila mga anak sang balor sang pagkabunayag, maalamon nga gamiton nila ang mga halimbawa sa Biblia. Mahimo nila gamiton ang rekord tuhoy sa mga indi bunayag subong ni Acan, nga nangawat kag nagtinguha nga ilikom ini; ni Gehazi, nga nagbinutig agod makaganar sing materyal nga butang; kag ni Judas, nga nangawat kag nagbinutig  paagi sa pagpakunokuno agod halitan si Jesus.—Josue 6:17-19; 7:11-25; 2 Hari 5:14-16, 20-27; Mateo 26:14, 15; Juan 12:6.

8 Magamit man nila ang mga halimbawa sang mga bunayag subong ni Jacob, nga nagsugo sa iya mga anak nga iuli ang kuarta nga ila nakita sa ila mga sako, kay nagapati sia nga nabutang lang ini sing indi hungod; ni Jefte kag sang iya anak nga babayi, nga nagsakripisyo sing daku agod matuman ang saad sang iya amay; kag ni Jesus, nga maisog nga nagpakilala sa masingki nga guban agod matuman ang tagna kag maamligan ang iya mga abyan. (Genesis 43:12; Hukom 11:30-40; Juan 18:3-11) Ining pila ka halimbawa nagahatag sa mga ginikanan sing ideya kon daw ano ka importante ang mga impormasyon sa Pulong sang Dios nga makabulig sa ila sa pagtudlo sa ila mga anak nga higugmaon kag pabaloran ang pagkabunayag.

9. Ano ang likawan sang mga ginikanan kon luyag nila mangin halimbawa sang pagkabunayag sa ila mga anak, kag ngaa importante ang ila halimbawa?

9 Responsibilidad sang mga ginikanan nga tudluan ang ila mga anak. Si apostol Pablo namangkot: “Ikaw nga nagatudlo sa iban, wala ka bala nagatudlo sa imo kaugalingon? Ikaw nga nagabantala nga ‘Indi magpangawat,’ nagapangawat ka bala?” (Roma 2:21) Nagalibog ang ulo sang iban nga bata kay ginatudluan sila sang ila mga ginikanan nga mangin bunayag, pero ang mga ginikanan mismo indi bunayag. Ginapakamatarong nila ang pagpangupit paagi sa pagsiling, “Wala ina kaso kon may magkuha kay nagasulubra man lang ina diri,” ukon ang pagbinutig paagi sa pagrason nga “Wala man gid sing malain sa sina kay gamay man lang ina nga binutig.” Pero ang matuod, ang pagpangawat, pagpangawat gid bisan pila man ang bili sang ginkawat, kag ang pagbinutig, pagbinutig gihapon bisan ano pa ang topiko ukon nadalahig sa sini. * (Basaha ang Lucas 16:10.) Madali matalupangdan sang  mga bata kon wala ginahimo sang mga ginikanan ang ginatudlo nila, kag may malain ini nga epekto sa mga bata. (Efeso 6:4) Apang kon matun-an nila ang pagkabunayag paagi sa halimbawa sang ila mga ginikanan, mahimo gid nga magadaku sila nga nagahimaya kay Jehova sa sining indi bunayag nga kalibutan.—Hulubaton 22:6.

PAGKABUNAYAG SA KONGREGASYON

10. Kon nagapakigsugilanon sa mga masigkatumuluo, ano ang dapat naton dumdumon?

10 Samtang nagapakig-upod kita sa mga masigka-Cristiano, madamo kita sing kahigayunan nga mapalambo ang pagkabunayag. Subong sang natun-an naton sa Kapitulo 12, dapat kita maghalong sa paggamit sang aton ikasarang sa paghambal, ilabi na upod sa aton mga masigkatumuluo. Ang kinaandan nga paghambalanay mahapos lang mangin makahalalit nga kutsokutso, ukon pasipala pa gani! Kon isugid naton ang istorya nga indi masaligan, mahimo nga nagapalapta kita sing butig, gani mas maayo kon punggan naton ang aton mga bibig. (Hulubaton 10:19) Sa pihak nga bahin, ayhan matuod ang aton nahibaluan, apang indi ini rason agod ipanugidsugid ini. Mahimo nga wala man kita sing labot sa sini, ukon basi may masakitan kon isugid naton ini. (1 Tesalonica 4:11) Ginapakamatarong sang iban ang ila sobra nga pagkaprangka sa pagsiling nga bunayag lang sila, apang ang aton ginahambal dapat nga mainayuhon kag maayo sa tanan nga tion.—Basaha ang Colosas 4:6.

11, 12. (a) Paano ginapalala sang iban nga nakahimo sing mabug-at nga sala ang ila problema? (b) Ano ang pila sa mga kabutigan ni Satanas tuhoy sa mabug-at nga mga sala, kag paano naton ini mabatuan? (c) Paano naton mapakita nga bunayag kita sa organisasyon ni Jehova?

 11 Importante gid nga bunayag kita sa mga nagapanguna sa kongregasyon. Ginatago sang iban ang ila mabug-at nga sala kag nagabinutig kon ginapamangkot sila sang mga gulang sang kongregasyon, gani nagalala pa gid ang ila problema. Ang iban may doble nga pagkabuhi pa gani, nagapakunokuno sila nga nagaalagad kay Jehova samtang nagahimo sila sing mabug-at nga sala. Subong resulta, ang ila bug-os nga kabuhi nangin kabutigan. (Salmo 12:2) Ang iban naman nagapanugid sa mga gulang, apang wala nila ginsugid ang bug-os nga natabo. (Binuhatan 5:1-11) Ini nga pagkadibunayag masami nga resulta sang pagpati sa mga kabutigan ni Satanas.—Tan-awa ang kahon nga “ Mga Kabutigan ni Satanas Tuhoy sa Mabug-at nga mga Sala.”

12 Importante man nga mangin bunayag kita sa organisasyon ni Jehova. Halimbawa, kon nagareport kita sang aton hinimuan sa ministeryo, kinahanglan nga matuod ang tanan naton nga ginareport. Kon nagasulat kita sa aplikasyon para sa pila ka pribilehiyo sa pag-alagad, dapat naton isugid ang matuod nga kahimtangan sang aton panglawas ukon ang iban pa nga impormasyon tuhoy sa aton kabuhi kag pag-alagad.—Basaha ang Hulubaton 6:16-19.

13. Paano naton mahuptan ang pagkabunayag kon kaupod naton sa negosyo ang aton masigkatumuluo?

13 Nalakip man sa pagkabunayag sa aton mga masigkatumuluo ang mga butang may kaangtanan sa negosyo. Kon kaisa, ang Cristianong mga kauturan mahimo nga magkaupod sa negosyo. Apang, ini nga mga butang indi nila dapat pag-idalahig sa ila pagsimba kag indi nila dapat pag-istoryahan sa Kingdom Hall ukon sa ministeryo. Mahimo nga may mga kauturan nga sa utod man nagatrabaho. Kon kita ang amo, dapat bunayag kita sa aton mga empleyado paagi sa pagbayad sa ila sa husto nga tion sang sueldo nga ginkasugtan, kag paghatag sa ila sing mga benepisyo suno sa kasugtanan ukon suno sa ginapatuman sang kasuguan. (1 Timoteo 5:18; Santiago 5:1-4) Kon kita  naman ang empleyado, dapat obrahan naton sing maukod ang suno sa ginsueldo sa aton. (2 Tesalonica 3:10) Wala kita nagapaabot nga paboran kita sa trabaho bangod utod naton sa pagtuo ang aton amo, nga daw subong bala obligado sia nga tugutan kita nga magpauli sing mas temprano, hatagan sing mga benepisyo, ukon iban pa nga pabor nga wala ginahatag sa iban nga empleyado.—Efeso 6:5-8.

14. Kon ang mga Cristiano magkasosyo sa negosyo, ano ang maalamon nila nga himuon, kag ngaa?

14 Ano abi kon magkasosyo kita sang isa ka utod sa negosyo nga nagakinahanglan sing daku nga kapital ukon pag-utang? Ang Biblia nagahatag sing importante kag praktikal nga prinsipio: Maghimo sing nasulat nga kasugtanan! Halimbawa, sang nagbakal sing duta si Jeremias, naghimo sia sing duha ka kopya nga kasulatan. Ginhimo niya ini sa atubangan sang mga saksi, kag gintago agod magamit sa ulihi. (Jeremias 32:9-12; tan-awa man ang Genesis 23:16-20.) Kon nagapakigsosyo sa negosyo upod sa mga masigkatumuluo, ang paghimo sing dokumento nga detalyado, nahanda sing maayo, kag napirmahan sa atubangan sang mga saksi, wala nagapahangop nga wala kamo sing salig sa isa kag isa. Sa baylo, makabulig ini agod malikawan ang indi paghangpanay, paglainay sing buot, kag pagbaisay nga ginatunaan sang indi pagsapakanay. Dapat dumdumon sang mga Cristiano nga magkasosyo nga indi dapat maguba ang paghiusa kag paghidait sang kongregasyon bangod lang sa negosyo. *1 Corinto 6:1-8.

PAGKABUNAYAG SA SINI NGA KALIBUTAN

15. Ano ang ginabatyag ni Jehova tuhoy sa pagpangdaya sa negosyo, kag ano ang pagtamod sang mga Cristiano sa sini?

15 Indi lamang sa kongregasyon dapat mangin bunayag ang isa ka Cristiano. Si Pablo nagsiling: “Luyag namon magkabuhi sing bunayag sa tanan nga butang.” (Hebreo 13:18) May kaangtanan sa negosyo, luyag gid sang aton Manunuga nga mangin bunayag kita. Sa libro sang Hulubaton lamang,  pila ka beses nga ginsambit ang indi bunayag nga timbangan. (Hulubaton 11:1; 20:10, 23) Sang una, kinaandan nga ginagamit sa negosyo ang mga timbangan kag mga pamug-at agod kiluhan sang ginabakal nga mga baligya kag sang kuarta nga ginabayad sa pagbakal. Ang indi bunayag nga mga negosyante nagagamit sing duha ka sahi sang pamug-at kag madaya nga timbangan agod limbungan kag dayaan ang ila mga kostumer. * Ginakangil-aran ni Jehova ini nga mga buhat! Agod makapabilin sa iya gugma, ginalikawan gid naton ang tanan nga pagkadibunayag sa negosyo.

16, 17. Ano nga pagkadibunayag ang lapnag sa kalibutan karon, kag ano ang desidido nga himuon sang matuod nga mga Cristiano?

16 Si Satanas ang manuggahom sini nga kalibutan, gani wala kita nagakatingala nga lapnag gid ang pagkadibunayag. Kada adlaw, mahimo nga ginasulay kita nga mangin indi bunayag. Kon nagasulat ang iban sang ila résumé agod mag-aplay sing obra, kinaandan na lang nga binutig kag sobra ang ila ginasugid, palsipikado ang ila mga dokumento, kag ginahimohimo lang nila ang ila eksperiensia sa trabaho. Kon nagasulat sila sa mga pormas para sa imigrasyon, pagbayad sing buhis, insurance, kag iban pa, masami nga indi matuod ang ila ginasulat agod makuha nila ang ila luyag. Madamo man nga estudyante ang nagakodigo ukon nagapangopya kon may test, ukon kon maghimo sila sing mga salaysay kag report, ginakopya nila ini sa Internet kag ginapagua nga ila ini hinimuan. Kag kon nagapakig-angot sila sa kurakot nga mga opisyales, masami nga nagahatag sila sing hamham agod makuha ang ila gusto. Ini nga mga buhat indi gid katingalahan sa sini nga kalibutan diin madamo ang “mahigugmaon sa kaugalingon, mahigugmaon sa kuarta, . . . wala sing gugma sa kon ano ang maayo.”—2 Timoteo 3:1-5.

17 Ang matuod nga mga Cristiano desidido gid nga indi maghimo sini nga mga buhat. Kon kaisa, mabudlay nga mangin bunayag sa sini nga kalibutan kay daw nagamadinalag-on pa  gani kag nagaayuhan ang indi bunayag nga mga tawo. (Salmo 73:1-8) Samtang ang mga Cristiano naman mahimo nga nagapamigado bangod luyag nila mangin bunayag “sa tanan nga butang.” Takus bala ini nga pagsakripisyo? Huo! Apang ngaa? Ano ang mga pagpakamaayo kon bunayag kita?

ANG MGA PAGPAKAMAAYO SANG PAGKABUNAYAG

18. Ngaa importante gid ang reputasyon nga bunayag?

18 Pila lang ka butang sa imo kabuhi ang mas importante sangsa reputasyon nga bunayag kag masaligan nga tawo. (Tan-awa ang kahon nga “ Bunayag Bala Ako sa Tanan nga Tion?”) Kag hunahunaa ini—bisan sin-o sarang makatigayon sini nga reputasyon! Wala ini nagadepende sa imo talento, manggad, hitsura, estado sang pamilya, ukon iban pa nga butang nga indi mo kontrolado. Walay sapayan sini, madamo ang wala makatigayon sing maayo nga reputasyon. Talagsahon lang ini. (Miqueas 7:2) Mahimo nga yagutaon ka sang pila bangod bunayag ka, apang apresyahon, saligan, kag tahuron ka sang iban. Madamo nga Saksi ni Jehova ang nabuligan pa gani sa pinansial bangod bunayag sila. Nakapabilin sila sa ila obra kon ginapahalin ang indi bunayag nga mga empleyado, ukon nakakita sila sing obra kon kinahanglanon gid ang bunayag nga mga empleyado.

19. Ano ang epekto sang pagkabunayag sa aton konsiensia kag sa aton kaangtanan kay Jehova?

19 Naeksperiensiahan mo man ini ukon wala, masapwan mo nga ang pagkabunayag may kapin pa nga mga pagpakamaayo. Matigayon mo ang matinlo nga konsiensia. Si Pablo nagsulat: “Nagasalig kami nga may bunayag kami nga konsiensia.” (Hebreo 13:18) Dugang pa, ang imo reputasyon nakita gid sang aton langitnon kag mahigugmaon nga Amay, kag ginahigugma niya ang bunayag nga mga tawo. (Basaha ang Salmo 15:1, 2; Hulubaton 22:1.) Huo, ang pagkabunayag makabulig sa imo nga makapabilin sa gugma sang Dios, kag amo ini ang labing daku nga padya nga matigayon naton. Binagbinagon naton sa masunod ang topiko may kaangtanan sa sini: Ang pagtamod ni Jehova sa trabaho.

^ par. 9 Sa kongregasyon, ang pagbinutig sa katuyuan nga halitan ang iban, mahimo nagakinahanglan sing hudisyal nga aksion sang mga gulang.

^ par. 14 Tuhoy sa himuon kon may problema ukon mapierde ang negosyo, tan-awa ang Apendise nga “Paghusay sang Indi Paghangpanay sa Negosyo.”

^ par. 15 Agod makaganar sila, lain nga pamug-at ang ginagamit nila sa pagpamakal kag lain naman sa pagbaligya. Indi man balanse ang timbangan nga ila ginagamit agod madayaan nila ang mga kostumer.

Magtuon sing Dugang Pa

MAGMATA!

Ano ang Himuon Mo Kon Magbinutig ang Imo Bata?

Ano ang himuon mo kon magbinutig ang imo bata? Ini nga artikulo may mga laygay nga nabase sa Biblia kon paano tudluan ang imo bata nga importante ang paghambal sing matuod.