Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Magpabilin Kamo sa Gugma sang Dios

 KAPITULO 3

Higugmaa ang Ginahigugma sang Dios

Higugmaa ang Ginahigugma sang Dios

Ang tawo nga nagaupod sa maalamon mangin maalamon man.”—HULUBATON 13:20.

1-3. (a) Ano ang ginasiling sang Biblia tuhoy sa aton mga kaupdanan? (b) Paano kita makapili sing mga abyan nga may maayo nga impluwensia sa aton?

ANG mga tawo daw mga espongha nga nagasuyop sang bisan ano sa ila palibot. Gani madali naton mailog ang mga panimuot, talaksan, kag batasan sang mga tawo nga suod sa aton kag kon kaisa indi gani naton ini matalupangdan.

2 Matuod gid ang ginasiling sang Biblia: “Ang tawo nga nagaupod sa maalamon mangin maalamon man, apang ang tawo nga nagaupod sa mga buangbuang mapahamak.” (Hulubaton 13:20) Ang ginapatuhuyan sini nga hulubaton indi pagkilalahay lamang. Ang tinaga nga “nagaupod” nagapahangop sing pirme nga pag-updanay. Ang isa ka reperensia sa Biblia nagsiling nga ini nga pagpakig-upod nagapahangop sing ‘gugma kag pagkasuod.’ Indi bala sa masami ginailog naton ang mga tawo nga ginahigugma naton? Gani bangod suod kita sa aton ginahigugma, maimpluwensiahan nila kita sa kaayuhan man ukon sa kalainan.

3 Agod makapabilin kita sa gugma sang Dios, dapat pilion naton ang mga abyan nga may maayo nga impluwensia sa aton. Paano? Higugmaon naton ang mga ginahigugma sang Dios, kag makig-abyan kita sa iya mga abyan. Hunahunaa ini. May mas maayo pa bala nga abyan sangsa abyan nga ginpili mismo ni Jehova? Binagbinagon naton  karon kon ano nga sahi sang mga tawo ang ginahigugma sang Dios. Kon hunahunaon naton ang pagtamod ni Jehova, makapili gid kita sing maayo nga mga abyan.

ANG MGA GINAHIGUGMA SANG DIOS

4. Ngaa may kinamatarong si Jehova nga pilion ang iya mga abyan, kag ngaa gintawag niya si Abraham nga “akon abyan”?

4 Ginapili gid ni Jehova sing maayo ang iya mga abyan. Indi bala may kinamatarong gid sia nga himuon ini? Kay man, sia ang Soberanong Ginuo sang uniberso kag ang pagpakig-abyan sa iya daku gid nga pribilehiyo! Kon amo, sin-o ang iya ginapili nga mga abyan? Nagapakigsuod si Jehova sa mga nagasalig kag nagatuo sa iya sing bug-os. Binagbinaga ang halimbawa sang patriarka nga si Abraham, nga kilala sa iya talalupangdon nga pagtuo. Wala na sing labaw pa nga pagtilaw sing pagtuo para sa isa ka amay nga pangabayon nga ihalad ang iya anak. * Apang sa bahin ni Abraham, “daw subong nga ginhalad na niya si Isaac” kay nagtuo gid sia “nga ang Dios makasarang sa pagbanhaw sa iya bisan gikan sa mga patay.” (Hebreo 11:17-19) Bangod sa pagtuo kag pagkamatinumanon ni Abraham, gintawag sia ni Jehova nga “akon abyan.”—Isaias 41:8; Santiago 2:21-23.

5. Ano ang pagtamod ni Jehova sa mga mainunungon nga nagatuman sa iya?

5 Nahamuot gid si Jehova sa mga mainunungon nga nagatuman sa iya. Ginahigugma niya ang mga mainunungon sa iya labaw sa tanan. (Basaha ang 2 Samuel 22:26.) Subong sang nakita na naton sa Kapitulo 1 sini nga libro, nahamuot gid si Jehova sa mga nagatuman sa iya bangod sa gugma. Ang Hulubaton 3:32 nagsiling: “Nagapakig-abyan  Sia sing suod sa mga matarong.” Ang mga mainunungon nga nagatuman kay Jehova ginaagda niya: Mahimo sila makaduaw sa iya “tolda” agod masimba nila sia kag makapangamuyo sa iya sa bisan ano nga tion.—Salmo 15:1-5.

6. Paano naton mapakita nga ginahigugma naton si Jesus, kag ano ang ginabatyag ni Jehova sa mga nagahigugma sa iya Anak?

6 Ginahigugma ni Jehova ang mga nagahigugma kay Jesus nga iya bugtong nga Anak. Si Jesus nagsiling: “Kon ang bisan sin-o nagahigugma sa akon, tumanon niya ang akon pulong, kag higugmaon sia sang akon Amay, kag magakadto kami sa iya kag magapuyo upod sa iya.” (Juan 14:23) Paano naton mapakita nga ginahigugma naton si Jesus? Paagi sa pagtuman sang iya mga sugo, lakip na ang pagbantala sing maayong balita kag pagtudlo sa mga tawo agod mangin mga disipulo niya. (Mateo 28:19, 20; Juan 14:15, 21) Mapakita man naton ang aton gugma kay Jesus kon ‘sundon naton sing maayo ang iya mga tikang’ kag panikasugan gid nga ilugon sia sa aton mga panghambal kag paggawi bisan pa di-himpit kita. (1 Pedro 2:21) Nahamuot gid si Jehova sa mga tawo nga bangod sang ila gugma sa iya Anak nagasunod sila sa iya mga tikang.

7. Ngaa maalamon nga makig-abyan kita sa mga abyan ni Jehova?

7 Luyag ni Jehova nga ang iya mga abyan may pagtuo, mainunungon, matinumanon, kag mahigugmaon kay Jesus kag sa iya mga talaksan. Dapat pamangkuton naton ang aton kaugalingon: ‘Amo man bala sini ang akon suod nga mga abyan? Nagapakig-abyan bala ako sa mga abyan ni Jehova?’ Maalamon gid kon himuon naton ini. May positibo nga impluwensia sa aton ang mga tawo nga may diosnon nga mga kinaiya kag makugi nga nagabantala sing maayong balita sang Ginharian kay mabuligan nila kita nga matuman ang aton determinasyon nga pahamut-an ang Dios.—Tan-awa ang kahon nga “ Ano ang Maayo nga Abyan?

 MAGTUON GIKAN SA HALIMBAWA SA BIBLIA

8. Ngaa dalayawon gid ang kaangtanan (a) ni Noemi kag ni Rut? (b) sang tatlo ka Hebreo nga pamatan-on? (c) ni Pablo kag ni Timoteo?

8 Ang Kasulatan nagaunod sing madamo nga halimbawa sang mga tawo nga nakabenepisyo bangod ginpili nila ang maayo nga mga abyan. Mabasa mo ang tuhoy sa kaangtanan ni Noemi kag sang iya umagad nga si Rut, ang tatlo ka Hebreo nga pamatan-on nga nangin suod nga mag-abyan sa Babilonia, kag ang kaangtanan ni Pablo kag ni Timoteo. (Rut 1:16; Daniel 3:17, 18; 1 Corinto 4:17; Filipos 2:20-22) Apang, binagbinagon naton ang isa pa ka talalupangdon nga halimbawa: ang pag-abyanay ni David kag ni Jonatan.

9, 10. Ngaa nangin suod nga mag-abyan si David kag si Jonatan?

9 Ang Biblia nagsiling nga sa tapos ginpatay ni David si Goliat, “nangin suod nga mag-abyanay si Jonatan kag si David, kag ginhigugma ni Jonatan si David subong sang iya kaugalingon.” (1 Samuel 18:1) Bisan pa daku ang kinamagulangan ni Jonatan kay David, nangin mag-abyan sila tubtob napatay si Jonatan sa patag-awayan. * (2 Samuel 1:26) Ngaa nangin suod sila nga mag-abyan?

10 Nangin suod gid nga mag-abyan si David kag si Jonatan bangod pareho nila nga ginahigugma ang Dios kag handum gid nila nga magpabilin nga matutom sa iya. Nagsuod pa gid sila bangod pareho sila nga luyag magpahamuot sa Dios. Ang kada isa may mga kinaiya nga nanamian sang isa kag isa. Mahimo nga nagdayaw gid si Jonatan sa kaisog kag kakugi sining pamatan-on nga walay kahadlok nga nagpangapin sang ngalan ni Jehova. Kag wala duhaduha nga gintahod ni David ang may edad na niya nga abyan nga mainunungon nga nagsakdag sa mga kahimusan ni Jehova kag gin-una ang kaayuhan ni David sangsa iya.  Halimbawa, binagbinaga ang natabo sang yara si David sa kahanayakan nga napung-awan gid bangod nagpalagyo sia sa akig kag malain nga si Hari Saul, nga amay ni Jonatan. Talalupangdon gid ang pagkamainunungon ni Jonatan sang ‘ginkadtuan niya si David kag ginbuligan niya sia nga magbakod ang iya pagsalig kay Jehova.’ (1 Samuel 23:16) Handurawa lamang ang ginbatyag ni David sang nagkadto  sa iya ang iya pinalangga nga abyan agod buligan sia kag palig-unon! *

11. Ano ang matun-an naton tuhoy sa pag-abyanay sa halimbawa ni Jonatan kag ni David?

11 Ano ang matun-an naton sa halimbawa ni Jonatan kag ni David? Importante gid kon ang mag-abyan pareho nga may apresasyon sa espirituwal nga mga butang. Kon makigsuod kita sa mga tawo nga ang pagtuluuhan, talaksan sa moral, kag handum nga magpabilin nga matutom sa Dios pareho sa aton, mahimo kita magpaambitay sing mga panghunahuna,  balatyagon, kag mga eksperiensia nga makapalig-on sa aton. (Basaha ang Roma 1:11, 12.) Makita naton ini nga mga abyan sa tunga sang aton mga masigkatumuluo. Apang, buot bala silingon nga ang tanan nga nagatambong sa mga miting sa Kingdom Hall maayo nga mga abyan? Indi.

PAGPILI SANG ATON SUOD NGA MGA ABYAN

12, 13. (a) Bisan sa tunga sang mga Cristiano, ngaa dapat naton pilion ang aton mga kaupdanan? (b) Ano ang problema sang mga kongregasyon sang unang siglo, kag ano ang mga paandam ni Pablo?

12 Bisan sa sulod sang kongregasyon dapat pilion gid naton ang mga abyan nga makapalig-on sa aton sa espirituwal. Ngaa? Subong nga indi dulungan maggulang ang mga bunga sang isa ka kahoy, indi man dulungan ang espirituwal nga pag-uswag sang mga Cristiano sa kongregasyon. Gani, kada kongregasyon indi palareho ang espirituwal nga pag-uswag sang mga Cristiano. (Hebreo 5:12–6:3) Siempre, dapat mangin mapinasensiahon kag mahigugmaon kita sa mga bag-uhan ukon mga maluya, kay luyag naton sila buligan nga mag-uswag.—Roma 14:1; 15:1.

13 Kon kaisa, may mga kahimtangan sa kongregasyon nga dapat kita maghalong kon sin-o ang aton kaupdanan. Mahimo nga ang pila sa ila nagagawi sing indi nagakaigo. Ang iban mahimo nga may hinakit sa kongregasyon ukon reklamador. Natabo man ini sa mga kongregasyon sang unang siglo C.E. Bisan pa ang kalabanan nga katapo sini matutom, may mga nagagawi sing indi nagakaigo. Bangod wala ginasunod sang iban sa kongregasyon sa Corinto ang pila ka panudlo, ginpaandaman ni apostol Pablo ang kongregasyon: “Indi kamo magpadaya. Ang pagpakig-upod sa malain nga mga tawo nagapalain sang mapuslanon nga mga batasan.” (1 Corinto 15:12, 33) Ginpaandaman ni Pablo si Timoteo nga bisan sa tunga sang mga Cristiano, mahimo may mga kauturan nga wala nagagawi sing dungganon. Ginsilingan niya si Timoteo nga indi makigsuod sa ila.—Basaha ang 2 Timoteo 2:20-22.

14. Paano naton maaplikar ang prinsipio sa mga paandam ni Pablo tuhoy sa mga kaupdanan?

 14 Paano naton maaplikar ang prinsipio sa mga paandam ni Pablo? Mahimo naton ini kon likawan naton nga makigsuod kay bisan sin-o nga may malain nga impluwensia sa aton—utod man sia ukon indi. (2 Tesalonica 3:6, 7, 14) Dapat naton amligan ang aton kaangtanan kay Jehova. Dumduma nga kaangay sang espongha, ginasuyop ukon ginailog naton ang mga panimuot kag pamatasan sang aton suod nga mga abyan. Indi kita makapaabot nga malatom sang tubig ang espongha kon itusmaw naton ini sa langgaw, gani indi man kita makapaabot nga maimpluwensiahan kita sing maayo kon malain ang aton mga kaupdanan.—1 Corinto 5:6.

Makakita ka sing maayo nga mga abyan sa tunga sang aton mga masigkasumilimba

15. Ano ang himuon mo agod makakita ka sing mahunahunaon sa espirituwal nga mga abyan sa kongregasyon?

15 Maayo na lang kay makakita kita sing mga abyan sa tunga sang aton mga masigkasumilimba nga makapalig-on sa aton. (Salmo 133:1) Paano ka makakita sing mahunahunaon sa espirituwal nga mga abyan sa kongregasyon? Samtang ginapalambo mo ang diosnon nga mga kinaiya kag pamatasan, pat-od gid nga magasuod sa imo ang iban nga pareho man sa imo. Apang, dapat maghimo ka man sing tikang agod makakita ka sing bag-o nga mga abyan. (Tan-awa ang kahon nga “ Kon Paano Kami Nakakita sing Maayo nga mga Abyan,” sa pahina 30.) Pilia ang mga abyan nga may mga kinaiya nga luyag mo palambuon. Sunda ang laygay sang Biblia nga ‘buksan sing masangkad ang imo tagipusuon,’ ukon makig-abyan sa imo mga masigkatumuluo ano man ang ila rasa, nasyonalidad, ukon kultura. (2 Corinto 6:13; basaha ang 1 Pedro 2:17.) Makig-abyan indi lamang sa mga kaedad mo. Dumduma nga daku ang kinamagulangan ni Jonatan kay David. Kon makig-abyan ka sa mga mas magulang sa imo, madamo sila sing eksperiensia kag kaalam nga mapaambit sa imo.

 KON MAG-UTWAS ANG MGA PROBLEMA

16, 17. Kon nasaklaw kita sang aton masigkasumilimba, ngaa indi kita dapat magpalayo sa kongregasyon?

16 Kon kaisa mahimo mag-utwas ang mga problema bangod lainlain ang personalidad kag ginhalinan sang mga kauturan sa kongregasyon. Mahimo masaklaw kita sang ginhambal ukon ginhimo sang aton masigkatumuluo. (Hulubaton 12:18) Kon kaisa, mahimo maglain ang aton buot bangod indi pareho ang aton personalidad, bangod sang indi paghangpanay ukon magkatuhay nga opinyon. Masandad bala kita bangod sini kag magbiya sa kongregasyon? Indi naton ini paghimuon kon ginahigugma gid naton si Jehova kag ang iya mga ginahigugma.

17 Takus gid si Jehova sang aton gugma kag bug-os nga debosyon kay sia ang aton Manunuga kag Manugsakdag sang Kabuhi. (Bugna 4:11) Dugang pa, dapat gid naton sakdagon  ang kongregasyon nga gingamit niya. (Hebreo 13:17) Gani, kon nasaklaw kita sang aton masigkasumilimba, indi kita dapat magsunggod kag magpalayo sa kongregasyon. Ngaa abi bayaan naton ang kongregasyon kay indi man si Jehova ang nagsaklaw sa aton? Bangod ginahigugma naton si Jehova indi naton mahimo nga talikdan sia kag ang iya katawhan!—Basaha ang Salmo 119:165.

18. (a) Ano ang aton himuon agod mapalambo ang paghidait sa kongregasyon? (b) Ano nga mga pagpakamaayo ang aton matigayon kon ginapatawad naton ang nagahinulsol nga nakasala sa aton?

18 Kon ginahigugma naton ang aton mga masigkasumilimba, palambuon naton ang paghidait sa sulod sang kongregasyon. Wala ginapaabot ni Jehova nga mangin himpit ang iya mga hinigugma, kag dapat amo man kita. Bangod sa gugma, tabunan naton ang magagmay nga mga sala kag dumdumon naton nga tanan kita indi himpit kag makasala man. (Hulubaton 17:9; 1 Pedro 4:8) Ang gugma nagabulig man sa aton nga padayon nga ‘magpinatawaray sing kinabubut-on.’ (Colosas 3:13) Apang, indi ini pirme mahapos iaplikar. Kon magpadaug kita sa negatibo nga balatyagon, mahimo maghinakit kita, ayhan magbatyag nga ang aton kaakig nagakaigo para silutan ang nakasala sa aton. Ang matuod, kita ang mahalitan kon maghinakit kita. Kon ang nakasala sa aton nagahinulsol kag patawaron naton sia, pakamaayuhon gid kita sing bugana. (Lucas 17:3, 4) Matigayon naton ang kalinong sa hunahuna kag tagipusuon, mahuptan ang paghidait sa kongregasyon, kag labaw sa tanan, matipigan ang aton kaangtanan kay Jehova.—Mateo 6:14, 15; Roma 14:19.

SAN-O NATON UNTATAN ANG PAGPAKIG-UPOD SA ISA?

19. San-o naton dapat untatan ang pagpakig-upod sa isa?

19 Kon kaisa ginapangabay kita nga untatan ang pagpakig-upod sa isa ka katapo anay sang kongregasyon. Matabo ini kon ang isa gin-disfellowship bangod ginlapas niya ang kasuguan sang Dios kag wala maghinulsol ukon ginsikway niya ang pagtuo paagi sa pagtudlo sing butig nga mga doktrina  ukon hungod sia nga nagbiya sa kongregasyon. Ang Pulong sang Dios direkta nga nagasugo sa aton nga ‘untatan ang pagpakig-upod’ sa ila. * (Basaha ang 1 Corinto 5:11-13; 2 Juan 9-11) Mahimo mabudlay gid ini himuon kon ang na-disfellowship abyan mo ukon pamilya. Tumanon bala naton ini nga sugo kag ipakita nga mainunungon kita kay Jehova kag sa iya matarong nga kasuguan labaw sa tanan? Dumduma nga nahamuot gid si Jehova sa mga mainunungon kag matinumanon.

20, 21. (a) Ngaa mahigugmaon gid nga kahimusan ang pag-disfellowship? (b) Ngaa importante nga pilion gid naton sing maayo ang aton mga abyan?

20 Ang pag-disfellowship mahigugmaon gid nga kahimusan ni Jehova. Ngaa? Ang pagsikway sa indi mahinulsulon nga nakasala nagapakita sing gugma sa balaan nga ngalan ni Jehova kag sa iya mga talaksan. (1 Pedro 1:15, 16) Paagi sini mahilway sa katalagman ang kongregasyon kag maamligan ang matutom nga mga kauturan batok sa malain nga impluwensia sang hungod nga nakasala. Gani, padayon sila nga makasimba kag makasalig nga ang kongregasyon dalangpan nila sa sining malaut nga kalibutan. (1 Corinto 5:7; Hebreo 12:15, 16) Ini nga pagdisiplina pagpakita man sing gugma sa nakasala. Mahimo nga amo gid sini ang kinahanglan agod makamarasmas sia kag magbalik kay Jehova.—Hebreo 12:11.

21 Indi mapanghiwala nga ang aton suod nga mga abyan may mabaskog nga impluwensia sa aton. Gani, importante nga pilion naton sing maayo ang aton mga abyan. Kon makig-abyan kita sa mga abyan ni Jehova kag higugmaon ang mga ginahigugma sang Dios, masapwan naton ang maayo gid nga mga abyan. Ang mga butang nga mailog naton sa ila makabulig sa aton determinasyon nga pahamut-an si Jehova.

^ par. 4 Sa pagpangabay sini kay Abraham, ginpakita ni Jehova ang pagahimuon niya nga sakripisyo sa paghalad sang iya bugtong nga Anak. (Juan 3:16) Apang, sa bahin ni Abraham, nagpasilabot si Jehova paagi sa pag-aman sing karnero nga lalaki nga amo ang ihalad sa baylo ni Isaac.—Genesis 22:1, 2, 9-13.

^ par. 9 Si David ‘bata pa’ sang ginpatay niya si Goliat kag mga 30 anyos sia sang mapatay si Jonatan. (1 Samuel 17:33; 31:2; 2 Samuel 5:4) Mga 60 anyos si Jonatan sang napatay sia, gani mas magulang sia sing mga 30 anyos kay David.

^ par. 10 Suno sa 1 Samuel 23:17, may lima ka butang nga ginhambal si Jonatan agod palig-unon si David: (1) Ginpalig-on niya si David nga indi magkahadlok. (2) Ginpasalig niya si David nga mapaslawan si Saul. (3) Ginpahanumdom niya si David nga sia ang mangin hari subong sang ginsaad sang Dios. (4) Nangako sia nga unungan niya si David. (5) Ginsugiran niya si David nga nahibal-an ni Saul nga si Jonatan mainunungon kay David.

^ par. 19 Para sa dugang nga impormasyon kon paano pakig-angutan ang mga na-disfellowship ukon hungod nga nagbiya sa organisasyon, tan-awa ang Apendise nga “Kon Paano Pakig-angutan ang Na-disfellowship.”

Magtuon sing Dugang Pa

Ang Katawhan ni Jehova Nagabiya sa Pagkadimatarong

Paano ang ekspresyon nga “magbiya sa pagkadimatarong” naangot sa mga hitabo sang panahon ni Moises? Ano ang aton matun-an sa sini nga mga hitabo?

Pilia ang Imo Kaupdanan sa Sining Katapusan nga mga Adlaw

Ang imo kaupdanan indi lang ang mga tawo nga imo ginapakig-updan.

Sin-o ang Akon Matuod nga mga Abyan?

Tun-i kon paano makakita sing matuod kag nagadugay nga pag-abyanay.