Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Nagagahom ang Ginharian sang Dios!

 KAPITULO 19

Pagtukod nga Nagapadungog kay Jehova

Pagtukod nga Nagapadungog kay Jehova

POKUS SANG KAPITULO

Ang pagtukod nga hilikuton sa bug-os nga kalibutan nagasakdag sa intereses sang Ginharian

1, 2. (a) Halin pa sang una, ano ang ginahimo sing malipayon sang mga alagad ni Jehova? (b) Ano ang ginapakabahandi ni Jehova?

HALIN pa sang una, ang mga mainunungon nga alagad ni Jehova malipayon na nga nagahimo sang mga tinukod nga nagahatag sing kadayawan sa iya ngalan. Halimbawa, ang mga Israelinhon nakigbahin gid sa pagtukod sang tabernakulo kag maalwan nga nag-aman sing mga materyales para sa sini.—Ex. 35:30-35; 36:1, 4-7.

2 Wala ginatamod ni Jehova ang mga materyales sang tinukod subong panguna nga butang nga nagapadungog sa iya, ukon amo ang pinakaimportante sa iya. (Mat. 23:16, 17) Sa baylo, ang dulot nga nagapadungog gid sa iya, amo ang pagsimba sang iya mga alagad, lakip ang ila kinabubut-on nga espiritu kag kakugi. Amo ini ang dulot nga ginapakabahandi gid niya. (Ex. 35:21; Mar. 12:41-44; 1 Tim. 6:17-19) Importante gid nga mahibaluan naton ini. Ngaa? Bangod ang mga tinukod nagakaguba sa ulihi. Halimbawa, wala na subong ang tabernakulo ukon ang templo. Pero wala ginakalipatan ni Jehova ang kaalwan kag pagpangabudlay sang iya mainunungon nga mga alagad nga nagsakdag sa pagtukod sini.—Basaha ang 1 Corinto 15:58; Hebreo 6:10.

3. Ano ang aton repasuhon sa sini nga kapitulo?

3 Ang mga alagad ni Jehova subong nagapangabudlay man sa pagpatindog sang mga tilipunan para sa pagsimba. Kag dalayawon gid ang aton nahimo sa direksion sang aton Hari nga si Jesucristo! Maathag nga ginapakamaayo gid ni Jehova ang aton mga panikasog. (Sal. 127:1) Sa sining kapitulo, repasuhon naton ang pila ka hilikuton nga nahimo kag kon paano ini nagapadungog kay Jehova. Binagbinagon man naton ang komento sang pila nga nakigbahin sa sini nga hilikuton.

Pagtukod sing mga Kingdom Hall

4. (a) Ngaa nagakinahanglan kita sing dugang pa nga tilipunan para sa pagsimba? (b) Ngaa gintingob ang pila ka sanga talatapan? (Tan-awa ang kahon nga “ Pagtukod sang Sanga—Pagpasibu sa mga Pagbag-o.”)

4 Subong sang ginbinagbinag sa Kapitulo 16, ginapatuman ni Jehova nga magtipon kita para magsimba. (Heb. 10:25) Ang aton mga miting wala lamang nagapabakod sang aton pagtuo kundi nagapapagsik man ini sa aton nga magbantala. Samtang nagahingapos ang katapusan nga mga adlaw, ginapadasig pa gid ni Jehova ang hilikuton. Bangod sini, ginatos ka libo ang nagadugok  sa iya organisasyon kada tuig. (Isa. 60:22) Samtang nagadamo ang mga sakop sang Ginharian labi man nga nagadaku ang kinahanglan nga mga pasilidad sa pag-imprinta sang base sa Biblia nga mga literatura. Nagakinahanglan man kita sing dugang pa nga tilipunan para sa pagsimba.

5. Ngaa nagakaigo ang ngalan nga Kingdom Hall? (Tan-awa man ang kahon nga “ Ang New Light Church.”)

5 Sa umpisa sang moderno nga kasaysayan sang katawhan ni Jehova, nakita sang mga Estudyante sang Biblia nga kinahanglan may kaugalingon sila nga tilipunan. Mahimo nga ang isa sa una nga mga tilipunan para sa pagsimba gintukod sa West Virginia, U.S.A., sang 1890. Sang dekada 1930, madamo nga tinukod ang ginpatindog ukon gin-renovate sang katawhan ni Jehova, pero ining mga tilipunan wala sing ngalan. Sang 1935, nagkadto si Brother Rutherford sa Hawaii diin may ginapatindog nga tilipunan upod sa bag-o nga sanga talatapan. Sang ginpamangkot sia kon ano ang itawag sa sini nga bilding, si Brother Rutherford nagsabat: “Indi ayhan dapat nga tawgon naton ini nga ‘Kingdom Hall,’ kay amo sina ang aton ginahimo,  nagabantala sang maayong balita sang Ginharian?” (Mat. 24:14) Sang ulihi, indi lamang ina nga tilipunan ang gintawag nga Kingdom Hall kundi ang kalabanan nga tilipunan nga ginagamit sang mga kongregasyon sang katawhan ni Jehova sa bug-os nga kalibutan.

6, 7. Ano ang epekto sang madasig-gintukod nga mga Kingdom Hall?

6 Sang dekada 1970, labi nga nagdamo ang kinahanglan nga mga Kingdom Hall. Bangod sini, ang mga utod sa United States nakatuon sing pamaagi sa pagtukod sing matahom kag praktikal nga mga Kingdom Hall sing pila lang ka adlaw. Sang 1983, mga 200 sini nga Kingdom Hall ang natukod sa United States kag Canada. Dayon, nagporma sila sing mga regional building committee. Nangin epektibo gid ini nga pamaagi amo nga sang 1986, ginhimo sang Nagadumala nga Hubon nga opisyal ini nga kahimusan. Sang 1987, may 60 na ka Regional Building Committee (RBC) sa United States. * Sang 1992, may mga RBC man nga gintangdo sa Argentina, Australia, France, Germany, Japan, Mexico, South Africa, kag Spain. Ining mapisan nga mga utod nga nagatukod sing mga Kingdom Hall kag Assembly Hall takus gid sang aton pagsakdag, kay ang ila ginahimo bahin sang sagrado nga pag-alagad.

7 Ining madasig-gintukod nga mga Kingdom Hall isa gid ka daku nga panaksi sa mga lugar nga gintukuran sini. Halimbawa, ang isa ka pamantalaan sa Spain may ulong dinalan nga “Ang Pagtuo Nagasaylo sing mga Bukid.” Nagakomento parte sa pagtukod sang Kingdom Hall sa banwa sang Martos, ang pamantalaan nagpamangkot: “Paano nangin posible nga sa sining kalibutan  karon nga napasad sa kakagod, ang mga boluntaryo gikan sa nanuhaytuhay nga rehiyon [sang Spain] dimakagod nga naglakbay padulong sa Martos agod magpatindog sing isa ka tinukod nga naglabaw sa tanan nga rekord sa kadasigon, pagkaekselente, kag pag-organisar?” Bilang sabat, ginsaysay sang artikulo ang ginsiling sang isa ka Saksi nga boluntaryo: “Ang rason yara lamang sa katunayan nga kami isa ka katawhan nga gintudluan ni Jehova.”

Pagtukod sa Pigado nga mga Pungsod

8. Sang 1999, anong bag-o nga programa ang gin-aprobahan sang Nagadumala nga Hubon, kag ngaa?

8 Sa hingapusan sang ika-20 nga siglo, madamo nga tawo sa pigado nga mga pungsod ang nagasulod sa organisasyon ni Jehova. Ginapanikasugan gid sang lokal nga mga kongregasyon nga makapatindog sing tilipunan. Pero may mga pungsod diin ang mga utod ginayaguta kag ginadaugdaug bangod ang ila Kingdom makaluluoy gid kon ikomparar sa tilipunan sang iban nga relihion. Sang 1999, gin-aprobahan sang Nagadumala nga Hubon ang pagpadasig sang pagpanukod sing mga Kingdom Hall sa pigado nga mga pungsod. Gingamit sa sini ang mga pondo gikan sa mas manggaranon nga mga pungsod agod may “pag-alalangay.” (Basaha ang 2 Corinto 8:13-15.) Ang mga utod gikan sa iban nga pungsod nagboluntaryo man sa pagbulig sa sini nga hilikuton.

9. Ano nga hilikuton ang daw imposible, pero ano ang nahimo?

9 Sa umpisa, daw imposible gid ini. Suno sa report sang 2001, sobra 18,300 ka Kingdom Hall ang kinahanglan sa 88 ka pigado nga pungsod. Pero sa bulig sang espiritu sang Dios kag sang  aton Hari nga si Jesucristo, wala sing hilikuton nga imposible. (Mat. 19:26) Sa sulod sang mga 15 ka tuig, halin sang 1999 asta sang 2013, ang katawhan sang Dios nakatukod sing 26,849 ka Kingdom Hall paagi sa sini nga programa. * Padayon nga ginpakamaayo ni Jehova ang pagbantala amo nga sang 2013, nagakinahanglan gihapon sing mga 6,500 ka Kingdom Hall sa sini nga mga pungsod kag sa karon, ginatos pa ang ginakinahanglan kada tuig.

Ang pagtukod sang mga Kingdom Hall sa pigado nga mga pungsod may pinasahi nga mga hangkat

10-12. Paano ang pagtukod sing mga Kingdom Hall nagapadungog sa ngalan ni Jehova?

10 Paano ang pagtukod sing bag-o nga mga Kingdom Hall nagapadungog sa ngalan ni Jehova? Ang report sang sanga talatapan sa Zimbabwe nagsiling: “Sa sulod sang isa ka bulan pagkatapos matukod ang bag-o nga Kingdom Hall, masami nagadoble ang kadamuon sang nagatambong sa mga miting.” Sa madamo nga pungsod, may mga tawo nga daw nagapangalag-ag magtambong bangod wala kita sing matahom nga tilipunan pero nagtambong sila sang may ara na. Bisan pa natukod na ang isa ka Kingdom Hall, kinahanglan naman sang isa pa. Pero indi lamang ang katahom sang bilding ang rason kon ngaa nagapalapit ang mga tawo kay Jehova. Ang matuod nga Cristianong gugma sang mga nagpatindog sini may epekto sa pagtamod sang mga tawo sa iya organisasyon. Binagbinaga ang pila ka halimbawa.

11 Indonesia. Sang nahibaluan sang tawo nga nagatan-aw sa pagtukod sang Kingdom Hall nga ang mga nagatrabaho sa sini mga boluntaryo lamang, nagsiling sia: “Nagdayaw gid ako sa inyo! Nakita ko kon paano ang kada isa nagapangabudlay sing bug-os tagipusuon kag malipayon, bisan pa wala kamo ginabayaran. Sa banta ko wala na sing relihion nga kaangay sa inyo!”

12 Ukraine. Ang isa ka babayi nga adlaw-adlaw nga nagalabay sa ginatukod nga Kingdom Hall naghinakop nga ang mga trabahador sa sini mga Saksi ni Jehova kag ang ila ginatukod Kingdom Hall. Nagsiling sia: “Nakabati ako parte sa mga Saksi ni Jehova kay ang akon manghod nga babayi nangin Saksi. Sang mapanilagan ko ini nga proyekto, nagdesisyon ako nga luyag ko mangin bahin sining espirituwal nga pamilya. Nasaksihan ko kon paano ginapakita ang gugma.” Ini nga babayi nagbaton sing pagtuon sa Biblia kag nabawtismuhan sang 2010.

13, 14. (a) Ano ang natun-an mo sa reaksion sang mag-asawa nga nakapanilag sa pagtukod sang isa ka Kingdom Hall? (b) Ano ang mahimo mo agod masiguro nga ang inyo tilipunan para sa pagsimba nagapadungog sa ngalan ni Jehova?

13 Argentina. Ginpalapitan sang isa ka mag-asawa ang utod nga nagadumala sang pagtukod sing Kingdom Hall. Ang bana nagsiling, “Ginapanilagan gid namon sing maayo ang inyo pagtukod kag . . . nagdesisyon kami nga magtuon parte sa Dios sa sini nga tilipunan.” Nian namangkot sia, “Ano ang himuon namon para mangin kalipikado kami sa pagtambong diri?” Ginbaton sang mag-asawa ang tanyag nga pagtuon sa Biblia, sa kondisyon nga mag-upod ang ila bug-os nga pamilya. Ang mga utod nalipay nga magpasugot sa sini nga kondisyon.

14 Ayhan wala ka nakabulig sa pagtukod sang inyo Kingdom Hall, pero may mahimo ka gihapon agod ang inyo tilipunan para  sa pagsimba nagapadungog sa ngalan ni Jehova. Halimbawa, mahimo mo agdahon ang imo mga Bible study, mga ginaduaw liwat, kag iban pa sa pagtambong sa mga miting. May kahigayunan ka man nga makabulig sa pagtinlo kag pagmentinar sang inyo tilipunan. Paagi sa pagpain sing kuarta para sa sini, makahatag ka sing donasyon para mamentinar ang inyo Kingdom Hall ukon ang mga tilipunan sa iban nga bahin sang kalibutan. (Basaha ang 1 Corinto 16:2.) Ining tanan nga hilikuton nagahatag sing dugang nga kadayawan sa ngalan ni Jehova.

Ang mga Manugpangabudlay nga ‘Nagahalad sing Kinabubut-on sang Ila Kaugalingon’

15-17. (a) Sin-o ang nagahimo sang kalabanan nga hilikuton sa pagtukod? (b) Ano ang natun-an mo sa komento sang mga mag-asawa nga nakapangabudlay sa internasyonal nga proyekto sa pagtukod?

15 Ang kalabanan nga hilikuton sa pagtukod sing mga Kingdom Hall, Assembly Hall, kag mga pasilidad sang sanga ginahimo sang lokal nga kauturan. Pero sa masami, ginabuligan sila sang mga utod gikan sa iban nga pungsod nga may eksperiensia na sa pagtukod. Ang pila sa sini nga mga boluntaryo nagpasibu sang ila kabuhi agod makabulig sa internasyonal nga mga proyekto sa sulod sang pila ka semana. May iban naman nga nagaalagad na sa madamo nga tinuig, nagasaylosaylo halin sa isa ka proyekto pakadto sa isa.

Sanday Timo kag Lina Lappalainen (Tan-awa ang parapo 16)

16 Ang internasyonal nga pagtukod may pinasahi nga mga hangkat pero may makalilipay man nga padya. Halimbawa, sanday Timo kag Lina naglakbay sa Asia, Europe, kag South America para magtukod sing mga Kingdom Hall, Assembly Hall, kag sanga talatapan. Si Timo nagsiling, “Nagabag-o ang akon asaynment halos kada duha ka tuig sa sulod sang nagligad nga 30 ka tuig.” Si Lina, nga ginpakaslan ni Timo 25 ka tuig na ang nagligad, nagsiling: “Nakaalagad na ako upod kay Timo sa napulo ka lainlain nga pungsod. Daku nga hangkat ang pagpasibu sa  bag-o nga pagkaon, klima, lenguahe, kag teritoryo sa pagbantala kag pagpangita sing bag-o nga mga abyan.” * Takus bala ang ila panikasog? “Ang mga hangkat,” siling ni Lina, “nagresulta sa amon pinakadaku nga mga pagpakamaayo. Naeksperiensiahan namon ang Cristianong gugma kag pagkamaabiabihon kag nabatyagan ang mahigugmaon nga pag-ulikid ni Jehova. Nakita namon ang katumanan sang saad ni Jesus sa iya mga disipulo nga narekord sa Marcos 10:29, 30. Nakabaton kami sing ginatos ka pilo nga espirituwal nga utod nga lalaki kag babayi, kag mga iloy.” Si Timo nagsiling, “Naghatag gid sa amon sing daku nga kaayawan ang paggamit sang amon ikasarang sa labing dungganon nga katuyuan, ang pagpakigbahin sa pagpasangkad sa mga pagkabutang sang Hari.”

17 Sanday Darren kag Sarah, nga nakabulig sa mga proyekto sa Africa, Asia, Central America, Europe, South America, kag South Pacific, nagbatyag nga mas daku ang ila nabaton sangsa ila ginhatag. Walay sapayan sang mga hangkat nga ila naatubang, si Darren nagsiling: “Isa gid ka pribilehiyo nga makapangabudlay upod sa mga kauturan sa nagkalainlain nga bahin sang globo. Nakita ko nga ang gugma naton kay Jehova pareho sang lubid nga nagalibot sa globo, nga nagaangot sa aton tanan.” Si Sarah nagsiling: “Madamo gid ako sing natun-an sa mga kauturan nga may lain nga kultura! Sang nakita ko ang ila mga sakripisyo sa pag-alagad kay Jehova napahulag gid ako nga ihatag ang akon pinakamaayo.”

18. Paano nagakatuman ang tagna sa Salmo 110:1-3?

18 Gintagna ni Hari David nga bisan pa magaatubang sing mga hangkat ang mga sakop sang Ginharian sang Dios, “magahalad [sila] sing kinabubut-on sang ila kaugalingon” para sa intereses sang Ginharian. (Basaha ang Salmo 110:1-3.) Ang tanan nga nadalahig sa hilikuton nga nagasakdag sa Ginharian may bahin sa pagtuman sini nga tagna. (1 Cor 3:9) Ang madamo nga pasilidad sang mga sanga talatapan, ginatos ka Assembly Hall, kag linibo ka Kingdom Hall isa ka kitaon nga ebidensia nga ang Ginharian sang Dios matuod kag nagagahom na. Daw ano gid nga pribilehiyo nga maalagad si Hari Jesucristo sa hilikuton nga nagadala sing kadungganan nga takus gid kay Jehova!

^ par. 6 Sang 2013, sobra 230,000 ka boluntaryo ang gin-aprobahan nga magpanghikot sa 132 ka RBC sa United States. Sa sini nga pungsod kada tuig, gina-coordinate sini nga mga komite ang pagtukod sing mga 75 ka bag-o nga Kingdom Hall kag pagbulig sa pag-renovate ukon pagkay-o sang mga 900 ka Kingdom Hall.

^ par. 9 Wala pa nalakip sa sini ang madamo nga gintukod nga Kingdom Hall nga indi bahin sa sini nga programa.

^ par. 16 Ang mga international servant kag international volunteer nagagamit sang kalabanan nila nga tion sa construction site, pero ginasuportahan man nila ang lokal nga mga kongregasyon sa pagbantala kada Sabado kag Domingo ukon sa gab-i.