Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Nagagahom ang Ginharian sang Dios!

 KAPITULO 16

Pagtipon Para Magsimba

Pagtipon Para Magsimba

POKUS SANG KAPITULO

Pagbinagbinag sang umpisa kag importansia sang aton mga miting

1. Ano nga bulig ang nabaton sang mga disipulo sang nagtipon sila, kag ngaa kinahanglan nila ini?

WALA magdugay pagkatapos mabanhaw si Jesus, nagtipon ang mga disipulo para magpalig-unanay. Pero, gintrangkahan nila ang puertahan bangod nahadlok sila sa ila mga kaaway. Pero sigurado nga nadula gid ang ila kahadlok sang nagpakita si Jesus sa tunga nila kag nagsiling: “Batuna ninyo ang balaan nga espiritu”! (Basaha ang Juan 20:19-22.) Sang ulihi, nagtipon liwat ang mga disipulo kag ginbubo ni Jehova ang balaan nga espiritu sa ila. Napabakod gid sila para sa pagbantala nga pagahimuon nila!—Binu. 2:1-7.

2. (a) Paano kita ginahatagan ni Jehova sing kusog, kag ngaa kinahanglan naton ini? (b) Ngaa importante gid ang Pangpamilya nga Pagsimba? (Tan-awa ang footnote kag ang kahon nga “ Pangpamilya nga Pagsimba.”)

2 Ang mga hangkat nga ginaatubang naton pareho man sa gin-atubang sang aton mga utod sang unang siglo. (1 Ped. 5:9) Kon kaisa, ang pila sa aton mahimo man mahadlok sa tawo kag kinahanglan naton ang kusog nga ginahatag ni Jehova agod makapadayon kita sa pagbantala. (Efe. 6:10) Ang daku nga bahin sini ginahatag ni Jehova paagi sa aton mga miting. May ara kita subong duha ka miting kada semana nga makatudlo gid sa aton—ang Miting Publiko kag Pagtinuon sa Lalantawan, kag ang aton midweek meeting nga ginatawag Ang Aton Cristianong Pagkabuhi kag Pagministeryo. * May ara man kita apat ka tuigan nga pagtilipon—rehiyonal nga kombension, duha ka sirkito nga asembleya, kag Memoryal sang kamatayon sang Cristo. Ngaa importante gid nga tambungan naton ini nga mga miting? Paano ini nag-umpisa sa moderno nga tion? Ano ang ginapakita parte sa aton sang aton panimuot sa mga miting?

Kon Ngaa Kinahanglan Magtipon

3, 4. Ano ang ginapatuman ni Jehova sa iya katawhan? Maghatag sing mga halimbawa.

3 Sadto pa, ginapatuman na ni Jehova nga magtipon ang iya katawhan para magsimba sa iya. Halimbawa, sang 1513 B.C.E., ginhatag ni Jehova ang iya Kasuguan sa pungsod sang Israel, kag nalakip sa sini ang semanal nga Adlaw nga Inugpahuway agod ang kada pamilya makasimba sa iya kag makatuon sang Kasuguan. (Deut. 5:12; 6:4-9) Sang gintuman sang mga Israelinhon ina nga sugo, nagbakod ang mga pamilya kag ang bug-os nga pungsod nagpabilin nga matinlo kag mabakod sa espirituwal. Sang wala na gintuman sang pungsod ang Kasuguan, lakip ang sugo nga  magtipon sing regular para magsimba kay Jehova, nadula nila ang kahamuot sang Dios.—Lev. 10:11; 26:31-35; 2 Cron. 36:20, 21.

4 Binagbinaga man ang halimbawa ni Jesus. Kinabatasan niya nga magtambong sa sinagoga kada semana sa Adlaw nga Inugpahuway. (Luc. 4:16) Sang napatay kag nabanhaw na si Jesus, ang iya mga disipulo padayon gihapon sa pagtipon sing regular bisan wala na ginapatuman ang Adlaw nga Inugpahuway. (Binu. 1:6, 12-14; 2:1-4; Roma 14:5; Col. 2:13, 14) Sa sining mga pagtinipon, ang mga Cristiano sang unang siglo wala lamang nagabaton sang instruksion kag pagpalig-on kundi nagahalad man sing pagdayaw sa Dios paagi sa ila mga pangamuyo, mga komento, kag mga ambahanon.—Col. 3:16; Heb. 13:15.

Ang mga disipulo ni Jesus nagatipon para magpabakod kag magpalig-on sa isa kag isa

5. Ngaa nagatambong kita sa semanal nga mga miting kag tuigan nga mga asembleya kag kombension? (Tan-awa man ang kahon nga “ Mga Pagtinipon nga Nagpahiusa sa Katawhan sang Dios.”)

5 Sing kaanggid, kon nagatambong kita sa semanal nga mga miting kag tuigan nga mga asembleya kag kombension, ginapakita naton ang pagsuporta sa Ginharian sang Dios, ginapabakod kita sang balaan nga espiritu, kag ginapalig-on naton ang iban paagi sa pagpabutyag sang aton pagtuo. Mas importante pa gid, may kahigayunan kita sa pagsimba kay Jehova paagi sa aton mga pangamuyo, mga komento, kag mga ambahanon. Mahimo lain ang aton pamaagi sa pagdumala sang miting sa pamaagi sang mga Israelinhon kag sang unang siglo nga mga Cristiano, pero pareho ang importansia sang aton mga pagtilipon. Paano nag-umpisa ang aton mga miting sa moderno nga tion?

Semanal nga mga Miting nga Nagapalig-on “sa Gugma kag sa Maayong mga Buhat”

6, 7. (a) Ano ang katuyuan sang aton mga miting? (b) Ano anay ang kinatuhayan sang mga miting sang kada grupo?

6 Sang si Brother Charles Taze Russell nagsugod sa pagpangita sang kamatuoran sa Pulong sang Dios, narealisar niya nga  kinahanglan gid magtipon upod sa mga may tulumuron pareho sa iya. Sang 1879, si Russell nagsulat: “Ako, upod sa iban pa sa Pittsburgh, nga nagaorganisar kag pirme nagahiwat sang klase sa biblia para sa pag-usisa sang Kasulatan, nagatipon kada Domingo.” Ang mga bumalasa sang Zion’s Watch Tower ginapalig-on man nga magtipon, kag sang 1881, may mga miting na sa Pittsburgh, Pennsylvania, kada Domingo kag Mierkoles. Ang Nobiembre 1895 nga Watch Tower nagsiling nga ang katuyuan sini nga mga miting amo ang pagpalambo sang “Cristianong paghiliupod, gugma kag paghiusa” kag paghatag sing kahigayunan sa mga nagatambong nga magpalig-unanay.—Basaha ang Hebreo 10:24, 25.

7 Sa sulod sang mga tinuig, lainlain ang pamaagi kag kasunson sang mga miting sang kada grupo sang mga Estudyante sang Biblia. Halimbawa, nagsulat ang isa ka grupo sa United States, nga ginbalhag sang 1911: “Nagahiwat kami sing mga lima ka semanal nga miting.” Ginahiwat nila ini kada Lunes, Mierkoles, Biernes, kag duha ka beses kon Domingo. Nagsulat man ang grupo sa Africa, nga ginbalhag sang 1914: “Nagahiwat kami sang miting duha ka beses kada bulan, sugod sa Biernes asta Domingo.” Sang ulihi, ginsugdan ang pamaagi sang miting nga ginasunod naton asta subong. Binagbinaga sing makadali kon paano nag-umpisa ang kada miting.

8. Ano anay ang pila ka tema sang una nga publiko nga mga lektyur?

8 Miting Publiko. Sang 1880, ang tuig pagkatapos ginsugdan ni Brother Russell ang pagbalhag sang Zion’s Watch Tower, gin-ilog niya si Jesus sa paglakbay para magbantala. (Luc. 4:43) Sa paghimo sini, ginsugdan ni Brother Russell ang pamaagi nga amo na subong ang aton Miting Publiko. Ginpahibalo sang Watch Tower ini nga paglakbay paagi sa pagsiling nga si Russell “nalipay gid sa paghiwat sing mga miting publiko parte sa ‘Mga butang tuhoy sa ginharian sang Dios.’” Sang 1911, sang naporma na ang mga klase, ukon kongregasyon sa pila ka pungsod, ang kada klase ginpalig-on nga magpadala sing sangkol nga mga humalambal sa kaingod nga mga lugar para maghatag sing serye sang anom ka lektyur parte sa mga topiko subong sang paghukom kag gawad. Sa katapusan sang kada pamulongpulong, ginapahibalo kon sin-o ang humalambal kag ano ang tema sa masunod nga semana.

9. Paano nagbag-o ang Miting Publiko sa nagligad nga mga tinuig, kag paano mo masuportahan ini nga miting?

9 Sang 1945, ginpahibalo sang Watchtower ang pagsugod sang bug-os kalibutan nga kampanya sang Miting Publiko nga may serye sang walo ka lektyur sa Biblia parte sa “hilingagawon nga mga problema sa aton panahon.” Sa madamo nga dekada, ang gintangdo nga mga humalambal wala lamang naggamit sang mga topiko halin sa matutom nga ulipon kundi sang mga topiko nga sila lang ang naghimo. Pero sang 1981, ang tanan nga humalambal ginsugo nga gamiton ang mga outline nga ginapadala sa mga kongregasyon. * Sang una, ang iban nga outline may  pagpakigbahin sang tumalambong ukon mga pasundayag. Pero sang 1990, ginbag-o ini kag ginhimo na lang nga pamulongpulong. May dugang pa gid nga pagbag-o sang Enero 2008 sang ginhimo na lang nga 30 minutos ang 45 minutos nga pamulongpulong publiko. Bisan pa nagbag-o ang mga pamaagi, ang nahanda sing maayo nga mga pamulongpulong publiko padayon nga nagapabakod sang pagtuo sa Pulong sang Dios kag nagatudlo sa aton sa nanuhaytuhay nga aspekto sang Ginharian. (1 Tim. 4:13, 16) Ginaagda mo bala ang imo mga ginaduaw liwat ukon iban pa nga indi Saksi nga mamati sa sining importante nga mga diskurso base sa Biblia?

10-12. (a) Ano nga mga pagbag-o ang ginhimo sa pamaagi sang Pagtinuon sa Lalantawan? (b) Ano nga mga pamangkot ang maayo nga ipamangkot mo sa imo kaugalingon?

10 Pagtinuon sa Lalantawan. Sang 1922, ang mga utod nga ginatawag pilgrimmga ministro nga ginpadala sang Watch Tower Society sa pagpamulongpulong sa mga kongregasyon kag sa pagpanguna sa pagbantala—amo ang nagrekomendar nga maghiwat sing isa ka regular nga miting para sa pagtinuon sa Watch Tower. Ini nga panugda ginsunod, kag sa umpisa, ang mga pagtinuon sa Watch Tower ginahiwat sa tungatunga sang semana ukon sa Domingo.

Pagtinuon sa Lalantawan sa Ghana sang 1931

11 Ang Hunyo 15, 1932, nga Watchtower may dugang pa nga panuytoy kon paano dumalahan ini nga miting. Ang artikulo nagsiling nga dapat ini dumalahan sang isa ka brother pareho sa ginahimo sa pagtinuon sa Puluy-an Bethel. Tatlo ka brother ang mapungko sa atubangan kag mabulosbulos basa sang mga parapo. Sadto, ang mga artikulo wala pa sing mga pamangkot, gani ang konduktor gin-instruksionan nga pangabayon ang tumalambong nga magpamangkot. Dayon, pangabayon niya ang tumalambong nga magsabat. Kon kinahanglan pa sing klaripikasyon, ang konduktor gin-instruksionan nga maghatag sing “malip-ot kag direkta sa punto” nga paathag.

 12 Sa umpisa, ang kada kongregasyon ginatugutan nga magpili sing gua sang magasin nga luyag tun-an sang kalabanan. Pero ginpanugda sang Abril 15, 1933, nga Watchtower nga gamiton sang tanan nga kongregasyon ang pinakabag-o nga gua. Sang 1937, may direksion nga ang pagtuon dapat hiwaton kon Domingo. Dugang pa nga pagbag-o sa pamaagi sang miting pareho sa ginahimo naton subong ang ginbalhag sa Oktubre 1, 1942, nga Watchtower. Una, ginpahibalo sang magasin nga may mga pamangkot na sa ubos sang kada pahina sang tulun-an nga mga artikulo, kag amo ini ang dapat gamiton. Dayon ginsiling sini nga ang miting dapat isa lang ka oras. Ginpalig-on man ang mga nagasabat nga indi pagbasahon ang parapo kundi magkomento “sa ila kaugalingon nga tinaga.” Ang Pagtinuon sa Lalantawan amo gihapon ang panguna nga miting diin ginaaman sang matutom nga ulipon ang espirituwal nga pagkaon sa nagakaigo nga tion. (Mat. 24:45) Maayo nga pamangkuton naton ang aton kaugalingon: ‘Nagahanda bala ako para sa pagtinuon sa Lalantawan kada semana? Ginatinguhaan ko bala nga magkomento tubtob posible?’

13, 14. Paano nag-umpisa ang Pagtinuon sang Kongregasyon sa Biblia, kag ano ang nanamian mo sa sini nga miting?

13 Pagtinuon sang Kongregasyon sa Biblia. Sa tungatunga sang dekada 1890, sang naggua na ang madamo nga volume sang Millennial Dawn, si Brother H. N. Rahn, isa ka Estudyante sang Biblia nga nagaistar sa Baltimore, Maryland, U.S.A., nagpanugda nga maghiwat sing “Dawn Circles” para sa pagtuon sang Biblia. Sa umpisa, ining mga miting nga masami ginahiwat sa pribado nga mga puluy-an, eksperimento lang. Apang sang Septiembre 1895, nangin madinalag-on ining mga Dawn Circles sa madamo nga siudad sa United States. Gani, ang Watch Tower sina nga bulan nagpanugda nga ang tanan nga estudyante sang kamatuoran maghiwat sini nga miting. Ginsiling man sini nga ang magadumala dapat maayo magbasa. Basahon niya ang isa ka dinalan dayon hulaton ang mga tumalambong sa pagkomento. Pagkatapos niya mabasa ang mga dinalan sang parapo kag mabinagbinag ini, dapat niya pangitaon kag basahon ang mga teksto. Sa katapusan sang kada kapitulo, ang kada isa mahatag sing malip-ot nga repaso sa gintun-an nga materyal.

14 Ang ngalan sini nga miting pila ka beses nga gin-islan. Ginatawag ini anay nga Berean Circles for Bible Study, nga nagapatuhoy sa mga taga-Berea sang unang siglo nga nag-usisa sing maayo sang Kasulatan. (Binu. 17:11) Sang ulihi, gin-islan ini nga Pagtinuon sang Kongregasyon sa Libro. Subong, ginatawag ini nga Pagtinuon sang Kongregasyon sa Biblia, kag ang bug-os nga kongregasyon nagatipon sa Kingdom Hall kag indi na sa magagmay nga grupo sa pribado nga mga puluy-an. Sa sulod sang mga dekada, lainlain na nga libro, brosyur, kag mga artikulo sa Watch Tower ang gingamit sa sini nga pagtuon. Halin pa sang una, ang  mga tumalambong ginapalig-on na nga makigbahin. Daku ang nahimo sini sa pagpadalom sang aton ihibalo sa Biblia. Nagahanda ka bala pirme sa sini nga miting kag nagapakigbahin tubtob sa imo masarangan?

15. Ang Teokratikong Eskwelahan Para sa Ministeryo gindesinyo para sa ano?

15 Teokratikong Eskwelahan Para sa Ministeryo. “Sang Lunes sang gab-i, Pebrero 16, 1942,” siling ni Carey Barber, nga nagaalagad sadto nga tion sa ulong talatapan sa Brooklyn, New York, “ang tanan nga lalaki nga miembro sang pamilya Bethel sa Brooklyn gin-agda nga magpaenrol sa eskwelahan nga gintawag sang ulihi nga Teokratikong Eskwelahan Para sa Ministeryo.” Ginlaragway ni Brother Barber, nga nangin miembro sang ulihi sang Nagadumala nga Hubon, ang eskwelahan subong “isa sa labing dalayawon nga pag-uswag sa pagpakig-angot ni Jehova sa iya katawhan sa modernong tion.” Nakabulig gid ini sa mga brother sa pagpauswag sang ila pagtudlo kag pagbantala amo nga sugod sang 1943, ang bukleta nga Course in Theocratic Ministry  amat-amat na nga natigayon sang mga kongregasyon sa bilog nga kalibutan. Sang Hunyo 1, 1943, ang Watchtower nagsiling nga ang Teokratikong Eskwelahan Para sa Ministeryo gindesinyo agod ang katawhan sang Dios “mahanas nga mangin mas maayo nga mga saksi sa pagbantala sang Ginharian.”—2 Tim. 2:15.

16, 17. Pamaagi lang bala sang pagpamulongpulong ang gintudlo sang Teokratikong Eskwelahan Para sa Ministeryo? Ipaathag.

16 Sa umpisa, madamo ang ginanerbios maghambal sa atubangan sang kadam-an. Si Clayton Woodworth, Jr., nga bata sang isa sa mga kaupdanan ni Brother Rutherford nga ginpriso sang 1918, naghinumdom sang iya una nga bahin sang 1943. “Nabudlayan gid ako magpamulongpulong,” siling ni Brother Woodworth. “Ang akon dila daw nagapalangdamol, ang akon baba nagamala, kag ang akon tingog daw alang-alang nga ngurob ukon tig-ik.” Sang nagauswag na si Clayton, madamo sia sing nabaton nga pribilehiyo sa pagpamulongpulong. Pero, indi lang pamaagi sang pagpamulongpulong ang gintudlo sang eskwelahan sa iya. Gintudluan man sia sini sang importansia sang  pagkamapainubuson kag pagsandig kay Jehova. “Narealisar ko,” siling niya, “nga ang humalambal indi importante. Pero kon maghanda sia sing maayo kag magsalig kay Jehova, manamian gid ang magapamati kag may matun-an sila.”

17 Sang 1959, ang mga sister gin-agda man nga magpaenrol sa eskwelahan. Nadumduman pa ni Sister Edna Bauer ang pahibalo sa asembleya. “Nadumduman ko ang kakunyag sang mga sister,” siling niya. “Karon mas madamo na sila sing pribilehiyo.” Sa sulod sang mga tinuig, madamo nga kauturan nga lalaki kag babayi ang nagpaenrol sa Teokratikong Eskwelahan Para sa Ministeryo agod matudluan ni Jehova. Subong, padayon kita nga nagabaton sini nga paghanas paagi sa aton midweek meeting.—Basaha ang Isaias 54:13.

18, 19. (a) Paano kita nagabaton sing praktikal nga panuytoy sa pagbantala subong? (b) Ngaa nagaamba kita sa aton mga miting? (Tan-awa ang kahon nga “ Pag-amba sang Kamatuoran.”)

18 Miting sa Serbisyo. Halin pa sang 1919, may mga miting na para sa pag-organisar sang pagbantala. Sadto, indi tanan nga kauturan nagatambong sa sini nga miting—kundi ang mga direkta lamang nga nagapakigbahin sa pagpanagtag sang literatura. Sugod sang 1923, may Miting sa Serbisyo nga ginahiwat kada bulan, kag tanan sa klase, ukon kongregasyon, dapat magtambong. Sang 1928, ang mga kongregasyon ginpalig-on nga maghiwat sang Miting sa Serbisyo kada semana. Sang 1935, ginpalig-on sang Watchtower ang tanan nga kongregasyon nga gamiton sa Miting sa Serbisyo ang impormasyon sa Director (gintawag sang ulihi nga Informant kag sang ulihi pa gid, Ang Aton Ministeryo sa Ginharian). Ini nga miting nangin regular nga bahin sang iskedyul sang kongregasyon.

19 Subong, nagabaton kita sing praktikal nga panuytoy sa pagbantala paagi sa aton midweek meeting. (Mat. 10:5-13) Kon kalipikado ka sa pagbaton sing kopya sang workbook para sa miting, ginatun-an mo bala kag ginaaplikar ang mga panugda sini sa imo ministeryo?

Ang Pinakaimportante nga Miting sa Bug-os nga Tuig

Halin pa sang unang siglo C.E., ang mga Cristiano nagatipon kada tuig para saulugon ang Memoryal sang kamatayon sang Cristo (Tan-awa ang parapo 20)

20-22. (a) Ngaa ginasaulog naton ang kamatayon ni Jesus? (b) Ano nga benepisyo ang naagom mo sa pagtambong sa Memoryal kada tuig?

20 Ginsugo ni Jesus ang iya mga sumulunod nga saulugon ang iya kamatayon asta sa iya pag-abot. Pareho sang Paskua, ang Memoryal sang Kamatayon sang Cristo isa ka tuigan nga okasyon. (1 Cor. 11:23-26) Ini nga miting ginatambungan sang minilyon kada tuig. Ginapahanumdom man sini sa mga hinaplas ang ila pribilehiyo subong kaupod nga mga manunubli sang Ginharian. (Roma 8:17) Kag para naman sa iban nga mga karnero, nagadugang ini sang ila tudok nga pagtahod kag pagkamainunungon sa Hari sang Ginharian sang Dios.—Juan 10:16.

21 Nakita ni Brother Russell kag sang iya kaupdanan ang importansia sang pagsaulog sang Panihapon sang Ginuo kag nahibaluan nila nga dapat ini saulugon makaisa lang kada tuig. Ang Abril 1880 nga Watch Tower nagsiling: “Sa pila ka tuig na, nangin kinabatasan para sa madamo sa aton diri sa Pittsburgh nga . . . dumdumon ang Paskua [Memoryal] kag kaunon ang  mga emblema sang lawas kag dugo sang aton Ginuo.” Sang ulihi, may ginahiwat nga kombension upod sa Memoryal. Suno sa una nga rekord sini nga okasyon sang 1889, ang nagtambong 225 kag 22 ang nabawtismuhan.

22 Sa karon, wala na ginatingob ang Memoryal sa kombension, pero ginaagda naton ang tanan bisan diin man kita nagaistar nga magtambong upod sa aton sa Kingdom Hall ukon sa gin-arkilahan nga pasilidad. Sang 2013, sobra 19 ka milyon ang nagsaulog sang kamatayon ni Jesus. Daw ano ang aton pribilehiyo indi lamang sa pagtambong sa Memoryal kundi sa pag-agda man sa iban nga mag-upod sa aton sa sining labing sagrado nga gab-i! Ginapanikasugan mo bala nga agdahon ang pinakamadamo nga tawo tubtob posible sa Memoryal kada tuig?

Kon Ano ang Ginapakita sang Aton Panimuot

23. Ano ang pagtamod mo sa aton mga miting?

23 Para sa mainunungon nga mga alagad ni Jehova, ang sugo nga magtipon indi kabug-atan. (Heb. 10:24, 25; 1 Juan 5:3) Halimbawa, si Hari David nanamian gid magkadto sa balay ni Jehova para magsimba. (Sal. 27:4) Nanamian gid sia makig-upod sa iban nga nagahigugma sa Dios. (Sal. 35:18) Kag hunahunaa ang halimbawa ni Jesus. Bisan sang bata pa sia, gusto gid niya magkadto sa balay sang iya Amay para magsimba.—Luc. 2:41-49.

Ang kabaskugon sang aton handum nga magtipon nagapakita kon daw ano ka matuod sa aton ang Ginharian sang Dios

24. Ano nga mga kahigayunan ang aton matigayon kon magtambong kita sa mga miting?

24 Kon nagatambong kita sa miting, ginapakita naton ang aton gugma kay Jehova kag handum nga palig-unon ang aton mga masigkatumuluo. Ginapakita man naton nga gusto naton makatuon kon paano magkabuhi subong sakop sang Ginharian sang Dios, kay panguna kita nga nagabaton sini nga paghanas sa mga miting, asembleya, kag kombension. Dugang pa, ang mga miting nagahatag sa aton sing ikasarang kag kusog para makapadayon sa isa sa pinakaimportante nga mga hilikuton sang Ginharian sang Dios subong—ang paghimo kag paghanas sing mga disipulo ni Hari Jesucristo. (Basaha ang Mateo 28:19, 20.) Wala sing duhaduha nga ang kabaskugon sang aton handum nga magtipon nagapakita kon daw ano ka matuod sa aton ang Ginharian sang Dios. Kabay nga pabaloran naton pirme ang aton mga miting!

^ par. 2 Dugang pa sa aton semanal nga mga miting sang kongregasyon, ang kada pamilya ukon indibiduwal ginapalig-on man nga magpain sing tion para sa personal nga pagtuon ukon pangpamilya nga pagsimba.

^ par. 9 Sang 2013, sobra na 180 ka outline para sa pamulongpulong publiko ang matigayon.

Magtuon sing Dugang Pa

ANG LALANTAWAN—TULUN-AN NGA EDISYON

Ginatipon ni Jehova ang Iya Malipayon nga Katawhan

Ano ang pagkaanggid sang mga kapiestahan sa Biblia sa mga kombension sang mga Saksi ni Jehova? Ngaa dapat naton ini tambungan?

ANG LALANTAWAN—TULUN-AN NGA EDISYON

Pangpamilya nga Pagsimba—Mahimo Mo Bala Ini nga Mas Makalilipay?

Basaha ang parte sa pangpamilya nga pagsimba sa lainlain nga pungsod para mabuligan ka kon ano ang puede mo himuon.