Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Nagagahom ang Ginharian sang Dios!

 KAPITULO 18

Pagsuporta sa Pinansial sa mga Hilikuton sang Ginharian

Pagsuporta sa Pinansial sa mga Hilikuton sang Ginharian

POKUS SANG KAPITULO

Kon ngaa kag kon paano ginasuportahan sa pinansial sang katawhan ni Jehova ang hilikuton sang Ginharian

1, 2. (a) Ano ang sabat ni Brother Russell sa ministro nga nagpamangkot kon paano ginapalakat ang mga hilikuton sang mga Estudyante sang Biblia? (b) Ano ang binagbinagon naton sa sini nga kapitulo?

ISA ka bes, ginpalapitan si Brother Charles T. Russell sang ministro sang Reformed Church para mamangkot kon paano ginapalakat ang mga hilikuton sang mga Estudyante sang Biblia.

“Wala kami nagapangolekta,” paathag ni Brother Russell.

“Diin kamo nagakuha sing kuarta?” pamangkot sang ministro.

“Kon isugid ko sa imo ang pinakasimple nga kamatuoran mahimo nga indi ka magpati,” sabat ni Russell. “Ang mga tawo nga nagatambong sa amon miting wala sing makita nga puyo nga ginalibot. Pero makita nila nga may mga galastuhan. Nagasiling sila sa ila kaugalingon, ‘May mga ginabayran sa paggamit sini nga tilipunan . . . Paano ayhan ako makaamot?’”

Daw indi makapati nga nagtulok kay Brother Russell ang ministro.

“Ginasugid ko lamang sa imo ang simple nga kamatuoran,” padayon ni Russell. “Nagapamangkot sila, ‘Paano ako makahatag sing diutay nga amot?’ Kon ang isa ginapakamaayo kag may ikasarang, luyag niya ini gamiton para sa Ginuo. Kon wala, ngaa piliton naton sia?” *

2 Huo, ang ginsiling ni Brother Russell “simple nga kamatuoran.” Halin pa sang una, ang katawhan sang Dios boluntaryo na nga nagaamot para sakdagon ang matuod nga pagsimba. Sa sini nga kapitulo, usisaon naton ang mga halimbawa sa Kasulatan kag sa aton kasaysayan sa moderno nga tion. Samtang ginabinagbinag naton kon paano ginasuportahan sa pinansial ang hilikuton sang Ginharian, maayo nga pamangkuton naton ang aton kaugalingon, ‘Paano ko mapakita nga ginasuportahan ko ang Ginharian?’

“Ang Tagsatagsa Kinabubut-on nga Magdala” sing Amot

3, 4. (a) Ngaa may kompiansa si Jehova sa iya mga sumilimba? (b) Paano ginpakita sang mga Israelinhon ang ila pagsuporta sa pagtukod sang tabernakulo?

3 Si Jehova may kompiansa sa iya matuod nga mga sumilimba. Nakahibalo sia nga kon may kahigayunan lang sila, malipayon gid sila nga magapakita sang ila debosyon paagi sa paghatag sing kinabubut-on. Binagbinaga ang duha ka halimbawa sa kasaysayan sang Israel.

 4 Sang nakagua na ang mga Israelinhon sa Egipto, ginsugo sila ni Jehova nga maghimo sing masaylosaylo nga tolda ukon tabernakulo para sa ila pagsimba. Daku ang gastuhon para sa paghimo sini. Ginsugo ni Jehova si Moises nga hatagan sing kahigayunan ang katawhan nga suportahan ini nga proyekto paagi sa pagsiling: ‘Ang tagsatagsa kinabubut-on nga magdala sing amot para kay Jehova.’ (Ex. 35:5) Ano ang reaksion sang katawhan nga bag-o lang nahilway sa ‘pagpigos kag ginpaobra sang tanan nga sahi sang obra sang isa ka ulipon’? (Ex. 1:14) Nagsuporta gid sila sing bug-os paagi sa paghatag sing bulawan, pilak, kag iban pa nga pagkabutang, nga ang kalabanan mahimo naghalin sa ila anay agalon nga mga Egiptohanon. (Ex. 12:35, 36) Sobra gid ang ginhatag sang mga Israelinhon amo nga ginsilingan sila nga ‘untatan na ang pagdala sini.’—Ex. 36:4-7.

5. Ano ang reaksion sang mga Israelinhon sang ginhatagan sila ni David sing kahigayunan sa pag-amot sa pagtukod sang templo?

5 Pagligad sang 475 ka tuig, si David nag-amot halin sa “[iya] mismo” bahandi agod gastuhan ang pagtukod sang templo, ang una nga permanente nga sentro sang matuod nga pagsimba sa duta. Dayon ginhatagan niya sing kahigayunan ang iya masigka-Israelinhon paagi sa pagpamangkot: “Sin-o karon ang magboluntaryo sa paghatag sing regalo kay Jehova?” Gani, ‘kinabubut-on sila nga naghatag sing bug-os tagipusuon kay Jehova.’ (1 Cron. 29:3-9) Ginkilala ni David kon diin gid naghalin ang mga amot sa iya pangamuyo kay Jehova: “Ang tanan nga butang halin sa imo, kag ginahatag namon sa imo ang naghalin sa imo.”—1 Cron. 29:14.

6. Ngaa kinahanglan ang kuarta para sa hilikuton sang Ginharian karon, kag ano nga mga pamangkot ang nagautwas?

6 Wala ginpilit ni Moises ukon ni David ang katawhan sang Dios nga maghatag. Kundi, ang mga tawo kinabubut-on nga naghatag. Kamusta subong? Nahibaluan naton nga ang hilikuton sang Ginharian sang Dios nagakinahanglan sing kuarta. Daku nga kantidad ang kinahanglan sa pagbalhag kag pagpanagtag sang mga Biblia kag base sa Biblia nga literatura, pagtukod kag pagmentinar sang mga tilipunan kag pasilidad sang sanga, kag pagbulig sa aton masigkatumuluo sa tion sang kalamidad. Gani, may mga pamangkot nga nagautwas: Diin naton ginakuha ang pondo? Kinahanglan bala piliton nga maghatag ang mga sumulunod sang Hari?

“Indi Gid Ini Magpakilimos Ukon Makitluoy sing Bulig sa mga Tawo”

7, 8. Ngaa ang katawhan ni Jehova wala nagapakilimos ukon nagapakitluoy para mangayo sing kuarta?

7 Indi gusto ni Brother Russell kag sang iya kaupdanan nga ilugon ang pagtipon sang pondo nga ginahimo sang mga simbahan sang Cristiandad. Sa ikaduha nga gua sang Watch Tower, sa subtitulo nga “Gusto Mo Bala sing ‘Zion’s Watch Tower’?” si Russell nagsiling: “Nagapati kami nga ang ‘Zion’s Watch Tower’ ginasakdag ni JEHOVA, kag gani indi gid ini magpakilimos ukon makitluoy sing bulig sa mga tawo. Kon Sia nga nagasiling: ‘Ang  tanan nga bulawan kag pilak sang mga bukid akon,’ indi makaaman sing kinahanglanon nga kuarta, hangpon namon ini nga tion na nga untaton ang pagbalhag sini.” (Hag. 2:7-9) Pagligad sang sobra 130 ka tuig, ang Lalantawan kag ang organisasyon nga nagabalhag sini nagapadayon gihapon!

8 Ang katawhan ni Jehova wala nagapakilimos. Wala sila nagapangolekta ukon nagapadala sing sulat para mag-solicit. Wala man sila nagapa-bingo, naganegosyo, ukon nagapa-raffle para makatipon sing pondo. Ginatuman nila ang madugay na nga ginasiling sang Watch Tower: “Sa banta namon indi husto nga mag-solicit sang kuarta para sa kausa sang Ginuo pareho sang kinabatasan sang iban . . . Nagapati kami nga ang pagpangayokayo sa ngalan sang Ginuo makapaakig kag indi makapahamuot sa iya, kag wala niya ginapakamaayo ang mga nagahatag ukon ang nahimo nga hilikuton.” *

“Maghimo ang Kada Isa Suno sa Ginpamat-od Niya sa Iya Tagipusuon”

9, 10. Ano ang isa ka rason kon ngaa boluntaryo kita nga nagaamot?

9 Subong mga sakop sang Ginharian, wala man kita karon ginapilit nga maghatag. Sa baylo, ginagamit naton ang aton kuarta kag iban pa nga pagkabutang para sakdagon ang mga hilikuton sang Ginharian. Ngaa wala kita nahilak maghatag? Binagbinagon naton ang tatlo ka rason.

10 Una, boluntaryo kita nga nagaamot bangod ginahigugma naton si Jehova kag gusto naton himuon “ang kalahamut-an sa iya mga mata.” (1 Juan 3:22) Nalipay gid si Jehova sa sumilimba nga tinagipusuon nga nagahatag. Usisaon naton ang ginsiling ni apostol Pablo parte sa Cristiano nga paghatag. (Basaha ang 2 Corinto 9:7.) Ang isa ka matuod nga Cristiano wala nagapangalag-ag ukon ginapilit kundi “ginpamat-od niya sa iya tagipusuon” nga maghatag. * Buot silingon, nagahatag sia pagkatapos niya mabinagbinag nga may ara kinahanglanon kag kon paano sia makabulig sa sini. Palangga gid ni Jehova ini nga manughatag kay “ginahigugma sang Dios ang nagahatag sing malipayon.”

Ang mga bata sa Mozambique nalipay man sa paghatag

11. Ano ang nagapahulag sa aton nga ihatag kay Jehova ang pinakamaayo naton nga dulot?

11 Ikaduha, nagaamot kita bilang pagpasalamat kay Jehova sa madamo nga pagpakamaayo nga nabaton naton. Binagbinaga ang isa ka makapahunahuna nga prinsipio sa Mosaikong Kasuguan. (Basaha ang Deuteronomio 16:16, 17.) Kon magtambong sila sa tatlo ka tuigan nga kapiestahan, ang kada lalaki dapat maghatag sing dulot “suno sa pagpakamaayo [sa iya] ni Jehova.” Gani antes sia magtambong, dapat anay niya isipon ang iya mga pagpakamaayo kag usisaon ang iya tagipusuon. Nian makadesisyon sia kon ano ang pinakamaayo nga dulot nga madala niya. Sing kaanggid, kon hunahunaon naton ang mga pagpakamaayo ni Jehova sa aton, mapahulag kita nga ihatag sa iya  ang aton pinakamaayo nga dulot. Makita sa aton bug-os tagipusuon nga dulot, lakip ang materyal nga mga amot, kon daw ano ka daku ang aton apresasyon sa bugana nga mga pagpakamaayo ni Jehova.—2 Cor. 8:12-15.

12, 13. Paano ang aton boluntaryo nga pag-amot nagapakita sang aton gugma sa Hari, kag daw ano ka daku ang puede ihatag sang isa?

12 Ikatlo, paagi sa boluntaryo nga pag-amot, ginapakita naton ang aton gugma kay Hari Jesucristo. Paano? Talupangda ang ginsiling ni Jesus sa iya mga disipulo sa iya katapusan nga gab-i sa duta. (Basaha ang Juan 14:23.) “Kon ang bisan sin-o nagahigugma sa akon,” siling ni Jesus, “tumanon niya ang akon pulong.” Nalakip sa “pulong” ni Jesus ang iya sugo nga ibantala ang maayong balita sang Ginharian sa bug-os nga duta. (Mat. 24:14; 28:19, 20) Ginatuman naton ina nga “pulong” kon ginahimo naton ang aton bug-os nga masarangan—paggamit sang aton tion, kusog, kag pagkabutang—para sakdagon ang pagbantala sang Ginharian. Paagi sa sini, ginapakita naton nga ginahigugma naton ang Mesianikong Hari.

 13 Huo, subong mainunungon nga mga sakop sang Ginharian, gusto naton ipakita ang bug-os tagipusuon nga pagsuporta sa sini paagi sa pinansial nga amot. Paano? Depende ina sa imo. Ang kada isa magahatag sang iya bug-os nga masarangan. Madamo sa aton mga masigkatumuluo ang pigado. (Mat. 19:23, 24; Sant. 2:5) Pero nalipay sila nga ginapabaloran ni Jehova kag sang iya Anak bisan diutay lang ang ila maamot basta kinabubut-on ini.—Mar. 12:41-44.

Paano Ginabaton ang Kuarta?

14. Sa sulod sang madamo nga tinuig, paano ginatanyag sang mga Saksi ni Jehova ang ila literatura?

14 Sa sulod sang madamo nga tinuig, ang mga Saksi ni Jehova nagatanyag sing literatura sa Biblia nga may amot. Ang ginapanugda nga amot diutay lang agod bisan ang mga pigado makabaton sing literatura. Siempre, kon ang tagbalay interesado pero wala sing inug-amot, handa ang mga manugbantala nga ihatag na lang ang literatura. Gusto gid nila nga mabasa ini sang sinsero nga mga tawo agod makabenepisyo sa sini.

15, 16. (a) Ano nga pagbag-o sa aton paagi sa pagtanyag sing literatura ang ginsugdan sang Nagadumala nga Hubon sang 1990? (b) Paano ginahatag ang boluntaryo nga donasyon? (Tan-awa man ang kahon nga “ Diin Nagakadto ang Aton mga Donasyon?”)

15 Sang 1990, ginbag-o sang Nagadumala nga Hubon ang aton paagi sa pagtanyag. Sugod sina nga tuig sa United States, ang tanan nga literatura ginatanyag na suno sa donasyon. Ang sulat sa tanan nga kongregasyon sa sini nga pungsod nagpaathag: “Ang mga magasin kag literatura dapat iaman sa mga manugbantala kag sa mga interesado nga wala nagapangabay ukon nagapanugda sing espesipiko nga amot bilang kondisyon para mabaton nila ini. . . . Ang bisan sin-o nga luyag maghatag sing donasyon para sa mga kagastuhanan sang aton pagtudlo nga hilikuton puede magdonar, pero makabaton sila sing literatura may donasyon man ukon wala.” Paagi sa sini nga kahimusan, labi nga nag-athag nga ang aton hilikuton kinabubut-on kag relihioso kag “indi kita manuglibod sang pulong sang Dios.” (2 Cor. 2:17) Sang ulihi, ini nga kahimusan ginpatuman man sa mga sanga sa bilog nga kalibutan.

16 Paano ginahatag ang boluntaryo nga donasyon? Sa Kingdom Hall sang mga Saksi ni Jehova may mga kahon alamutan. Ang mga indibiduwal mahimo maghulog diri ukon direkta nga magpadala sing donasyon sa isa sa legal nga mga korporasyon nga ginagamit sang mga Saksi ni Jehova. Kada tuig, may artikulo sa Lalantawan nga nagapaathag kon ano ang pila ka pamaagi sa paghatag sing donasyon.

Paano Ginagamit ang Kuarta?

17-19. Ipaathag kon paano ginagamit ang pondo para sa (a) bug-os kalibutan nga hilikuton, (b) pagpanukod sang mga Kingdom Hall sa bug-os nga kalibutan, kag (c) lokal nga mga kagastuhanan sa kongregasyon.

17 Bug-os kalibutan nga hilikuton. Ang pondo ginagasto para sa pagbantala sa bug-os nga kalibutan. Nalakip sa sini ang paghimo sing mga literatura, pagtukod kag pagmentinar sang mga sanga talatapan kag Bethel, kag mga kinahanglanon sa mga teokratikong eskwelahan. Dugang pa, ginagamit man ang pondo  para sa mga kinahanglanon sang mga misyonero, nagalakbay nga manugtatap, kag espesyal payunir. Ang aton mga donasyon ginagamit man sa pagbulig sa aton mga masigkatumuluo sa tion sang kalamidad. *

18 Pagpanukod sang mga Kingdom Hall sa bug-os nga kalibutan. Ang pondo ginagamit sa pagbulig sa mga kongregasyon sa pagtukod ukon pag-renovate sang ila Kingdom Hall. Samtang nagaabot ang mga amot, nagadugang man ang pondo nga ginagamit sa pagbulig sa iban nga kongregasyon. *

19 Lokal nga mga kagastuhanan sa kongregasyon. Ang pondo ginagamit para sa pagpanghikot kag pagmentinar sang Kingdom Hall. Ang mga gulang mahimo magrekomendar nga magpadala sing pondo sa lokal nga sanga talatapan para gamiton sa bug-os kalibutan nga hilikuton. Kon amo sini ang gusto nila, ang mga gulang dapat anay magpresentar sing resolusyon sa kongregasyon para paaprobahan antes ini ipadala. Kada bulan, ang brother nga nagatatap sang accounts nagahanda sing report sa kuenta nga ginabasa sa kongregasyon.

20. Paano mo mapadunggan si Jehova paagi sa imo “hamili nga mga butang”?

20 Kon binagbinagon naton tanan ang nadalahig sa aton pagbantala kag paghimo sing disipulo nga hilikuton sa bilog nga duta, mapahulag kita nga ‘padunggan si Jehova paagi sa aton hamili nga mga butang.’ (Hulu. 3:9, 10) Nalakip sa sini ang aton pisikal, mental, kag espirituwal nga mga ikasarang. Gusto gid naton gamiton ini sing bug-os para sa Ginharian. Pero dumduma nga ang aton hamili nga mga butang nagalakip man sang aton materyal nga mga pagkabutang. Kabay nga mangin determinado kita nga ihatag ang aton masarangan. Ang aton boluntaryo nga mga donasyon nagapadungog kay Jehova kag nagapakita sang aton pagsuporta sa Mesianikong Ginharian.

^ par. 1 Watch Tower, Hulyo 15, 1915, pahina 218-219.

^ par. 8 Watch Tower, Agosto 1, 1899, pahina 201.

^ par. 10 Ang isa ka iskolar nagsiling nga ang Griegong tinaga nga ginbadbad “ginpamat-od” “nagapahangop sing pagdesisyon sing abanse.” Nagsiling pa sia: “Bisan pa may kalipay sa boluntaryo nga paghatag, dapat ginaplano ini kag sistematiko.”—1 Cor. 16:2.

^ par. 17 Tan-awa ang Kapitulo 20 para sa dugang nga impormasyon parte sa ministeryo sang pagbulig.

^ par. 18 Tan-awa ang Kapitulo 19 para sa detalye parte sa pagtukod sang mga Kingdom Hall.

Magtuon sing Dugang Pa

Paano Kita Makabulig sa mga Kinahanglanon sang Iban?

Hibalua kon paano ang donasyon sa bug-os kalibutan nga hilikuton sang mga Saksi ni Jehova nakabulig sa pag-atipan sang pisikal kag espirituwal nga mga kinahanglanon sang iban.

Magasakripisyo Ka Bala Para sa Ginharian?

Hibalua kon paano naton magamit ang aton tion, kuarta, kusog, kag mga ikasarang para masuportahan ang Ginharian sang Dios.