Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Nagagahom ang Ginharian sang Dios!

 KAPITULO 4

Ginapakataas ni Jehova ang Iya Ngalan

Ginapakataas ni Jehova ang Iya Ngalan

POKUS SANG KAPITULO

Ginhatagan sang katawhan sang Dios sing nagakaigo nga pagpakataas ang iya ngalan

1, 2. Paano ginpakataas sang Bag-ong Kalibutan nga Badbad ang ngalan sang Dios?

MANAMI ang tiempo sang Martes sang aga sang Disiembre 2, 1947 sang ginsugdan sang isa ka gamay nga grupo sang hinaplas nga mga utod sa Bethel sa Brooklyn, New York, ang daku gid nga proyekto. Mabudlay gid ini nga hilikuton, pero ginpangabudlayan nila ini sa masunod nga 12 ka tuig. Sang ulihi, sang Domingo, Marso 13, 1960, nakompleto nila ang katapusan nga teksto sang bag-o nga badbad sang Biblia. Pagligad sang tatlo ka bulan, sang Hunyo 18, 1960, gin-release ni Brother Nathan Knorr ang katapusan nga volume sang kompleto nga Bag-ong Kalibutan nga Badbad sang Balaan nga Kasulatan sa nakunyag nga mga tumalambong sa kombension sa Manchester, England. Ginpahayag sang humalambal ang ginabatyag sang tanan sang nagsiling sia: ‘Adlaw ini sang pagkalipay para sa mga Saksi ni Jehova sa bilog nga kalibutan!’ Isa ka pinasahi nga bahin sining bag-o nga badbad ang rason sa pagkalipay—ang masunson nga paggamit sang ngalan sang Dios.

Ang Bag-ong Kalibutan nga Badbad Sang Cristianong Griegong Kasulatan gin-release sa Theocracy’s Increase nga Asembleya sang 1950 (Wala: Sa Yankee Stadium, New York City; tuo: Sa Ghana)

2 Madamo nga badbad sang Biblia ang nagkakas sa ngalan sang Dios. Pero ginpamatukan gid sang hinaplas nga mga alagad ni Jehova ang pahito ni Satanas nga dulaon ang ngalan sang Dios sa memorya sang mga tawo. Ang introduksion sang Bag-ong Kalibutan nga Badbad nga gin-release sina nga adlaw nagsiling: “Ang panguna nga bahin sini nga translation amo ang pagpasag-uli sang ngalan sang Dios sa husto nga lugar sini.” Gingamit sang Bag-ong Kalibutan nga Badbad ang ngalan sang Dios sing kapin sa 7,000 ka beses. Ginpakataas gid sining badbad ang ngalan sang aton langitnon nga Amay nga si Jehova!

3. (a) Ano anay ang paghangop sang aton mga kauturan sa kahulugan sang ngalan sang Dios? (b) Paano naton dapat hangpon ang Exodo 3:13, 14? (Tan-awa ang kahon nga “ Ang Kahulugan sang Ngalan sang Dios.”)

3 Sang una, abi sang mga Estudyante sang Biblia ang ngalan sang Dios nagakahulugan sing “ako amo ako.” (Ex. 3:14) Gani ang Watch Tower sang Enero 1, 1926, nagsiling: “Ang ngalan nga Jehova nagakahulugan sing kinaugalingon nga pagluntad, . . . ang Isa nga wala sing ginsuguran kag wala sing katapusan.” Pero sang gin-umpisahan na sang mga manugbadbad sang Bag-ong Kalibutan nga Badbad ang ila hilikuton, ginbuligan ni Jehova ang iya katawhan nga mahangpan nga ang iya ngalan wala lang nagakahulugan  nga kinaugalingon sia nga nagaluntad kundi panguna nga nagapahangop nga isa sia ka Dios sang katuyuan kag hilikuton. Natun-an nila nga ang ngalan nga Jehova literal nga nagakahulugan sing “Ginapahanabo Niya nga Mangin Amo.” Huo, sia ang nagtuga sang uniberso kag sang maalam nga mga tinuga kag padayon sia nga nagapanghikot para matuman ang iya kabubut-on kag katuyuan. Apang ngaa importante gid nga pakataason ang ngalan sang Dios, kag paano kita makapakigbahin sa pagpakataas sini?

Ang Pagpakabalaan sa Ngalan sang Dios

4, 5. (a) Ano ang ginapangabay naton kon mangamuyo kita nga “Pakabalaanon ang imo ngalan”? (b) Paano kag san-o pakabalaanon sang Dios ang iya ngalan?

4 Luyag ni Jehova nga pakataason ang iya ngalan. Ang matuod, ang panguna niya nga katuyuan amo ang pagpakabalaan sang iya ngalan, subong makita sa una nga pangabay ni Jesus sa iya modelo nga pangamuyo: “Pakabalaanon ang imo ngalan.” (Mat. 6:9) Ano bala ang ginapangabay naton kon ginapangamuyo naton ini?

5 Subong sang natun-an naton sa Kapitulo 1 sini nga libro, ang pangabay nga “Pakabalaanon ang imo ngalan” amo ang isa sa tatlo ka pangabay sa modelo nga pangamuyo ni Jesus nga may kaangtanan sa katuyuan ni Jehova. Ang duha pa amo: “Magkari ang imo Ginharian. Matuman ang imo kabubut-on.” (Mat. 6:10) Gani, kon ginapangabay naton si Jehova nga magpanghikot para magkari ang iya Ginharian kag matuman ang iya kabubut-on, ginapangabay man naton sia nga magpanghikot para pakabalaanon ang iya ngalan. Buot silingon, ginapangabay naton sia nga tinluan ang iya ngalan sa mga pagpakahuya sa sini sugod pa sang pagrebelde sa Eden. Ano ang sabat ni Jehova? Nagsiling sia: “Pakabalaanon ko ang akon dungganon nga ngalan, nga ginpasipalahan sa mga pungsod.” (Ezeq. 36:23; 38:23) Sa Armageddon, pakabalaanon ni Jehova ang iya ngalan sa atubangan sang tanan niya nga tinuga kon dulaon na niya ang kalautan.

6. Paano kita makapakigbahin sa pagpakabalaan sa ngalan sang Dios?

6 Sa bug-os nga kasaysayan, gintugutan ni Jehova ang iya mga alagad nga makigbahin sa pagpakabalaan sa iya ngalan. Siempre indi naton madugangan ang pagkasagrado sang ngalan sang Dios kay sagrado na ini, ukon balaan, sa bug-os nga kahulugan. Kon amo, paano naton ini mapakabalaan? Si Isaias nagsiling: “Si Jehova sang mga kasuldadusan—sia ang Isa nga dapat ninyo tamdon nga balaan.” Kag si Jehova nagsiling parte sa iya katawhan: “Pakabalaanon nila ang akon ngalan . . . , kag dayawon nila ang Dios sang Israel.” (Isa. 8:13; 29:23) Gani, mapakabalaan naton ang ngalan sang Dios paagi sa pagtamod sini nga tuhay kag mas mataas sangsa iban nga ngalan, pagtahod sa ginarepresentar sini, kag pagbulig sa iban nga tamdon ini nga balaan. Labi naton nga ginapakita ang aton pagdayaw kag tudok nga pagtahod sa ngalan sang Dios kon ginakilala naton si Jehova nga aton Manuggahom kag ginatuman sia sing bug-os tagipusuon.—Hulu. 3:1; Bug. 4:11.

 Ginhanda sa Pagdala kag Pagpakataas sa Ngalan sang Dios

7, 8. (a) Ngaa wala dayon ginhatagan sing pribilehiyo ang katawhan sang Dios sa pagdala sang iya ngalan? (b) Ano subong ang aton binagbinagon?

7 Gingamit sang mga alagad sang Dios sa moderno nga tion ang ngalan sang Dios sa ila mga publikasyon halin pa sang dekada 1870. Halimbawa, sa Zion’s Watch Tower sang Agosto 1879 kag sa Songs of the Bride, ang songbook nga ginbalhag sina nga tuig, ginsambit ang ngalan ni Jehova. Pero daw makita naton nga antes gintugutan ni Jehova ang iya katawhan nga tawgon sing dayag sa iya sagrado nga ngalan, ginpat-od niya anay nga kalipikado sila sa sinang daku gid nga pribilehiyo. Paano ginhanda ni Jehova ang mga Estudyante sang Biblia sadto nga magdala sang iya ngalan?

8 Kon balikan naton ang ulihi nga bahin sang katuigan 1800 kag temprano nga bahin sang katuigan 1900, makita naton kon paano ginbuligan ni Jehova ang iya katawhan nga mahangpan sing mas maathag ang importante nga mga kamatuoran parte sa iya ngalan. Binagbinagon naton ang tatlo sa sini.

9, 10. (a) Ngaa ang Watch Tower masami anay nga nakapokus kay Jesus? (b) Ano ang nagbag-o sugod sang 1919, kag ano ang resulta? (Tan-awa man ang kahon nga “ Paano Ginpakataas sang Watchtower ang Ngalan sang Dios?”)

9 Una, natigayon sang mga alagad ni Jehova ang husto nga pagtamod sa importansia sang ngalan sang Dios. Gintamod anay sang matutom nga mga Estudyante sang Biblia ang gawad subong panguna nga panudlo sang Biblia. Gani, ang Watch Tower masami nga nakapokus kay Jesus. Halimbawa, sa una nga tuig sang pagbalhag sini, ginsambit sini ang ngalan ni Jesus sing napulo ka beses nga mas masunson sangsa ngalan ni Jehova. Ang Watchtower sang Marso 15, 1976 nagsiling nga ginhatagan sang mga Estudyante sang Biblia sing “sobra nga pagpakaimportante” si Jesus. Apang, ginbuligan sila sang ulihi ni Jehova nga makita ang pagpadaku sang Biblia sa ngalan sang Dios. Ano ang epekto sini sa mga Estudyante sang Biblia? Sugod sang 1919, siling sang amo man nga artikulo sang Watchtower, “ginsugdan nila nga ipakita ang labi nga kadungganan sa langitnon nga Amay sang Mesias nga si Jehova.” Ang matuod, sa mga dekada pagkatapos sang 1919, ginsambit sang Watch Tower ang ngalan sang Dios sing sobra sa 6,500 ka beses!

10 Paagi sa paghatag sing nagakaigo nga pagpadaku sa ngalan ni Jehova, ginpakita sang aton mga kauturan ang ila gugma sa ngalan sang Dios. Kaangay ni Moises, ginsugdan nila nga “ibantala . . . ang ngalan ni Jehova.” (Deut. 32:3; Sal. 34:3) Gani subong sang ginsaad sa Kasulatan, gintalupangod ni Jehova ang ila gugma sa iya ngalan kag ginpakamaayo sila.—Sal. 119:132; Heb. 6:10.

11, 12. (a) Paano nagbag-o ang aton mga publikasyon pagkatapos sang 1919? (b) Ano ang ginapatalupangod ni Jehova sa iya mga alagad, kag ngaa?

11 Ikaduha, natigayon sang matuod nga mga Cristiano ang husto nga pagtamod sa hilikuton nga ginapahimo sang Dios. Wala magdugay pagkatapos sang 1919, napahulag ang mga nagapanguna nga hinaplas nga usisaon ang tagna ni Isaias. Nian, nagbag-o ang pokus sang aton mga publikasyon. Ngaa masiling naton nga ini nga pagbag-o nangin “pagkaon sa nagakaigo nga tion”?—Mat. 24:45.

 12 Antes sang 1919, wala pa gid mabinagbinag sa Watch Tower ang ginsiling ni Isaias: “‘Kamo ang akon mga saksi,’ siling ni Jehova, ‘ang akon alagad nga ginpili ko.’” (Basaha ang Isaias 43:10-12.) Pero pagkatapos sang 1919, ang aton mga publikasyon nagpokus sa sini nga teksto, nga nagpalig-on sa tanan nga hinaplas nga makigbahin sa hilikuton nga gin-asayn ni Jehova sa ila—ang pagpanaksi parte sa iya. Sa katunayan, sugod sang 1925 asta 1931 lang, ang Isaias 43 ginbinagbinag sa 57 ka gua sang Watch Tower, kag ang kada gua nag-aplikar sang ginsiling ni Isaias sa matuod nga mga Cristiano. Maathag nga sadto nga mga tinuig, ginapatalupangod ni Jehova sa iya mga alagad ang hilikuton nga dapat nila himuon. Ngaa? Mahimo nga para “tilawan anay kon bala takus sila.” (1 Tim. 3:10) Para mangin takus sa pagdala sang ngalan sang Dios, dapat anay pamatud-an sang mga Estudyante sang Biblia kay Jehova paagi sa ila mga hilikuton nga matuod gid sila nga mga saksi niya.—Luc. 24:47, 48.

13. Paano ginpahayag sang Pulong sang Dios ang pinakaimportante nga isyu nga dapat solbaron?

13 Ikatlo, nahangpan sang katawhan ni Jehova ang importansia sang pagpakabalaan sa ngalan sang Dios. Sang dekada 1920, nahangpan nila nga ang pagpakabalaan sa ngalan sang Dios amo ang labing importante nga isyu nga dapat solbaron. Paano ginpahayag sang Pulong sang Dios ining serioso nga kamatuoran? Binagbinaga ang duha ka halimbawa. Ano bala ang panguna nga rason kon ngaa ginluwas sang Dios ang Israel sa Egipto? Si Jehova nagsiling: “Agod makilala ang akon ngalan sa bug-os nga duta.” (Ex. 9:16) Kag ngaa ginkaluy-an ni Jehova ang Israel sang nagrebelde sila sa iya? Sa liwat, si Jehova nagsiling: “Nanghikot ako tungod sa akon ngalan agod indi ini mapasipalahan sa mga pungsod.” (Ezeq. 20:8-10) Ano ang natun-an sang mga Estudyante sang Biblia sa sini kag sa iban pa nga rekord sang Biblia?

14. (a) Ano ang nahangpan sang katawhan sang Dios sang ulihi nga bahin sang dekada 1920? (b) Ano ang epekto sang mas madalom nga paghangop sang mga Estudyante sang Biblia sa pagbantala? (Tan-awa man ang kahon nga “ Isa ka Daku nga Rason sa Pagbantala.”)

14 Sa ulihi nga bahin sang dekada 1920, nahangpan sang katawhan sang Dios ang importansia sang ginsiling ni Isaias sang nagligad nga 2,700 ka tuig. Nagsiling sia parte kay Jehova: “Amo ini ang paagi nga gintuytuyan mo ang imo katawhan, agod maghimo ka sing halangdon nga ngalan para sa imo kaugalingon.” (Isa. 63:14) Nahangpan sang mga Estudyante sang Biblia nga ang panguna nga isyu indi ang kaluwasan kundi ang pagpakabalaan sa ngalan sang Dios. (Isa. 37:20; Ezeq. 38:23) Sang 1929, ginsumaryo sang libro nga Prophecy ining kamatuoran paagi sa pagsiling: “Ang ngalan ni Jehova amo ang pinakaimportante nga isyu sa tanan nga tinuga.” Ining bag-o nga paghangop nagpahulag pa gid sa mga alagad sang Dios sa pagpanaksi parte kay Jehova kag sa pagtinlo sang iya ngalan batok sa mga pagpasipala.

15. (a) Sang dekada 1930, ano ang nahangpan sang aton mga kauturan? (b) Ano nga tion ang nag-abot?

15 Sa umpisa sang dekada 1930, natigayon sang aton mga kauturan ang husto nga pagtamod sa importansia sang ngalan sang Dios, ang mas maathag nga paghangop sa hilikuton nga  ginapahimo sang Dios, kag ang mas madalom nga paghangop sa panguna nga isyu nga dapat lubaron. Karon, tion na para tugutan ni Jehova ang iya mga alagad nga magdala sang iya ngalan sing dayag. Balikan naton ang kasaysayan kon paano ini natabo.

Si Jehova Nagpili sang “Katawhan nga Tawgon sa Iya Ngalan”

16. (a) Sa ano nga talalupangdon nga paagi ginpakataas ni Jehova ang iya ngalan? (b) Sin-o ang una nga nag-alagad subong katawhan nga gintawag sa ngalan sang Dios?

16 Ang isa ka talalupangdon nga paagi nga ginpakataas ni Jehova ang iya ngalan amo ang pagpili sang mga tawo sa duta nga magdala sini. Halin sang 1513 B.C.E., ginrepresentar sang pungsod sang Israel si Jehova subong iya katawhan. (Isa. 43:12) Pero wala nila gintuman ang ila katipan sa Dios, amo nga sang 33 C.E., nawasi nila ang espesyal nga kaangtanan sa iya. Wala  magdugay pagkatapos sini, si Jehova “nagbaton na karon sa mga indi Judiyo, agod makapili sia halin sa ila sang katawhan nga tawgon sa iya ngalan.” (Binu. 15:14) Ang bag-ong ginpili nga katawhan gintawag nga “Israel sang Dios,” nga ang miembro hinaplas nga mga sumulunod sang Cristo halin sa lainlain nga pungsod.—Gal. 6:16.

17. Ano nga pahito ni Satanas ang nagmadinalag-on?

17 Sang mga 44 C.E., ang mga disipulo sang Cristo “gintawag nga mga Cristiano . . . paagi sa pagtuytoy sang Dios.” (Binu. 11:26) Sang primero, ina nga ngalan pinasahi kay matuod nga mga Cristiano lamang ang ginpatuhuyan sini. (1 Ped. 4:16) Apang subong sang ginapakita sang ilustrasyon ni Jesus parte sa mga trigo kag hilamon, nagmadinalag-on ang pahito ni Satanas nga ining pinasahi nga ngalan ipatuhoy man sa tanan nga butig nga Cristiano. Gani pagligad sang mga tinuig, ang matuod nga mga Cristiano mabudlay na makilal-an. Pero nagbag-o ini sang “tig-alani,” nga nagsugod sang 1914. Ngaa? Bangod ginsugdan na sang mga anghel ang pagpain sa matuod nga mga Cristiano sa mga butig.—Mat. 13:30, 39-41.

18. Ano ang nakabulig sa aton mga kauturan nga makita nga kinahanglan nila ang isa ka bag-o nga ngalan?

18 Sang natangdo na ang matutom nga ulipon sang 1919, ginbuligan ni Jehova ang iya katawhan nga mahangpan ang hilikuton nga ginapahimo sa ila. Nag-athag sa ila nga ang pagpamalaybalay nagpain sa ila sa tanan nga butig nga Cristiano. Sang narealisar nila ina, nahangpan nila dayon nga indi na pinasahi ang ngalan nga “Estudyante sang Biblia.” Ang ila panguna nga katuyuan sa kabuhi indi lang pagtuon sang Biblia kundi pagpanaksi parte sa Dios kag pagpadungog kag pagpakataas sang iya ngalan. Kon amo, ano nga ngalan ang nagakaigo para sa ila hilikuton? Ina nga pamangkot nasabat sang 1931.

Program sang kombension sang 1931

19, 20. (a) Ano ang makalilipay nga resolusyon sa kombension sang 1931? (b) Ano ang reaksion sang aton mga kauturan sa ila bag-o nga ngalan?

19 Sang Hulyo 1931, mga 15,000 ka Estudyante sang Biblia ang nag-abot sa Columbus, Ohio, U.S.A., para sa kombension. Sang nakita nila ang program, natingala sila sa duha ka dalagku nga letra nga J kag W sa kober sini. ‘Ano ayhan ang buot silingon sini nga mga letra?’ pamangkot nila. Abi sang iban, ‘Just Watch’; iban naman ‘Just Wait.’ Nian sang Domingo, Hulyo 26, ginpresentar ni Brother Joseph Rutherford ang isa ka resolusyon nga nagalakip sini nga pinamulong: “Handum naton nga makilala kag tawgon sa ngalan nga, Jehovah’s witnesses.” Sina nga tion, nahangpan na sang tanan nga tumalambong kon ano ang duha ka letra—nagakahulugan ini sing Jehovah’s Witnesses, isa ka ngalan nga base sa Isaias 43:10.

20 Ang tumalambong nagpalakpak sing matunog kag malawig bilang sabat sa sini nga resolusyon. Ini nga mga palakpak mabatian sa radyo asta sa pihak nga bahin sang kalibutan! Sanday Ernest kag Naomi Barber sa Australia nagsiling: “Sang nagpinalakpak sila sa America, ang mga utod sa Melbourne nagtumbotumbo kag nagpinalakpak man. Indi gid namon ini malipatan!” *

 Ang Ngalan sang Dios Ginapakataas sa Bilog nga Kalibutan

21. Paano ang bag-o nga ngalan nagpalig-on sa pagbantala?

21 Ang pagdala sang base sa Kasulatan nga ngalan nga Saksi ni Jehova naghatag sing dugang nga kusog sa mga alagad sang Dios sa pagbantala. Sanday Edward kag Jessie Grimes, ang mag-asawa nga payunir sa United States nga nakatambong sa 1931 nga kombension sa Columbus, nagsiling: “Naghalin kami nga mga Estudyante sang Biblia, nagpauli kami nga mga Saksi ni Jehova. Nalipay gid kami sa amon ngalan kay makabulig ini sa amon sa pagpakataas sa ngalan sang aton Dios.” Pagkatapos sina nga kombension, ang pila ka Saksi may bag-o nga pamaagi. Nagapakilala sila sa tagbalay paagi sa paghatag sa ila sing kard nga may mensahe: “Isa ako sa mga saksi ni JEHOVA nga nagabantala sang Ginharian ni JEHOVA nga amon Dios.” Huo, ginpabugal sang katawhan sang Dios ang ngalan ni Jehova, kag handa na sila nga ipahibalo ang kahulugan sini sa bilog nga kalibutan.—Isa. 12:4.

“Naghalin kami nga mga Estudyante sang Biblia, nagpauli kami nga mga Saksi ni Jehova”

22. Ano ang nagapamatuod nga ang katawhan ni Jehova may pinasahi nga identidad?

22 Madamo nga tuig na ang nagligad sugod sang ginbaton sang aton hinaplas nga mga kauturan ang ila bag-o nga ngalan. Sugod sadto, naguba bala ni Satanas ang identidad sang katawhan sang Dios? Nabudlayan bala ang mga tawo nga makilal-an kita sa iban nga relihion? Wala gid! Sa baylo, ang aton pinasahi nga ngalan subong mga saksi sang aton Dios labi nga nangin talalupangdon pa gid. (Basaha ang Miqueas 4:5; Malaquias 3:18.) Ang matuod, nakilal-an gid kita sa ngalan sang Dios amo nga ang bisan sin-o nga nagagamit sini nga ngalan makilal-an dayon nga Saksi ni Jehova. Sa baylo nga malipdan sang kaangay bukid nga butig nga mga relihion, ang matuod nga pagsimba kay Jehova “tukuron sing malig-on nga mataas pa sa putukputukan sang kabukiran.” (Isa. 2:2) Sa karon, ang pagsimba kag ngalan ni Jehova ginpakataas gid.

23. Suno sa Salmo 121:5, ano nga importante nga kamatuoran parte kay Jehova ang nagapalig-on sa aton?

23 Makapalig-on gid mahibaluan nga amligan kita ni Jehova batok sa mga pagsalakay ni Satanas karon kag sa palaabuton! (Sal. 121:5) Gani, ang aton ginabatyag pareho gid sa salmista nga nagsulat: “Malipayon ang pungsod nga ang Dios amo si Jehova, ang katawhan nga iya ginpili nga panag-iyahan.”—Sal. 33:12.

^ par. 20 Tan-awa ang Kapitulo 7, pahina 72-74, para sa detalye parte sa paggamit sang radyo.

Magtuon sing Dugang Pa

Ang Ngalan sang Dios sa Hebreong Kasulatan

Ngaa gingamit sang Bag-ong Kalibutan nga Badbad ang “Jehova” bisan gindula sang madamo nga badbad ang ngalan sang Dios?

“Balaan, Balaan, Balaan si Jehova”

Ngaa ginaangot sang Biblia ang katahom sa pagkabalaan?