Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Nagagahom ang Ginharian sang Dios!

 KAPITULO 17

Paghanas sa mga Ministro sang Ginharian

Paghanas sa mga Ministro sang Ginharian

POKUS SANG KAPITULO

Kon paano ginhanda sang mga teokratikong eskwelahan ang mga ministro sang Ginharian sa pagtuman sang ila asaynment

1-3. Paano ginpasangkad ni Jesus ang pagbantala nga hilikuton, kag ano nga mga pamangkot ang nag-utwas?

DUHA ka tuig na nga nagbantala si Jesus sa bug-os nga Galilea. (Basaha ang Mateo 9:35-38.) Nagkadto sia sa madamo nga siudad kag baryo, nagtudlo sa mga sinagoga kag nagbantala sang maayong balita sang Ginharian. Bisan diin sia mabantala, ginadugukan sia sang mga tawo. “Madamo ang alanyon,” siling ni Jesus, kag mas madamo nga mangangani ang kinahanglan.

2 Naghimo si Jesus sing kahimusan para mapasangkad ang pagbantala nga hilikuton. Paano? Paagi sa pagpadala sang iya 12 ka apostoles “sa pagbantala sing Ginharian sang Dios.” (Luc. 9:1, 2) Mahimo may mga pamangkot ang mga apostoles kon paano nila ini himuon. Gani antes sila ginpadala, mahigugmaon nga ginhatag ni Jesus ang isa ka butang nga nabaton niya halin sa iya Amay—paghanas.

3 Madamo nga pamangkot ang nagautwas: Ano nga paghanas ang nabaton ni Jesus halin sa iya Amay? Ano nga paghanas ang ginhatag ni Jesus sa iya mga apostoles? Kamusta naman karon—ginahanas man bala sang Mesianikong Hari ang iya mga sumulunod para sa ministeryo? Kon amo, paano?

“Ginahambal Ko Kon Ano ang Gintudlo sang Amay sa Akon”

4. San-o kag diin gintudluan sang iya Amay si Jesus?

4 Ginbaton ni Jesus nga gintudluan sia sang iya Amay. Sa tion sang iya ministeryo, nagsiling si Jesus: “Ginahambal ko kon ano ang gintudlo sang Amay sa akon.” (Juan 8:28) San-o kag diin gintudluan si Jesus? Ang paghanas sa iya mahimo nagsugod pagkatapos sia gintuga subong panganay nga Anak sang Dios. (Col. 1:15) Ang Anak kaupod sang iya Amay sa langit sa indi maisip nga tinuig, nga nagapamati kag nagapanilag sa “Dakung Instruktor.” (Isa. 30:20) Bilang resulta, ang Anak nakabaton sing wala tupong nga edukasyon parte sa mga kinaiya, ginahimo, kag katuyuan sang iya Amay.

5. Ano nga instruksion ang ginhatag sang Amay sa iya Anak parte sa ministeryo nga pagahimuon niya sa duta?

5 Sang ulihi, gintudluan ni Jehova ang iya Anak parte sa ministeryo nga pagahimuon niya sa duta. Binagbinaga ang tagna nga nagapakita sang kaangtanan sang Dakung Instruktor sa iya panganay nga Anak. (Basaha ang Isaias 50:4, 5.) Ginapukaw ni  Jehova ang iya Anak “kada aga,” siling sang tagna. Ginalaragway sini ang isa ka maestro nga nagapukaw sa iya estudyante sing aga pa para tudluan ini. Ang isa ka reperensia sa Biblia nagsiling: “Si Jehova . . . daw kaangay nga nagadala sa iya sa eskwelahan, kag nagatudlo sa iya kon ano ang ibantala kag kon paano ini himuon.” Sa sinang langitnon nga “eskwelahan” gintudluan ni Jehova ang iya Anak “kon ano ang . . . isiling kag itudlo.” (Juan 12:49) Ginhatagan man sang Amay sing instruksion ang Anak kon paano magtudlo. * Sang ari sia sa duta, gingamit ni Jesus ini nga paghanas indi lamang sa pagtuman sang iya ministeryo kundi sa paghanas man sa iya mga sumulunod sa pagtuman sang ila ministeryo.

6, 7. (a) Ano nga paghanas ang ginhatag ni Jesus sa iya mga apostoles, kag ano ang ginpahimo niya sa ila? (b) Ginapat-od ni Jesus nga mabaton sang iya mga sumulunod subong ang ano nga sahi sang paghanas?

6 Ano nga paghanas ang ginhatag ni Jesus sa iya mga apostoles, subong sang ginsambit sa umpisa? Suno sa Mateo kapitulo 10, ginhatagan niya sila sing espesipiko nga instruksion sa ministeryo, lakip ang masunod: diin mabantala (bersikulo 5, 6), ano ang ibantala (bersikulo 7), kon ngaa kinahanglan magsalig kay Jehova (bersikulo 9, 10), kon paano palapitan ang tagbalay (bersikulo 11-13), kon paano atubangon ang pagpamatok (bersikulo 14, 15), kag kon ano ang himuon kon hingabuton (bersikulo 16-23). * Ang maathag nga paghanas nga ginhatag ni Jesus nagbulig sa mga apostoles sa pagpauswag sang pagbantala sang maayong balita sang unang siglo C.E.

7 Kamusta naman subong? Si Jesus, ang Hari sang Ginharian sang Dios, naghatag sa iya mga sumulunod sang pinakamabug-at nga asaynment nga amo ang pagbantala sang “maayong balita sang Ginharian . . . sa bug-os nga duta subong panaksi sa tanan nga pungsod.” (Mat. 24:14) Ginhanas bala kita sang Hari sa pagtuman sa sining labing importante nga hilikuton? Huo! Bisan didto sia sa langit, ginapat-od gid sang Hari nga mahanas ang iya mga sumulunod kon paano magbantala kag kon paano tumanon ang pinasahi nga mga salabton sa kongregasyon.

Paghanas sa mga Ministro nga Mangin mga Ebanghelisador

8, 9. (a) Ano ang panguna nga katuyuan sang Teokratikong Eskwelahan Para sa Ministeryo? (b) Paano nakabulig sa imo ang midweek meeting para mangin mas epektibo sa ministeryo?

8 Madugay na nga ginagamit sang organisasyon ni Jehova ang mga asembleya, kombension, kag mga miting sang kongregasyon—subong sang Miting sa Serbisyo—para hanason ang katawhan sang Dios sa ministeryo. Pero sugod sang dekada 1940, ang mga nagapanguna sa ulong talatapan naghimo sing mga kahimusan para sa paghanas paagi sa nanuhaytuhay nga eskwelahan.

9 Teokratikong Eskwelahan Para sa Ministeryo. Subong sang ginbinagbinag sa nagligad nga kapitulo, ini nga eskwelahan ginsugdan sang 1943. Ang katuyuan bala sini nga eskwelahan amo lamang ang paghanas sa mga estudyante sa paghatag sing epektibo nga mga bahin sa mga miting sang kongregasyon? Indi. Ang panguna nga katuyuan sini amo ang paghanas sa katawhan sang Dios sa paggamit sang ila ikasarang sa  paghambal para dayawon si Jehova sa ministeryo. (Sal. 150:6) Ini nga eskwelahan nagbulig man sa tanan nga brother kag sister nga nagpaenrol sa sini para mangin mas epektibo nga mga ministro sang Ginharian. Ini nga paghanas ginahimo subong paagi sa midweek meeting.

10, 11. Sin-o karon ang mahimo mag-eskwela sa Gilead School, kag ano ang katuyuan sang kurikulum sini?

10 Watchtower Bible School of Gilead. Ini nga eskwelahan nagsugod sang Lunes, Pebrero 1, 1943. Gindesinyo ini anay para hanason ang mga payunir kag iban pa nga bug-os tion nga mga alagad para sa pagmisyonero sa iban nga bahin sang kalibutan. Pero sugod sang Oktubre 2011, ang mga ginapaeskwela sa sini amo lamang ang ara na sa pinasahi nga bug-os tion nga pag-alagad—mga espesyal payunir, mga nagalakbay nga manugtatap kag ang ila asawa, mga Bethelite, kag mga misyonero nga wala pa nakaeskwela sa sini.

11 Ano ang katuyuan sang kurikulum sang Gilead School? Ang isa ka madugay na nga instruktor sa sini nagsiling: “Para pabakuron ang pagtuo sang mga estudyante paagi sa maid-id nga pagtuon sang Pulong sang Dios kag pagbulig sa ila sa pagpalambo sang espirituwal nga mga kinaiya nga kinahanglan para maatubang ang mga hangkat sa ila asaynment. Importante man nga katuyuan sang kurikulum ang pagpatudok sa mga estudyante sang mas mabaskog nga handum sa pagbantala.”—Efe. 4:11.

12, 13. Ano ang epekto sang Gilead School sa bug-os kalibutan nga pagbantala? Maghatag sing halimbawa.

12 Ano ang epekto sang Gilead School sa bug-os kalibutan nga pagbantala? Sugod sang 1943, sobra 8,500 ang nahanas sa eskwelahan, * kag nakaalagad sila sa sobra 170 ka pungsod sa bug-os nga kalibutan. Gingamit gid sang mga misyonero ang paghanas sa ila. Nangin maayo sila nga halimbawa sa ministeryo kag ginhanas man nila ang iban. Sa masami, ang mga misyonero ang nagpauswag sa pagbantala sa lugar nga diutay lang ukon wala gid anay sing manugbantala sang Ginharian.

13 Binagbinaga ang natabo sa Japan, diin nauntat anay ang organisado nga pagbantala bangod sa Bug-os Kalibutan nga Inaway II. Sang Agosto 1949, wala pa napulo ang lokal nga manugbantala sa Japan. Pero sa katapusan nga bahin sina nga tuig, 13 ka nahanas sa Gilead nga misyonero ang nangin masako sa pagbantala sa Japan. Madamo pa ang nagsunod. Sa umpisa, nagpokus lang sila sa dalagku nga mga siudad. Sang ulihi, nagsaylo sila sa iban pa nga siudad. Ginpalig-on gid sang mga misyonero ang ila mga Bible study kag ang iban pa nga magpayunir. Ginpakamaayo gid ang makugi nga panikasog sang mga misyonero. Karon, sobra na 216,000 ang manugbantala sa Japan, kag halos 40 porsiento sa ila ang payunir! *

14. Ang mga teokratikong eskwelahan daku nga pamatuod sang ano? (Tan-awa man ang kahon nga “ Mga Eskwelahan nga Nagahanas sang mga Ministro sang Ginharian.”)

14 Iban pa nga teokratikong eskwelahan. Ang Pioneer Service School, Bible School for Christian Couples, kag Bible School for Single Brothers nakabulig gid sa mga estudyante sini nga mag-uswag sa espirituwal kag mangin makugi sa pagpanguna sa pagbantala. * Ining tanan nga teokratikong eskwelahan daku  nga pamatuod nga ginasangkapan gid sing bug-os sang aton Hari ang iya mga sumulunod sa pagtuman sang ila ministeryo.—2 Tim. 4:5.

Paghanas sa mga Utod nga Lalaki sa Pag-uyat sa Pinasahi nga mga Responsibilidad

15. Sa ano nga paagi luyag ilugon sang mga lalaki nga may katungdanan si Jesus?

15 Dumduma ang tagna ni Isaias nga si Jesus gintudluan sang Dios. Sa sinang langitnon nga “eskwelahan,” ang Anak nakatuon kon paano “masabat . . . sing husto nga mga pulong ang mga ginalapyo.” (Isa. 50:4) Gin-aplikar ni Jesus ini nga instruksion. Sang ari sia sa duta, ginpaumpawan niya ang mga “ginabudlayan kag ginabug-atan.” (Mat. 11:28-30) Bilang pag-ilog kay Jesus, luyag man sang mga lalaki nga may katungdanan nga paumpawan ang ila kauturan. Agod mahimo ini, gintukod ang nanuhaytuhay nga eskwelahan para buligan ang kalipikado nga mga lalaki nga mangin mas epektibo sa pag-alagad sa ila masigkatumuluo.

16, 17. Ano ang katuyuan sang Kingdom Ministry School? (Tan-awa man ang footnote.)

16 Kingdom Ministry School. Ang una sini nga klase nagsugod sang Marso 9, 1959, sa South Lansing, New York. Gin-agda  ang mga nagalakbay nga manugtatap pati man ang mga congregation servant sa isa ka bulan nga kurso. Sang ulihi, ini nga eskwelahan ginbadbad halin sa Ingles pakadto sa iban nga lenguahe, kag amat-amat sini nga ginhanas ang mga utod sa bilog nga kalibutan. *

Si Brother Lloyd Barry nga nagatudlo sang Kingdom Ministry School sa Japan sang 1970

17 Ang 1962 Tuigan nga Libro sang mga Saksi ni Jehova nagsiling parte sa katuyuan sang Kingdom Ministry School: “Sa sining tuman kasako nga kalibutan, ang manugtatap sa kongregasyon sang mga saksi ni Jehova dapat isa ka tawo nga kahibalo mag-organisar sang iya kabuhi agod mahatagan niya sing atension ang tanan sa kongregasyon kag mangin pagpakamaayo sa ila. Pero sa paghimo sini, dapat indi niya pagpalabihon ang kongregasyon sangsa iya pamilya, kundi dapat sia magpakita sing kaligdong sa hunahuna. Isa gid ka dalayawon nga kahigayunan ang ginhatag sa mga congregation servant sa bilog nga kalibutan nga makaeskwela kag mahanas sa Kingdom Ministry School para matuman nila ang ginasiling sang Biblia nga dapat himuon sang isa ka manugtatap!”—1 Tim. 3:1-7; Tito 1:5-9.

18. Paano nakabenepisyo ang tanan nga katawhan sang Dios sa Kingdom Ministry School?

 18 Ang tanan nga katawhan sang Dios nakabenepisyo sa Kingdom Ministry School. Paano? Kon ginaaplikar sang mga gulang kag mga ministeryal nga alagad ang ila natun-an sa eskwelahan, kaangay ni Jesus, mapaumpawan nila ang ila masigkatumuluo. Indi bala ginapabaloran mo gid kon ginapalig-on ka, ginapamatian, ukon ginaduaw sang matinatapon nga gulang ukon ministeryal nga alagad? (1 Tes. 5:11) Ining kalipikado nga mga lalaki matuod gid nga pagpakamaayo sa ila kongregasyon!

19. Ano ang iban pa nga eskwelahan nga ginatatap sang Teaching Committee, kag ano ang katuyuan sining mga eskwelahan?

19 Iban pa nga teokratikong eskwelahan. Ang Teaching Committee sang Nagadumala nga Hubon nagatatap sa iban pa nga eskwelahan nga nagahanas sa mga lalaki nga may katungdanan sa organisasyon. Ini nga mga eskwelahan gindesinyo para buligan ang responsable nga mga utod—gulang sa kongregasyon, nagalakbay nga manugtatap, miembro sang Komite sang Sanga—nga mangin epektibo sa pagtuman sang ila madamo nga responsibilidad. Ining base sa Biblia nga mga kurso nagapalig-on sa mga utod nga magpabilin nga mabakod sa espirituwal kag iaplikar ang mga prinsipio sa Kasulatan sa ila pagpakig-angot sa hamili nga mga karnero nga gintugyan ni Jehova sa ila.—1 Ped. 5:1-3.

Ang una nga Ministerial Training School nga ginhiwat sa Malawi sang 2007

20. Ngaa makasiling si Jesus nga tanan kita ‘natudluan ni Jehova,’ kag ano ang imo determinasyon?

20 Maathag nga ginapat-od gid sang Mesianikong Hari nga mahanas sing maayo ang iya mga sumulunod. Ang tanan nga paghanas naghalin sa ibabaw paubos: Ginhanas ni Jehova ang iya Anak, kag ginhanas man sang Anak ang iya mga sumulunod. Gani, makasiling gid si Jesus nga tanan kita ‘natudluan ni Jehova.’ (Juan 6:45; Isa. 54:13) Kabay nga mangin determinado kita nga panginpuslan sing bug-os ang paghanas sang Hari sa aton. Kag dapat naton dumdumon nga ang panguna nga katuyuan sini nga paghanas amo ang pagbulig sa aton nga magpabilin nga mabakod sa espirituwal agod nga matuman naton sing bug-os ang aton ministeryo.

^ par. 5 Paano naton nahibaluan nga gintudluan sang Amay ang Anak kon paano magtudlo? Binagbinaga ini: Ang paggamit ni Jesus sing madamo nga ilustrasyon sa pagtudlo nagtuman sang tagna nga narekord siniglo pa antes sia nabun-ag. (Sal. 78:2; Mat. 13:34, 35) Maathag nga ang Awtor sina nga tagna nga si Jehova, nagpat-od sing abanse nga ang iya Anak magatudlo paagi sa mga ilustrasyon, ukon parabola.—2 Tim. 3:16, 17.

^ par. 6 Pagligad sang pila ka bulan, si Jesus “nagpili sang 70 pa gid kag ginpadala sila sing tagduhaduha” para magbantala. Ginhanas man niya sila.—Luc. 10:1-16.

^ par. 12 May iban nga makapila na nag-eskwela sa Gilead School.

^ par. 13 Para sa dugang nga detalye parte sa nahimuan sang mga misyonero nga nahanas sa Gilead sa bug-os nga kalibutan, tan-awa ang kapitulo 23 sang Jehovah’s Witnesses—Proclaimers of God’s Kingdom.

^ par. 14 Ang duha ka ulihi nga eskwelahan ginbuslan sang School for Kingdom Evangelizers.

^ par. 16 Sa karon, ang tanan nga gulang nakabenepisyo sa Kingdom Ministry School nga may nanuhaytuhay nga kalawigon kag ginahiwat kada pila ka tuig. Sugod sang 1984, ang mga ministeryal nga alagad ginahanas man sa sini nga eskwelahan.

Magtuon sing Dugang Pa

“Tapana ang Banas sang Imo mga Tiil” Agod Mag-uswag

Paano mo makuha ang mga balagbag kag malab-ot ang imo espirituwal nga mga tulumuron?

Buligi ang Iban nga Mapakita ang Ila Bug-os nga Ikasarang

Paano naton mabuligan ang mga pamatan-on ukon bag-o nabawtismuhan para mag-uswag?