Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Nagagahom ang Ginharian sang Dios!

 KAPITULO 6

Katawhan nga Nagabantala—Mga Ministro nga Nagahalad sing Kinabubut-on sang Ila Kaugalingon

Katawhan nga Nagabantala—Mga Ministro nga Nagahalad sing Kinabubut-on sang Ila Kaugalingon

POKUS SANG KAPITULO

Nagtipon sing mga manugbantala ang Hari

1, 2. Anong daku nga hilikuton ang gintagna ni Jesus, kag anong importante nga pamangkot ang nag-utwas?

ANG mga pulitiko masami nagasaad apang wala nila ginatuman. Kon kaisa, bisan ang may maayo nga motibo indi makatuman sang ila mga pangako. Sa kabaliskaran, ang Mesianikong Hari nga si Jesucristo, nagatuman gid pirme sang iya ginsiling.

2 Sang si Jesus nangin Hari sang 1914, handa na sia nga tumanon ang gintagna niya mga 1,900 ka tuig na ang nagligad. Antes sia napatay, nagtagna si Jesus: “Ining maayong balita sang Ginharian ibantala sa bug-os nga duta.” (Mat. 24:14) Ang katumanan sini mangin bahin sang tanda sang iya presensia sa paggahom sa Ginharian. Apang, may nag-utwas nga isa ka importante nga pamangkot: Paano makatipon ang Hari sing mga manugbantala nga magaalagad sing kinabubut-on sa katapusan nga mga adlaw—sa tion nga ang mga tawo maiyaiyahon, wala sing gugma, kag indi relihioso? (Mat. 24:12; 2 Tim. 3:1-5) Dapat naton mahibaluan ang sabat kay nadalahig diri ang tanan nga matuod nga Cristiano.

3. Ano nga kompiansa ang ginpakita ni Jesus, kag diin niya ini natun-an?

3 Usisaa liwat ang ginsiling ni Jesus. Ang mga tinaga bala nga “ibantala” nagapakita nga sigurado gid sia? Huo! Sigurado si Jesus nga may kinabubut-on nga magasuportar sa iya sa katapusan nga mga adlaw. Ngaa may kompiansa gid sia? Natun-an niya ini sa iya Amay. (Juan 12:45; 14:9) Antes sia nangin tawo, naobserbahan ni Jesus nga si Jehova may kompiansa sa Iya mga sumilimba. Tan-awon naton kon paano niya ini ginpakita.

“Ang Imo Katawhan Magahalad sing Kinabubut-on sang Ila Kaugalingon”

4. Ang mga Israelinhon gin-agda ni Jehova nga suportahan ang ano nga hilikuton, kag ano ang ila ginhimo?

4 Dumduma ang natabo sang ginsugo ni Jehova si Moises nga maghimo sang tabernakulo, ukon tolda, nga mangin sentro sang pagsimba para sa pungsod sang Israel. Gin-agda ni Jehova ang katawhan, paagi kay Moises, nga suportahan ang hilikuton. Ginsilingan sila ni Moises: ‘Ang tagsatagsa kinabubut-on nga magdala sing amot para kay Jehova.’ Ano ang resulta? “Kada aga nagadala . . . ang mga Israelinhon sang ila kinabubut-on nga mga dulot.” Kadamo gid sang ila gindala amo nga ginpauntat na sila  sa pagdala sing bisan ano nga butang! (Ex. 35:5; 36:3, 6) Wala gid ginguba sang mga Israelinhon ang kompiansa ni Jehova sa ila.

5, 6. Suno sa Salmo 110:1-3, ano nga panimuot ang ginapaabot ni Jehova kag ni Jesus sa matuod nga mga sumilimba sa tion sang katapusan?

5 Ginapaabot man bala ni Jehova ining kinabubut-on nga panimuot sa iya mga sumilimba sa katapusan nga mga adlaw? Huo! Sobra 1,000 ka tuig antes ginbun-ag si Jesus sa duta, gingiyahan ni Jehova si David sa pagsulat parte sa tion nga magasugod sa paggahom ang Mesias. (Basaha ang Salmo 110:1-3.) Si Jesus, ang bag-o ginpapungko nga Hari, may mga kaaway nga magasumpong sa iya. Pero madamo man ang magasuportar sa iya. Indi sila pagpiliton nga mag-alagad sa Hari. Bisan ang mga pamatan-on magahalad sing kinabubut-on sang ila kaugalingon, kag madamo gid sila amo nga ginlaragway sila subong indi maisip nga tun-og nga nagalikop sa duta sa kaagahon. *

Ang mga nagasuportar sa Ginharian nga kinabubut-on nga nagaalagad pareho kadamo sa tun-og (Tan-awa ang parapo 5)

6 Nahibaluan ni Jesus nga ang tagna sa Salmo 110 naaplikar sa iya. (Mat. 22:42-45) Gani, may basihan gid ang iya kompiansa nga may mga mainunungon nga magasuportar sa iya paagi sa kinabubut-on nga pagbantala sang maayong balita sa duta. Ano ang ginapakita sang kasaysayan? May gintipon gid bala ang Hari nga mga manugbantala nga kinabubut-on nga magaalagad sa katapusan nga mga adlaw?

“Pribilehiyo Ko kag Katungdanan nga Ibantala Ina nga Mensahe”

7. Pagkatapos nagpungko subong Hari, paano ginhanda ni Jesus sa hilikuton ang iya mga sumulunod?

7 Wala magdugay pagkatapos sia nagpungko subong Hari, ginhanda ni Jesus ang iya mga sumulunod para sa daku nga hilikuton. Subong sang natun-an naton sa Kapitulo 2, may ginhimo sia nga pag-usisa kag pagtinlo sang 1914 asta sa temprano sang 1919. (Mal. 3:1-4) Dayon sang 1919, nagtangdo sia sing matutom nga ulipon nga magapanguna sa iya mga sumulunod.  (Mat. 24:45) Sugod sadto, ina nga ulipon nagaaman sing espirituwal nga pagkaon—paagi sa mga pamulongpulong sa kombension kag naimprinta nga mga publikasyon—nga sulitsulit nga nagapadaku sang salabton sang tanan nga Cristiano nga makigbahin sing personal sa pagbantala.

8-10. Paano ginpalig-on sang mga kombension ang pagbantala? Maghatag sing halimbawa. (Tan-awa man ang kahon nga “ Mga Kombension nga Nagpalig-on sang Pagbantala.”)

8 Mga pamulongpulong sa kombension. Ang mga Estudyante sang Biblia nagtipon sa Cedar Point, Ohio, U.S.A., halin sang Septiembre 1 asta 8, 1919, para sa ila una nga daku nga kombension pagkatapos sang Bug-os Kalibutan nga Inaway I. Sa ikaduha nga adlaw, si Brother Rutherford naghatag sing pamulongpulong diin prangka niya nga ginsilingan ang mga delegado: “Ang misyon sang isa ka Cristiano sa duta . . . amo ang pagpahayag sang mensahe sang ginharian sang Ginuo.”

9 Ang talalupangdon nga bahin sang kombension natabo sang ikalima nga adlaw sang nagpamulongpulong si Brother Rutherford sa tig-ulo nga “Pamulongpulong sa mga Masigkamanugpangabudlay,” nga ginbalhag sa Watch Tower sa idalom sang tig-ulo nga “Pagbantala sang Ginharian.” Nagsiling sia: “May tion nga serioso nga ginapamangkot sang isa ka Cristiano ang iya kaugalingon, Ngaa ari ako sa duta? Kag ang sabat amo, Ang Ginuo mainayuhon nga naghimo sa akon subong iya embahador sa pagdala sang mensahe sang Dios sang pagpasag-uli sa kalibutan, kag pribilehiyo ko kag katungdanan nga ibantala ina nga mensahe.”

10 Sa sinang indi malipatan nga pamulongpulong, ginpahibalo ni Brother Rutherford nga magabalhag sang bag-o nga magasin, nga Golden Age (Magmata! karon), para giyahan ang mga tawo sa Ginharian nga amo lamang ang paglaum sang katawhan. Dayon namangkot sia kon sin-o sa mga tumalambong ang luyag makigbahin sa pagpanagtag sini nga magasin. Ang isa ka report parte sa kombension nagsiling: “Makapalig-on gid ang ila reaksion. Anom ka libo ka tawo ang nagtindog sing dungan.” * Maathag nga may nagasuportar sa Hari nga kinabubut-on nga magabantala sang iya Ginharian!

11, 12. Suno sa Watch Tower sang 1920, san-o himuon ang hilikuton nga gintagna ni Jesus?

11 Naimprinta nga mga publikasyon. Ang kahulugan sang gintagna ni Jesus nga hilikuton—ang pagbantala sang maayong balita sang Ginharian—amat-amat nga nag-athag paagi sa mga artikulo sang Watch Tower. Binagbinaga ang pila ka halimbawa sang dekada 1920.

12 Ano nga mensahe ang ibantala subong katumanan sang Mateo 24:14? San-o himuon ina nga hilikuton? Ang Hulyo 1, 1920, nga Watch Tower, sa artikulo nga “Ebanghelyo sang Ginharian,” nagpaathag sang mensahe, nga nagasiling: “Ang maayong balita diri nagapatuhoy sa katapusan sang daan nga kahimusan sang mga butang kag sa pagtukod sang ginharian sang Mesias.” Maathag nga ginpakita sang artikulo kon san-o ibantala  ining mensahe, nga nagasiling: “Ining mensahe dapat ipahayag sugod sa dakung bug-os kalibutan nga inaway [Bug-os Kalibutan nga Inaway I] asta sa ‘dakung kapipit-an.’” Gani, ang artikulo nagsiling: “Karon na ang tion . . . para ibantala sa bug-os nga Cristiandad ining maayong balita.”

13. Paano ginpalig-on sang Watch Tower sang 1921 ang hinaplas nga mga Cristiano nga mag-alagad sing kinabubut-on?

13 Ginapilit bala ang katawhan sang Dios sa paghimo sang hilikuton nga gintagna ni Jesus? Wala. Ang artikulo nga “Magpakaisog,” sa Marso 15, 1921, nga Watch Tower, nangabay sa hinaplas nga mga Cristiano nga mag-alagad sing kinabubut-on. Ang kada isa ginapalig-on nga pamangkuton ang iya kaugalingon: “Indi bala nga isa ko gid ka daku nga pribilehiyo, subong man katungdanan, nga makigbahin sa sini nga hilikuton?” Ang artikulo nagpadayon: “Nagasalig kami nga kon makita mo ini [nga isa ka pribilehiyo nga makigbahin sa hilikuton] mangin kaangay ka ni Jeremias, nga sa iya tagipusuon ang pulong sang Ginuo ‘nangin pareho sa kalayo nga nagadabdab sa iya mga tul-an,’ nagapahulag gid sa iya amo nga indi niya mapunggan nga maghambal.” (Jer. 20:9) Ginapakita sining pagpalig-on nga may kompiansa gid si Jehova kag si Jesus sa mga mainunungon nga nagasuportar sa Ginharian.

14, 15. Sang 1922, ano nga paagi sa pagpalab-ot sang mensahe sa iban ang ginlaygay sang Watch Tower sa hinaplas nga mga Cristiano?

14 Paano mapalab-ot sang matuod nga mga Cristiano ang mensahe sang Ginharian sa iban? Ang malip-ot pero epektibo nga artikulo nga “Importante ang Pag-alagad” sa Watch Tower nga Agosto 15, 1922, nagpahanumdom sa hinaplas nga mga Cristiano nga importante ang “pagpanagtag sing mga balasahon kag pagpakigsugilanon sa mga tawo sa ila balay, kag ang pagpanaksi nga malapit na ang ginharian sang langit.”

15 Maathag nga sugod sang 1919, ginagamit sang Cristo ang matutom kag mainandamon nga ulipon para sulitsulit nga ipadaku nga ang pribilehiyo kag katungdanan sang isa ka Cristiano sa duta, amo ang pagpahayag sang mensahe sang Ginharian. Pero ano ang reaksion sang mga Estudyante sang Biblia sa pagpalig-on nga makigbahin sa pagpahayag sang Ginharian?

“Ang mga Matutom Magaboluntaryo”

16. Ano ang reaksion sang pila ka ginboto nga mga gulang sa ideya nga ang tanan dapat makigbahin sa ministeryo?

16 Sang dekada 1920 kag 1930, may pila nga indi ugyon sa ideya nga ang tanan nga hinaplas nga Cristiano dapat makigbahin sa ministeryo. Ginpaathag sa Nobiembre 1, 1927, nga Watch Tower ang nagakatabo: “May mga miembro subong sang simbahan [kongregasyon] nga nagaalagad bilang gulang . . . pero wala nagapalig-on sa mga kauturan nga magbantala, kag sila mismo wala nagabantala. . . . Indi sila ugyon sa panugda nga magpamalaybalay para isugid ang mensahe sang Dios, sang iya Hari kag sang iya ginharian, sa mga tawo.” Ang artikulo prangka nga nagsiling: “Tion na para sa mga matutom nga markahan sila kag likawan, kag hambalon sila nga indi na naton pagsaligan ining mga lalaki sang katungdanan sang pagkagulang.” *

17, 18. Ano ang reaksion sang kalabanan sa kongregasyon sa direksion sang ulong talatapan, kag paano naghulag sa sini ang minilyon sang nagligad nga 100 ka tuig?

 17 Maayo gid kay kalabanan sa kongregasyon makugi nga nagtuman sa direksion sang ulong talatapan. Ginkabig nila nga isa ka pribilehiyo nga ipaambit ang mensahe sang Ginharian. Amo sini ang ginsiling sang Watch Tower sang Marso 15, 1926: “Ang mga matutom magaboluntaryo . . . sa pagsugid sining mensahe sa mga tawo.” Ining mga matutom nagtuman gid sang tagna sa Salmo 110:3 kag nagpamatuod nga kinabubut-on sila nga nagasuportar sa Mesianikong Hari.

18 Sang nagligad nga 100 ka tuig, minilyon ang kinabubut-on nga nagpahayag sang mensahe sang Ginharian. Sa masunod nga mga kapitulo, binagbinagon naton kon paano sila nagbantala—ang ila pamaagi kag kagamitan—kag kon ano ang resulta. Apang, binagbinagon naton anay kon ngaa minilyon ang nagboluntaryo sa pagbantala sang Ginharian bisan pa nagakabuhi sila sa maiyaiyahon nga kalibutan. Samtang ginabinagbinag naton ini, maayo nga pamangkuton naton ang aton kaugalingon, ‘Ngaa ginapaambit ko ang maayong balita sa iban?’

“Padayon . . . nga Unahon ang Pagpangita sa Ginharian”

19. Ngaa ginatuman naton ang laygay ni Jesus nga “padayon . . . nga unahon ang pagpangita sa Ginharian”?

19 Ginlaygayan ni Jesus ang iya mga sumulunod nga “padayon . . . nga unahon ang pagpangita sa Ginharian.” (Mat. 6:33) Ngaa ginatuman naton ini? Kay man ginakilala naton ang pagkaimportante sang Ginharian, subong amo ang sentro sang katuyuan sang Dios. Subong sang nakita naton sa nagligad nga kapitulo, amat-amat nga ginpahayag sang balaan nga espiritu ang makakulunyag nga mga kamatuoran parte sa Ginharian. Kon natandog kita sa sini, napahulag kita nga unahon ang pagpangita sa Ginharian.

Kaangay sang tawo nga nalipay gid sang nakasapo sia sing bahandi nga natago, ang mga Cristiano nalipay man nga nasapwan nila ang kamatuoran sang Ginharian (Tan-awa ang parapo 20)

20. Paano ginapakita sang ilustrasyon ni Jesus parte sa bahandi nga natago kon ano ang mangin reaksion sang iya mga sumulunod sa laygay nga padayon nga unahon ang pagpangita sa Ginharian?

20 Nahibaluan ni Jesus kon ano ang mangin reaksion sang iya mga sumulunod sa laygay nga padayon nga unahon ang pagpangita sang Ginharian. Binagbinaga ang iya ilustrasyon parte sa bahandi nga natago. (Basaha ang Mateo 13:44.) Samtang nagaobra, ang mangunguma sa ilustrasyon nakasapo sang bahandi nga natago kag nahangpan niya dayon ang balor sini. Ano ang iya ginhimo? “Bangod sa kalipay, naglakat sia kag ginbaligya ang tanan niya nga pagkabutang kag ginbakal ang latagon.” Ano ang leksion para sa aton? Kon masapwan naton ang kamatuoran sang Ginharian kag mahangpan ang balor sini, nalipay kita sa paghimo sing bisan ano nga sakripisyo para mabutang ang intereses sang Ginharian sa nagakaigo nga lugar sini—una sa aton kabuhi. *

21, 22. Paano ginpakita sang mga mainunungon nga nagasuportar sa Ginharian nga ginauna nila ini? Maghatag sing halimbawa.

21 Ginapakita sang mga mainunungon nga nagasuportar sa Ginharian, indi lamang sa hambal kundi sa buhat, nga ginauna nila ini. Ginagamit nila ang ila kabuhi, ikasarang, kag pagkabutang para sa pagbantala sang Ginharian. Madamo ang naghimo sang daku nga sakripisyo para unahon ang bug-os tion nga ministeryo. Naeksperiensiahan mismo sining tanan nga kinabubut-on  nga nag-alagad kon paano ginapakamaayo ni Jehova ang mga nagauna sa Ginharian. Binagbinaga ang masunod nga halimbawa.

22 Sanday Avery kag Lovenia Bristow nagsugod sa pag-alagad subong mga colporteur (payunir) sa nabagatnan sang United States sa ulihi nga bahin sang dekada 1920. Sang ulihi, nagsiling si Lovenia: “Makalilipay gid ang amon kabuhi ni Avery sa madamo nga tinuig sugod sang nagpayunir kami. Madamo nga beses nga wala kami kahibalo kon diin kami mangita sing inugbakal sang gasolina ukon groserya. Pero, may paagi gid pirme si Jehova sa pag-aman sa amon. Basta wala lang kami nag-untat. Wala gid kami nagakawad-an sang amon kinahanglanon.” Nadumduman ni Lovenia nga isa ka bes sang nagaalagad sila sadto sa Pensacola, Florida, diutay na lang ang ila kuarta kag pagkaon. Sang nagpauli sila sa ila treyler, nakita nila ang duha ka bag nga groserya nga may sulat: “Upod ang gugma halin sa Pensacola Company.” * Si Lovenia nagsiling parte sa madamo nga tuig niya sa bug-os tion nga ministeryo: “Wala gid kami ginpabay-an ni Jehova. Wala niya ginaguba ang pagsalig namon sa iya.”

23. Ano ang ginabatyag mo parte sa kamatuoran sang Ginharian nga imo nasapwan, kag ano ang imo determinasyon?

23 Indi palareho ang kadamuon sang aton ginahimo sa pagbantala. Lainlain ang aton kahimtangan. Pero, mahimo naton kabigon nga isa ka pribilehiyo nga ibantala ang maayong balita sing bug-os kalag. (Col. 3:23) Bangod ginapabaloran naton ang hamili nga kamatuoran sang Ginharian nga aton nasapwan, gusto gid naton nga maghimo sing bisan ano nga sakripisyo para makaalagad sing bug-os. Amo man bala sina ang imo determinasyon?

24. Ano ang isa sa pinakadaku nga nahimo sang Ginharian sa katapusan nga mga adlaw?

24 Sang nagligad nga siglo, gintuman gid sang Hari ang iya tagna sa Mateo 24:14. Kag wala gid sia sing may ginpilit. Ang iya mga sumulunod naggua sa sining maiyaiyahon nga kalibutan kag kinabubut-on nga naghalad sang ila kaugalingon sa pagbantala. Ang ila bug-os kalibutan nga pagbantala sang maayong balita bahin sang tanda sang presensia sang paggahom ni Jesus sa Ginharian—kag isa sa pinakadaku nga nahimo sang Ginharian sa katapusan nga mga adlaw.

^ par. 5 Sa Biblia, ang tun-og naangot sa kabuganaan.—Gen. 27:28; Miq. 5:7.

^ par. 10 Ang tract nga To Whom the Work Is Entrusted nagpaathag: “Ang Golden Age nga kampanya amo ang pagpamalaybalay dala ang mensahe sang ginharian. . . . Luwas sa sini, ginabilin man ang Golden Age sa kada balay, magkuha man sing suskripsion ukon indi ang tagbalay.” Pagligad sang mga tinuig, ginpalig-on ang mga kauturan nga magtanyag sing suskripsion para sa Golden Age kag Watch Tower. Sugod sang Pebrero 1, 1940, ginpalig-on ang katawhan ni Jehova nga magpanagtag sing kopya sang magasin kag ireport ang kadamuon sang ila napahamtang.

^ par. 16 Sadto, ang mga gulang ginaboto sang kongregasyon sa demokratiko nga paagi. Gani, puede nga indi pagbotohon sang mga kauturan ang mga lalaki nga indi ugyon sa pagministeryo. Ang pagbag-o sa teokratiko nga pagtangdo sang mga gulang binagbinagon sa Kapitulo 12.

^ par. 20 Amo man sini ang punto ni Jesus sa ilustrasyon parte sa nagalakbay nga negosyante nga nagapangita sing malahalon nga perlas. Sang nasapwan niya ini, ginbaligya niya ang tanan niya nga pagkabutang kag ginbakal ini. (Mat. 13:45, 46) Ang duha ka parabola nagatudlo man sa aton nga mahimo naton matun-an ang kamatuoran sang Ginharian sa lainlain nga paagi. Indi hungod nga nasapwan ini sang iban; samtang may ara man nga nagapangita gid sini. Pero bisan paano man naton ini nasapwan, handa kita magsakripisyo para unahon ang Ginharian.

^ par. 22 Ang kongregasyon sadto ginatawag nga company.

Magtuon sing Dugang Pa

ANG LALANTAWAN (TULUN-AN NGA EDISYON)

Makugi Ka Bala sa Maayong mga Buhat?

Ini nga artikulo magabinagbinag kon paano ang aton kakugi sa pagbantala kag maayong paggawi nagaganyat sa mga tawo sa Dios.

ANG LALANTAWAN (TULUN-AN NGA EDISYON)

Alagda si Jehova Antes Mag-abot ang Malaut nga mga Adlaw

Ano ang pinasahi nga mga kahigayunan sang tigulang nga mga Cristiano para mapasangkad ang ila ministeryo?