Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Nagagahom ang Ginharian sang Dios!

 KAPITULO 7

Pamaagi sa Pagbantala—Nagagamit sang Tanan nga Pamaagi Para Malab-ot ang mga Tawo

Pamaagi sa Pagbantala—Nagagamit sang Tanan nga Pamaagi Para Malab-ot ang mga Tawo

POKUS SANG KAPITULO

Ginagamit sang katawhan sang Dios ang lainlain nga pamaagi sa pagbantala para malab-ot ang pinakamadamo nga tawo tubtob posible

1, 2. (a) Ano nga pamaagi ang gingamit ni Jesus para mabatian sia sang madamo nga tawo? (b) Paano gin-ilog sang matutom nga mga disipulo sang Cristo ang iya halimbawa, kag ngaa?

GINDUGUKAN sang kadam-an si Jesus sa baybay, pero nagsakay sia sa sakayan kag nagpalayo diutay. Ngaa? Nakahibalo sia nga mas matunog ang iya tingog kon ara sia sa dagat kag mabatian ini sing mas maathag sang madamo nga tawo.—Basaha ang Marcos 4:1, 2.

2 Sa mga tinuig antes kag pagkatapos mabun-ag ang Ginharian, gin-ilog sang matutom nga mga disipulo sang Cristo ang iya halimbawa. Naggamit sila sing pinasahi nga mga pamaagi sa pagpalapnag sang maayong balita sang Ginharian sa madamo nga tawo. Paagi sa panuytoy sang Hari, ang katawhan sang Dios padayon nga nagapangita sing paagi kag nagapasibu sa mga kahimtangan kada may bag-o nga teknolohiya. Luyag naton ini himuon antes mag-abot ang katapusan. (Mat. 24:14) Binagbinaga ang pila sa mga pamaagi nga gingamit naton sa paglab-ot sa mga tawo, bisan diin man sila nagaistar. Hunahunaa man kon paano mo mailog ang pagtuo sang mga nagpalapnag sang maayong balita sadto.

Paglab-ot sa Madamo nga Tawo

3. Ngaa naakig gid ang mga kaaway sang kamatuoran sa aton paggamit sang mga pamantalaan?

3 Pamantalaan. Si Brother Russell kag ang iya kaupdanan nagabalhag na sing Watch Tower halin pa sang 1879 para mapalab-ot ang mensahe sang Ginharian sa madamo. Pero sang mga tinuig antes sang 1914, daw ginmaniobra sang Cristo ang sitwasyon para mapalapnag pa gid ang maayong balita. Ining sagunson nga mga hitabo nagsugod sang 1903. Sadto nga tuig, si Dr. E. L. Eaton, humalambal sang isa ka grupo sang Protestante nga mga ministro sa Pennsylvania, naghangkat kay Charles Taze Russell nga debatehan nila ang mga doktrina sang Biblia. Sa iya sulat kay Russell, si Eaton nagsiling: “Sa banta ko kon debatehan naton ang mga doktrina nga wala naton ginaugyunan . . . mangin interesado gid ang publiko.” Nag-ugyon man sanday Russell kag ang iya kaupdanan nga mangin interesado ang publiko gani nagsugtanay sila nga ibalhag ang mga debate sa nagapanguna  nga pamantalaan, ang Pittsburgh Gazette. Bangod madamo ang nanamian sa mga artikulo kag sa matahom nga paathag ni Russell sa kamatuoran sang Biblia, nagtanyag ang pamantalaan nga ibalhag ang iya mga diskurso kada semana. Sigurado nga naakig gid sa sini ang mga kaaway sang kamatuoran!

Sang 1914, sobra 2,000 ka pamantalaan ang nagabalhag sang mga sermon ni Russell

4, 5. Ano nga kinaiya ang ginpakita ni Russell, kag paano sia mailog sang mga may katungdanan sa organisasyon?

4 Wala magdugay mas madamo na nga pamantalaan ang luyag magbalhag sang mga diskurso ni Russell. Sang 1908, ginreport sang Watch Tower nga ang mga sermon ginabalhag na sa “onse ka pamantalaan sing regular.” Ang mga kauturan nga pamilyar sa pamantalaan naglaygay kay Russell nga kon sayluhon niya sa mas kilala nga siudad ang mga opisina sang Sosiedad sa Pittsburgh, mas madamo nga pamantalaan ang magabalhag sang base sa Biblia nga mga artikulo. Pagkatapos mabinagbinag ining laygay kag ang iban pa nga butang, ginsaylo ni Russell ang mga opisina sa Brooklyn, New York, sang 1909. Ang resulta? Pila ka bulan pagkatapos sang pagsaylo, mga 400 na ka pamantalaan ang nagabalhag sang mga diskurso, kag padayon pa ini nga nagadamo. Sang natukod na ang Ginharian sang 1914, sobra 2,000 ka pamantalaan sa apat ka lenguahe ang nagabalhag sang mga sermon kag mga artikulo ni Russell!

5 Ano ang importante nga leksion sa sini nga pag-uswag? Dapat ilugon sang mga may katungdanan sa organisasyon sang Dios ang pagkamapainubuson ni Russell. Paano? Sa paghimo sing importante nga mga desisyon, binagbinaga ang laygay sang iban.—Basaha ang Hulubaton 15:22.

6. Ano ang epekto sa isa ka babayi sang mga kamatuoran nga ginbalhag sa mga pamantalaan?

6 Ang mga kamatuoran sang Ginharian nga ginbalhag sa mga pamantalaan nagpabag-o sa kabuhi sang mga tawo. (Heb. 4:12) Halimbawa, si Ora Hetzel, nga nabawtismuhan sang 1917, isa sa madamo nga nakatuon sang kamatuoran paagi sa sini. “Sang may bana na ako,” siling ni Ora, “ginbisitahan ko ang akon iloy sa Rochester, Minnesota. Pag-abot ko, nakita ko si Nanay nga nagagunting sang mga artikulo sa isa ka pamantalaan. Mga sermon gali ini ni Russell. Ginpaathag sa akon ni Nanay ang mga butang nga iya natun-an sa sini.” Ginbaton ni Ora ini nga mga kamatuoran kag nagpabilin sia nga matutom nga manugbantala sang Ginharian sang Dios sa sulod sang mga 60 ka tuig.

7. Ngaa ginbinagbinag liwat sang mga nagapanguna ang paggamit sang mga pamantalaan?

7 Sang 1916, ginbinagbinag liwat sang mga nagapanguna ang paggamit sang mga pamantalaan sa pagpalapnag sang maayong balita bangod sa duha ka importante nga hitabo. Una, nagadabdab sadto ang Dakung Inaway, gani mabudlay mangita sing mga suplay sa pag-imprinta. Sang 1916, ginsugid sang aton departamento sang pamantalaan sa Britain ang ila kabudlayan: “Mga sobra na lang karon sa 30 ka pamantalaan ang nagabalhag sang mga Sermon. Basi mabuhinan pa gid ini kay nagamahal na gid ang papel.” Ikaduha, napatay si Brother Russell sang Oktubre 31, 1916. Gani, ginpahibalo sa Disiembre 15, 1916, nga  Watch Tower: “Bangod nagtaliwan na si Brother Russell, ang pagbalhag sang mga sermon [sa mga pamantalaan] untaton na.” Bisan pa gin-untat na ining pamaagi sang pagbantala, ang iban naman nga pamaagi, subong sang “Photo-Drama of Creation,” padayon nga nagamadinalag-on.

8. Ano ang nadalahig sa paghimo sang “Photo-Drama of Creation”?

8 Piktyur nga mga presentasyon. Mga tatlo ka tuig nga nagpangabudlay si Russell kag ang iya mga kaupod sa paghimo sang “Photo-Drama of Creation,” nga ginpagua sang 1914. (Hulu. 21:5) Ang Drama, nga amo anay ang tawag sa sini, isa ka mapahituon nga kombinasyon sang nagahulag nga mga piktyur, narekord nga tunog, kag de-kolor nga mga kristal nga slide. Ginatos ka tawo ang nakigbahin sa pagdrama sa mga eksena sang Biblia nga ginakuhaan sang kamera, kag may mga sapat pa gani. “Madamo nga sapat gikan sa isa sa dalagku nga zoo,” siling sang  report sang 1913, “ang gingamit sa paghimo sang nagahulag nga mga piktyur sang bahin ni Noe sa kasaysayan sang kalibutan.” Ang gingamit naman nga ginatos ka kristal nga slide, manomano nga ginkoloran sang mga artist halin sa London, New York, Paris, kag Philadelphia.

9. Ngaa ginpangabudlayan kag gingastuhan gid ang paghimo sang “Photo-Drama”?

9 Ngaa ginpangabudlayan kag gingastuhan gid ang paghimo sang “Photo-Drama”? Ang resolusyon sa 1913 nga serye sang kombension nagsiling: “Ang kadalag-an sang mga pamantalaan sa Amerika sa pag-impluwensia sa publiko paagi sa mga komiks kag ilustrasyon . . . pati na ang popularidad sang nagahulag nga mga piktyur kay bag-o ini kag makapresentar sang impormasyon sa lainlain nga paagi, nagapakita nga epektibo ini kag, nagapati kami, kag may rason gid, subong mga manugbantala kag mga manunudlo sang Biblia, nga gamiton ang nagahulag nga mga piktyur kag stereopticon nga mga slide subong epektibo kag maayo gid nga pamaagi para sa mga ebanghelisador kag mga manunudlo.”

Ibabaw: Pag-opereyt sang “Photo-Drama”; idalom: Kristal nga mga slide sang “Photo-Drama”

10. Daw ano ka lapnag ang pagpasalida sang “Photo-Drama”?

10 Sang 1914, ang “Photo-Drama” ginpasalida sa 80 ka siudad kada adlaw. Halos walo ka milyon sa United States kag Canada ang nakatan-aw sini. Sina man nga tuig, ang “Photo-Drama” ginpasalida sa Australia, Britain, Denmark, Finland, Germany, New Zealand, Norway, Sweden, kag Switzerland. May ginhimo pa gid nga simple nga bersion nga wala sing nagahulag nga piktyur, para sa magagmay nga mga banwa. Gintawag ini nga “Eureka Drama” kag mas barato ini kag mahapos saylusayluhon. Sang 1916, ang “Photo-Drama” ukon “Eureka Drama” nabadbad na sa Armenian, Dano-Norwegian, French, German, Greek, Italian, Polish, Spanish, kag Swedish.

Sang 1914, ang “Photo-Drama” ginpasalida sa mga awditoryum nga puno sang tawo

11, 12. Ano ang epekto sang “Photo-Drama” sa isa ka pamatan-on, kag ano nga halimbawa ang iya ginpakita?

11 Ang French nga “Photo-Drama” may daku gid nga epekto sa 18 anyos nga si Charles Rohner. “Ginpasalida ini sa amon banwa sa Colmar, Alsace, France,” siling ni Charles. “Sa umpisa pa lang, nanamian gid ako sa maathag nga presentasyon sang kamatuoran sang Biblia.”

12 Subong resulta, si Charles nabawtismuhan sang 1922 kag nagsulod sa bug-os tion nga pag-alagad. Ang iya una nga asaynment amo ang pagbulig sa pagpasalida sang “Photo-Drama” sa France. Si Charles nagsiling: “Madamo ako sing asaynment—manugtokar sang byolin, account servant, kag literature servant. Ako man ang nagapatinong sa tumalan-aw antes magsugod ang programa. Kon intermisyon, nagatanyag kami sang literatura. May ginaasayn kami nga mga brother ukon sister sa isa ka seksion sang hall. Ang kada isa sa ila may dala nga mga literatura kag ginatanyagan ang kada tawo sa ila seksion. Isa pa, sa entrada sang hall, may mga lamesa kami nga puno sing literatura.” Sang 1925, gin-agda si Charles nga mag-alagad sa Bethel sa  Brooklyn, New York. Gin-asayn sia didto nga konduktor sang orkestra para sa bag-o nga estasyon sang radyo nga WBBR. Sa tapos mabinagbinag ang halimbawa ni Brother Rohner, pamangkuton naton ang aton kaugalingon, ‘Handa bala ako sa pagbaton sang bisan ano nga asaynment para makabulig sa pagpalapnag sang mensahe sang Ginharian?’—Basaha ang Isaias 6:8.

13, 14. Paano gingamit ang radyo sa pagpalapnag sang maayong balita? (Tan-awa man ang mga kahon nga “ Programa sa WBBR” kag “ Isa ka Talalupangdon nga Kombension.”)

13 Radyo. Sang dekada 1920, ang interes sa “Photo-Drama” amat-amat nga nag-ugdaw, pero radyo naman ang nangin importante nga paagi sa pagpalapnag sang maayong balita sang Ginharian. Sang Abril 16, 1922, ginhatag ni Brother Rutherford ang iya una nga broadcast halin sa Metropolitan Opera House sa Philadelphia, Pennsylvania. Ginabulubanta nga 50,000 ang nakabati sa pamulongpulong nga “Minilyon nga Nagakabuhi Karon ang Indi na Mapatay.” Dayon sang 1923, ginhimo ang una nga pag-broadcast sang kombension. Magluwas sa komersial nga mga estasyon, nagdesisyon ang mga nagapanguna nga mas maayo nga magtukod sang aton kaugalingon nga estasyon. Gani, gintukod ini sa Staten Island, New York, kag ginrehistro subong WBBR. Una ini nga nagpalayag sa kahanginan sang Pebrero 24, 1924.

Sang 1922, mga 50,000 ang nakabati sang gin-broadcast nga pamulongpulong nga “Minilyon nga Nagakabuhi Karon ang Indi na Mapatay”

14 Ang Watch Tower nga Disiembre 1, 1924 nagsiling parte sa katuyuan sang WBBR: “Nagapati kami nga ang radyo amo ang pinakabarato kag pinakaepektibo nga paagi sa pagpalapnag sang mensahe sang kamatuoran.” Nagsiling pa ini: “Kon luyag sang Ginuo nga magtukod pa sang madamo nga estasyon para sa pagpalapnag sang kamatuoran, magaaman sia sing kuarta suno sa iya maayo nga paagi.” (Sal. 127:1) Sang 1926, ang katawhan ni Jehova may anom na ka estasyon sang radyo. Ang duha ara sa United States—WBBR sa New York kag WORD malapit sa Chicago. Ang apat ara sa Canada—Alberta, British Columbia, Ontario, kag Saskatchewan.

15, 16. (a) Ano ang reaksion sang klero sa Canada parte sa aton paggamit sang radyo? (b) Paano nakabulig ang mga lektyur sa radyo sa pagpamalaybalay?

15 Ining lapnag nga pag-broadcast sang kamatuoran sang Biblia natalupangdan sang klero sang Cristiandad. Si Albert Hoffman, nga pamilyar sa hilikuton sa estasyon sang radyo sa Saskatchewan, Canada, nagsiling: “Labi nga nagadamo ang nakakilala sa mga Estudyante sang Biblia [ang tawag sadto sa mga Saksi ni Jehova]. Daku gid nga panaksi ang nahimo. Pero sang 1928, gin-ipit na sang klero ang mga opisyal amo nga ang tanan nga estasyon sa Canada nga ginagamit sang mga Estudyante sang Biblia ginkuhaan sing lisensia.”

16 Bisan pa ginsira na ang aton mga estasyon sang radyo sa Canada, ang mga lektyur sa Biblia padayon gihapon nga ginapalayag sa komersial nga mga estasyon. (Mat. 10:23) Para mapanginpuslan sing maayo ining mga programa, ginbutang sa Watch Tower kag Golden Age (Magmata! karon) ang listahan sang mga estasyon nga nagapalayag sang kamatuoran sang Biblia para  mapalig-on sang mga nagapamalaybalay ang mga tawo nga mamati sa mga lektyur sa ila lokal nga mga estasyon. Ano ang epekto sini? Ang Bulletin sang Enero 1931 nagsiling: “Ang radyo daku gid nga bulig sa mga abyan sa ila pagpamalaybalay. Madamo sing nabaton nga report sa opisina nga bangod nabatian na sang mga tawo ang mga lektyur ni Brother Rutherford, nagakuha sila dayon sang mga libro nga ginatanyag sa ila.” Ginlaragway sang Bulletin ang pagpalayag sa mga radyo kag ang pagpamalaybalay subong “duha ka daku nga pamaagi sang pagbantala sang organisasyon sang Ginuo.”

17, 18. Bisan pa nagbag-o ang kahimtangan, ano ang padayon nga nangin papel sang radyo?

17 Sang dekada 1930, nagdamo pa gid ang nagapamatok sa paggamit naton sang komersial nga mga estasyon sang radyo. Gani sang 1937, ang katawhan ni Jehova nagpasibu sa nagabag-o nga mga kahimtangan. Gin-untat nila ang paggamit sang komersial nga mga radyo kag nagkonsentrar sa pagpamalaybalay. * Pero ang radyo may importante gihapon nga papel sa pagpalapnag sang mensahe sang Ginharian sa mga bahin sang kalibutan nga malayo ukon mabudlay bantalaan. Halimbawa, halin sang 1951 asta 1991, may estasyon sa West Berlin, Germany, nga regular nga naga-broadcast sang mga diskurso sa Biblia agod mabatian sang mga nagaistar sa anay East Germany. Sugod sang 1961 kag pagligad sang kapin sa 30 ka tuig, ang estasyon sang pungsod sa Suriname, South America, semanal nga naga-broadcast sang 15 ka minuto nga programa sa pagpalapnag sang mga kamatuoran sang Biblia. Halin sang 1969 asta 1977, ang organisasyon naghimo sang sobra 350 ka narekord nga programa sa radyo sa serye nga “Ang Bug-os nga Kasulatan Mapuslanon.” Mabatian ini sa 291 ka estasyon sang radyo, sa 48 ka estado sang United States. Sang 1996, ang isa ka estasyon sang radyo sa Apia, kapital sang Samoa sa South Pacific, semanal nga nagpalayag sang programa nga “Mga Sabat sa Imo mga Pamangkot sa Biblia.”

18 Samtang nagahingapos ang ika-20 nga siglo, ang radyo wala na gingamit subong panguna nga pamaagi sa pagpalapnag sang maayong balita. Pero may bag-o naman nga teknolohiya nga nagpaposible para malab-ot ang indi maisip nga kadamuon sang tawo.

19, 20. Ngaa ang katawhan ni Jehova naghimo sang jw.org, kag ngaa epektibo gid ini? (Tan-awa man ang kahon nga “ JW.ORG.”)

19 Internet. Sang 2013, sobra na 2.7 ka bilyon ukon halos 40 porsiento sang populasyon sang kalibutan, ang may access sa Internet. Suno sa isa ka pagbulubanta, mga duha ka bilyon ka tawo ang naga-Internet sa mga gadyet, subong sang mga smartphone kag tablet. Padayon ini nga nagadamo sa bilog nga kalibutan, kag ang Africa amo subong ang pinakamasunson nga naga-internet sa gadyet, diin sobra 90 ka milyon ang may kaugalingon nga koneksion sa Internet. Bangod sini, nagbag-o na ang pamaagi sa pagpalapnag sang impormasyon.

 20 Sugod sang 1997, ang katawhan ni Jehova naggamit man sini nga pamaagi. Sang 2013, ang jw.org Web site ma-browse na sa mga 300 ka lenguahe, kag ang base sa Biblia nga mga impormasyon sa sobra 520 ka lenguahe. Ang aton site ginakadtuan sing sobra 750,000 ka beses kada adlaw. Kada bulan, dugang pa sa pagtan-aw sang video, ang mga tawo naga-download sang sobra 3 ka milyon ka kompleto nga libro, 4 ka milyon ka kompleto nga magasin, kag 22 ka milyon ka audio track.

21. Ano ang natun-an mo sa eksperiensia ni Sina?

21 Ang Web site epektibo gid nga pamaagi sa pagpalapnag sang maayong balita, bisan sa mga lugar nga ginadumilian ang aton hilikuton. Halimbawa, sang temprano sang 2013, ang lalaki nga si Sina nakabukas sang jw.org kag nagtawag sa ulong talatapan sa United States para mangayo sing dugang nga impormasyon parte sa Biblia. Ngaa pinasahi gid ini? Si Sina isa ka Muslim kag nagaistar sa isa ka malayo nga lugar sa pungsod nga ginadumilian gid ang mga Saksi ni Jehova. Bangod sini, may kahimusan nga ginhimo para ma-Bible study si Sina sing duha ka beses kada semana sang isa ka Saksi sa United States. Nagatuon sila paagi sa Internet.

Pagtudlo sa mga Indibiduwal

22, 23. (a) May iban bala nga pamaagi nga nagbulos sa pagpamalaybalay? (b) Paano ginpakamaayo sang Hari ang aton mga panikasog?

22 Ang mga pamaagi nga gingamit naton para malab-ot ang madamo nga tawo, subong sang pamantalaan, “Photo-Drama,” programa sa radyo, kag Web site, wala gintuyo nga magbulos sa pagpamalaybalay. Ngaa? Bangod ang katawhan ni Jehova nakatuon sa halimbawa ni Jesus. Wala lang sia nagbantala sa kadam-an  kundi nagkonsentrar sia sa pagbulig sa mga indibiduwal. (Luc. 19:1-5) Ginhanas ni Jesus ang iya mga disipulo nga amo man sini ang himuon, kag ginhatagan niya sila sing mensahe nga ibantala. (Basaha ang Lucas 10:1, 8-11.) Subong sang ginbinagbinag sa Kapitulo 6, ginapalig-on pirme sang mga nagapanguna ang tanan nga alagad ni Jehova nga istoryahon ang mga tawo sing personal.—Binu. 5:42; 20:20.

23 Pagligad sang isa ka gatos ka tuig sa tapos mabun-ag ang Ginharian, sobra na 7.9 ka milyon ang aktibo nga nagatudlo sang katuyuan sang Dios sa iban. Wala sing duhaduha nga ginpakamaayo gid sang Hari ang mga pamaagi nga aton gingamit sa pagpahayag sang Ginharian. Subong sang makita naton sa masunod nga kapitulo, gin-amanan man niya kita sing mga kagamitan nga kinahanglan naton sa pagpalapnag sang maayong balita sa tanan nga pungsod, tribo, kag hambal.—Bug. 14:6.

^ par. 17 Sang 1957, nagdesisyon ang mga nagapanguna nga isira ang WBBR sa New York, ang katapusan naton nga estasyon sang radyo.

Magtuon sing Dugang Pa

Paano Kita Dapat “Magsabat sa Kada Isa”?

Paano kita makapangatarungan sing epektibo paagi sa Kasulatan kon nagasabat sa mabudlay nga mga pamangkot? Binagbinaga ang tatlo ka paagi nga magamit naton para makapakumbinsi ang aton sabat.