Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Nagagahom ang Ginharian sang Dios!

 KAPITULO 1

“Magkari ang Imo Ginharian”

“Magkari ang Imo Ginharian”

POKUS SANG KAPITULO

Usisaa ang gintudlo ni Jesus parte sa Ginharian sang Dios

1, 2. Ano ang ginsiling ni Jehova nga nabatian sang tatlo ka apostoles ni Jesus, kag ano ang ila ginhimo?

KON may ginsugo sa imo si Jehova nga Dios, ano ang himuon mo? Bisan ano man ini, sigurado nga tumanon mo gid. Indi bala?

2 Naeksperiensiahan ini sang tatlo ka apostoles ni Jesus nga sanday Pedro, Santiago, kag Juan wala madugay pagkatapos sang Paskua sang 32 C.E. (Basaha ang Mateo 17:1-5.) Sang gindala sila sang ila Agalon sa “isa ka mataas nga bukid,” nakita nila sa palanan-awon si Jesus subong isa ka mahimayaon nga langitnon nga Hari. Daw matuod gid ang palanan-awon kay gusto pa tani ni Pedro nga mag-entra sa sini. Samtang nagahambal si Pedro, ginlikupan sila sang panganod. Dayon naeksperiensiahan ni Pedro kag sang iya mga kaupod ang isa ka pribilehiyo nga diutay lang gid ang nakatigayon—ang mabatian ang tingog ni Jehova. Pagkatapos mapamatud-an nga Anak niya si Jesus, nagsiling si Jehova: “Magpamati kamo sa iya.” Gintuman ini sang mga apostoles. Ginpamatian nila ang gintudlo ni Jesus kag ginpalig-on ang iban nga amo man sini ang himuon.—Binu. 3:19-23; 4:18-20.

Pirme gid ginasambit ni Jesus ang parte sa Ginharian sang Dios

3. Ngaa gusto ni Jehova nga pamatian naton ang iya Anak, kag ano nga topiko ang maayo nga binagbinagon naton?

3 Ang mga tinaga—“Magpamati kamo sa iya”—ginsulat sa Biblia para sa aton. (Roma 15:4) Ngaa? Bangod si Jesus amo ang humalambal ni Jehova kag kada magtudlo si Jesus, ginasugid niya kon ano ang gusto sang iya Amay nga mahibaluan naton. (Juan 1:1, 14) Ang Ginharian sang Dios, ang langitnon nga Mesianikong gobierno nga ginatapuan ni Cristo Jesus kag sang 144,000 ka kaupod niya nga gumalahom, amo ang pirme mabatian kay Jesus. Gani, maayo nga binagbinagon naton ining importante nga topiko. (Bug. 5:9, 10; 14:1-3; 20:6) Pero, usisaon anay naton kon ngaa pirme gid ginasambit ni Jesus ang parte sa Ginharian sang Dios.

“Sa Kabuganaan sang Tagipusuon . . .”

4. Paano ginpakita ni Jesus nga malapit gid sa iya tagipusuon ang Ginharian?

4 Malapit gid sa tagipusuon ni Jesus ang Ginharian. Ngaa nasiling naton ina? Bangod ang aton mga ginahambal nagapakita kon ano ang ara sa aton tagipusuon—kon ano gid ang  importante sa aton. Si Jesus mismo nagsiling: “Sa kabuganaan sang tagipusuon nagahambal ang baba.” (Mat. 12:34) Kada may kahigayunan, nagasugid gid si Jesus parte sa Ginharian. Sobra 100 ka beses nga ginpatuhuyan ang Ginharian sa apat ka Ebanghelyo, ang kalabanan sini ginhambal ni Jesus. Ginhimo niya ini nga tema sang iya pagbantala, nga nagasiling: “Dapat ko man ibantala ang maayong balita sang Ginharian sang Dios sa iban nga mga siudad, kay tungod sini ginpadala ako.” (Luc. 4:43) Bisan sang ginbanhaw na sia, padayon gihapon nga ginpakighambal ni Jesus ang Ginharian sa iya mga disipulo. (Binu. 1:3) Makita naton nga ang iya tagipusuon puno gid sing apresasyon para sa Ginharian kay pirme niya ini ginapakig-istorya.

5-7. (a) Paano naton nahibaluan nga ang Ginharian malapit sa tagipusuon ni Jehova? Maghatag sing halimbawa. (b) Paano naton mapakita nga malapit sa aton tagipusuon ang Ginharian?

5 Ang Ginharian malapit man sa tagipusuon ni Jehova. Paano naton ina nahibaluan? Dumduma nga si Jehova ang nagpadala sang iya bugtong nga Anak sa kalibutan; kay Jehova naghalin ang tanan nga ginsiling kag gintudlo sang iya Anak. (Juan 7:16; 12:49, 50) Kay Jehova man naghalin ang tanan nga nasulat sa apat ka Ebanghelyo parte sa kabuhi kag ministeryo ni Jesus. Hunahunaa sing makadali kon ano ang ginapahangop sini.

Maayo nga ipamangkot sang kada isa, ‘Malapit bala sa akon tagipusuon ang Ginharian sang Dios?’

6 Halimbawa, nagatipon ka sing mga retrato para ibutang sa album sang pamilya. Madamo ka sing retrato pero indi tanan makaigo sa album. Ano ang himuon mo? Magpili ka lang sing pila. Sing kaanggid, ang Ebanghelyo kaangay man sa album nga nagapakilala kay Jesus. Wala ginpasulat ni Jehova sa mga manunulat sang Ebanghelyo ang tanan nga ginsiling kag ginhimo ni Jesus sang ari sia sa duta. (Juan 20:30; 21:25) Pero, gintuytuyan sila sang espiritu ni Jehova sa pagsulat sang pila ka detalye nga makabulig sa aton nga mahangpan ang katuyuan sang ministeryo ni Jesus kag kon ano ang pinakaimportante kay Jehova. (2 Tim. 3:16, 17; 2 Ped. 1:21) Bangod ang Ebanghelyo puno sang mga panudlo ni Jesus parte sa Ginharian sang Dios, makasiling kita nga ang Ginharian malapit gid sa tagipusuon ni Jehova. Hunahunaa—luyag ni Jehova nga mahibaluan naton ang parte sa iya Ginharian!

7 Maayo nga ipamangkot sang kada isa, ‘Malapit bala sa akon tagipusuon ang Ginharian sang Dios?’ Kon huo, mamati gid kita sa ginsiling kag gintudlo ni Jesus parte sa sina nga Ginharian—kon ano ang importansia sini, kag kon paano kag kon san-o ini magakari.

“Magkari ang Imo Ginharian”—Paano?

8. Paano ginsumaryo ni Jesus ang importansia sang Ginharian?

8 Binagbinaga ang modelo nga pangamuyo. Sa simple nga mga tinaga, ginsumaryo ni Jesus ang importansia sang Ginharian, kag ang pagahimuon sini. Ini nga pangamuyo may pito ka pangabay. Ang una nga tatlo parte sa mga katuyuan ni Jehova—pagpakabalaan sang iya ngalan, pagkari sang iya Ginharian,  kag pagtuman sang iya kabubut-on sa duta subong sang sa langit. (Basaha ang Mateo 6:9, 10.) Ining tatlo ka pangabay naangot sa isa kag isa. Ang Mesianikong Ginharian amo ang instrumento ni Jehova sa pagpakabalaan sang iya ngalan kag pagtuman sang iya kabubut-on.

9, 10. (a) Ano ang himuon sang Ginharian sang Dios kon magkari na ini? (b) Ano nga saad sang Biblia ang gusto mo gid nga matuman?

9 Paano magkari ang Ginharian sang Dios? Kon nagapangamuyo kita nga “Magkari ang imo Ginharian,” ginapangabay naton nga magpanghikot ina nga Ginharian. Kon magkari na ini, gamiton sang Ginharian ang bug-os nga gahom sini sa duta. Dulaon sini ang malaut nga sistema sang mga butang, lakip ang tanan nga gobierno sang tawo, kag paluntaron ang matarong nga bag-ong kalibutan. (Dan. 2:44; 2 Ped. 3:13) Dayon, sa paggahom sang Ginharian, ang bug-os nga duta himuon nga paraiso. (Luc. 23:43) Ang mga ara sa memorya sang Dios buhion liwat kag makaupod sang ila mga hinigugma. (Juan 5:28, 29) Ang mga matinumanon mangin himpit kag magkabuhi sing dayon. (Bug. 21:3-5) Sa katapusan, ang duta bug-os nga mahiusa sa langit, kag magapabanaag sang kabubut-on ni Jehova nga Dios! Gusto mo bala makita ang katumanan sini nga mga saad sang Biblia? Dumduma nga kada mangamuyo ka nga magkari ang Ginharian sang Dios, ginapangamuyo mo nga matuman ining matahom nga mga saad.

10 Maathag nga ang Ginharian sang Dios wala pa “magkari” sa pagtuman sang modelo nga pangamuyo. Kay man, ang mga gobierno sang tawo pa gihapon ang nagagahom kag wala pa ang matarong nga bag-ong kalibutan. Pero may maayong balita. Ang Ginharian sang Dios natukod na, subong sang binagbinagon naton sa masunod nga kapitulo. Pero, usisaon anay naton ang ginsiling ni Jesus kon san-o tukuron ang Ginharian kag kon san-o ini magakari.

San-o Tukuron ang Ginharian sang Dios?

11. Ano ang ginpakita ni Jesus parte sa pagtukod sang Ginharian sang Dios?

11 Ginpakita ni Jesus nga ang Ginharian indi pagtukuron sang unang siglo C.E., bisan pa ginapaabot ini sang pila niya ka disipulo. (Binu. 1:6) Binagbinaga ang duha ka magkatuhay nga ilustrasyon nga ang isa ginsugid niya sang 31 C.E. kag ang ikaduha sang 33 C.E.

12. Paano ginapakita sang ilustrasyon parte sa trigo kag hilamon nga ang Ginharian wala natukod sang unang siglo C.E.?

12 Ang ilustrasyon parte sa trigo kag hilamon. (Basaha ang Mateo 13:24-30.) Mahimo nga ginsugid kag ginpaathag ni Jesus ini nga ilustrasyon sang tigpamulak sang 31 C.E. (Mat. 13:36-43) Amo ini ang kahulugan sang ilustrasyon: Sang napatay na ang mga apostoles, ang Yawa nagsab-ug sing hilamon (butig nga mga Cristiano) sa tunga sang trigo (“mga anak sang Ginharian,” ukon hinaplas nga mga Cristiano). Ang trigo kag ang hilamon pabay-an lang nga magtubo asta sa pag-ani, nga amo “ang hingapusan sang sistema sang mga butang.” Sa tig-alani, ang  mga hilamon gabuton. Dayon, ang trigo tipunon. Gani, ginapakita sang ilustrasyon nga ang Ginharian tukuron, indi sang unang siglo C.E., kundi pagkatapos sang tion sang pagtubo. Subong sang natabo, ang tion sang pagtubo natapos sang 1914 kag sa sini man nga tion nagsugod ang tig-alani.

13. Paano ginpakita ni Jesus nga indi sia dayon mangin Mesianikong Hari pagbalik niya sa langit?

13 Ang ilustrasyon parte sa mina. (Basaha ang Lucas 19:11-13.) Ini nga ilustrasyon ginsugid ni Jesus sang 33 C.E., sang nagapakadto sia sa Jerusalem sa katapusan nga tion. Abi sang iban niya nga tagpalamati tukuron niya ang Ginharian pag-abot nila sa Jerusalem. Agod tadlungon ina nga pagpati kag ipakita nga madugay pa ini matabo, ginpaanggid ni Jesus ang iya kaugalingon sa “isa ka dungganon nga tawo” nga magalakbay “sa malayo nga lugar agod mangin hari.” * Sa bahin ni Jesus, ang “malayo nga lugar” amo ang langit, diin itangdo sia sang iya Amay subong Hari. Pero nahibaluan ni Jesus nga indi sia dayon mangin Mesianikong Hari pagbalik niya sa langit. Kundi, mapungko sia anay sa tuo sang Dios kag maghulat sang nagakaigo nga tion. Nakita naton nga ini nga paghulat naglawig sing ginatos ka tuig.—Sal. 110:1, 2; Mat. 22:43, 44; Heb. 10:12, 13.

San-o Magakari ang Ginharian sang Dios?

14. (a) Ano ang sabat ni Jesus sa pamangkot sang apat niya ka apostoles? (b) Ano ang ginasugid sa aton sang katumanan sang tagna ni Jesus parte sa iya presensia kag sa Ginharian?

14 Mga pila ka adlaw antes ginpatay si Jesus, ginpamangkot sia sang apat niya ka apostoles: “Ano bala ang tanda sang imo presensia kag sang hingapusan sang sistema sang mga butang?”  (Mat. 24:3; Mar. 13:4) Ginsabat ini ni Jesus paagi sa pagsugid sing masangkad nga tagna sa Mateo kapitulo 24 kag 25. Detalyado nga ginsugid ni Jesus ang nanuhaytuhay nga hitabo sa bilog nga kalibutan nga mangin tanda sang hut-ong sang tion sang iya “presensia.” Ang pagsugod sang iya presensia magadungan sa pagtukod sang Ginharian; kag ang hingapusan sang iya presensia magadungan man sa pagkari sang Ginharian. Madamo kita sing pamatuod nga ang tagna ni Jesus nagakatuman na sugod pa sang 1914. * Gani, ang pagsugod sang iya presensia kag ang pagtukod sang Ginharian natabo sina nga tuig.

15, 16. Sin-o ang ginatumod ni Jesus nga “ini nga kaliwatan”?

15 Apang, san-o gid magakari ang Ginharian sang Dios? Wala ginsugid ni Jesus ang eksakto nga petsa. (Mat. 24:36) Pero may ginsiling sia nga nagapakita nga malapit na gid ini. Nagsiling si Jesus nga ang Ginharian magakari kon “ini nga kaliwatan” nakasaksi na sang katumanan sang tanda. (Basaha ang Mateo 24:32-34.) Sin-o bala “ini nga kaliwatan”? Binagbinagon naton sing maayo ang ginsiling ni Jesus.

16 “Ini nga kaliwatan.” Mga di-tumuluo bala ang ginatumod ni Jesus? Indi. Sin-o bala sadto ang iya tagpalamati? Ang pila ka apostoles nga “nagpalapit sa iya . . . nga silahanon lang.” (Mat. 24:3) Ini nga mga apostoles ginhaplasan sang ulihi sang balaan nga espiritu. Binagbinaga man ang konteksto. Antes niya ginsambit “ini nga kaliwatan,” si Jesus nagsiling: “Tun-i ninyo karon ang ilustrasyon gikan sa kahoy nga higuera: Kon ang bag-o nga mga sanga sini magapanalingsing na, mahibaluan ninyo nga malapit na ang tingadlaw. Subong man, kon makita ninyo ini tanan, mahibaluan ninyo nga malapit na sia sa mga puertahan.” Ang hinaplas nga mga sumulunod ni Jesus—indi ang mga di-tumuluo—amo ang makakita kag makahangop sang iya tagna, nga si Jesus “malapit na . . . sa mga puertahan.” Gani ang gintumod ni Jesus nga “ini nga kaliwatan,” amo ang iya hinaplas nga mga sumulunod.

17. Ano ang kahulugan sang mga ekspresyon nga “kaliwatan” kag “ini tanan”?

17 “Indi gid magtaliwan tubtob mahanabo ini tanan.” Paano ini matuman? Agod masabat ini, dapat mahibaluan naton ang duha ka butang: ang kahulugan sang “kaliwatan” kag “ini tanan.” Ang “kaliwatan” masami nagapatuhoy sa mga tawo nga lainlain ang edad nga nag-abtanay sa isa ka hut-ong sang tion. Ang kaliwatan indi sobra kalawig, kag may katapusan. (Ex. 1:6) Ang ekspresyon nga “ini tanan” nagalakip sa tanan nga gintagna nga mahanabo sa presensia ni Jesus, halin sang nagsugod ini sang 1914 asta sa hingapusan sini sa “dakung kapipit-an.”—Mat. 24:21.

18, 19. Paano naton dapat hangpon ang ginsiling ni Jesus parte sa “ini nga kaliwatan,” kag ano ang aton konklusion?

18 Paano naton dapat hangpon ang ginsiling ni Jesus parte sa “ini nga kaliwatan”? Ang kaliwatan ginahuman sang duha ka nag-abtanay nga grupo sang mga hinaplas. Ang una nga grupo amo ang mga hinaplas nga nakakita sang pagsugod sang  katumanan sang tanda sang 1914, kag ang ikaduha amo ang mga hinaplas nga nangin kontemporaryo sang una nga grupo. Ang pila sa ikaduha nga grupo buhi pa kag makasaksi sang dakung kapipit-an. Ining duha ka grupo nagahuman sang isa ka kaliwatan bangod may tion nga nag-abtanay ang ila kabuhi subong mga hinaplas nga Cristiano. *

19 Ano ang aton konklusion? Nahibaluan naton nga ang tanda sang presensia sang paggahom ni Jesus nagakatabo na sa bilog nga kalibutan. Naintiendihan man naton nga ang mga hinaplas nga buhi pa subong kag bahin sang “ini nga kaliwatan” nagatigulang na. Pero indi sila tanan mapatay antes magsugod ang dakung kapipit-an. Gani makasiling kita nga malapit na gid magkari ang Ginharian sang Dios kag maggahom sa bilog nga duta! Makalilipay gid nga masaksihan ang katumanan sang pangamuyo nga gintudlo ni Jesus: “Magkari ang imo Ginharian”!

20. Anong importante nga topiko ang binagbinagon sa sini nga libro, kag ano ang usisaon sa masunod nga kapitulo?

20 Indi gid naton dapat pagkalimtan ang ginsiling ni Jehova sa langit parte sa iya Anak: “Magpamati kamo sa iya.” Subong matuod nga mga Cristiano, gusto gid naton tumanon ina nga sugo. Interesado gid kita sa tanan nga ginsiling kag gintudlo ni Jesus parte sa Ginharian sang Dios. Ang nahimo na kag pagahimuon pa sang Ginharian isa gid ka importante nga topiko nga binagbinagon sa sini nga libro. Sa masunod nga kapitulo, usisaon naton ang makalilipay nga mga hitabo nga naangot sa pagkabun-ag sang Ginharian sang Dios sa langit.

^ par. 13 Ang ilustrasyon ni Jesus mahimo nagpahanumdom sa iya tagpalamati parte kay Arquelao, nga anak ni Herodes nga Daku. Antes napatay si Herodes, gintangdo niya si Arquelao nga magpanubli sang paggahom sa Judea kag sa iban pa nga lugar. Pero antes maggahom si Arquelao, kinahanglan sia anay maglakbay sing malawig pa Roma agod magkuha sang pahanugot ni Cesar Augusto.

^ par. 18 Ang bisan sin-o nga nangin hinaplas pagkatapos napatay ang katapusan nga miembro sang una nga grupo—buot silingon, sang patay na ang tanan nga nakasaksi sa “pamuno . . . sang kasakit” sang 1914—indi bahin sang “ini nga kaliwatan.”—Mat. 24:8.