Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Nagagahom ang Ginharian sang Dios!

 KAPITULO 3

Ginapahayag ni Jehova ang Iya Katuyuan

Ginapahayag ni Jehova ang Iya Katuyuan

POKUS SANG KAPITULO

Ginapahayag ni Jehova sing amat-amat ang paghangop sa iya katuyuan, pero sa mga nagakahadlok lamang sa iya

1, 2. Paano ginpahayag ni Jehova ang iya katuyuan sa katawhan?

GINAUPOD sang pila ka ginikanan ang ila kabataan kon magbinagbinag sila sang mga butang parte sa pamilya. Pero wala nila ginasugid ang tanan nga impormasyon. Ginapili lang nila ang mga detalye nga maintiendihan na sang ila mga bata.

2 Sing kaanggid, amat-amat man nga ginapahayag ni Jehova ang iya katuyuan sa katawhan. Pero ginahimo lang niya ini kon nagakaigo na ang tion. Binagbinaga kon paano ginpahayag ni Jehova ang mga kamatuoran parte sa Ginharian sa kasaysayan sang tawo.

Ngaa Kinahanglan ang Ginharian?

3, 4. Gintalana bala ni Jehova ang palaabuton sang katawhan? Ipaathag.

3 Ang Mesianikong Ginharian indi bahin sang orihinal nga katuyuan ni Jehova. Ngaa? Bangod wala gintalana ni Jehova ang palaabuton sang katawhan. Ginhatagan niya ang mga tawo sing kahilwayan sa pagbuot. Ginsugid niya kanday Adan kag Eva ang iya katuyuan sa katawhan nga nagasiling: “Magpanganak kamo kag magdamo, pun-a ninyo ang duta kag dumalahan ini.” (Gen. 1:28) Ginapaabot ni Jehova nga tahuron nila ang iya talaksan sang maayo kag malain. (Gen. 2:16, 17) Sanday Adan kag Eva puede kuntani magpabilin nga mainunungon. Kon ginhimo nila ini kag sang ila mga kaliwat, indi na kuntani naton kinahanglan ang Ginharian nga pagagamhan sang Cristo sa pagtuman sang katuyuan sang Dios. Ang bilog nga globo puno kuntani karon sing himpit nga mga tawo nga nagasimba kay Jehova.

4 Bisan pa nagrebelde sanday Satanas, Adan, kag Eva, wala ginkalimtan ni Jehova ang iya katuyuan nga pun-on ang duta sang himpit nga mga tawo. Sa baylo, ginbag-o niya ang iya pamaagi sa pagtuman sini. Ang iya katuyuan indi pareho sa tren nga isa lang ka riles ang ginaagyan para makalab-ot sa destinasyon kag mahimo madiskaril kon hilabtan sang iban. Kon mahambal na ni Jehova ang iya katuyuan, wala sang puersa sa uniberso nga makapugong sini. (Basaha ang Isaias 55:11.) Kon may magbalabag, puede maggamit si Jehova sang iban nga  paagi. * (Ex. 3:14, 15) Kon sa banta niya kinahanglanon, ginapahibalo niya sa iya matutom nga mga alagad ang bag-o nga pamaagi nga iya gamiton sa pagtuman sang iya katuyuan.

5. Paano ginsabat ni Jehova ang rebelyon sa Eden?

5 Ginlakip ni Jehova sa iya katuyuan nga magtukod sing Ginharian bilang sabat sa rebelyon sa Eden. (Mat. 25:34) Sa tion nga daw wala na sing paglaum ang katawhan, ginpahayag ni Jehova ang instrumento nga iya pagagamiton sa pagpasag-uli sa katawhan kag sa pagdula sa kasakit nga resulta sang pagkasakon ni Satanas sa gahom. (Gen. 3:14-19) Pero wala ginhatag ni Jehova ang tanan nga detalye parte sa Ginharian sa isa lang ka tion.

Ginsugdan ni Jehova ang Pagpahayag sang mga Kamatuoran Parte sa Ginharian

6. Ano ang ginsaad ni Jehova, pero ano ang wala niya ginpahayag?

6 Sa una nga tagna, ginsaad ni Jehova nga isa ka “kaliwat” ang gamiton niya nga magadugmok sa man-ug. (Basaha ang Genesis 3:15.) Pero wala pa ginpakilala sadto kon sin-o ina nga kaliwat kag kon sin-o ang kaliwat sang man-ug. Ang matuod, mga 2,000 pa ka tuig ang nagligad antes nagpahayag liwat si Jehova sing pila ka detalye parte sa sini. *

7. Ngaa ginpili si Abraham, kag anong importante nga leksion ang aton matun-an sa sini?

7 Sang ulihi, ginpili ni Jehova si Abraham nga pagahalinan sang ginsaad nga kaliwat. Ginpili si Abraham bangod ‘nagpamati sia sa tingog ni Jehova.’ (Gen. 22:18) May matun-an kita nga importante nga leksion sa sini—ginapahayag lang ni Jehova ang iya katuyuan sa isa nga may matinahuron nga kahadlok sa iya.—Basaha ang Salmo 25:14.

8, 9. Ano nga mga kamatuoran parte sa ginsaad nga kaliwat ang ginpahayag ni Jehova kanday Abraham kag Jacob?

8 Sang nagapakig-istorya sia sa iya abyan nga si Abraham paagi sa isa ka anghel, ginpahayag ni Jehova sa una nga tion ang importante nga kamatuoran parte sa ginsaad nga kaliwat: Isa ini ka tawo. (Gen. 22:15-17; Sant. 2:23) Pero paano dugmukon sining tawo ang man-ug? Sin-o bala ang man-ug? Ang sabat sa sining mga pamangkot ipahayag sa ulihi.

9 Nagdesisyon si Jehova nga ang ginsaad nga kaliwat magahalin sa apo ni Abraham nga si Jacob, isa ka tawo nga may daku nga pagtuo sa Dios. (Gen. 28:13-22) Paagi kay Jacob, ginpahayag ni Jehova nga ang Isa nga Ginsaad magahalin sa kaliwat sang anak ni Jacob nga si Juda. Gintagna ni Jacob nga ining kaliwat ni Juda magabaton sing “setro,” nga simbulo sang harianon nga awtoridad, kag “tumanon sang katawhan.” (Gen. 49:1, 10) Paagi sa sini, ginpakita ni Jehova nga ang Isa nga Ginsaad mangin manuggahom, isa ka hari.

10, 11. Ngaa ginpahayag ni Jehova ang iya katuyuan kay David kag kay Daniel?

10 Mga 650 ka tuig pagkatapos sang panahon ni Juda, may ginpahayag pa gid si Jehova parte sa iya katuyuan kay Hari David, nga kaliwat ni Juda. Ginlaragway ni Jehova si David nga “isa ka tawo nga kalahamut-an sa iya tagipusuon.” (1 Sam. 13:14; 17:12; Binu. 13:22) Bangod si David may kahadlok sa  Dios, nakigkatipan si Jehova sa iya kag nagsaad nga isa sa iya mga kaliwat ang magagahom sing walay katapusan.—2 Sam. 7:8, 12-16.

11 Mga 500 ka tuig sang ulihi, gingamit ni Jehova si propeta Daniel para isugid ang eksakto nga tuig sang pag-abot sining Isa nga Hinaplas, ukon Mesias, sa duta. (Dan. 9:25) Si Daniel “hamili gid” para kay Jehova. Ngaa? Bangod gintahod gid ni Daniel si Jehova kag gin-alagad sia sing padayon.—Dan. 6:16; 9:22, 23.

12. Ano ang ginpahimo kay Daniel, kag ngaa?

12 Gingamit ni Jehova ang matutom nga mga propeta kaangay ni Daniel para magsulat sing mga detalye parte sa ginsaad nga kaliwat, ang Mesias. Pero indi pa panahon para mahangpan sang mga alagad ni Jehova ang bug-os nga kahulugan sang ila ginsulat. Halimbawa, sang ginpakita kay Daniel paagi sa palanan-awon ang parte sa pagtukod sang Ginharian sang Dios, ginsilingan sia nga isira lang anay ang tagna asta sa gintalana nga tion ni Jehova. Kon mag-abot na ina nga tion, ang matuod nga ihibalo “magabugana.”—Dan. 12:4.

Gingamit ni Jehova ang matutom nga mga lalaki kaangay ni Daniel para magsulat sang mga detalye sang Mesianikong Ginharian

Ginpahayag ni Jesus ang Katuyuan sang Dios

13. (a) Sin-o ang ginsaad nga kaliwat? (b) Paano ginpahayag ni Jesus ang kahulugan sang Genesis 3:15?

13 Maathag nga ginpakilala ni Jehova nga si Jesus amo ang ginsaad nga kaliwat nga naghalin kay David kag magagahom subong Hari. (Luc. 1:30-33; 3:21, 22) Sang ginsugdan ni Jesus ang iya ministeryo, nangin maathag sa katawhan ang katuyuan sang Dios. (Mat. 4:13-17) Halimbawa, ginbuyagyag gid ni Jesus kon sin-o ang “man-ug” nga ginsambit sa Genesis 3:14, 15, kag gintawag ang Yawa subong “manugpatay” kag “amay sang kabutigan.” (Juan 8:44) Sa bugna nga ginhatag niya kay Juan, ginpakilala ni Jesus “ang orihinal nga man-ug” subong “ang isa nga ginatawag Yawa kag Satanas.” * (Basaha ang Bugna 1:1; 12:9.) Sa sina man nga bugna, ginpakita ni Jesus—subong ang ginsaad nga kaliwat—kon paano niya tumanon sa ulihi ang tagna sa Eden nga dugmukon sing permanente si Satanas.—Bug. 20:7-10.

14-16. Nahangpan bala pirme sang unang siglo nga mga disipulo ang bug-os nga kahulugan sang mga kamatuoran nga ginpahayag ni Jesus? Ipaathag.

14 Subong sang nakita naton sa Kapitulo 1 sini nga libro, pirme ginapakig-istorya ni Jesus ang parte sa Ginharian. Pero, wala niya pirme ginasugid ang tanan nga detalye nga gusto mahibaluan sang iya mga disipulo. Bisan pa naghatag sia sing espesipiko nga mga detalye, sang ulihi na lang nahangpan sang mga sumulunod sang Cristo ang bug-os nga kahulugan sini, kon kaisa pagligad pa sang ginatos ka tuig. Binagbinaga ang pila ka halimbawa.

15 Sang 33 C.E., ginpaathag gid ni Jesus nga ang kaupod nga mga gumalahom sang Hari sang Ginharian sang Dios magahalin sa duta kag pagabanhawon subong espiritu nga mga tinuga sa langit. Pero wala ini dayon nahangpan sang iya mga disipulo. (Dan. 7:18; Juan 14:2-5) Sa amo man nga tuig, ginpakita ni Jesus  paagi sa mga ilustrasyon nga ang Ginharian indi pa pagtukuron dayon pagkayab niya. (Mat. 25:14, 19; Luc. 19:11, 12) Wala gid nahangpan sang mga disipulo ining importante nga punto amo nga sang ginbanhaw si Jesus ginpamangkot nila sia: “Ipasag-uli mo bala ang ginharian sa Israel sa sini nga tion?” Pero wala pa naghatag sing dugang nga detalye si Jesus sadto. (Binu. 1:6, 7) Gintudlo man ni Jesus nga may “iban nga mga karnero,” nga indi bahin sang “diutay nga panong” sang iya kaupod nga mga manuggahom. (Juan 10:16; Luc. 12:32) Nahangpan lang sang mga sumulunod sang Cristo kon sin-o ining duha ka grupo sang natukod na ang Ginharian sang 1914.

16 Madamo nga butang ang puede isugid ni Jesus sa iya mga disipulo sang ari sia sa duta, pero nakahibalo sia nga indi pa nila ini mahangpan. (Juan 16:12) Huo madamo sing kamatuoran parte sa Ginharian ang ginpahayag sang unang siglo. Pero indi pa sadto ang tion para mangin bugana ang ihibalo.

Ang Matuod nga Ihibalo Magabugana sa “Tion sang Katapusan”

17. Ano ang dapat naton himuon para mahangpan naton ang mga kamatuoran parte sa Ginharian, apang ano pa ang kinahanglanon?

17 Ginsaaran ni Jehova si Daniel nga “sa tion sang katapusan,” madamo ang “magapakadto-pakari kag ang matuod nga ihibalo” sa katuyuan sang Dios magabugana. (Dan. 12:4) Ang mga interesado sa sini nga ihibalo dapat manikasog gid nga matigayon ini. Suno sa isa ka reperensia, ang Hebreo nga tinaga nga ginbadbad “magapakadto-pakari” nagapahangop sing maayo kag maid-id nga pag-usisa sa isa ka libro. Apang, bisan pa usisaon naton sing maayo ang Biblia, indi gid naton mahangpan ang mga kamatuoran sang Ginharian kon indi kita paghatagan ni Jehova sini nga pribilehiyo.—Basaha ang Mateo 13:11.

18. Paano nagpakita sing pagtuo kag pagkamapainubuson ang mga nagakahadlok kay Jehova?

18 Subong nga amat-amat nga ginpahayag ni Jehova ang mga kamatuoran parte sa Ginharian antes sang 1914, padayon man  niya nga ginahimo ini sa tion sang katapusan. Makita naton sa Kapitulo 4 kag 5 sini nga libro nga sang nagligad nga 100 ka tuig, pila ka beses nga kinahanglan bag-uhon sang katawhan sang Dios ang ila paghangop. Ginapakita bala sini nga wala sila ginasakdag ni Jehova? Indi. Ngaa? Bangod ang mga nagakahadlok kay Jehova nagpakita sing duha ka kinaiya nga ginakahamut-an gid niya—pagtuo kag pagkamapainubuson. (Heb. 11:6; Sant. 4:6) Ang mga alagad ni Jehova nagatuo nga ang tanan nga saad sang Pulong sang Dios matuman gid. Nagpakita sila sing pagkamapainubuson sang ginbaton nila nga sayop ang ila paghangop kon paano matuman ining mga saad. Ini nga panimuot makita sa Marso 1, 1925, nga Watch Tower, nga nagasiling: “Nakahibalo kita nga ang Ginuo amo ang manugpaathag sang iya kaugalingon, kag sia ang magapaathag sang iya Pulong sa iya katawhan suno sa iya paagi kag tion.”

“Ang Ginuo . . . ang magapaathag sang iya Pulong sa iya katawhan suno sa iya paagi kag tion”

19. Ano ang gintugutan ni Jehova nga mahangpan naton karon, kag ngaa?

19 Sang gintukod ang Ginharian sang 1914, indi pa bug-os ang ihibalo sang katawhan sang Dios kon paano matuman ang mga tagna parte sa Ginharian. (1 Cor. 13:9, 10, 12) Bangod gusto gid naton nga matuman ang mga saad sang Dios, kon kaisa nagasala kita sa aton paghangop. Sa pagligad sang mga tinuig, nakit-an nga husto gid ang isa pa ka ginsiling sang Watch Tower nga ginkutlo sa parapo 18. Ang artikulo nagsiling: “Indi kita magsala kon amo ini ang himuon naton nga pagsulundan, nga ang tagna mahangpan lang naton kon natuman na ukon samtang nagakatuman ini.” Ara na kita sa tion sang katapusan kag madamo nga tagna parte sa Ginharian ang natuman kag nagakatuman pa lang. Bangod ang katawhan sang Dios mapainubuson kag handa magpatadlong, gintugutan ni Jehova nga mas mahangpan naton sing maayo ang iya katuyuan. Nangin bugana na ang matuod nga ihibalo!

 Ang Pagpasibu sang Paghangop Nagtilaw sa Katawhan sang Dios

20, 21. Paano nag-apektar sa unang siglo nga mga Cristiano ang pagpasibu sa paghangop?

20 Kon ginapasibu ni Jehova ang aton paghangop sa kamatuoran, ginatilawan sini ang kahimtangan sang aton tagipusuon. May pagtuo bala kita kag pagkamapainubuson nga batunon ini nga mga pagbag-o? Naagihan ini sang mga Cristiano sang unang siglo. Ibutang ta nga isa ikaw ka Judiyo nga Cristiano sadto. Ginatahod mo gid ang Mosaikong Kasuguan kag ginapabugal ang imo pungsod. Karon nakabaton ka sing gin-inspirar nga sulat halin kay apostol Pablo. Nagasiling ini nga ang Kasuguan wala na ginapatuman kag ginsikway na ni Jehova ang kinaugali nga Israel kag nagatipon sia sing espirituwal nga Israel nga ang mga miembro pareho nga Judiyo kag Gentil. (Roma 10:12; 11:17-24; Gal. 6:15, 16; Col. 2:13, 14) Ano ayhan ang mangin reaksion mo?

21 Ginbaton sang mapainubuson nga mga Cristiano ang gin-inspirar nga paathag ni Pablo kag ginpakamaayo sila ni Jehova. (Binu. 13:48) Pero ang iban wala nagbaton kag nagpabilin sa ila kaugalingon nga paghangop. (Gal. 5:7-12) Kon indi nila pagbag-uhon ang ila pagtamod, mawasi nila ang kahigayunan nga mangin manuggahom kaupod sang Cristo.—2 Ped. 2:1.

22. Ano ang ginabatyag mo sa mga pagpasibu sang aton paghangop sa mga katuyuan sang Dios?

22 Sa nagligad nga mga tinuig, ginpasibu ni Jehova ang aton paghangop sa Ginharian. Halimbawa, ginbuligan niya kita nga mahangpan sing mas maathag kon san-o painon ang mga sakop sang Ginharian sa mga indi mabinatunon subong sang pagpain sa karnero sa mga kanding. Gintudluan man niya kita kon san-o makompleto ang 144,000, kon ano ang kahulugan sang mga ilustrasyon ni Jesus parte sa Ginharian, kag kon san-o banhawon pa langit ang pinakaulihi nga hinaplas. * Ano ang reaksion mo sa sini nga mga pagpasibu? Napalig-on bala ang imo pagtuo? Ginatamod mo bala ini subong pamatuod nga padayon nga ginatudluan ni Jehova ang iya mapainubuson nga katawhan? Ang masunod nga pagabinagbinagon sa sini nga libro magapabakod sang imo pagsalig nga si Jehova padayon nga nagapahayag sang iya katuyuan sa mga nagakahadlok sa iya.

^ par. 4 Ang ngalan sang Dios isa ka Hebreong tinaga nga nagakahulugan sing “mangin.” Ang ngalan ni Jehova nagapahangop nga Manugtuman sia sang iya mga saad. Tan-awa ang kahon nga “Ang Kahulugan sang Ngalan sang Dios,” sa pahina 43.

^ par. 6 Bisan pa ining kalawigon daw indi normal subong, dumdumon naton nga mas malawig ang kabuhi sadto; apat lang ka kaliwatan ang nag-abtanay halin kay Adan pakadto kay Abraham. Naabtan ni Adan si Lamec nga amay ni Noe. Naabtan naman ni Lamec si Sem nga anak ni Noe. Naabtan ni Sem si Abraham.—Gen. 5:5, 31; 9:29; 11:10, 11; 25:7.

^ par. 13 Ang ngalan nga “Satanas” makita sing 18 ka beses sa Hebreong Kasulatan. Pero, ang tinaga nga “Satanas” sobra 30 ka beses nga naggua sa Cristianong Griegong Kasulatan. Nagakaigo lang nga ang Hebreong Kasulatan wala nagpokus kay Satanas kundi sa pagpakilala sa Mesias. Sang nag-abot na ang Mesias, ginbuyagyag niya sing bug-os si Satanas, subong sang narekord sa Cristianong Griegong Kasulatan.

^ par. 22 Para sa dugang nga impormasyon sa sini nga mga pagpasibu, tan-awa ang masunod nga gua sang Lalantawan: Oktubre 15, 1995, pahina 23-28; Enero 15, 2008, pahina 20-24; Hulyo 15, 2008, pahina 17-21; Hulyo 15, 2013, pahina 9-14.

Magtuon sing Dugang Pa

ANG LALANTAWAN (TULUN-AN NGA EDISYON)

Palig-una ang Imo Pagtuo sa Ginharian

Si Jehova naggamit sing anom ka katipan nga nagagarantiya nga tumanon sang iya Ginharian ang iya katuyuan. Paano ini nga mga katipan magapabakod sang aton pagtuo?