Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Nagagahom ang Ginharian sang Dios!

 KAPITULO 10

Ginapuro sa Espirituwal sang Hari ang Iya Katawhan

Ginapuro sa Espirituwal sang Hari ang Iya Katawhan

POKUS SANG KAPITULO

Kon ngaa kag kon paano ginpuro kag gintinluan sa espirituwal ni Jesus ang iya mga sumulunod

1-3. Ano ang ginhimo ni Jesus sang nakita niya nga ginahigkuan ang templo?

GINATAHOD gid ni Jesus ang templo sa Jerusalem kay nakahibalo sia kon ano ang ginarepresentar sini. Ang templo madugay na nga sentro sang matuod nga pagsimba sa duta. Pero ina nga pagsimba—sa balaan nga Dios nga si Jehova—dapat matinlo kag putli. Gani, handurawa kon ano ang ginbatyag ni Jesus sang nag-abot sia sa templo sang Nisan 10, 33 C.E. kag nakita niya nga ginahigkuan ini. Ano ang natabo?—Basaha ang Mateo 21:12, 13.

2 Sa Luwang sang mga Gentil, ginahingalitan sang makagod nga mga negosyante kag mga manugbaylo sing kuarta ang mga sumilimba nga nagahalad kay Jehova. * “Gintabog [ni Jesus] ang tanan nga nagabaligya kag nagabakal sa templo, kag ginbaliskad niya ang lamesa sang mga manugbaylo sing kuarta.” (Ipaanggid ang Nehemias 13:7-9.) Ginpakamalaut niya ining makagod nga mga tawo kay ginhimo nila ang balay sang iya Amay nga “kueba sang mga kawatan.” Gani, ginpakita ni Jesus nga ginatahod niya ang templo kag ang ginarepresentar sini. Ang pagsimba sa iya Amay dapat magpabilin nga matinlo!

3 Pagligad sang mga siglo, pagkatapos sia nagpungko subong Mesianikong Hari, gintinluan liwat ni Jesus ang isa ka templo—ang templo nga nagadalahig sa tanan nga luyag magsimba kay Jehova subong. Ano ina nga templo?

Pagtinlo sa “mga Anak ni Levi”

4, 5. (a) Paano ginpuro kag gintinluan ang hinaplas nga mga sumulunod ni Jesus halin sang 1914 asta sa temprano sang 1919? (b) Natapos na bala ang pagpuro kag pagtinlo sa katawhan sang Dios? Ipaathag.

4 Subong sang nakita naton sa Kapitulo 2, pagkatapos magpungko si Jesus sa trono sang 1914, gin-usisa nila sang iya Amay ang espirituwal nga templo—ang kahimusan para sa putli nga pagsimba. * Nian, nakita sang Hari nga ang hinaplas nga mga Cristiano, “ang mga anak ni Levi,” nagakinahanglan sing pagpuro kag pagtinlo. (Mal. 3:1-3) Halin sang 1914 asta sa temprano sang 1919, gintugutan sang Manugpuro nga si Jehova, nga maagyan sang iya katawhan ang mga pagtilaw kag kabudlayan nga magapuro kag magatinlo sa ila. Sing makalilipay, ang mga hinaplas nakalampuwas sa sining kalayuhon nga mga pagtilaw. Nangin mas matinlo sila kag handa sa pagsuportar sa Mesianikong Hari!

 5 Natapos na bala ang pagpuro kag pagtinlo sa katawhan sang Dios? Wala pa. Sa katapusan nga mga adlaw, ginagamit ni Jehova ang Mesianikong Hari sa pagbulig sa iya mga sumulunod nga mangin matinlo agod makapabilin sila sa espirituwal nga templo. Sa masunod nga duha ka kapitulo, makita naton kon paano niya sila ginpuro sa moral kag organisasyonal nga paagi. Pero, hambalan naton anay ang parte sa espirituwal nga pagtinlo. Makapalig-on gid binagbinagon ang ginhimo ni Jesus—sa kitaon kag indi kitaon nga paagi—para buligan ang iya mga sumulunod nga mangin matinlo sa espirituwal.

“Tinlui Ninyo ang Inyo Kaugalingon”

6. Paano ang mga sugo ni Jehova sa gintapok nga mga Judiyo nagabulig sa aton nga mahangpan kon ano ang nadalahig sa espirituwal nga katinlo?

6 Ano ang espirituwal nga katinlo? Para masabat ina, usisaon naton ang ginsugo ni Jehova sa gintapok nga mga Judiyo sang manughalin na sila sa Babilonia sang ikan-om nga siglo B.C.E. (Basaha ang Isaias 52:11.) Ang panguna nga rason sang pagpabalik sa ila sa Jerusalem amo ang pagtukod liwat sang templo kag pagpasag-uli sang matuod nga pagsimba. (Esd. 1:2-4) Luyag ni Jehova nga biyaan sang iya katawhan ang tanan nga impluwensia sang relihion sang Babilonia. Ginhatagan niya sila sing sunodsunod nga sugo: “Indi kamo magtandog sang bisan ano nga mahigko,” “maggua kamo sa tunga niya,” kag “tinlui ninyo ang inyo kaugalingon.” Ang putli nga pagsimba kay Jehova indi dapat madagtaan sang butig nga pagsimba. Ano ang aton konklusion? Agod makapabilin nga matinlo sa espirituwal, dapat hilway kita sa panudlo kag mga buhat sang butig nga relihion.

7. Ano nga alagyan ang ginagamit ni Jesus para buligan ang iya mga sumulunod nga mangin matinlo sa espirituwal?

7 Wala magdugay pagkatapos sia nagpungko subong Hari, naggamit si Jesus sing isa ka kitaon nga alagyan para buligan ang iya mga sumulunod nga mangin matinlo sa espirituwal. Ina nga alagyan amo ang matutom kag mainandamon nga ulipon, nga gintangdo sang Cristo sang 1919. (Mat. 24:45) Sadto nga tuig, gintinluan na sang mga Estudyante sang Biblia ang ila kaugalingon batok sa madamo nga butig nga panudlo. Pero, kinahanglan pa nila ang dugang nga pagtinlo sa espirituwal. Paagi sa iya matutom nga ulipon, amat-amat nga ginpahangop sang Cristo sa iya mga sumulunod ang parte sa mga selebrasyon kag mga kinabatasan nga dapat nila biyaan. (Hulu. 4:18) Binagbinagon naton ang pila sini.

Dapat Bala Magsaulog sing Krismas ang mga Cristiano?

8. Ano ang madugay na nga ginapatihan sang mga Estudyante sang Biblia parte sa Krismas, pero ano ang indi maathag sa ila?

8 Madugay na nga ginapatihan sang mga Estudyante sang Biblia nga ang Krismas may pagano nga ginhalinan kag si Jesus wala matawo sang Disiembre 25. Ang Zion’s Watch Tower sang Disiembre 1881 nagsiling: “Minilyon ka pagano ang nangin katapo sang simbahan. Pero ang ila pagbag-o halos sa ngalan lang, ang pagano nga mga saserdote ginhimo nga cristiano nga mga pari kag ang pagano nga mga selebrasyon ginhatagan lang sang cristiano nga mga ngalan—subong sang Krismas.” Sang 1883, sa artikulo nga  “San-o Natawo si Jesus?” ang Watch Tower nagpangatarungan nga si Jesus natawo sa mga una nga bahin sang Oktubre. * Pero, indi pa maathag sa mga Estudyante sang Biblia nga dapat nila untaton ang pagselebrar sang Krismas. Padayon pa gani ini nga ginasaulog sang pamilya Bethel sa Brooklyn. Pero pagligad sang 1926, nagbag-o ang kahimtangan. Ngaa?

9. Ano ang nahangpan sang ulihi sang mga Estudyante sang Biblia parte sa Krismas?

9 Sang mausisa sing maayo sang mga Estudyante sang Biblia ini nga topiko, nahangpan nila nga ang ginhalinan sang Krismas kag ang mga kinabatasan nga may labot sa sini nagapakahuya sa Dios. Ang artikulo nga “Ang Ginhalinan sang Krismas,” sa Golden Age sang Disiembre 14, 1927, nagsiling nga ang Krismas isa ka pagano nga selebrasyon, nasentro sa kalipayan, kag nagadalahig sang pagsimba sa idolo. Ginpaathag sang artikulo nga ang Krismas wala ginsugo sang Cristo kag prangka ini nga nagsiling: “Ang kamatuoran nga ang kalibutan, ang unod, kag ang Yawa pabor sa padayon nga pagselebrar sini . . . isa ka mabaskog nga argumento nga indi na gid ini dapat pagsaulugon sang mga nga nakadedikar nga mag-alagad sing bug-os kay Jehova.” Indi katingalahan nga ang pamilya Bethel wala na nagselebrar sang Krismas sina nga Disiembre—kag indi na gid tubtob san-o!

10. (a) Ano ang dugang pa nga pagbuyagyag parte sa Krismas sang Disiembre 1928? (Tan-awa man ang kahon nga “ Krismas, ang Ginhalinan kag Katuyuan Sini.”) (b) Paano ginpaandaman ang katawhan sang Dios parte sa iban pa nga selebrasyon nga dapat likawan? (Tan-awa ang kahon nga “ Pagbuyagyag sa Iban Pa nga Kapiestahan kag Selebrasyon.”)

10 Pagkasunod nga tuig, ang mga Estudyante sang Biblia nakabaton sing dugang pa nga pagbuyagyag parte sa Krismas. Sang Disiembre 12, 1928, si Brother Richard H. Barber, nga miembro sang staff sa ulong talatapan, nagpamulongpulong sa radyo nga nagbuyagyag sang indi matinlo nga ginhalinan sining selebrasyon.  Ano ang reaksion sang katawhan sang Dios sa maathag nga direksion sang ulong talatapan? Nadumduman pa ni Brother Charles Brandlein sang gin-untat nila sang iya pamilya ang pagselebrar sang Krismas. Nagsiling sia: “Nanugunan bala kami sa pagbiya sa sining pagano nga mga butang? Wala gid! . . . Daw pareho lang ini sa pag-uba sang mahigko nga bayo kag paghaboy sini.” Sing kaanggid, si Brother Henry A. Cantwell, nga nangin nagalakbay nga manugtatap sang ulihi, nagsiling man: “Nalipay kami kay ginhatagan kami sing pribilehiyo nga pamatud-an ang amon gugma kay Jehova.” Ang mainunungon nga mga sumulunod sang Cristo handa sa paghimo sing mga pagbag-o kag sa paglikaw sa selebrasyon nga naghalin sa mahigko nga pagsimba. *Juan 15:19; 17:14.

11. Paano naton mapakita nga ginasuportahan naton ang Mesianikong Hari?

11 Maayo gid nga halimbawa ang matutom nga mga Estudyante sang Biblia! Pamangkuton naton ang aton kaugalingon: ‘Paano ko ginatamod ang direksion halin sa ulong talatapan? Ginabaton ko bala ini sing mapinasalamaton kag ginaaplikar?’ Ang aton kinabubut-on nga pagtuman nagapakita nga ginasuportahan naton ang Mesianikong Hari, nga nagagamit sa matutom nga ulipon sa pag-aman sing espirituwal nga pagkaon sa nagakaigo nga tion.—Binu. 16:4, 5.

Dapat Bala Maggamit sing Krus ang mga Cristiano?

Krus-kag-korona nga simbulo (Tan-awa ang parapo 12 kag 13)

12. Ano ang pagtamod sang mga Estudyante sang Biblia sa krus sa sulod sang madamo nga tinuig?

12 Madamo nga tinuig nga ginatamod sang mga Estudyante sang Biblia ang krus subong simbulo sang Cristianismo. Pero nakahibalo man sila nga indi ini dapat pagsimbahon, kay  nahangpan nila nga sala ang idolatriya. (1 Cor. 10:14; 1 Juan 5:21) Sang 1883 pa lang, ang Watch Tower prangka na nga nagsiling nga “ang tanan nga idolatriya kangil-aran sa Dios.” Pero sa umpisa, wala ginakabig sang mga Estudyante sang Biblia nga sala ang pila ka paggamit sang krus. Halimbawa, ginapabugal nila ang pagsuksok sing pin nga krus-kag-korona subong nagapakilala nga tanda. Para sa ila, nagakahulugan ini nga kon mapamatud-an nila nga matutom sila asta sa kamatayon, mabaton nila ang korona sang kabuhi. Sugod sang 1891, ang simbulo nga krus-kag-korona makita sa kober sang Watch Tower.

13. Ano nga kasanagan parte sa paggamit sang krus ang nabaton sang mga sumulunod sang Cristo? (Tan-awa man ang kahon nga “ Amat-amat nga Kasanagan Parte sa Paggamit sang Krus.”)

13 Ginapakabahandi gid sang mga Estudyante sang Biblia ang krus-kag-korona nga simbulo. Pero sa ulihi nga bahin sang dekada 1920, amat-amat nga nahangpan sang mga sumulunod sang Cristo ang parte sa paggamit sang krus. Nadumduman pa ni Brother Grant Suiter, nga nangin miembro sang Nagadumala nga Hubon, ang asembleya sang 1928 sa Detroit, Michigan, U.S.A. Nagsiling sia: “Ginpaathag sa asembleya nga luwas nga indi kinahanglan ang krus-kag-korona nga simbulo, kangil-aran pa ini.” May dugang pa nga kasanagan nga nabaton sa masunod nga mga tinuig. Nangin maathag nga ang krus indi gid dapat paggamiton sa putli kag matinlo nga pagsimba.

14. Ano ang reaksion sang katawhan sang Dios sa amat-amat nga kasanagan parte sa krus?

14 Ano ang reaksion sang katawhan sang Dios sa amat-amat nga kasanagan parte sa krus? Ginhuptan bala nila gihapon ang krus-kag-korona nga simbulo nga ginapakabahandi gid nila? “Ginsikway gilayon namon ini sang nahangpan namon kon ano ang ginarepresentar sini,” siling ni Lela Roberts, isa ka madugay na nga alagad ni Jehova. Ang isa pa ka matutom nga sister nga si Ursula Serenco, nagpabutyag sa ginabatyag sang madamo: “Ginbaton namon nga ang ginakabig anay namon nga simbulo sang kamatayon sang Ginuo kag sang amon Cristianong debosyon isa gid ka pagano nga simbulo. Nahisuno sa Hulubaton 4:18, nalipay kami nga ang amon banas padayon nga ginapasanagan.” Ang mainunungon nga mga sumulunod sang Cristo indi gid makigbahin sa mahigko nga mga kinabatasan sa pagsimba!

15, 16. Paano naton mapakita nga determinado kita nga huptan nga matinlo ang dutan-on nga luwang sang espirituwal nga templo ni Jehova?

15 Amo man sina ang aton determinasyon subong. Ginakilala naton nga ang Cristo nagagamit sang kitaon nga alagyan—ang matutom kag mainandamon nga ulipon—para buligan ang iya katawhan nga magpabilin nga matinlo sa espirituwal. Gani, kon ang espirituwal nga pagkaon nga aton nabaton nagapaandam batok sa mga selebrasyon ukon kinabatasan nga nadagtaan sang butig nga relihion, nagatuman kita gilayon. Pareho sa mga kauturan nga nagkabuhi sa umpisa sang presensia sang Cristo, determinado man kita nga huptan nga matinlo ang dutan-on nga luwang sang espirituwal nga templo ni Jehova.

16 Sa katapusan nga mga adlaw, nagapanghikot man ang Cristo sa indi kitaon nga paagi para amligan ang mga kongregasyon batok sa mga tawo nga mahimo magdagta sa sini. Paano niya ini ginahimo? Tan-awon naton.

 Pagpain sang “mga Malauton Gikan sa mga Matarong”

17, 18. Sa ilustrasyon parte sa pukot, ano ang kahulugan sang (a) pagladlad sang pukot, (b) pagkuha “sang tanan nga sahi sang isda,” (c) pagtipon sang maayo nga mga isda sa mga suludlan, kag (d) pagpilak sang indi maayo nga isda?

17 Ginabantayan gid ni Hari Jesucristo ang mga kongregasyon sang katawhan sang Dios sa bug-os nga duta. Lipod sa aton ihibalo, ang Cristo kag ang mga anghel nagahimo sing pagpain nga hilikuton. Ginlaragway ni Jesus ining hilikuton sa iya ilustrasyon parte sa pukot. (Basaha ang Mateo 13:47-50.) Ano ang buot silingon sining ilustrasyon?

Ang pukot nagarepresentar sa pagbantala sang Ginharian nga ginahimo sa dagat sang katawhan (Tan-awa ang parapo 18)

18 Pagladlad sang “pukot . . . sa dagat.” Ang pukot nagarepresentar sa pagbantala sang Ginharian nga ginahimo sa dagat sang katawhan. Pagkuha “sang tanan nga sahi sang isda.” Ang maayong balita nagaganyat sa tanan nga sahi sang tawo. Nagalakip ini sa nangin matuod nga Cristiano, pati na ang mga nagpakita sing interes sa umpisa pero wala nagpanindugan sa putli nga pagsimba. * Pagtipon sang “maayo nga mga isda sa mga suludlan.” Ang mga sinsero ginatipon sa kaangay suludlan nga kongregasyon, diin masimba nila sing matinlo si Jehova. Pagpilak sang “indi maayo” nga isda. Sa katapusan nga mga adlaw, ginapain sang Cristo kag sang mga anghel ang “mga malauton gikan sa mga matarong.” * Subong resulta, ang mga wala sa husto nga kahimtangan sang tagipusuon—ayhan indi handa nga biyaan ang sala nga mga pagpati ukon kinabatasan—indi makadagta sa mga kongregasyon. *

19. Ano ang ginabatyag mo sa ginahimo sang Cristo para amligan ang katinlo sang katawhan sang Dios kag ang kaputli sang matuod nga pagsimba?

19 Indi bala isa gid ka pasalig para sa aton nga ginaamligan sang aton Hari nga si Jesucristo ang iya mga ginaatipan? Indi bala makapalig-on mahibaluan nga ang iya kakugi sa matuod nga pagsimba—kag sa matuod nga mga sumilimba—amo gihapon pareho sang gintinluan niya ang templo sang unang siglo C.E.? Nagapasalamat gid kita nga ang Cristo nagapanghikot para amligan ang espirituwal nga katinlo sang katawhan sang Dios kag ang kaputli sang matuod nga pagsimba! Mapakita naton ang aton pagsakdag sa Hari kag sa iya Ginharian paagi sa paglikaw sa tanan nga butig nga relihion!

^ par. 2 Lain ang kuarta nga ginabayad sa tuigan nga buhis sang templo gani kinahanglan pa magpabaylo ang mga bisita nga Judiyo, kag ang mga manugbaylo nagapanukot sang ila serbisyo. Isa pa, may mga sumilimba nga kinahanglan magbakal sing sapat para ihalad. Gintawag ni Jesus ang mga negosyante nga “kawatan,” ayhan bangod mahal katama ang ila baligya kag ginasukot sa ila serbisyo.

^ par. 4 Ang katawhan ni Jehova sa duta nagasimba sa dutan-on nga luwang sang iya daku nga espirituwal nga templo.

^ par. 8 Ginpakita sa sini nga artikulo nga ang pagpati nga natawo si Jesus sang tigtulugnaw “wala nagasanto sa ginasiling sang rekord nga may mga manugbantay nga ara sa latagon upod sa ila mga panong.”—Luc. 2:8.

^ par. 10 Sa iya sulat sang Nobiembre 14, 1927, si Brother Frederick W. Franz nagsiling: “Indi na kami mag-Krismas subong nga tuig. Ang pamilya Bethel nagdesisyon nga indi na magselebrar sang Krismas.” Pagligad sang pila ka bulan, sa iya sulat sang Pebrero 6, 1928, si Brother Franz nagsiling: “Amat-amat kita nga ginatinluan sang Ginuo batok sa mga sala sang Babilonianhon nga organisasyon sang Yawa.”

^ par. 18 Halimbawa, binagbinaga nga sang 2013, ang peak nga manugbantala 7,965,954 samtang 19,241,252 ang nagtambong sa Memoryal sang kamatayon sang Cristo.

^ par. 18 Ang pagpain sang maayo nga isda sa indi maayo nga isda indi pareho sa pagpain sang karnero sa kanding. (Mat. 25:31-46) Ang pagpain, ukon katapusan nga paghukom, sang mga karnero kag mga kanding matabo sa dakung kapipit-an. Pero samtang wala pa ina, ang mga kaangay sang indi maayo nga isda puede pa makabalik kay Jehova kag matipon sa kaangay suludlan nga mga kongregasyon.—Mal. 3:7.

^ par. 18 Sa ulihi, ang indi maayo nga mga isda itagbong sa kalayuhon nga hurno, nga nagakahulugan sing kalaglagan.

Magtuon sing Dugang Pa

Ginapabaloran Mo Bala ang Aton Espirituwal nga Palanublion?

Ang paghibalo kag pag-apresyar sa aton espirituwal nga palanublion magabulig sa aton nga mangin determinado sa paghupot sang aton integridad sa Dios.

Nahangpan Mo Bala “ang Kahulugan”?

Ano ang kahulugan sang mga ilustrasyon ni Jesus parte sa manugsab-ug nga nagtulog, pukot, kag buhaha nga anak?