Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ano Gid ang Ginatudlo sang Biblia?

 KAPITULO KUATRO

Sin-o si Jesucristo?

Sin-o si Jesucristo?
  • Ano ang espesyal nga papel ni Jesus?

  • Diin sia naghalin?

  • Ano sia nga klase sang tawo sadto?

1, 2. (a) Ngaa indi buot silingon nga kon nabal-an mo ang ngalan sang isa nga bantog, kilala mo na gid sia? (b) Ano ang siling sang iban parte kay Jesus?

MADAMO sing bantog nga tawo sa kalibutan. Ang pila sa ila kilala sa ila komunidad, siudad, ukon pungsod. Ang iban kilala sa bilog nga kalibutan. Pero indi buot silingon nga kon nabal-an mo ang ngalan sang isa nga bantog, kilala mo na gid sia. Indi man buot silingon sini nga nabal-an mo ang tanan parte sa iya kag kon ano gid sia nga klase sang tawo.

2 Ang mga tawo sa bilog nga kalibutan may nabal-an parte kay Jesucristo, bisan pa mga 2,000 ka tuig na ang nagligad sang nagkabuhi sia sa duta. Pero madamo ang indi sigurado kon sin-o gid si Jesus. Siling sang iban, maayo lang sia nga tawo. Para naman sa iban, propeta lang sia. Pero ang iban nagapati nga si Jesus ang Dios kag dapat simbahon. Matuod bala ini?

3. Ngaa importante nga makilala mo si Jehova nga Dios kag si Jesucristo?

3 Importante nga mabal-an mo ang kamatuoran parte kay Jesus. Ngaa? Bangod ang Biblia nagasiling: “Ini nagakahulugan sang kabuhi nga wala sing katapusan, ang pagkilala nila sa imo, ang lamang matuod nga Dios, kag sa imo ginpadala, si Jesucristo.” (Juan 17:3) Huo,  ang pagkilala kay Jehova nga Dios kag kay Jesucristo makadul-ong sa kabuhi nga wala sing katapusan sa paraiso nga duta. (Juan 14:6) Isa pa, si Jesus ang pinakamaayo nga halimbawa kon paano magkabuhi kag kon paano tratuhon ang iban. (Juan 13:34, 35) Sa una nga kapitulo sini nga libro, gintun-an naton ang kamatuoran parte sa Dios. Gani tun-an naman naton kon ano gid ang ginatudlo sang Biblia parte kay Jesucristo.

ANG GINSAAD NGA MESIAS

4. Ano ang buot silingon sang mga titulo nga “Mesias” kag “Cristo”?

4 Madugay pa antes natawo si Jesus, gintagna sang Biblia ang pagkari sang isa nga ipadala sang  Dios subong Mesias, ukon Cristo. Ang mga titulo nga “Mesias” (halin sa Hebreo nga tinaga) kag “Cristo” (halin sa Griego nga tinaga) pareho lang nga nagakahulugan sing “Isa nga Hinaplas.” Ining Isa nga ginsaad mangin hinaplas, ukon gintangdo sang Dios para sa espesyal nga posisyon. Sa ulihi nga mga kapitulo sini nga libro, may matun-an pa kita parte sa importante nga papel sang Mesias para matuman ang mga saad sang Dios. Matun-an man naton ang mga pagpakamaayo nga mahatag ni Jesus sa aton bisan subong. Pero antes natawo si Jesus, sigurado nga madamo ang nagapamangkot, ‘Sin-o gid ang mangin Mesias?’

5. Sa ano kumbinsido gid ang mga disipulo ni Jesus?

5 Sang unang siglo C.E., kumbinsido gid ang mga disipulo ni Jesus nga taga-Nazaret nga sia ang ginsaad nga Mesias. (Juan 1:41) Ang isa sa mga disipulo, nga si Simon Pedro, nagsiling kay Jesus: “Ikaw ang Cristo.” (Mateo 16:16) Pero, ngaa sigurado ang mga disipulo nga si Jesus gid ang ginsaad nga Mesias? Kag paano man naton ini masiguro?

6. Sa ano mo mapaanggid ang pagbulig ni Jehova sa mga matutom para makilala ang Mesias?

6 Ang mga propeta sang Dios nga nagkabuhi antes kay Jesus nagtagna sing madamo nga detalye parte sa Mesias. Ini nga mga detalye makabulig sa iban para makilal-an sia. Daw pareho bala nga ginpangabay ka nga sugaton sa terminal sang bus ukon tren ukon sa erport ang tawo nga indi mo pa kilala. Makabulig gid kon hatagan ka sing detalye parte sa imo sugaton. Sing kaanggid, paagi sa mga propeta sang Biblia, naghatag si Jehova sing detalyado nga impormasyon parte sa pagahimuon sang Mesias kag kon ano ang iya maagihan. Ang katumanan sining madamo nga tagna makabulig sa mga matutom nga makilala sia sing maayo.

7. Ano ang duha sa mga tagna parte kay Jesus nga natuman?

 7 Binagbinaga ining duha lang ka halimbawa. Una, sobra 700 ka tuig antes natawo si Jesus, gintagna ni propeta Miqueas nga ang Isa nga ginsaad matawo sa Betlehem, nga isa ka gamay nga banwa sa Juda. (Miqueas 5:2) Diri gid bala nga banwa natawo si Jesus? Huo! (Mateo 2:1, 3-9) Ikaduha, ginatos ka tuig antes natawo si Jesus, gintagna sa Daniel 9:25 ang tuig mismo nga magagua ang Mesias, ang tuig 29 C.E. * Ang katumanan sini kag sang iban pa nga mga tagna ebidensia nga si Jesus ang ginsaad nga Mesias.

Sang ginbawtismuhan si Jesus, nangin Mesias sia, ukon Cristo

8, 9. Ano nga ebidensia nga si Jesus amo ang Mesias ang nangin maathag sang ginbawtismuhan sia?

8 Ang dugang pa nga ebidensia nga si Jesus ang Mesias nangin maathag sang dali na lang matapos ang 29 C.E. Amo ini ang tuig nga nagkadto si Jesus kay Juan nga Manugbawtismo para magpabawtismo sa Suba Jordan. Si Jehova nagsaad sadto kay Juan sing tanda para makilal-an niya ang Mesias. Nakita ni Juan ini nga tanda sang ginbawtismuhan si Jesus. Suno sa Biblia, amo ini ang natabo: “Pagkatapos mabawtismuhan si Jesus, nagtakas sia gilayon sa tubig; kag ang langit nabuksan, kag nakita niya ang espiritu sang Dios nga nagapanaug kaangay sang salampati kag nagkunsad sa iya. Kag may nabatian nga tingog halin sa langit nga nagasiling: ‘Ini ang akon Anak, ang hinigugma, nga ginakahamut-an ko.’” (Mateo 3:16, 17) Sang nakita niya kag nabatian ang natabo, wala nagduhaduha si Juan nga si Jesus ginpadala sang Dios. (Juan 1:32-34) Sang ang espiritu sang Dios, ukon aktibo nga puersa, ginbubo kay Jesus sina nga adlaw, nangin Mesias sia, ukon  Cristo, ang isa nga gintangdo nga mangin Lider kag Hari.—Isaias 55:4.

9 Ang katumanan sang tagna sa Biblia kag ang ginsiling mismo ni Jehova nga Dios maathag nga nagapakita nga si Jesus ang ginsaad nga Mesias. Pero ginasabat sang Biblia ang duha pa ka importante nga pamangkot parte kay Jesucristo: Diin sia naghalin? Ano sia nga klase sang tawo sadto?

DIIN NAGHALIN SI JESUS?

10. Ano ang ginatudlo sang Biblia parte sa kabuhi ni Jesus antes sia nagkadto sa duta?

10 Ginatudlo sang Biblia nga nagkabuhi si Jesus sa langit antes sia nagkadto sa duta. Gintagna ni Miqueas nga ang Mesias matawo sa Betlehem kag nagsiling man sia nga ang Iya ginhalinan “halin pa sang una.” (Miqueas 5:2) Si Jesus mismo kapila magsiling nga nagkabuhi na sia sa langit antes sia mabun-ag subong tawo. (Basaha ang Juan 3:13; 6:38, 62; 17:4, 5) Bilang espiritu nga tinuga sa langit, si Jesus may espesyal nga kaangtanan kay Jehova.

11. Paano ginapakita sang Biblia nga si Jesus amo ang pinakahamili nga Anak ni Jehova?

11 Si Jesus amo ang pinakahamili nga Anak ni Jehova—kag rasonable gid ini. Gintawag sia nga “panganay sa tanan nga tinuga,” kay sia ang una nga gintuga sang Dios. * (Colosas 1:15) May isa pa ka rason kon ngaa ini nga Anak espesyal gid. Sia ang “bugtong nga Anak.” (Juan 3:16) Buot silingon, si Jesus lamang ang direkta nga gintuga sang Dios. Kag sia lamang ang gingamit  sang Dios sang gintuga Niya ang iban pa nga butang. (Colosas 1:16) Isa pa, si Jesus gintawag nga “Pulong.” (Juan 1:14) Ginapakita sini nga nagahambal sia para sa Dios. Buot silingon, ginadala niya ang mga mensahe kag mga instruksion sa iban pa nga anak sang Amay, tawo man ukon espiritu.

12. Ngaa makasiling kita nga ang panganay nga Anak indi tupong sa Dios?

12 Tupong bala sa Dios ang panganay nga Anak, pareho sang pagpati sang iban? Indi amo sina ang ginatudlo sang Biblia. Natun-an naton sa nagligad nga parapo nga ang Anak gintuga. Gani, maathag nga may ginsuguran sia, pero si Jehova nga Dios wala sing ginsuguran ukon katapusan. (Salmo 90:2) Ang bugtong nga Anak wala gid maghunahuna nga tupungan niya ang iya Amay. Maathag nga ginatudlo sang Biblia nga ang Amay labaw pa sa Anak. (Basaha ang Juan 14:28; 1 Corinto 11:3) Si Jehova lamang ang “Dios nga Labing Gamhanan.” (Genesis 17:1) Gani, indi sia matupungan. *

13. Suno sa Biblia, ang Anak “larawan sang indi makita nga Dios.” Ano ang buot silingon sini?

13 Si Jehova kag ang iya panganay nga Anak nag-updanay sing binilyon ka tuig—antes pa gintuga ang duta kag ang puno sing bituon nga kalangitan. Sigurado nga ginahigugma gid nila ang isa kag isa! (Juan 3:35; 14:31) Ining pinalangga nga Anak pareho gid sa iya Amay. Amo nga suno sa Biblia, ang Anak “larawan sang indi makita nga Dios.” (Colosas 1:15) Huo, pareho sang tawhanon nga anak nga mahimo nakailog ukon nakasunod gid sa iya amay, ining langitnon nga Anak nagpakita sing mga kinaiya kag personalidad sang iya Amay.

14. Paano nabun-ag nga tawo ang bugtong nga Anak ni Jehova?

 14 Ang bugtong nga Anak ni Jehova kinabubut-on nga nagbiya sa langit kag nanaug sa duta agod mangin tawo. Pero basi nagapamangkot ka, ‘Paano mabun-ag nga tawo ang isa ka espiritu nga tinuga?’ Para mahimo ini, naghimo si Jehova sing milagro. Ang kabuhi sang iya panganay nga Anak sa langit ginbutang niya sa tiyan sang Judiyo nga birhen nga si Maria. Wala sing tawo nga amay nga nadalahig. Gani si Maria nagbun-ag sing perpekto nga anak kag ginhingalanan ini nga Jesus.—Lucas 1:30-35.

ANO NGA KLASE SANG TAWO SI JESUS SADTO?

15. Ngaa makasiling kita nga makilala naton sing maayo si Jehova paagi kay Jesus?

15 Ang mga ginsiling kag ginhimo ni Jesus sang diri sia sa duta makabulig sa aton nga makilala sia sing maayo. Dugang pa, makilala naton sing maayo si Jehova paagi kay Jesus. Ngaa? Dumduma nga ini nga Anak amo ang perpekto nga larawan sang iya Amay. Amo kon ngaa ginsilingan ni Jesus ang isa sa iya mga disipulo: “Ang bisan sin-o nga nakakita sa akon nakakita man sa Amay.” (Juan 14:9) Ang apat ka libro sa Biblia nga ginatawag Mga Ebanghelyo—Mateo, Marcos, Lucas, kag Juan—may madamo nga impormasyon parte sa kabuhi, ginhimo, kag mga kinaiya ni Jesucristo.

16. Ano ang panguna nga mensahe ni Jesus, kag kay sin-o naghalin ang iya ginatudlo?

16 Si Jesus kilala gid bilang “Manunudlo.” (Juan 1:38; 13:13) Ano ang iya gintudlo? Ang panguna gid niya nga mensahe amo ang “maayong balita sang Ginharian”—nga amo ang Ginharian sang Dios, ang gobierno sa langit nga magagahom sa bilog nga duta kag magadala sing wala katapusan nga mga pagpakamaayo sa  matinumanon nga mga tawo. (Mateo 4:23) Kay sin-o ini mensahe? Si Jesus nagsiling: “Ang akon ginatudlo wala naghalin sa akon, kundi sa nagpadala sa akon,” nga amo si Jehova. (Juan 7:16) Nabal-an ni Jesus nga gusto sang iya Amay nga mabatian sang mga tawo ang maayong balita sang Ginharian. Sa Kapitulo 8, matun-an pa gid naton ang parte sa Ginharian sang Dios kag kon ano ang himuon sini.

17. Diin nagpanudlo si Jesus, kag ngaa nagsakripisyo sia sa pagtudlo sa iban?

17 Diin nagpanudlo si Jesus? Sa tanan nga lugar nga may tawo—uma, siudad, baryo, merkado, kag mga balay. Wala naghulat si Jesus nga kadtuan sia sang mga tawo. Sia ang nagkadto sa ila. (Marcos 6:56; Lucas 19:5, 6) Ngaa nagsakripisyo si Jesus kag naghatag sing daku nga tion sa pagbantala kag pagtudlo? Kay amo ini ang kabubut-on sang Dios. Ginhimo gid ni Jesus ang kabubut-on sang iya Amay. (Juan 8:28, 29) Pero may isa pa ka rason  kon ngaa nagbantala sia. Naluoy sia sa mga tawo nga nagakadto sa iya. (Basaha ang Mateo 9:35, 36.) Ginpabay-an sila sang mga lider sang ila relihion, nga amo tani ang nagatudlo sa ila sing kamatuoran parte sa Dios kag sa iya mga katuyuan. Nabal-an ni Jesus nga kinahanglan gid mabatian sang mga tawo ang mensahe sang Ginharian.

18. Ano ang mga kinaiya ni Jesus nga nanamian mo gid?

18 Si Jesus mapinalanggaon kag may balatyagon gid. Gani para sa iban, mabuot sia kag madali palapitan. Bisan ang mga bata wala nahadlok magpalapit sa iya. (Marcos 10:13-16) Si Jesus wala sing ginpasulabi. Gindumtan niya ang kalautan kag ang mga sitwasyon nga wala sing katarungan. (Mateo 21:12, 13) Sang tion nga ang mga babayi daw wala ginarespeto kag may diutay nga kinamatarong, nagpakita sia sing respeto sa ila. (Juan 4:9, 27) Si Jesus matuod nga mapainubuson. Isa ka bes, ginhinawan niya ang mga tiil sang iya mga  apostoles, isa ka buhat nga sa masami ginahimo lang sang mga suluguon.

Si Jesus nagbantala bisan diin nga may tawo

19. Ano ang halimbawa nga nagapakita nga nabal-an gid ni Jesus ang mga kinahanglanon sang iban?

19 Nabal-an gid ni Jesus ang mga kinahanglanon sang iban. Napamatud-an gid ini sang naghimo sia sing milagro nga pagpang-ayo paagi sa gahom sang espiritu sang Dios. (Mateo 14:14) Halimbawa, may isa ka lalaki nga aruon nga nagpalapit kay Jesus kag nagsiling: “Kon luyag mo gid, matinluan mo ako.” Nabatyagan ni Jesus ang pag-antos kag kasakit sang lalaki. Bangod sa kaluoy, gin-untay ni Jesus ang iya kamot kag gintandog ang lalaki, nga nagasiling: “Luyag ko! Magmatinlo ka.” Kag nag-ayo ang aruon! (Marcos 1:40-42) Maimadyin mo bala ang nabatyagan sang lalaki?

MATUTOM ASTA SA KATAPUSAN

20, 21. Ngaa si Jesus isa ka halimbawa sang mainunungon nga pagtuman sa Dios?

20 Si Jesus ang pinakamaayo nga halimbawa sang mainunungon nga pagtuman sa Dios. Nagpabilin sia nga matutom sa iya Amay sa langit sa tanan nga sitwasyon kag bisan pa sang tanan nga pagpamatok kag pag-antos. Ginbatuan niya ang mga pagsulay ni Satanas kag nagmadinalag-on sia. (Mateo 4:1-11) Ang pila sadto ka paryente ni Jesus wala nagtuo sa iya, kag nagsiling pa sila nga “nagbuang sia.” (Marcos 3:21) Pero wala ini ginsapak ni Jesus. Padayon niya nga ginhimo ang hilikuton sang Dios. Bisan pa ginainsulto sia kag ginapakalain, ginpunggan ni Jesus ang iya kaugalingon, kag wala gid nagbalos sa mga nagapamatok sa iya.—1 Pedro 2:21-23.

21 Si Jesus nagpabilin nga matutom asta sa kamatayon—mapintas kag masakit katama nga kamatayon sa kamot sang iya mga kaaway. (Basaha ang Filipos 2:8.)  Dumduma ang iya ginbatas sa katapusan nga adlaw sang iya kabuhi bilang tawo. Gindakop sia, gin-akusahan sang butig nga mga testigo, ginpamatbatan sang malaut nga mga hukom, ginkadlawan sang akig nga mga tawo, kag ginsakit sang mga soldado. Samtang ginalansang sia sa usok, nagsinggit sia antes mahunusan sing ginhawa: “Natuman na!” (Juan 19:30) Pero sa ikatlo nga adlaw sa tapos sia mapatay, ginbanhaw sia sang iya Amay sa langit bilang isa liwat ka espiritu. (1 Pedro 3:18) Pila ka semana sang ulihi, nagbalik sia sa langit. Didto, “nagpungko [sia] sa tuo sang Dios” kag naghulat sa pagbaton sing gahom bilang hari.—Hebreo 10:12, 13.

22. Ano ang nahimo ni Jesus bangod nagpabilin sia nga matutom asta sa kamatayon?

22 Ano ang nahimo ni Jesus bangod nagpabilin sia nga matutom asta sa kamatayon? Paagi sa iya kamatayon, may kahigayunan na kita nga mabuhi sing wala katapusan sa paraiso nga duta, kay amo gid ini ang orihinal nga katuyuan ni Jehova. Paano ini nahimo sang kamatayon ni Jesus? Matun-an mo ini sa masunod nga kapitulo.

^ par. 7 Ang paathag sang katumanan sang tagna ni Daniel parte kay Jesus makita sa artikulo sa Apendise nga “Paano Gintagna ni Daniel ang Pag-abot sang Mesias?

^ par. 11 Si Jehova gintawag nga Amay bangod sia ang Manunuga. (Isaias 64:8) Si Jesus gintuga sang Dios, gani gintawag sia nga Anak sang Dios. Ini man ang rason kon ngaa ang espiritu nga mga tinuga kag bisan ang tawo nga si Adan gintawag nga mga anak sang Dios.—Job 1:6; Lucas 3:38.

^ par. 12 Para sa dugang nga ebidensia nga ang panganay nga Anak indi tupong sa Dios, tan-awa ang artikulo sa Apendise nga “Ang Kamatuoran Parte sa Amay, sa Anak, kag sa Balaan nga Espiritu.”