Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ano Gid ang Ginatudlo sang Biblia?

 KAPITULO KINSE

Ang Pagsimba nga Ginabaton sang Dios

Ang Pagsimba nga Ginabaton sang Dios
  • Ang tanan bala nga relihion ginabaton sang Dios?

  • Paano naton makilala ang matuod nga relihion?

  • Sin-o ang matuod nga mga sumilimba sang Dios subong?

1. Kon eksakto ang aton paagi sa pagsimba sa Dios, ano ang aton benepisyo?

SI Jehova nga Dios nagaulikid gid sa aton kag gusto niya nga makabenepisyo kita sa iya mapinalanggaon nga paggiya. Kon eksakto ang aton paagi sa pagsimba sa iya, mangin malipayon kita kag malikawan naton ang madamo nga problema. Mabaton man naton ang iya pagpakamaayo kag bulig. (Isaias 48:17) Madamo gid nga relihion ang nagasiling nga ginatudlo nila ang kamatuoran parte sa Dios. Pero sarisari ang ila ginatudlo parte sa kon sin-o gid ang Dios kag kon ano ang gusto sang Dios nga himuon naton.

2. Paano naton mabal-an ang eksakto nga paagi sa pagsimba kay Jehova, kag ano ang halimbawa nga makabulig sa aton para maintiendihan ini?

2 Paano mo mabal-an ang eksakto nga paagi sa pagsimba kay Jehova? Indi na kinahanglan nga tun-an mo kag ikumparar ang ginatudlo sang tanan nga relihion. Dapat mo lang tun-an kon ano gid ang ginatudlo sang Biblia parte sa matuod nga pagsimba. Halimbawa, problema sa madamo nga pungsod ang peke nga kuarta. Kon suguon ka nga hibaluon kon ano ang peke, ano ang himuon mo?  Tandaan mo bala ang tanan nga peke nga kuarta? Indi. Mas maayo kon gamiton mo ang imo tiempo sa pagkilala sa matuod nga kuarta. Kon makilala mo na ang matuod nga kuarta, mabal-an mo na kon ano ang peke. Pareho sini, kon makilala naton ang matuod nga relihion, mabal-an naton kon ano ang butig.

3. Para malipay ang Dios sa aton, ano ang ginsiling ni Jesus nga dapat naton himuon?

3 Kinahanglan gid nga ang aton paagi sang pagsimba ginabaton ni Jehova. Madamo ang nagapati nga ang tanan nga relihion ginabaton sang Dios, pero indi amo sina ang ginatudlo sang Biblia. Indi gani bastante nga magsiling ka lang nga Cristiano ka. Si Jesus nagsiling: “Indi tanan nga nagasiling sa akon, ‘Ginuo, Ginuo,’ makasulod sa Ginharian sang langit, kundi ang nagahimo lamang sang kabubut-on sang akon Amay sa langit.” Gani para malipay ang Dios sa aton, tun-an naton kag tumanon ang iya mga ginapahimo. Ang mga tawo nga wala nagatuman sang kabubut-on sang Dios gintawag ni Jesus nga ‘nagahimo sing malain.’ (Mateo 7:21-23) Pareho sang peke nga kuarta, ang butig nga relihion wala sing pulos. Ang malain pa, ini nga mga relihion makahalalit gid.

4. Ano ang buot silingon sang ginsiling ni Jesus parte sa duha ka dalan, kag diin nagapadulong ang tagsa ka dalan?

4 Ginahatagan ni Jehova sing kahigayunan ang tanan nga tawo sa duta nga makabaton sing kabuhi nga wala sing katapusan. Pero para mabuhi asta san-o sa Paraiso, dapat eksakto ang aton paagi sang pagsimba sa Dios, kag ang paagi sang aton pagkabuhi subong nagapalipay sa iya. Makapasubo nga madamo ang wala nagahimo sini. Amo kon ngaa nagsiling si Jesus: “Magsulod kamo sa makitid nga gawang, kay masangkad ang gawang kag malapad ang dalan nga nagapadulong sa kalaglagan, kag  madamo ang nagaagi sa sini; apang makitid ang gawang kag mabudlay ang dalan nga nagapadulong sa kabuhi, kag pila lamang ang nakatultol sini.” (Mateo 7:13, 14) Ang matuod nga relihion nagapadulong sa kabuhi nga wala sing katapusan. Ang butig nga relihion nagapadulong sa kalaglagan. Indi gusto ni Jehova nga malaglag ang bisan sin-o. Amo kon ngaa ginahatagan niya sing kahigayunan ang mga tawo bisan diin nga makatuon parte sa iya. (2 Pedro 3:9) Gani, ang aton kabuhi ukon kamatayon nagadepende sa aton paagi sa pagsimba sa Dios.

PAANO MAKILALA ANG MATUOD NGA RELIHION?

5. Paano naton makilala ang aktibo nga mga miembro sang matuod nga relihion?

5 Paano matultulan ang “dalan nga nagapadulong sa kabuhi”? Nagsiling si Jesus nga ang matuod nga relihion makilala paagi sa pagkabuhi sang aktibo nga mga miembro sini. “Makilala ninyo sila sa ila mga bunga,” siling niya. “Ang tanan nga maayo nga kahoy nagapamunga sing maayo nga bunga.” (Mateo 7:16, 17) Buot silingon, ang aktibo nga mga miembro sang matuod nga relihion makilala paagi sa ila pagtuluuhan kag paggawi. Bisan pa indi sila perpekto kag nagasala, ang grupo sang matuod nga mga sumilimba sang Dios nagatinguha gid sa paghimo sang iya kabubut-on. Tun-an naton ang anom ka butang nga nagapakilala sa aktibo nga mga miembro sang matuod nga relihion.

6, 7. (a) Para sa matuod nga mga alagad sang Dios, ano ang Biblia? (b) Ngaa maayo gid nga halimbawa si Jesus sa paggamit sang Pulong sang Dios?

6 Ang ginatudlo sang matuod nga mga alagad sang Dios ginabase nila sa Biblia. Ang Biblia mismo nagasiling: “Ang pagsulat sa bug-os nga Kasulatan gintuytuyan sang Dios kag mapuslanon sa pagpanudlo, sa pagsabdong, sa  pagtadlong, sa pagdisiplina sa pagkamatarong, agod ang tawo sang Dios may ikasarang gid, kag nasangkapan sing bug-os para sa tagsa ka maayong buhat.” (2 Timoteo 3:16, 17) Ginsulatan ni apostol Pablo ang pareho niya nga mga Cristiano: “Sang nabatian ninyo ang pulong sang Dios sa amon, ginbaton ninyo ini, indi subong pulong sang mga tawo, kundi kon ano gid ini, subong pulong sang Dios.” (1 Tesalonica 2:13) Gani, ang pagtuluuhan kag mga ginahimo sang matuod nga relihion indi base sa opinyon ukon tradisyon sang tawo. Ginbase ini sa Pulong nga gintuytuyan sang Dios, ang Biblia.

7 Maayo gid nga halimbawa si Jesucristo kay ginbase niya ang iya mga ginatudlo sa Pulong sang Dios. Sang nagpangamuyo sia sa iya Amay sa langit, nagsiling sia: “Ang imo pulong kamatuoran.” (Juan 17:17) Nagtuo si Jesus sa Pulong sang Dios, kag ang tanan niya nga gintudlo nagasantu sa sini. Antes si Jesus magsambit sang isa ka kasulatan, pirme sia nagasiling: “Nasulat na.” (Mateo 4:4, 7, 10) Ginasunod man ini sang katawhan sang Dios subong. Wala sila nagatudlo sang ila ideya. Nagapati sila nga ang Biblia Pulong sang Dios, kag ginabase gid nila ang ila ginatudlo sa ginasiling sini.

8. Sa pagsimba kay Jehova, ano ang isa sa importante nga ginahimo sang iya mga sumilimba?

8 Ang aktibo nga mga miembro sang matuod nga relihion kay Jehova lamang nagasimba kag ginapakilala nila ang iya ngalan. Si Jesus nagsiling: “Si Jehova nga imo Dios ang dapat mo simbahon, kag sia lamang ang hatagan mo sing sagrado nga pag-alagad.” (Mateo 4:10) Gani si Jehova lamang ang ginasimba sang iya mga alagad. Sa ila pagsimba, ang isa sa importante nga ginahimo nila amo ang pagsugid sa mga tawo sang ngalan sang matuod nga Dios kag sang iya personalidad. Ang Salmo 83:18  nagasiling: “Ikaw, nga ang ngalan amo si Jehova, ikaw lamang ang Labing Mataas sa bug-os nga duta.” Nagpakita si Jesus sing halimbawa sa pagbulig sa iban nga makilala ang Dios, pareho sa ginsiling niya sa iya pangamuyo: “Ginpakilala ko ang imo ngalan sa mga tawo nga ginhatag mo sa akon halin sa kalibutan.” (Juan 17:6) Subong, ginatudlo man sang matuod nga mga sumilimba sang Dios ang iya ngalan, katuyuan, kag mga kinaiya.

9, 10. Paano ginapakita sang matuod nga mga Cristiano nga nagahigugmaanay sila?

9 Ang katawhan sang Dios matuod gid nga nagahigugmaanay. Si Jesus nagsiling: “Paagi sini mahibaluan sang tanan nga mga disipulo ko kamo, kon nagahigugmaanay kamo.” (Juan 13:35) Amo sini ang paghigugmaanay sang mga Cristiano sang una. Paagi sa pagpakita sang gugma nga nabase sa mga prinsipio sang Biblia, puede magtamdanay nga daw mag-ulutod ang mga tawo nga sarisari sing rasa, pangabuhi, kag pungsod. (Basaha ang Colosas 3:14.) Indi amo sini ang pagtamdanay sang mga miembro sang butig nga mga relihion. Ngaa? Kay nagapinatyanay sila bangod nagakontrahanay ang ila pungsod ukon tribo. Pero ang matuod nga mga Cristiano wala nagauyat sing mga armas para patyon ang pareho nila nga mga Cristiano ukon ang bisan sin-o. Ang Biblia nagasiling: “Ang mga anak sang Dios kag ang mga anak sang Yawa makilala paagi sa sini: Ang bisan sin-o nga wala nagapadayon sa paghimo sing pagkamatarong kag wala nagahigugma sa iya utod indi halin sa Dios. . . . Dapat naton higugmaon ang isa kag isa; indi kaangay ni Cain, nga naghalin sa isa nga malauton kag nagpatay sa iya utod.”—1 Juan 3:10-12; 4:20, 21.

10 Siempre, indi lang pagpatay ang aton likawan kon matuod ang aton gugma. Ang matuod nga mga Cristiano  nagagamit sang ila oras, kusog, kag mga pagkabutang para magbulig kag magpabakod sa isa kag isa. Ginahimo nila ini nga wala nagapaabot sing balos. (Hebreo 10:24, 25) Nagabuligay sila kon may mga problema, kag tampad sila ukon honest sa pagpakig-angot sa iban. Ang matuod, ginatuman nila ang laygay sang Biblia nga ‘himuon ang maayo sa tanan.’—Galacia 6:10.

11. Ngaa importante ang pagbaton kay Jesucristo bilang paagi sang Dios sa pagluwas sa aton?

11 Ang matuod nga mga Cristiano nagabaton kay Jesucristo bilang paagi sang Dios sa pagluwas sa aton. Ang Biblia nagasiling: “Wala na sing iban pa nga manluluwas kundi sia lang, kay wala na sing iban pa nga ngalan sa duta nga ginpili sang Dios sa katawhan sa pagluwas sa aton.” (Binuhatan 4:12) Pareho sa natun-an naton sa Kapitulo 5, ginhatag ni Jesus ang iya kabuhi bilang gawad para sa matinumanon nga mga tawo. (Mateo 20:28) Si Jesus man ang ginhatagan sang Dios sing awtoridad nga mangin Hari sa Ginharian sa langit nga magagahom sa bilog nga duta. Kag ginasugo kita sang Dios nga dapat naton tumanon si Jesus kag sundon ang iya ginatudlo kon gusto naton ang kabuhi nga wala sing katapusan. Gani, ang Biblia nagasiling: “Ang isa nga nagatuo sa Anak makatigayon sang kabuhi nga wala sing katapusan; ang isa nga wala nagatuman sa Anak indi makatigayon sang kabuhi.”—Juan 3:36.

12. Ano ang dapat himuon para indi mangin bahin sang kalibutan?

12 Ang matuod nga mga sumilimba indi bahin sang kalibutan. Sang ginbista si Jesus sa atubangan sang Romano nga gobernador nga si Pilato, nagsiling sia: “Ang akon Ginharian indi bahin sini nga kalibutan.” (Juan 18:36) Bisan diin man sila nga pungsod nagaistar, ang matuod nga mga sumulunod ni Jesus mga sakop sang iya Ginharian  sa langit, gani wala sila sing ginaapinan ukon neutral kon parte sa pulitika. Wala sila nagaentra sa mga inaway. Kag wala man nila ginapasilabtan ang desisyon sang iban nga mag-entra sa isa ka partido pulitika, magkandidato, ukon magboto. Pero bisan neutral sila sa pulitika, nagatuman sila sa kasuguan. Ngaa? Bangod ang Pulong sang Dios nagasugo sa ila nga “magpasakop” sa “mas mataas nga mga awtoridad” ukon gobierno. (Roma 13:1) Kon ang ginasugo sang gobierno supak sa ginasugo sang Dios, ang matuod nga mga sumilimba nagasunod sa halimbawa sang mga apostoles, nga nagsiling: “Dapat namon tumanon ang Dios subong manuggahom sa baylo sang mga tawo.”—Binuhatan 5:29; Marcos 12:17.

13. Para sa matuod nga mga sumulunod ni Jesus, ano ang Ginharian sang Dios, kag ano ang ila ginahimo bangod sini?

13 Ang matuod nga mga sumulunod ni Jesus nagabantala nga ang Ginharian sang Dios amo lamang ang paglaum sang mga tawo. Si Jesus nagtagna: “Ining maayong balita sang Ginharian ibantala sa bug-os nga duta subong panaksi sa tanan nga pungsod, kag dayon magaabot ang katapusan.” (Mateo 24:14) Ang matuod nga mga sumulunod ni Jesucristo wala nagatudlo sa mga tawo nga maglaum nga solbaron sang gobierno ang ila mga problema, kundi nagabantala sila nga ang Ginharian sang Dios sa langit amo lamang ang paglaum sang mga tawo. (Salmo 146:3) Si Jesus nagtudlo sa aton nga ipangamuyo ining perpekto nga gobierno sang nagsiling sia: “Magkari ang imo Ginharian. Matuman ang imo kabubut-on sa duta subong sang sa langit.” (Mateo 6:10) Ang Pulong sang Dios nagtagna nga ining Ginharian sa langit ‘magadugmok kag magalaglag sa tanan nga ginharian [nga nagagahom subong] kag ini lamang ang magapabilin sing dayon.’—Daniel 2:44; Bugna 16:14; 19:19-21.

14. Ano nga relihion ang ginapatihan mo nga nagatuman sa mga ginasugo sang Dios para sa matuod nga pagsimba?

 14 Suno sa bag-o lang naton natun-an, pamangkuta ang imo kaugalingon: ‘Ano nga relihion ang nagabase sang tanan nila nga ginatudlo sa Biblia kag nagapakilala sang ngalan ni Jehova? Ano nga grupo ang nagapakita sing diosnon nga gugma, nagatuo kay Jesus, indi bahin sang kalibutan, kag nagasugid nga ang Ginharian sang  Dios amo lamang ang matuod nga paglaum para sa mga tawo? Sa tanan nga relihion sa kalibutan, ano nga relihion ang nagatuman sini tanan nga sugo sang Dios?’ Maathag nga ginapakita sang mga ebidensia nga ini nga relihion amo ang Mga Saksi ni Jehova.—Basaha ang Isaias 43:10-12.

ANO ANG HIMUON MO?

15. Luwas sa pagpati nga nagaluntad ang Dios, ano pa ang iya ginasugo?

15 Ang pagpati lamang nga may Dios indi bastante para mapalipay sia. Kay man siling sang Biblia, bisan gani ang mga demonyo nagapati nga may Dios. (Santiago 2:19) Pero maathag nga wala nila ginahimo ang kabubut-on sang Dios kag wala sia nalipay sa ila. Para malipay sa aton ang Dios, indi lamang nga dapat kita magpati nga nagaluntad sia kundi dapat man naton himuon ang iya kabubut-on. Dapat man kita maggua sa butig nga relihion kag magsulod sa matuod nga pagsimba.

16. Kon parte sa butig nga pagsimba, ano ang dapat naton himuon?

16 Ginpakita ni apostol Pablo nga dapat indi kita mag-entra sa butig nga pagsimba. Nagsulat sia: “‘Maggua kamo sa tunga nila, kag magbulag kamo,’ siling ni Jehova, ‘kag untati ninyo ang pagtandog sa indi matinlo nga butang’; ‘kag batunon ko kamo.’” (2 Corinto 6:17; Isaias 52:11) Gani ginalikawan sang matuod nga mga Cristiano ang bisan ano nga may labot sa butig nga pagsimba.

17, 18. (a) Ano ang “Babilonia nga Daku”? (b) Ngaa kinahanglan nga ‘maggua’ gilayon sa Babilonia nga Daku?

17 Ginapakita sang Biblia nga ang tanan nga klase sang butig nga pagsimba bahin sang “Babilonia nga Daku.” *  (Bugna 17:5) Madumduman naton sa sini ngalan ang siudad sadto nga Babilonia. Didto nagsugod ang butig nga relihion pagkatapos sang Baha sang panahon ni Noe. Madamo sa ginatudlo kag ginabuhat sang butig nga relihion ang nagsugod sa Babilonia. Halimbawa, ang mga taga-Babilonia sadto nagasimba sa trinidad, ukon tigtatlotatlo nga mga dios. Subong, ang panguna nga doktrina sang madamo nga relihion amo ang Trinidad. Pero maathag nga ginatudlo sang Biblia nga may isa lamang ka matuod nga Dios, si Jehova, kag si Jesucristo Anak niya. (Juan 17:3) Ang mga taga-Babilonia sadto nagapati man nga ang mga tawo may imortal nga kalag nga nagakabuhi gihapon bisan patay na ang lawas kag mahimo mag-antos sa isa ka lugar sang pagpaantos. Subong, ginatudlo sang kalabanan nga relihion nga ang isa may imortal nga kalag ukon espiritu nga mahimo mag-antos sa impierno nga may kalayo.

18 Ang paagi sang pagsimba sang mga taga-Babilonia sadto naglapnag sa bilog nga kalibutan, gani ang emperyo sang butig nga relihion sa kalibutan eksakto gid nga tawgon nga Babilonia nga Daku. Kag gintagna sang Dios nga ini nga emperyo sang butig nga relihion hinali nga malaglag. Naintiendihan mo bala kon ngaa importante gid nga magbulag ka sa tanan nga may labot sa Babilonia nga Daku? Gusto ni Jehova nga Dios nga ‘maggua’ ka gilayon sa Babilonia nga Daku samtang may panahon pa.—Basaha ang Bugna 18:4, 8.

Paagi sa pag-alagad kay Jehova upod sa iya katawhan, mas daku ang imo mabaton sangsa imo madula

19. Ano ang imo mabaton kon mag-alagad ka kay Jehova?

19 Bangod sa imo desisyon nga maghalin sa butig nga relihion, mahimo likawan ka sang iban. Pero paagi sa pag-alagad kay Jehova upod sa iya katawhan, mas daku ang imo mabaton sangsa imo madula. Pareho sang mga disipulo ni Jesus sang una nga nagbiya sang iban nga  mga butang para magsunod sa iya, sa ulihi mangin malapit ka man sa madamo nga kauturan nga pareho mo nga nagasimba kay Jehova. Mangin bahin ka sang bilog kalibutan nga pamilya sang minilyon ka matuod nga Cristiano, nga nagapakita sing matuod gid nga gugma. Kag may makalilipay ka nga paglaum nga kabuhi nga wala sing katapusan “sa palaabuton nga sistema sang mga butang.” (Basaha ang Marcos 10:28-30.) Sa ulihi, basi ang mga nagbiya sa imo bangod sa imo pagtuluuhan mangin interesado sa ginatudlo sang Biblia kag magsimba man kay Jehova.

20. Ano ang palaabuton sang aktibo nga mga miembro sang matuod nga relihion?

20 Ang Biblia nagatudlo nga sa indi madugay dulaon sang Dios ang malaut nga sistema sang mga butang kag islan niya ini sang matarong nga bag-o nga kalibutan sa idalom sang paggahom sang iya Ginharian. (2 Pedro 3:9, 13) Matahom kag makalilipay gid ina nga kalibutan! Sa sinang matarong nga bag-o nga sistema, mangin isa na lang ang relihion, isa ka matuod nga pagsimba. Indi bala nga mapakita mo gid ang kaalam kon himuon mo ang kinahanglanon nga mga tikang para makapakig-upod ka sa matuod nga mga sumilimba subong?

^ par. 17 Para sa dugang nga impormasyon kon ngaa ang Babilonia nga Daku nagarepresentar sa bilog kalibutan nga emperyo sang butig nga relihion, tan-awa ang artikulo sa Apendise nga “Ano ang ‘Babilonia nga Daku’?