Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ano Gid ang Ginatudlo sang Biblia?

 KAPITULO DOSE

Pagkabuhi nga Nagapalipay sa Dios

Pagkabuhi nga Nagapalipay sa Dios
  • Paano ka mangin abyan sang Dios?

  • Ngaa nadalahig ka sa hangkat ni Satanas?

  • Ano nga paggawi ang wala nagapalipay kay Jehova?

  • Ano dapat ang imo pagkabuhi para malipay sa imo ang Dios?

1, 2. Sin-o ang pila ka tawo nga ginpili ni Jehova nga mangin malapit niya nga abyan?

ANO nga klase sang tawo ang pilion mo nga mangin abyan? Siguro gusto mo gid mangin abyan ang isa nga pareho mo sing opinyon, hilig, kag mga prinsipio. Kag ayhan gusto mo gid ang tawo nga nami sing batasan, pareho sang tawo nga mabuot kag bunayag ukon honest.

2 Halin pa sang una, nagpili ang Dios sing pila ka tawo nga mangin malapit niya nga mga abyan. Halimbawa, gintawag ni Jehova si Abraham nga iya abyan. (Basaha ang Isaias 41:8; Santiago 2:23.) Gintawag man sang Dios si David nga “isa ka tawo nga kalahamut-an sa akon tagipusuon” bangod palangga ni Jehova ang tawo nga pareho kay David. (Binuhatan 13:22) Kag para kay Jehova, ang propeta nga si Daniel “hamili gid.”—Daniel 9:23.

3. Ngaa nakig-abyan si Jehova sa pila ka tawo?

 3 Ngaa nakig-abyan si Jehova kay Abraham, David, kag Daniel? Kay man, nagsiling sia kay Abraham: “Nagpamati ka sa akon tingog.” (Genesis 22:18) Gani nagapalapit si Jehova sa mga mapainubuson nga nagatuman sa iya. Ginsilingan niya ang mga Israelinhon: “Tumana ninyo ako, kag mangin Dios ninyo ako, kag mangin katawhan ko kamo.” (Jeremias 7:23) Kon tumanon mo si Jehova, mangin abyan ka man niya!

GINAPABAKOD NI JEHOVA ANG IYA MGA ABYAN

4, 5. Paano ginapakita ni Jehova ang iya kusog sa mga nagasimba sa iya?

4 Hunahunaa kon ano ang buot silingon nga abyan mo ang Dios. Ang Biblia nagasiling nga nagapangita si Jehova sing mga kahigayunan “agod ipakita ang iya kusog para sa ila nga ang tagipusuon bug-os sa iya.” (2 Cronica 16:9) Paano mapakita ni Jehova sa imo ang iya kusog? Ang isa ka paagi mabasa sa Salmo 32:8. Si Jehova nagsiling: “Hatagan ko ikaw sing paghangop kag tudluan ko ikaw sang dalanon nga dapat mo laktan. Laygayan ko ikaw samtang nagatulok ako sa imo.”

5 Nabatyagan mo bala sa ginsiling ni Jehova ang iya pag-ulikid? Hatagan ka niya sing direksion kag bantayan ka niya samtang ginatuman mo ini. Gusto sang Dios nga buligan ka sa imo mga kabudlayan kag mga pagtilaw. (Basaha ang Salmo 55:22.) Gani kon mag-alagad ka kay Jehova sing bug-os tagipusuon, makasalig ka pareho sang manunulat sang salmo nga nagsiling: “Ginahunahuna ko si Jehova sa tanan nga tion. Bangod yara sia sa akon tuo nga kamot, indi ako  malingkang.” (Salmo 16:8; 63:8) Huo, si Jehova makabulig sa imo para ang imo pagkabuhi makapalipay sa iya. Pero, pareho sang nabal-an mo na, may kaaway ang Dios nga gusto magpugong sa imo.

ANG HANGKAT NI SATANAS

6. Ano ang gin-akusar ni Satanas parte sa mga tawo?

6 Ginapaathag sang Kapitulo 11 sini nga libro kon paano ginhangkat ni Satanas nga Yawa ang pagkasoberano sang Dios. Nagsiling si Satanas nga butigon ang Dios. Ginpagua niya nga indi patas si Jehova kay wala sia nagpasugot nga si Adan kag si Eva ang madesisyon para sa ila kaugalingon kon ano ang husto kag sala. Sang nakasala si Adan kag si Eva kag sang nagdamo na ang ila mga anak sa duta, ginduhaduhaan ni Satanas ang motibo sang tanan nga tawo. ‘Indi gugma ang nagatiklod sa mga tawo para magsimba sa Dios,’ akusar niya. ‘Hatagi ’ko tsansa, kay mapatalikod ko ang tanan sa Dios.’ Ang kasaysayan ni Job nagapakita nga amo sini ang pagpati ni Satanas. Sin-o si Job, kag ngaa nadalahig sia sa hangkat ni Satanas?

7, 8. (a) Ngaa wala sing tawo nga kaangay kay Job sang panahon niya? (b) Ano ang ginsiling ni Satanas nga nagapakita nga ginduhaduhaan niya ang motibo ni Job?

7 Nagkabuhi si Job mga 3,600 ka tuig na ang nagligad. Maayo sia nga tawo, kay nagsiling si Jehova: “Wala sing kaangay sa iya sa duta. Matarong sia kag may integridad nga tawo. Nagakahadlok sia sa Dios kag nagalikaw sa malain.” (Job 1:8) Nalipay gid ang Dios kay Job.

8 Ginduhaduhaan ni Satanas ang motibo ni Job sa pag-alagad sa Dios. Ang Yawa nagsiling kay Jehova: “Indi bala nga ginaamligan mo [si Job] kag ang iya panimalay  kag ang tanan nga yara sa iya? Ginpakamaayo mo ang iya mga binuhatan, kag ginpadamo ang iya kasapatan sa duta. Apang untaya ang imo kamot kag kuhaa ang tanan nga yara sa iya, kag pat-od gid nga sikwayon ka niya.”—Job 1:10, 11.

9. Ano ang ginhimo ni Jehova sa hangkat ni Satanas, kag ngaa?

9 Gusto ipagua ni Satanas nga si Job nagaalagad lang sa Dios bangod may makuha sia. Nag-akusar man ang Yawa nga kon tilawan si Job, magatalikod sia sa Dios. Ano ang ginhimo ni Jehova sa hangkat ni Satanas? Nadalahig sa sini nga isyu ang motibo ni Job, gani nagpasugot si Jehova nga tilawan ni Satanas si Job. Paagi sa sini, magaathag kon bala ginahigugma ni Job ang Dios ukon wala.

GINTILAWAN SI JOB

10. Ano nga mga pagtilaw ang naagyan ni Job, kag ano ang iya reaksion?

10 Gintilawan dayon ni Satanas si Job sa sarisari nga paagi. Ang mga kasapatan ni Job ginkawat, kag ang iban napatay. Ang kalabanan niya nga trabahador ginpatay man. Nag-imol ukon nagpamigado gid si Job tungod sini. Nadugangan pa gid ang trahedya sang napatay ang iya pulo ka bata bangod sa mabaskog nga hangin. Pero bisan pa sining grabe nga mga trahedya, “wala makasala si Job ukon magbasol sa Dios.”—Job 1:22.

11. (a) Ano ang ikaduha nga gin-akusar ni Satanas parte kay Job, kag ano ang ginhimo ni Jehova? (b) Ano ang reaksion ni Job bisan pa masakit katama ang iya balatian?

11 Pero wala mag-untat si Satanas. Siguro nagpensar si Satanas nga bisan pa nabatas ni Job ang pagkadula sang iya propiedad, mga trabahador, kag kabataan, talikdan niya ang Dios kon magmasakit sia. Nagpasugot  si Jehova nga pamasakiton ni Satanas si Job sing makangilil-ad kag masakit katama nga balatian. Wala gihapon madula ang pagtuo ni Job sa Dios. Determinado sia nga nagsiling: “Tubtob mapatay ako, indi ko pag-isikway ang akon integridad!”—Job 27:5.

Nakabaton si Job sing padya bangod matutom sia sa Dios

12. Paano ginsabat ni Job ang hangkat ni Satanas?

12 Wala kabalo si Job nga naghalin kay Satanas ang iya mga kabudlayan. Wala gid sia kabalo nga ginhangkat gali sang Yawa ang pagkasoberano ni Jehova, gani nagpensar sia nga basi ang Dios ang naghatag sang iya mga problema. (Job 6:4; 16:11-14) Sa gihapon, wala niya gindula ang iya integridad kay Jehova. Nagpabilin sia nga matutom sa Dios, gani napamatud-an nga sala ang akusasyon ni Satanas nga nagaalagad lang si Job sa Dios kay may makuha sia!

13. Ano ang resulta bangod matutom sa Dios si Job?

13 Paagi sa katutom ni Job, nasabat gid ni Jehova ang nagapang-insulto nga hangkat ni Satanas. Si Job matuod gid nga abyan ni Jehova, kag bangod matutom sia, ginhatagan sia sang Dios sing padya.—Job 42:12-17.

NGAA NADALAHIG KA?

14, 15. Ngaa nadalahig ang tanan nga tawo sa hangkat ni Satanas kay Job?

14 Indi lang si Job ang nadalahig sa isyu parte sa integridad sa Dios nga ginpautwas ni Satanas. Bisan ikaw nadalahig man. Maathag ini nga ginasiling sang Pulong ni Jehova sa Hulubaton 27:11: “Magmaalam ka, anak ko, kag pasadyaha ang akon tagipusuon, agod masabat ko sia nga nagayaguta sa akon.” Ini nga mga tinaga nga ginsulat ginatos ka tuig pagkatapos mapatay si Job nagapakita nga ginayaguta ukon ginainsulto gihapon ni Satanas ang Dios kag ginaakusar ang  Iya mga alagad. Kon ang aton pagkabuhi nagapalipay kay Jehova, nagabulig kita para masabat ang butig nga akusasyon ni Satanas kag mapalipay naton ang tagipusuon sang Dios. Ano ang ginabatyag mo sa sini? Indi bala nga manami gid kon nagabulig kita sa pagsabat sa butig nga akusasyon sang Yawa, bisan pa dapat naton bag-uhon ang aton kabuhi para mahimo ini?

15 Pensara bala ang ginsiling ni Satanas: “Ihatag sang tawo ang tanan nga yara sa iya tungod sa iya kabuhi.” (Job 2:4) Sa pagsiling nga “tawo,” ginklaro ni Satanas nga indi lang si Job ang iya ginaakusar kundi ang tanan nga tawo. Importante gid ini nga punto. Ginduhaduhaan ni Satanas ang imo integridad sa Dios. Gusto sang Yawa nga indi mo pagtumanon ang Dios kag indi mo paghimuon ang matarong kon may mga kabudlayan. Paano ini ginahimo ni Satanas?

16. (a) Ano ang mga paagi ni Satanas para indi na magsimba ang mga tawo sa Dios? (b) Paano ini gamiton sang Yawa para madala ka niya?

16 Pareho sa natun-an mo sa Kapitulo 10, sarisari ang paagi ni Satanas para indi na magsimba ang mga tawo sa Dios. Kon kaisa, daw pareho sia sa “nagangurob nga leon, nga nagapangita sing tulukbon.” (1 Pedro 5:8) Gani, mahimo impluwensiahan ni Satanas ang imo mga amigo ukon amiga, pamilya, ukon iban pa para balabagan ang imo pagtinguha nga magtuon sa Biblia kag himuon ang imo natun-an. * (Juan 15:19, 20) Kon  kaisa naman, si Satanas “nagapakunokuno nga anghel sang kapawa.” (2 Corinto 11:14) Ayhan may mga paagi sia nga indi bal-anon para mapatalang ka kag para biyaan mo ang diosnon nga pagkabuhi. Ginagamit man niya ang pagluya sang buot, kay nagabatyag ka nga imposible nga mahimo mo ang ginasugo sang Dios. (Hulubaton 24:10) Bisan daw ‘nagangurob man sia nga leon’ ukon daw “anghel sang kapawa,” ang iya hangkat amo lang gihapon: Nagasiling sia nga kon ginabudlayan ka ukon ginasulay, magauntat ka sa pag-alagad sa Dios. Paano mo masabat ang iya hangkat kag mapamatud-an ang imo integridad sa Dios, pareho kay Job?

PAGTUMAN SA MGA SUGO NI JEHOVA

17. Ano gid dapat ang rason sa pagtuman sa mga sugo ni Jehova?

17 Masabat mo ang hangkat ni Satanas kon ang imo pagkabuhi nagapalipay sa Dios. Ti, ano ang dapat mo himuon? Ang Biblia nagasabat: “Higugmaa si Jehova nga inyo Dios sa bug-os ninyo nga tagipusuon kag sa bug-os ninyo nga kalag kag sa bug-os ninyo nga kusog.” (Deuteronomio 6:5) Samtang nagadaku ang imo gugma sa Dios, mabatyagan mo nga gusto mo gid tumanon ang iya mga sugo. “Amo ini ang kahulugan sang gugma sa Dios,” sulat ni apostol Juan, “nga tumanon naton ang iya mga sugo.” Kon bug-os tagipusuon mo nga ginahigugma si Jehova, makita mo nga “ang iya mga sugo indi mabug-at.”—1 Juan 5:3.

18, 19. (a) Ano ang pila ka sugo ni Jehova? (Tan-awa ang kahon nga may tig-ulo nga “ Likawi ang mga Ginadumtan ni Jehova.”) (b) Ngaa masiling naton nga wala nagapangayo ang Dios sang indi naton masarangan?

18 Ano ang mga sugo ni Jehova? Ang iban parte sa mga buhat nga indi naton dapat paghimuon. Ang pila  sini makita sa kahon nga may tig-ulo nga “ Likawi ang mga Ginadumtan ni Jehova.” Nalista diri ang mga buhat nga maathag nga ginakondenar sang Biblia. Sa una mo nga pagtan-aw, mahimo ang iban sini daw indi man malain. Pero kon pamalandungan mo ang ginasiling sang mga bersikulo sa Biblia, marealisar mo nga mas maayo nga sundon ang mga kasuguan ni Jehova. Ang pagbag-o sang imo paggawi mahimo nga mabudlay gid. Pero mabatyagan mo ang daku nga kalipay kon ang imo pagkabuhi ginabaton  sang Dios. (Isaias 48:17, 18) Kag mahimo mo gid ini. Ngaa?

19 Si Jehova wala gid nagapangayo sang indi naton masarangan. (Basaha ang Deuteronomio 30:11-14.) Mas kabalo sia kon ano ang aton masarangan kag indi masarangan. (Salmo 103:14) Isa pa, ginahatagan kita ni Jehova sing kusog para matuman naton sia. Si apostol Pablo nagsiling: “Ang Dios matutom, kag indi sia magtugot nga sulayon kamo labaw sa inyo masarangan, apang kon mag-abot ang pagsulay magahimo  man sia sang lulutsan agod mabatas ninyo ini.” (1 Corinto 10:13) Si Jehova nagahatag pa gani sing “gahom nga labaw sa kinaandan” para makabatas ka. (2 Corinto 4:7) Sang nabatas ni apostol Pablo ang madamo nga kabudlayan, nagsiling sia: “Sa tanan nga butang may kusog ako paagi sa isa nga nagapabakod sa akon.”—Filipos 4:13.

PAANO MATUN-AN ANG DIOSNON NGA MGA KINAIYA?

20. Ano ang diosnon nga mga kinaiya nga dapat mo tun-an sa imo kaugalingon, kag ngaa importante ini?

20 Para malipay si Jehova sa aton pagkabuhi, indi lamang paglikaw sa mga ginadumtan niya ang dapat himuon. Dapat mo man higugmaon ang iya ginahigugma. (Roma 12:9) Indi bala nga nagalapit ang imo buot sa mga tawo nga pareho mo sing opinyon, hilig, kag prinsipio? Amo man sina si Jehova. Gani tun-i nga higugmaon ang mga butang nga ginahigugma ni Jehova. Makita mo ang pila sini sa Salmo 15. Mabasa mo diri kon sin-o ang ginapili sang Dios nga mangin mga abyan niya. (Basaha ang Salmo 15:1-5.) Makita sa mga abyan ni Jehova ang ginatawag sang Biblia nga “mga kinaiya nga ginapatubas sang espiritu.” Ini nga mga kinaiya amo ang “gugma, kalipay, paghidait, pagkamapinasensiahon, maayo nga kabubut-on, kaayo, pagtuo, kalulo, kag pagpugong sa kaugalingon.”—Galacia 5:22, 23.

21. Ano ang makabulig sa imo nga matun-an sa imo kaugalingon ang diosnon nga mga kinaiya?

21 Ang regular nga pagbasa kag pagtuon sa Biblia magabulig sa imo nga matun-an sa imo kaugalingon ang diosnon nga mga kinaiya. Kag ang pagtuon sa  mga sugo sang Dios makabulig para ang imo panghunahuna magsantu sa panghunahuna sang Dios. (Isaias 30:20, 21) Kon sigehon mo ang pagpabakod sang imo gugma kay Jehova, mas mabatyagan mo nga gusto mo ang pagkabuhi nga nagapalipay sa Dios.

22. Ano ang imo mabenepisyo kon ang imo pagkabuhi nagapalipay sa Dios?

22 Kinahanglan mo magtinguha para ang imo pagkabuhi nagapalipay kay Jehova. Siling sang Biblia, ang pagbag-o sa imo kabuhi daw pareho sa pag-uba sang imo daan nga personalidad kag pagsuksok sang bag-o nga personalidad. (Colosas 3:9, 10) Pero parte sa mga sugo ni Jehova, ang isa ka manunulat sang salmo nagsiling: “Daku ang padya kon tumanon ini.” (Salmo 19:11) Mapamatud-an mo nga daku gid ang pagpakamaayo kon ang imo pagkabuhi nagapalipay sa Dios. Kon himuon mo ini, makabulig ka sa pagsabat sa hangkat ni Satanas kag mapalipay mo ang tagipusuon ni Jehova!

^ par. 16 Indi buot silingon sini nga ginakontrol mismo ni Satanas ang mga tawo nga nagabalabag sa imo. Pero si Satanas ang dios sining sistema sang mga butang, kag ang bug-os nga kalibutan yara sa iya gahom. (2 Corinto 4:4; 1 Juan 5:19) Gani mapaabot naton nga madamo ang wala nanamian sa diosnon nga pagkabuhi, kag ang iban magakontra sa imo.