Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ano Gid ang Ginatudlo sang Biblia?

 KAPITULO TRES

Ano ang Katuyuan sang Dios Para sa Duta?

Ano ang Katuyuan sang Dios Para sa Duta?
  • Ano ang katuyuan sang Dios para sa mga tawo?

  • Paano ginhangkat ang Dios?

  • Ano ang kahimtangan sang kabuhi sa duta sa palaabuton?

1. Ano ang katuyuan sang Dios para sa duta?

ANG katuyuan sang Dios sa duta maayo gid. Gusto ni Jehova nga mapuno ini sang mga tawo nga malipayon kag wala nagamasakit. Ang Biblia nagasiling nga “naghimo man si Jehova nga Dios sing isa ka hardin sa Eden” kag “ginpatubo . . . ang tagsa ka kahoy nga makagalanyat tulukon kag maayo nga kalan-on.” Sang natuga na sang Dios ang una nga lalaki kag babayi, nga si Adan kag si Eva, ginbutang Niya sila sa sining matahom nga ilistaran kag ginsugo sila: “Magpanganak kamo kag magdamo, pun-a ninyo ang duta kag dumalahan ini.” (Genesis 1:28; 2:8, 9, 15) Gani katuyuan sang Dios nga ang mga tawo magpanganak. Dayon palaparon nila ang ila hardin nga ilistaran sa bilog nga duta kag atipanon ang mga sapat.

2. (a) Ngaa kabalo kita nga matuman ang katuyuan sang Dios para sa duta? (b) Suno sa Biblia, ano nga klase sang mga tawo ang magaistar sa duta asta san-o?

2 Sa banta mo, matuman gid ayhan ang katuyuan ni Jehova nga Dios nga ang mga tawo mapuyo ukon maistar sa paraiso nga duta? Ang Dios naghambal: “Ginsiling ko ini, kag pahanabuon ko ini.” (Isaias 46:9-11; 55:11) Huo, tumanon gid sang Dios kon ano ang iya ginatuyo!  Nagsiling sia nga ‘wala niya gintuga ang duta sa wala sing pulos, kundi ginbuhat ini agod puy-an.’ (Isaias 45:18) Ano nga klase sang mga tawo ang gusto sang Dios nga mag-istar sa duta? Kag daw ano kadugay niya sila paistaron diri? Ang Biblia nagasabat: “Ang mga matarong magapanubli sang duta, kag magapuyo sila sa sini sa wala sing katubtuban.”Salmo 37:29; Bugna 21:3, 4.

3. Ano ang masubo nga mga sitwasyon nga nagakatabo subong sa duta, kag ano ang mga pamangkot bangod sini?

3 Siempre, wala pa ini matabo. Ang mga tawo subong nagamasakit kag nagakapatay; nagainaway pa gani sila kag nagapatyanay. May natabo gid nga indi amo. Sigurado nga indi katuyuan sang Dios ang nagakatabo sa duta subong! Ti, ngaa amo sini? Ngaa wala matuman ang katuyuan sang Dios? Wala sang bisan ano nga libro nga ginsulat sang tawo parte sa kasaysayan nga makapaathag sini. Kay man, ang problema nag-umpisa sa langit.

ANG GINHALINAN SANG KAAWAY

4, 5. (a) Sin-o gid ang nagaistorya kay Eva paagi sa man-ug? (b) Paano matabo nga ang tawo nga sang una maayo kag ginarespeto gid mahimo mangin kawatan?

4 Ang una nga libro sa Biblia nagasiling nga may nagpamatok sa Dios sa hardin sang Eden. Ginlaragway sia subong “ang man-ug,” pero indi lang sia basta sapat. Suno sa katapusan nga libro sa Biblia, sia “ang isa nga ginatawag Yawa kag Satanas, nga nagapatalang sa bug-os napuy-an nga duta.” Gintawag man sia nga “orihinal nga man-ug.” (Genesis 3:1; Bugna 12:9) Ining gamhanan nga anghel, ukon indi makita nga espiritu nga tinuga, naggamit sing man-ug para mag-istorya kay Eva, pareho sang tawo nga kabalo magpakunokuno nga ang iya tingog naghalin sa monyika ukon puppet. Ining espiritu nga persona sigurado nga ara gid sang ginhimo sang Dios ang duta para sa mga tawo.—Job 38:4, 7.

 5 Perpekto ang tanan nga tinuga ni Jehova, gani sin-o ang naghimo sa sining “Yawa,” sa sining “Satanas”? Sa simple nga paathag, ang isa sa gamhanan nga espiritu nga mga anak sang Dios naghimo sang iya kaugalingon nga mangin Yawa. Paano? Pareho ini sa tawo nga sang una maayo kag ginarespeto gid pero mahimo mangin kawatan. Paano ini matabo? Ayhan ginpatubo niya sa iya tagipusuon ang malain nga handum. Samtang padayon niya ini nga ginapensar, ining malain nga handum mahimo magbaskog. Dayon kon may tsansa, posible nga himuon niya ang malain nga handum nga ginapensar niya.—Basaha ang Santiago 1:13-15.

6. Ngaa ang isa ka gamhanan nga espiritu nga anak sang Dios nangin Satanas nga Yawa?

6 Amo sini ang natabo kay Satanas nga Yawa. Mahimo gid nga nabatian niya ang ginsiling sang Dios kanday Adan kag Eva nga magpanganak kag pun-on ang duta sang ila mga anak. (Genesis 1:27, 28) Sigurado nga naghunahuna sia, ‘Puede man nga ako ang simbahon sang tanan nga tawo, kag indi ang Dios!’ Gani nagtubo ang malain nga handum sa iya tagipusuon. Sang ulihi, naghulag sia sa pagdaya kay Eva paagi sa paghambal sing kabutigan parte sa Dios. (Basaha ang Genesis 3:1-5.) Gani nangin “Yawa” sia, nga nagakahulugan “Manugpasipala,” kag nangin “Satanas,” nga nagakahulugan “Manugpamatok.”

7. (a) Ngaa napatay si Adan kag si Eva? (b) Ngaa ang tanan nga anak ni Adan nagatigulang kag nagakapatay?

7 Paagi sa pagbinutig kag pagdaya, nakumbinsi ni Satanas nga Yawa si Adan kag si Eva nga indi magtuman sa Dios. (Genesis 2:17; 3:6) Bilang resulta, napatay sila sang ulihi, suno gid sa ginsiling sang Dios nga matabo kon indi sila magtuman. (Genesis 3:17-19) Bangod indi na perpekto si Adan sang nakasala sia, napanubli sang tanan  niya nga anak ang sala nga halin sa iya. (Basaha ang Roma 5:12.) Daw pareho ini sa hurmahan sang tinapay. Kon gupi ang hurmahan, ano ang matabo sa kada tinapay nga ginluto sa sini? Siempre may gupi man, kag indi na perpekto ang korte. Pareho man sini ang kada tawo. Ang kada isa may “gupi” ukon indi perpekto bangod napanubli ini kay Adan. Amo ini ang rason kon ngaa ang tanan nga tawo nagatigulang kag nagakapatay.—Roma 3:23.

8, 9. (a) Ano gid ang hangkat ni Satanas? (b) Ngaa wala dayon ginpatay sang Dios ang mga nagrebelde sa iya?

8 Ang matuod, sang ginkumbinsi ni Satanas si Adan kag si Eva nga magpakasala sa Dios, ginpangunahan na niya ang pagrebelde. Ginhangkat niya ang paagi ni Jehova sa paggahom. Pareho lang nga nagsiling si Satanas: ‘Ang Dios malain nga manuggahom. Butigon sia kag ginadingot niya ang maayo nga mga butang sa iya mga sakop. Indi kinahanglan sang mga tawo ang paggahom sang Dios. Puede sila makadesisyon para sa ila kaugalingon kon ano ang maayo kag malain. Kag mas maayo ang ila sitwasyon kon ako ang maggahom.’ Ano ang himuon sang Dios sa sining nagapang-insulto nga hangkat? Hambal sang iban, dapat ginpatay na lang sang Dios ang mga nagrebelde sa iya. Pero masabat bala sini ang hangkat ni Satanas? Mapamatud-an bala sini nga husto ang paggahom sang Dios?

9 Perpekto ang hustisya ni Jehova, gani wala niya dayon ginpatay ang mga nagrebelde sa iya. Kabalo sia nga kinahanglan ang tion para masabat sing maayo ang hangkat ni Satanas kag para pamatud-an nga butigon ang Yawa. Gani nagdesisyon ang Dios nga pasugtan ang mga tawo nga gamhan anay ang ila kaugalingon sa idalom sang impluwensia ni Satanas. Ipaathag sang Kapitulo 11 sini nga libro kon ngaa nagpasugot si Jehova nga  magligad ang malawig nga tion antes husayon ini nga mga hulusayon. Pero maayo gid nga hunahunaon naton ini: Husto bala si Adan kag si Eva nga magpati kay Satanas, nga wala pa gid sing maayo nga nahimo sa ila? Husto bala nga magpati sila nga si Jehova, nga naghatag sang tanan nila nga kinahanglanon, mapintas kag butigon? Ano ang himuon mo kon ikaw ang sa lugar nila?

10. Paano mo mapakita nga dampig ka kay Jehova bilang sabat sa hangkat ni Satanas?

 10 Maayo gid nga hunahunaon ini nga mga pamangkot bangod ang kada isa sa aton nagaatubang man sing amo sini nga hulusayon. May kahigayunan ka nga magdampig kay Jehova para masabat ang hangkat ni Satanas. Makadesisyon ka nga batunon si Jehova subong imo Manuggahom kag makabulig ka para pamatud-an nga butigon si Satanas. (Salmo 73:28; basaha ang Hulubaton 27:11.) Pero masubo nga sa binilyon ka tawo sa kalibutan, pila lang ang naghimo sini nga desisyon. Gani may importante nga pamangkot, Ginatudlo gid bala sang Biblia nga si Satanas ang nagagahom sa sini nga kalibutan?

SIN-O ANG NAGAGAHOM SA SINI NGA KALIBUTAN?

Itanyag bala ni Satanas kay Jesus ang tanan nga ginharian sang kalibutan kon indi ini iya?

11, 12. (a) Ngaa ang pagsulay kay Jesus nagapakita nga si Satanas ang manuggahom sini nga kalibutan? (b) Ano pa ang iban nga ebidensia nga si Satanas ang manuggahom sini nga kalibutan?

11 Wala gid magduhaduha si Jesus nga si Satanas ang manuggahom sini nga kalibutan. Paagi sa milagro, ginpakita sadto ni Satanas kay Jesus “ang tanan nga ginharian sang kalibutan kag ang gahom kag manggad sini.” Dayon ginpromisahan ni Satanas si Jesus: “Ini tanan ihatag ko sa imo kon magyaub ka kag maghimo sing isa ka buhat sang pagsimba sa akon.” (Mateo 4:8, 9; Lucas 4:5, 6) Pensara bala. Masiling ayhan nga pagsulay ini kay Jesus kon indi si Satanas ang manuggahom sini nga mga ginharian? Wala ginpanghiwala ni Jesus nga iya ni Satanas ining tanan nga gobierno sang kalibutan. Kay kon indi ini kay Satanas, sigurado nga nagpamatok si Jesus.

12 Matuod, si Jehova ang labing gamhanan nga Dios, ang Manunuga sang dalayawon nga uniberso. (Bugna 4:11) Pero, wala gid nagasiling ang Biblia nga si Jehova nga Dios ukon si Jesucristo ang manuggahom sini nga kalibutan. Maathag pa gani nga ginsiling ni Jesus nga  si Satanas “ang manuggahom sini nga kalibutan.” (Juan 12:31; 14:30; 16:11) Nagsiling man ang Biblia nga si Satanas nga Yawa amo ang “dios sini nga sistema sang mga butang.” (2 Corinto 4:3, 4) Parte sa sini nga manugpamatok, ukon Satanas, ang Cristiano nga si apostol Juan nagsulat: “Ang bug-os nga kalibutan yara sa gahom sang isa nga malauton.”—1 Juan 5:19.

PAANO DULAON ANG KALIBUTAN NI SATANAS?

13. Ngaa kinahanglan ang bag-o nga kalibutan?

13 Samtang nagaligad ang mga tinuig, nagalala pa gid ang sitwasyon sang kalibutan. Madamo sing nagailinaway nga pungsod, korap nga mga pulitiko, salimpapaw nga mga lider sang relihion, kag bat-ulan nga mga kriminal. Daw imposible na nga mareporma ang kalibutan. Ginapakita sang Biblia nga malapit na lang dulaon sang Dios ang kalautan sa kalibutan sa tion sang iya inaway nga Armageddon. Dayon, magabulos ang matarong kag bag-o nga kalibutan.—Bugna 16:14-16.

14. Sin-o ang ginpili sang Dios nga mangin Manuggahom sang Iya Ginharian, kag ano ang tagna parte sa sini?

14 Ginpili ni Jehova nga Dios si Jesucristo nga mangin Manuggahom sang Iya Ginharian, ukon gobierno, sa langit. Madugay na nga gintagna sang Biblia: “Isa ka bata ang natawo sa aton, isa ka anak nga lalaki ang ginhatag sa aton; kag ibutang sa iya abaga ang gobierno. Ang iya ngalan tawgon nga . . . Prinsipe sang Paghidait. Ang iya gobierno magalapnag kag ang paghidait mangin wala sing katapusan.” (Isaias 9:6, 7, footnote) Parte sa sini nga gobierno, gintudluan ni Jesus ang iya mga sumulunod nga mangamuyo: “Magkari ang imo Ginharian. Matuman ang imo kabubut-on sa duta subong sang sa langit.” (Mateo 6:10) Matun-an naton sa ulihi sa sini nga libro nga malapit na lang dulaon sang Ginharian sang Dios  ang tanan nga gobierno sini nga kalibutan kag ini ang magabulos. (Basaha ang Daniel 2:44.) Dayon, paagi sa Ginharian sang Dios, mangin paraiso ang duta.

MALAPIT NA ANG BAG-O NGA KALIBUTAN!

15. Ano ang “bag-o nga duta”?

15 Ang Biblia nagapasalig sa aton: ‘May bag-o nga langit kag bag-o nga duta nga ginahulat naton suno sa saad sang Dios, kag sa sini magapuyo ang pagkamatarong.’ (2 Pedro 3:13; Isaias 65:17) Kon kaisa, ang ginasiling sang Biblia nga “duta” nagakahulugan sing mga tawo nga nagaistar sa duta. (Genesis 11:1) Gani ang matarong nga “bag-o nga duta” amo ang grupo sang mga tawo nga nahamut-an sang Dios.

16. Ano ang dalayawon nga regalo sang Dios para sa iya mga nahamut-an, kag ano ang dapat naton himuon para mabaton ini?

16 Nagsaad si Jesus nga sa nagapakari nga bag-o nga kalibutan, ang mga nahamut-an sang Dios makabaton sing regalo nga “kabuhi nga wala sing katapusan.” (Marcos 10:30) Buksi palihug ang imo Biblia sa Juan 3:16 kag 17:3, kag basaha ang ginsiling ni Jesus nga dapat naton himuon para mabaton ang kabuhi nga wala sing katapusan. Dayon, hunahunaa ang ginasugid sang Biblia nga mga pagpakamaayo. Ihatag ini sa mga kalipikado nga magbaton sining dalayawon nga regalo halin sa Dios sa nagapakari nga Paraiso nga duta.

17, 18. Ngaa makasiguro kita nga sa ulihi may paghidait kag seguridad sa bilog nga kalibutan?

17 Madula na ang kalautan, inaway, krimen, kag kasingki. “Madula na ang mga malauton . . . Apang ang mga mahagop magapanubli sang duta.” (Salmo 37:10, 11) May paghidait na bangod ‘pauntaton sang Dios ang mga inaway sa bug-os nga duta.’ (Salmo 46:9; Isaias 2:4) Dayon, “magabugana ang paghidait tubtob wala na ang bulan”—buot silingon, asta san-o!—Salmo 72:7.

 18 Ang mga nagasimba kay Jehova magakabuhi nga may kalig-unan ukon seguridad. Sang panahon sang Biblia, may seguridad ang pagkabuhi sang mga Israelinhon sang gintuman nila ang Dios. (Levitico 25:18, 19) Gani mapaabot naton nga amo man sini ang kabuhi naton sa Paraiso!—Basaha ang Isaias 32:18; Miqueas 4:4.

19. Ngaa nabal-an naton nga mangin bugana ang pagkaon sa bag-o nga kalibutan sang Dios?

19 Wala na sing kakulang sa pagkaon. “Mangin bugana ang mga uyas sa duta,” siling sang manunulat sang salmo. “Sa putukputukan sang kabukiran magahapayhapay ini.” (Salmo 72:16) Pakamaayuhon ni Jehova nga Dios ang mga matarong, kag “ang duta magahatag sang iya patubas.”—Salmo 67:6.

20. Ngaa makasiguro kita nga ang bilog nga duta mangin paraiso?

20 Mangin paraiso ang bilog nga duta. Ang duta nga ginguba sadto sang makasasala nga mga tawo patindugan sang matahom nga mga balay kag himuan sang mga hardin. (Basaha ang Isaias 65:21-24; Bugna 11:18) Samtang nagaligad ang panahon, ang mga bahin sang duta nga ginaatipan sang tawo magalapad asta nga ang bilog nga globo mangin matahom kag mapatubason pareho sa hardin sang Eden. Kag padayon nga ‘ihumlad sang Dios ang iya kamot kag ihatag ang handum sang tagsa ka buhi nga butang.’—Salmo 145:16.

21. Ngaa makasiling kita nga maabot ang tion nga may paghidait na sa tunga sang mga sapat kag mga tawo?

21 May paghidait na sa tunga sang mga sapat kag mga tawo. Ang ilahas kag ginasagod nga mga sapat magaupdanay sa pagkaon. Bisan ang gamay nga bata indi na mahadlok sa mga sapat nga delikado subong.—Basaha ang Isaias 11:6-9; 65:25.

22. Ano ang matabo sa balatian?

22 Wala na sing balatian. Bilang Manuggahom sang  Ginharian sang Dios sa langit, mas madamo nga pagpang-ayo ang himuon ni Jesus sangsa ginhimo niya sang ari pa sia sa duta. (Mateo 9:35; Marcos 1:40-42; Juan 5:5-9) Gani, “wala sing pumuluyo nga magasiling: ‘Nagamasakit ako.’”—Isaias 33:24; 35:5, 6.

23. Ngaa makalilipay gid para sa aton ang pagkabanhaw?

23 Ang napatay nga mga pinalangga banhawon kag may paglaum nga indi na mapatay. Ang tanan nga nagakatulog sa kamatayon nga ara sa memorya sang Dios pagabanhawon. Ang matuod, “may pagkabanhaw sang mga matarong kag mga indi matarong.”—Binuhatan 24:15; basaha ang Juan 5:28, 29.

24. Ano ang ginabatyag mo parte sa pagkabuhi sa Paraiso nga duta?

24 Makalilipay gid nga palaabuton ang nagahulat sa mga nagdesisyon nga magtuon parte sa aton Daku nga Manunuga, si Jehova nga Dios, kag mag-alagad sa iya! Ang palaabuton nga Paraiso nga duta amo ang buot silingon ni Jesus sang nagsaad sia sa kriminal nga napatay sa iya tupad: “Mangin kaupod ko ikaw sa Paraiso.” (Lucas 23:43) Importante gid nga magtuon pa kita parte kay Jesucristo, nga paagi sa iya mangin posible ining tanan nga mga pagpakamaayo.