Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ano Gid ang Ginatudlo sang Biblia?

 APENDISE

Dapat Bala Maggamit ang mga Cristiano sing Krus sa Ila Pagsimba?

Dapat Bala Maggamit ang mga Cristiano sing Krus sa Ila Pagsimba?

ANG krus ginakabig nga hamili kag ginarespeto sang minilyon ka tawo. Ginatawag ini sang The Encyclopædia Britannica nga “panguna nga simbulo sang Cristiano nga relihion.” Pero eksakto bala nga maggamit ang matuod nga mga Cristiano sing krus sa pagsimba?

Dumdumon naton nga si Jesucristo wala napatay sa krus. Ang Griego nga tinaga nga ginbadbad nga “krus” amo ang stau·rosʹ. Nagakahulugan ini sing “isa ka tadlong nga haligi ukon usok.” Ang The Companion Bible nagasiling: “Ang [stau·rosʹ] wala nagakahulugan sing duha ka kahoy nga ginbangday . . . Wala gid sing mabasa sa Griego nga [Bag-o nga Testamento] nga nagapahangop bisan sang duha ka kahoy lang.”

Sa iban nga mga bersikulo, gingamit sang mga manunulat sang Biblia ang isa pa ka tinaga para sa instrumento sa pagpatay kay Jesus. Amo ini ang Griego nga tinaga nga xyʹlon. (Binuhatan 5:30; 10:39; 13:29; Galacia 3:13; 1 Pedro 2:24) Ini nga tinaga nagakahulugan lamang sing “kahoy” ukon “lipak, batuta, ukon puno sang kahoy.”

Ang usok pirme ginagamit para sa pagpatay. Ngaa? Ang libro nga Das Kreuz und die Kreuzigung (Ang Krus kag ang Paglansang sa Krus), ni Hermann Fulda, nagapaathag: “Sa iban nga lugar diin ginapatay ang mga kriminal sa atubangan sang publiko, malaka lang ang mga kahoy. Gani isa lang ka kahoy ang ginatubsok sa duta. Diri ginagapos ukon ginalansangan ang nabayaw nga mga kamot sang mga kriminal kag sa masami pati ang ila tiil.”

Pero ang makapakumbinsi gid nga ebidensia ara sa Pulong sang Dios. Si apostol Pablo nagasiling: “Ginbakal kita sang Cristo, gani nahilway kita sa pagpakamalaut sang Kasuguan. Kay sia ang ginpakamalaut sa baylo nga kita, kay nasulat na: ‘Ginpakamalaut ang isa nga ginbutang sa usok [“kahoy,” HPV].’” (Galacia 3:13) Ginsulit diri ni Pablo ang Deuteronomio 21:22, 23, diin maathag nga ginsambit ang usok, indi krus. Ini nga paagi sang pagpatay nagahimo sa isa nga ‘pagpakamalaut,’ gani indi eksakto nga dekorasyunan sang mga Cristiano ang ila balay sang mga imahen sang Cristo sa krus.

 Sa una nga 300 ka tuig pagkatapos napatay ang Cristo, wala sing ebidensia nga naggamit sing krus ang mga tawo nga nagasiling nga Cristiano. Pero sang ikap-at nga siglo, ang pagano nga si Emperador Constantino nakumbertir sa apostata nga Cristianismo kag ginsakdag niya ang krus bilang simbulo sini. Bisan ano man ang motibo ni Constantino, wala sing labot ang krus kay Jesucristo. Ang matuod, ang krus naghalin sa mga pagano. Ang New Catholic Encyclopedia nagabaton: “Gingamit na ang krus antes pa sang panahon sang mga Cristiano kag sang indi Cristiano nga mga kultura.” Suno pa gid sa iban nga awtorisado nga mga libro, ang krus naangot sa pagsimba sa kinaugali kag sa seksuwal nga ritwal sang mga pagano.

Kon amo, ngaa ginasuportahan ining pagano nga simbulo? Mahimo nga para mas madali batunon sang mga pagano ang “Cristianismo.” Pero maathag nga ginapakamalaut sang Biblia ang debosyon sa bisan ano nga simbulo sang mga pagano. (2 Corinto 6:14-18) Ginadilian man sang Biblia ang tanan nga klase sang pagsimba sa mga diosdios. (Exodo 20:4, 5; 1 Corinto 10:14) Gani, may rason gid ang matuod nga mga Cristiano nga indi maggamit sing krus sa pagsimba. *

^ par. 2 Para sa mas detalyado nga paathag parte sa krus, tan-awa ang pahina 89-93 sang libro nga Reasoning From the Scriptures, nga ginbalhag sang mga Saksi ni Jehova.