Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ano Gid ang Ginatudlo sang Biblia?

 APENDISE

Disiembre Bala Natawo si Jesus?

Disiembre Bala Natawo si Jesus?

WALA ginasugid sa aton sang Biblia kon san-o natawo si Jesus. Pero nagahatag ini sa aton sing mabakod nga rason sa pagsiling nga indi Disiembre natawo si Jesus.

Si Jesus natawo sa Betlehem. Hunahunaa ang tiempo sa Betlehem sina nga tion sang tuig. Kon bulan sang Chislev (katumbas sang Nobiembre/Disiembre) sang mga Judiyo, matugnaw kag  maulan. Ginasundan ini sang Tebeth (Disiembre/Enero). Amo ini ang pinakamatugnaw nga bulan sa sulod sang isa ka tuig, kag kon kaisa may niebe sa mataas nga mga lugar. Tan-awon naton ang ginasugid sang Biblia parte sa klima sa sina nga rehiyon.

Ginpakita sang manunulat sang Biblia nga si Esdras nga ang bulan sang Chislev matugnaw gid man kag maulan. Pagkatapos magsiling nga may kadam-an nga nagtipon sa Jerusalem “sang ika-20 nga adlaw sang ikasiam nga bulan [Chislev],” nagsiling sia nga ang mga tawo “nagakurog . . . bangod sang mabaskog nga ulan.” Parte sa tiempo sina nga tion sang tuig, ang nagtipon nga mga tawo nagsiling: “Tig-ululan karon. Indi kami makapabilin sa gua.” (Esdras 10:9, 13; Jeremias 36:22) Amo nga sa mga rehiyon sa palibot sang Betlehem, ang mga manugbantay kag ang ila mga panong wala nagapagab-i sa gua kon Disiembre!

Pero ang Biblia nagasiling nga sang gab-i nga natawo si Jesus, ang mga manugbantay ara sa latagon nga nagaatipan sang ila mga panong. Ginapakita pa gani sang manunulat sang Biblia nga si Lucas nga sadto nga tion, ang mga manugbantay “nagaistar sa latagon kag nagabantay sang ila mga panong sa bug-os nga gab-i” malapit sa Betlehem. (Lucas 2:8-12) Talupangda  nga ang mga manugbantay nagaistar mismo sa gua, kag wala nagadayandayan lang kon adlaw. Ang ila panong ara sa latagon kon gab-i. Posible bala ang pagkabuhi sa gua sa matugnaw kag maulan nga tiempo sa Betlehem kon Disiembre? Indi gid. Gani ang mga sitwasyon sang ginbata si Jesus nagapakita nga indi sia Disiembre natawo. *

Ginasugid sa aton sang Pulong sang Dios kon san-o gid napatay si Jesus, pero diutay lang ang ginasugid sini nga nagapakita kon san-o sia natawo. Nagapahanumdom ini sa aton sang ginsiling ni Hari Solomon: “Ang maayo nga ngalan mas maayo pa sangsa malahalon nga lana, kag ang adlaw sang kamatayon sangsa adlaw sang pagkatawo.” (Manugwali 7:1) Amo kon ngaa madamo kita sing mabasa sa Biblia parte sa ministeryo kag kamatayon ni Jesus, pero diutay lang ang mga detalye parte sa tion sang iya pagkatawo.

Sang natawo si Jesus, ang mga manugbantay kag ang ila mga panong ara sa latagon kon gab-i

^ par. 2 Para sa dugang nga impormasyon, tan-awa ang Reasoning From the Scriptures, pahina 176-179, nga ginbalhag sang mga Saksi ni Jehova.