Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ano Gid ang Ginatudlo sang Biblia?

 KAPITULO DISIOTSO

Ang Bawtismo kag ang Imo Relasyon sa Dios

Ang Bawtismo kag ang Imo Relasyon sa Dios
  • Paano ginabawtismuhan ang isa ka Cristiano?

  • Ano nga mga tikang ang dapat mo himuon para mabawtismuhan ka?

  • Paano ang isa ka tawo nagadedikar sa Dios?

  • Ano ang espesyal nga rason nga dapat magpabawtismo ang isa ka tawo?

1. Ngaa gusto magpabawtismo sang Etiopianhon nga opisyal sang palasyo?

“TAN-AWA! May tubig diri; ano ang nagapugong sa akon sa pagpabawtismo?” Amo ina ang pamangkot sang Etiopianhon nga opisyal sang palasyo sang unang siglo. Ginpamatud-an sa iya sang Cristiano nga si Felipe nga ang ginsaad nga Mesias amo si Jesus. Natandog gid ang Etiopianhon sa iya natun-an sa Kasulatan, gani gusto niya nga magpabawtismo!—Binuhatan 8:26-36.

2. Ngaa dapat mo hunahunaon sing serioso ang pagpabawtismo?

2 Kon gintun-an mo sing maayo ang una nga mga kapitulo sini nga libro upod sa isa sa mga Saksi ni Jehova, mahimo nga handa ka na nga mamangkot, ‘Ano ang nagapugong sa akon nga magpabawtismo?’ Natun-an mo na ang saad sang Biblia nga kabuhi nga wala sing katapusan sa Paraiso. (Lucas 23:43; Bugna 21:3, 4) Natun-an mo man ang matuod nga kahimtangan sang mga patay kag ang paglaum nga pagkabanhaw. (Manugwali 9:5; Juan 5:28, 29) Mahimo nga nagaupod ka na sa mga Saksi ni Jehova sa ila mga pagtilipon sa kongregasyon, kag  napamatud-an mo mismo kon paano nila ginapakita sa buhat ang matuod nga relihion. (Juan 13:35) Ang pinakaimportante sa tanan, mahimo nga nagasugod ka na sa pagpabakod sang imo relasyon kay Jehova nga Dios.

3. (a) Ano ang ginsugo ni Jesus sa iya mga sumulunod? (b) Paano ginahimo ang pagbawtismo sa tubig?

3 Paano mo mapakita nga gusto mo na mag-alagad sa Dios? Ginsugo ni Jesus ang iya mga sumulunod: “Kadtui ninyo ang mga tawo sa tanan nga pungsod kag tudlui ninyo sila agod mangin disipulo ko. Bawtismuhi ninyo sila.” (Mateo 28:19) Si Jesus mismo nagpakita sing halimbawa sa sini paagi sa pagpabawtismo sa tubig. Wala sia ginwisikan, kag wala sia ginbubuan lamang sing tubig sa ulo. (Mateo 3:16) Ang tinaga nga “bawtismo” naghalin sa Griego nga termino nga nagakahulugan sing “pagpasalop sa tubig.” Gani, ang Cristiano nga bawtismo nagakahulugan sing pagpasalop ukon pagtum-oy sa tubig.

4. Ano ang ginapakita sang pagpabawtismo sa tubig?

4 Ang pagpabawtismo sa tubig kinahanglan gid para sa  tanan nga gusto mangin malapit kay Jehova nga Dios. Paagi sa pagpabawtismo, ginapakita mo sa publiko ang imo handum nga mag-alagad sa Dios. Ginapakita sini nga nalipay ka sa paghimo sang kabubut-on ni Jehova. (Salmo 40:7, 8) Pero para mabawtismuhan ka, may mga tikang nga dapat mo himuon.

KINAHANGLAN ANG IHIBALO KAG PAGTUO

5. (a) Ano ang una nga tikang para makapabawtismo? (b) Ngaa importante gid ang mga pagtilipon sang mga Cristiano?

5 Nakasugod ka na sang una nga tikang. Paano? Paagi sa pagkilala kay Jehova nga Dios kag kay Jesucristo, mahimo paagi sa naiskedyul nga pagtuon sa Biblia. (Basaha ang Juan 17:3.) Pero madamo ka pa sing dapat matun-an. Gusto sang mga Cristiano nga ‘mapuno sila sing sibu nga ihibalo tuhoy sa kabubut-on sang Dios.’ (Colosas 1:9) Daku gid nga bulig ang mga pagtilipon sa kongregasyon sang mga Saksi ni Jehova. Importante gid nga magtambong ka sa sini. (Hebreo 10:24, 25) Ang regular nga pagtambong makabulig sa imo nga makilala pa gid ang Dios.

Ang pagkuha sang sibu nga ihibalo sa Pulong sang Dios isa ka importante nga tikang antes ka mabawtismuhan

6. Para mabawtismuhan ka, daw ano kadamo ang dapat mo mabal-an sa Biblia?

6 Siempre, indi kinahanglan nga nabal-an mo ang tanan sa Biblia para mabawtismuhan ka. Ang Etiopianhon nga opisyal may nabal-an na sa Kasulatan, pero may mga bahin sini nga indi pa niya maintiendihan kag kinahanglan sia buligan. (Binuhatan 8:30, 31) Pareho sa iya, madamo ka pa sing dapat matun-an. Ang matuod, wala sing katapusan ang imo pagtuon parte sa Dios. (Manugwali 3:11) Gani antes ka mabawtismuhan, dapat mo mabal-an kag batunon bisan ang panguna lang nga ginatudlo sang Biblia. (Hebreo 5:12) Ang pila sa sini amo ang kamatuoran parte sa kahimtangan sang mga patay kag kon daw ano ka importante ang ngalan sang Dios kag ang iya Ginharian.

7. Ano dapat ang epekto sa imo sang pagtuon sa Biblia?

 7 Pero, indi lang ihibalo ang kinahanglan, kay “kon wala sing pagtuo imposible nga mapahamut-an ang Dios.” (Hebreo 11:6) Ang Biblia nagasugid sa aton nga sang nabatian sang mga tawo sa siudad sang Corinto sang una ang mensahe nga ginawali sang mga Cristiano, “nagtuo [sila] kag nagpabawtismo.” (Binuhatan 18:8) Amo man sini ang pagtuon sa Biblia. Dapat nga magpabakod ini sang imo pagtuo nga ang Biblia amo gid ang Pulong sang Dios. Dapat man ini magbulig sa imo nga magtuo sa mga saad sang Dios kag sa nagaluwas nga halad ni Jesus.—Josue 23:14; Binuhatan 4:12; 2 Timoteo 3:16, 17.

PAGSUGID SA IBAN SANG KAMATUORAN SA BIBLIA

8. Ano ang magapahulag sa imo nga isugid sa iban ang imo natun-an?

8 Samtang nagatubo ang pagtuo sa imo tagipusuon, mabatyagan mo nga mabudlay taguon ang imo natun-an. (Jeremias 20:9) Ang pagtuo magapahulag sa imo nga isugid sa iban ang parte sa Dios kag ang iya mga katuyuan.—Basaha ang 2 Corinto 4:13.

Ang pagtuo magapahulag sa imo nga isugid sa iban ang imo ginapatihan

9, 10. (a) Sin-o ang mga tawo nga mahimo una mo nga sugiran sang kamatuoran sa Biblia? (b) Kon gusto mo na mag-upod sa pagwali sang mga Saksi ni Jehova, ano ang dapat mo himuon?

9 Mahimo nga isugid mo ang kamatuoran sa Biblia una anay sa imo pamilya, abyan, kaingod, kag katrabaho. Kag himua ini sa maayo nga paagi. Sa ulihi, mahimo nga gusto mo na mag-upod sa organisado nga pagwali sang mga Saksi ni Jehova. Kon mag-abot na ina nga tion, indi maghuyahuya nga ihambal ini sa Saksi nga nagatudlo sa imo sang Biblia. Kon nakita nga puede ka na mag-upod sa pagwali, ikaw kag ang nagatudlo sa imo i-iskedyul nga makighambal sa duha ka gulang sang kongregasyon.

10 Paagi sini, makilala mo pa gid ang pila ka Cristiano nga gulang, nga nagabantay sang panong sang Dios. (Binuhatan  20:28; 1 Pedro 5:2, 3) Kon nakita sini nga mga gulang nga naintiendihan mo kag ginapatihan ang panguna nga mga panudlo sang Biblia, ginasunod mo ang mga prinsipio sang Dios, kag gusto mo na gid mangin isa sa mga Saksi ni Jehova, pabal-on ka nila nga puede ka na makaupod sa pagministeryo bilang indi bawtismado nga manugbantala sang maayong balita.

11. Ano pa ang kinahanglan bag-uhon sang iban para puede na sila makaupod sa pagministeryo?

11 Pero, mahimo indi ka pa puede mag-upod sa pagministeryo kay may mga kinahanglan ka pa bag-uhon sa imo pagkabuhi kag pamatasan. Ayhan may ginatagotago ka pa nga sala nga mga buhat nga kinahanglan mo untatan ukon dulaon. Gani, antes ka mangabay nga mangin indi bawtismado nga manugbantala ukon manugwali, dapat wala ka na nagahimo sing mabug-at nga mga sala, pareho sang seksuwal nga imoralidad, pagpahubog, kag pagdroga.—Basaha ang 1 Corinto 6:9, 10; Galacia 5:19-21.

PAGHINULSOL KAG PAGKANAKUMBERTIR

12. Ngaa kinahanglan gid ang paghinulsol?

12 May iban pa nga dapat himuon para puede ka na mabawtismuhan. Si apostol Pedro nagsiling: “Maghinulsol kamo kag magbag-o agod mapatawad ang inyo mga sala.” (Binuhatan 3:19) Ang paghinulsol amo ang sinsero nga pagkasubo sa imo nahimo. Ang paghinulsol kinahanglan gid sang isa ka tawo nga nangin imoral sadto, pero kinahanglan man ini himuon bisan matinlo ang pagkabuhi sang isa. Ngaa? Kay ang tanan nga tawo makasasala kag kinahanglan nila ang pagpatawad sang Dios. (Roma 3:23; 5:12) Sang wala ka pa nakatuon sa Biblia, wala mo nabal-an ang kabubut-on sang Dios. Gani indi mo masiling nga ginsunod mo gid ang iya kabubut-on. Amo nga kinahanglan gid ang paghinulsol.

13. Ano ang pagkanakumbertir?

 13 Pagkatapos sang paghinulsol, kinahanglan ang pagkanakumbertir, ukon ‘pagbag-o.’ Buot silingon, indi lang ini basta paghinulsol. Dapat nga isikway ukon talikdan mo na ang imo paagi sang pagkabuhi sadto, kag sugod subong determinado ka nga himuon ang husto. Ang paghinulsol kag pagkanakumbertir mga tikang nga dapat mo gid himuon antes ka mabawtismuhan.

PAGDEDIKAR SANG KAUGALINGON

14. Ano ang importante nga tikang nga dapat mo himuon antes ka mabawtismuhan?

14 May isa pa ka importante nga tikang nga dapat himuon antes ka mabawtismuhan. Dapat mo idedikar ang imo kaugalingon kay Jehova nga Dios.

Nakadedikar ka na bala sa Dios paagi sa pangamuyo?

15, 16. (a) Ano ang buot silingon sang pagdedikar sang imo kaugalingon sa Dios? (b) Ano ang nagapahulag sa isa ka tawo sa paghimo sini?

15 Kon ginadedikar mo ang imo kaugalingon kay Jehova nga Dios paagi sa hugot nga pangamuyo, nagsaad ka sa iya nga sia lang ang imo simbahon asta san-o. (Deuteronomio 6:15) Pero ngaa gusto ini himuon sang isa? Ibutang ta nga ang isa ka lalaki nagapangaluyag sa isa ka babayi. Samtang ginapanilagan niya ang babayi kag nakita ang iya maayo nga mga batasan, nagadugang pa gid ang iya luyag sa babayi. Sa ulihi, kon mangin sila na, natural lang nga hagaron sia sang lalaki nga magpakasal. Matuod, ang pagpangasawa magakahulugan sing dugang nga mga responsibilidad. Pero bangod sa gugma, himuon gihapon sang lalaki ining importante nga tikang.

16 Sang nakilala mo na si Jehova kag ginhigugma sia, napahulag ka nga mag-alagad sa iya nga wala sing kondisyon ukon limitasyon. Ang tanan nga gusto magsunod sa Anak sang Dios, nga si Jesucristo, dapat nga ‘magpanghiwala  sang iya kaugalingon.’ (Marcos 8:34) Mahimo naton ini kon siguraduhon naton nga ang aton handum kag mga gusto wala nagabalabag sa aton pagtuman sing bug-os sa Dios. Gani antes ka mabawtismuhan, dapat nga ang paghimo sang kabubut-on ni Jehova nga Dios amo gid ang una sa imo kabuhi.—Basaha ang 1 Pedro 4:2.

DAUGA ANG KAHADLOK NGA MAPASLAWAN

17. Ngaa nahadlok ang iban nga magdedikar sa Dios?

17 Ang iban nagaduhaduha sa pagdedikar sang ila kaugalingon kay Jehova kay nahadlok sila nga himuon ining serioso nga tikang. Nahadlok sila kay bilang dedikado nga mga Cristiano, may salabton na sila sa Dios. Bangod nahadlok nga basi mapaslawan sila kag indi nila mahimo ang ginapatuman ni Jehova, pamatyag nila mas maayo nga indi na lang magdedikar sa iya.

18. Ano ang makapahulag sa imo nga magdedikar kay Jehova?

18 Samtang ginatun-an mo nga higugmaon si Jehova, mapahulag ka nga magdedikar sa iya kag himuon ang imo masarangan para matuman ini. (Manugwali 5:4) Kon makadedikar ka na, sigurado nga gusto mo “maglakat nga takus kay Jehova sa tuyo nga pahamut-an sia sing bug-os.” (Colosas 1:10) Bangod ginahigugma mo ang Dios, indi ka magbatyag nga mabudlay gid himuon ang iya kabubut-on. Sigurado nga magaugyon ka kay apostol Juan, nga nagsulat: “Amo ini ang kahulugan sang gugma sa Dios, nga tumanon naton ang iya mga sugo; apang ang iya mga sugo indi mabug-at.”—1 Juan 5:3.

19. Ngaa indi ka dapat mahadlok sa pagdedikar sang imo kaugalingon sa Dios?

19 Indi kinahanglan nga mangin perpekto ka para makadedikar sa Dios. Nabal-an ni Jehova ang imo mga limitasyon kag wala sia nagapaabot sang indi mo masarangan. (Salmo 103:14) Gusto niya nga mangin madinalag-on ka,  kag suportahan ka niya kag buligan. (Basaha ang Isaias 41:10.) Masiguro mo nga kon magsalig ka kay Jehova sing bug-os tagipusuon, “tadlungon niya ang imo mga banas.”—Hulubaton 3:5, 6.

PAGSIMBULO SANG IMO DEDIKASYON PAAGI SA PAGPABAWTISMO

20. Ngaa indi mahimo nga magpabilin nga pribado ang imo dedikasyon kay Jehova?

20 Kon pamensaron mo sing maayo ang mga butang nga bag-o lang naton nahambalan, mahimo mabuligan ka sini sa pagdedikar sang imo kaugalingon kay Jehova paagi sa pangamuyo. Pero, ang kada isa nga nagahigugma  gid sa Dios dapat man maghimo sing dayag nga pagpahayag para sa kaluwasan. (Roma 10:10) Paano mo ini himuon?

Ang bawtismo nagasimbulo nga napatay na kita sa aton paagi sang pagkabuhi sadto, kag nabuhi kita liwat para himuon ang kabubut-on sang Dios

21, 22. Paano mo dayag nga mapahayag ang imo pagtuo?

21 Hambala ang koordenitor sang hubon sang mga gulang sa inyo kongregasyon nga gusto mo na magpabawtismo. Magaiskedyul sia sang mga gulang nga magarebyu sa imo sang mga pamangkot parte sa panguna nga mga ginatudlo sang Biblia. Kon mag-ugyon ini nga mga gulang nga puede ka na mabawtismuhan,  hambalon ka nila nga makapabawtismo ka na sa masunod nga asembleya ukon kombension. * Sa sini nga mga okasyon, may mabatian nga pamulongpulong parte sa kahulugan sang bawtismo. Dayon pangabayon sang humalambal ang tanan nga magapabawtismo nga sabton ang duha ka simple nga pamangkot bilang isa ka paagi para dayag nila nga mapahayag ang ila pagtuo.

22 Ang bawtismo amo ang nagapakilala sa imo sing dayag nga nadedikar mo na ang imo kaugalingon sa Dios kag isa ka na sa mga Saksi ni Jehova. Ang mga bawtismuhan ginatum-oy sa tubig para ipakita sing dayag nga nagdedikar sila kay Jehova.

ANG KAHULUGAN SANG IMO BAWTISMO

23. Ano ang buot silingon sang pagpabawtismo “sa ngalan sang Amay kag sang Anak kag sang balaan nga espiritu”?

23 Nagsiling si Jesus nga ang iya mga disipulo bawtismuhan “sa ngalan sang Amay kag sang Anak kag sang balaan nga espiritu.” (Mateo 28:19) Buot silingon, ang isa nga pagabawtismuhan nagakilala sang awtoridad ni Jehova nga Dios kag ni Jesucristo. (Salmo 83:18; Mateo 28:18) Ginakilala man niya ang papel sang balaan nga espiritu, ukon aktibo nga puersa sang Dios, kag kon paano ini nagapanghikot.—Galacia 5:22, 23; 2 Pedro 1:21.

24, 25. (a) Ano ang ginasimbulo sang bawtismo? (b) Ano nga pamangkot ang kinahanglan pa sabton?

24 Pero ang bawtismo indi lang pagpasalop sa imo sa tubig. Importante gid ang ginasimbulo sini. Ang pagsalop nagasimbulo nga napatay ka na sa imo paagi sang pagkabuhi sadto. Ang pagbutwa naman nagapakita nga nabuhi ka liwat para himuon ang kabubut-on sang Dios. Dumduma man nga kay Jehova nga Dios ka mismo  nagdedikar, indi sa isa ka hilimuon, prinsipio, tawo, ukon isa ka organisasyon. Ang imo dedikasyon kag bawtismo pagsugod sang imo malapit katama nga pagpakig-abyan sa Dios—isa ka suod nga relasyon sa iya.—Salmo 25:14.

25 Indi buot silingon nga kon nabawtismuhan ka na, luwas ka na. Si apostol Pablo nagsulat: “Padayon ninyo nga panikasugi ang inyo kaugalingon nga kaluwasan nga may kahadlok kag pagkurog.” (Filipos 2:12) Ang bawtismo pagsugod pa lang. Ang pamangkot, Paano ka makapabilin sa gugma sang Dios? Sabton ini sang aton katapusan nga kapitulo.

^ par. 21 Ang bawtismo regular nga bahin sang mga asembleya kag kombension sang mga Saksi ni Jehova kada tuig.