Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ano Gid ang Ginatudlo sang Biblia?

 KAPITULO DOS

Ang Biblia—Libro Halin sa Dios

Ang Biblia—Libro Halin sa Dios
  • Ngaa lain gid ang Biblia sa iban nga libro?

  • Paano ka mabuligan sang Biblia nga maatubang ang imo mga problema?

  • Ngaa masaligan mo ang mga tagna sa Biblia?

1, 2. Ngaa ang Biblia manami gid nga regalo halin sa Dios?

MAY madumduman ka bala nga tion nga nakabaton ka sing manami nga regalo halin sa imo abyan? Ayhan nalipay ka gid. Kay paagi sa sini nga regalo, nabatyagan mo nga importante gid sa iya ang inyo pag-abyanay. Sigurado gid nga ginpasalamatan mo ang regalo sang imo abyan nga nagadumdom gid sa imo.

2 Ang Biblia regalo halin sa Dios, nga mapasalamatan gid naton. Ining espesyal nga libro nagasugid sang mga butang nga indi gid naton makita sa iban nga libro. Halimbawa, ginasugid sini sa aton ang pagtuga sang duta, sang langit nga puno sing bituon, kag sang una nga lalaki kag babayi. May masaligan ini nga mga prinsipio nga makabulig sa pag-atubang sa mga problema kag mga kabalaka. Ginapaathag sini kon paano himuon sang Dios ang iya katuyuan kag kon paano niya kay-uhon ang sitwasyon diri sa duta. Gani ang Biblia manami gid nga regalo halin sa Dios!

3. (a) Ngaa ginhatag sa aton ni Jehova ang Biblia? (b) Nalipay ka bala sa sini? Ngaa?

3 Ang Biblia isa man ka regalo nga nagapalipay sa  aton, kay may ginasugid ini parte sa Manughatag, si Jehova nga Dios. Ang paghatag niya sa aton sini nga libro ebidensia nga gusto niya nga makilala gid naton sia. Ang Biblia makabulig gid sa imo nga mangin malapit kay Jehova.

4. Kon parte sa kadamuon, ngaa lain gid ang Biblia sa iban nga libro?

4 Mahimo nga may Biblia ka, pero indi lang ikaw ang may ara sini. Ang kompleto ukon ang iban nga bahin sang Biblia ginbalhag na sa mga 2,600 ka lenguahe, gani matigayon na ini sang sobra 90 porsiento sang populasyon sang kalibutan. Sa aberids, sobra isa ka milyon ka Biblia ang ginabaton sang mga tawo kada semana! Binilyon ka kompleto nga Biblia ukon mga bahin sini ang nabalhag na. Gani masiling gid nga wala sing iban nga libro nga pareho sang Biblia.

Ang “Bag-ong Kalibutan nga Badbad sang Balaan nga Kasulatan” matigayon sa madamo nga lenguahe

5. Sa ano nga paagi nga ang Biblia “gintuytuyan sang Dios”?

5 Isa pa, ang Biblia “gintuytuyan sang Dios.” (Basaha ang 2 Timoteo 3:16.) Sa ano nga paagi? Ginasabat  ini mismo sang Biblia: “Ang ginhambal sang mga tawo naghalin sa Dios samtang ginapahulag sila sang balaan nga espiritu.” (2 Pedro 1:21) Makumparar naton ini sa manedyer nga nagasugo sa iya sekretarya nga maghimo sing sulat. Ang unod sang sulat mga ideya kag instruksion sang manedyer. Gani, sulat gid ini sang manedyer, indi sang sekretarya. Amo man sini ang Biblia. Ang mensahe sini halin sa Dios, indi halin sa mga tawo nga nagsulat sini. Gani, ang bilog nga Biblia matuod gid nga “pulong sang Dios.”—1 Tesalonica 2:13.

NAGASANTU KAG SIBU

6, 7. Ngaa dalayawon gid ang pagsantuanay sang mga bahin sang Biblia?

6 Ang Biblia ginsulat sa sulod sang 1,600 ka tuig. Ang mga manunulat sini nagkabuhi sa sarisari nga tion kag indi pareho ang ila gindak-an. Ang pila sa ila mga mangunguma, mangingisda, kag mga manugbantay sang karnero. Ang iban naman mga propeta, hukom, kag mga hari. Ang manunulat sang Ebanghelyo nga si Lucas isa ka doktor. Pero bisan indi pareho ang ginhalinan sang mga manunulat sang Biblia, nagasantu ini halin sa umpisa asta sa katapusan. *

7 Ang una nga libro sang Biblia nagasugid sa aton kon paano nagsugod ang problema sang mga tawo. Ang katapusan nga libro nagapakita nga ang bilog nga kalibutan mangin paraiso, ukon hardin. Sa kabilugan, ang Biblia nagasugid sang linibo ka tuig nga kasaysayan kag nagabulig sa aton nga maintiendihan kon  paano matabo ang katuyuan sang Dios. Dalayawon gid ang pagsantuanay sang Biblia, kag dapat lang, kay libro ini halin sa Dios.

8. Ano ang mga halimbawa nga nagapakita nga ang Biblia sibu sa siensia?

8 Ang Biblia sibu sa siensia. May abanse pa gani ini nga mga impormasyon. Halimbawa, mabasa sa libro sang Levitico ang mga kasuguan sa Israel sang una parte sa katinlo kag pagpain sa mga nagabalatian, samtang ang iban nga pungsod wala sing nabal-an parte sa sini. Sang sala pa ang pag-intiende sang mga tawo parte sa korte sang duta, ang Biblia nagsiling na nga tipulon ini, ukon bilog. (Isaias 40:22) Eksakto man ang ginsiling sang Biblia nga ang duta nagabitay “sa wala.” (Job 26:7) Matuod, ang Biblia indi libro parte sa siensia. Pero kon may mabasa ka diri parte sa siensia, sibu gid ini. Siempre, kay libro ini halin sa Dios.

9. (a) Kon parte sa kasaysayan, masiling bala nga sibu kag masaligan ang Biblia? Ngaa? (b) Bangod wala sing gintago ang mga manunulat sang Biblia, ano ang masiling mo parte sa sini?

9 Ang Biblia sibu man kag masaligan kon parte sa kasaysayan. Eksakto ang mga detalye sini. Mabasa diri indi lamang ang ngalan sang mga indibiduwal kundi pati man ang ila mga katigulangan. * Sa masami, ginatago sang mga manunulat sang kasaysayan ang kapierdihan sang ila pungsod, pero ang mga manunulat sang Biblia tampad ukon wala sing gintago, kay ginsulat pa gani nila ang ila mga sala kag ang mga sala sang ila pungsod. Halimbawa, sa libro sang Numeros sa Biblia, gin-aku sang manunulat nga si Moises ang iya daku nga sala, nga sa diin ginsabdong sia. (Numeros  20:2-12) Ini nga katampad talagsa na lang makita sa iban nga sinulatan parte sa kasaysayan, pero makita ini sa Biblia bangod ini nga libro halin sa Dios.

LIBRO SANG MAPUSLANON NGA KAALAM

10. Ngaa ang Biblia mapuslanon gid nga libro?

10 Bangod ang Biblia gintuytuyan sang Dios, “mapuslanon [ini] sa pagpanudlo, sa pagsabdong, sa pagtadlong.”  (2 Timoteo 3:16) Huo, mapuslanon gid ini nga libro. Ginapakita sini kon ano gid ang kinahanglanon sang tawo. Siempre, kay ang Awtor sini, nga si Jehova nga Dios, amo ang Manunuga! Mas naintiendihan niya ang aton ginahunahuna kag ginabatyag. Isa pa, nabal-an ni Jehova kon ano ang kinahanglan para mangin malipayon kita. Nabal-an man niya kon ano ang dapat naton likawan.

11, 12. (a) Sa iya Sermon sa Bukid, ano nga mga topiko ang gintudlo ni Jesus? (b) Sa ano pa nga mga bahin sang kabuhi magamit ang mga prinsipio sa Biblia, kag ngaa ang mga laygay sini mapuslanon asta subong?

11 Binagbinaga ang Sermon sa Bukid ni Jesus, nga mabasa sa Mateo kapitulo 5 asta 7. Sa sini nga sermon, sarisari nga topiko ang gintudlo ni Jesus, pareho sang kon paano makita ang matuod nga kalipay, kon paano husayon ang mga indi pag-intiendihanay, kon paano mangamuyo, kag kon ngaa indi naton pag-unahon ang pagpangita sing manggad. Asta subong, ang mga ginsiling ni Jesus epektibo kag mapuslanon.

12 Ang pila ka prinsipio sa Biblia magamit sa kabuhi sang pamilya, pagtrabaho, kag kaangtanan sa iban. Ang mga prinsipio sini para sa tanan, kag asta subong ang mga laygay sini para gid sa kaayuhan. Paagi kay propeta Isaias, ginpaathag sang Dios ang kaalam nga ara sa Biblia: “Ako si Jehova nga imo Dios, ang nagatudlo sa imo para sa imo kaayuhan.”—Isaias 48:17.

LIBRO SANG TAGNA

Ang kalaglagan sang Babilonia gintagna sang manunulat sang Biblia nga si Isaias

13. Ano nga mga detalye parte sa Babilonia ang ginpasulat ni Jehova kay propeta Isaias?

13 Ang Biblia may madamo nga tagna, kag ang kalabanan sini natabo na. Halimbawa, paagi kay propeta Isaias, nga nagkabuhi sang ikawalo nga siglo B.C.E., gintagna ni Jehova nga malaglag ang siudad sang  Babilonia. (Isaias 13:19; 14:22, 23) Ginpasulat man ang mga detalye kon paano mapierde ang siudad. Pamalhon sang nagasalakay nga mga soldado ang suba sang Babilonia kag makasulod sila sa siudad nga wala sing inaway. Dugang pa, gintagna man ni Isaias ang ngalan sang hari nga magapierde sa Babilonia—si Ciro.—Basaha ang Isaias 44:27–45:2.

14, 15. Paano natabo ang pila ka detalye sang tagna ni Isaias parte sa Babilonia?

14 Mga 200 ka tuig sang ulihi—sang gab-i sang Oktubre 5/6, 539 B.C.E.—may mga soldado nga nagkampo malapit sa Babilonia. Sin-o ang ila kumander? Ang hari sang Persia nga si Ciro. Malapit na lang matabo ang dalayawon gid nga tagna. Pero matabo gid ayhan ang tagna nga salakayon sang mga soldado ni Ciro ang Babilonia nga wala sing inaway?

15 Ang mga Babilonianhon nagahiwat sing kapiestahan sina nga gab-i kag pamatyag nila wala sing malain nga matabo kay dalagku ang mga pader sang ila siudad. Sa pihak nga bahin, naghimo sing paagi si Ciro  nga mapalikaw ang tubig sang suba nga nagailig pakadto sa siudad. Sang ulihi, nagnabaw ini, gani nakatabok ang iya mga soldado kag nakapalapit sa mga pader sang siudad. Pero paano masulod sang mga soldado ni Ciro ang mga pader sang Babilonia? Wala sing may nakabalo sang rason, pero sina nga gab-i ang mga puertahan pasulod sa siudad napabay-an nga bukas!

16. (a) Ano ang gintagna ni Isaias parte sa katapusan nga madangatan sang Babilonia? (b) Paano natabo ang tagna ni Isaias nga ang Babilonia indi na gid pag-istaran?

16 May isa pa ka tagna parte sa Babilonia: “Indi na sia pag-istaran, ukon pagpuy-an sa wala sing katubtuban. Wala sang Arabianhon nga magapatindog sang tolda didto, kag wala sang mga manugbantay nga magapaluko sang ila panong didto.” (Isaias 13:20) Wala lamang ginapakita sini nga tagna ang paglaglag sa siudad. Ginapakita sini nga ang Babilonia indi na gid pag-istaran. Makita mo ang ebidensia nga natabo ini nga tagna. Ang lugar sang Babilonia sang una nga wala na ginaistaran subong—mga 80 kilometros sa bagatnan  sang Baghdad, Iraq—ebidensia nga natuman ang ginsiling ni Jehova paagi kay Isaias: “Silhigon ko sia sang silhig sang kalaglagan.”—Isaias 14:22, 23. *

Ang ginlaglag nga Babilonia

17. Ngaa makapabakod sing pagtuo nga mabal-an nga nagakatabo ang mga tagna sa Biblia?

17 Indi bala nga makapabakod sing pagtuo nga mabal-an nga ang mga tagna sa Biblia masaligan? Kay man, kon gintuman ni Jehova nga Dios ang iya mga saad sadto, may rason gid kita nga magsalig nga tumanon man niya ang iya saad nga paraiso nga duta. (Basaha ang Numeros 23:19.) Huo, kita may “paglaum nga kabuhi nga wala sing katapusan nga madugay na nga ginsaad sang Dios nga indi makabutig.”—Tito 1:2. *

“ANG PULONG SANG DIOS BUHI”

18. Ano ang ginsiling sang Cristiano nga si apostol Pablo parte sa “pulong sang Dios”?

18 Sa aton natun-an sa sini nga kapitulo, klaro gid nga ang Biblia espesyal nga libro. Nagasantuanay ini, sibu sa siensia kag kasaysayan, mapuslanon, kag ang mga tagna sini masaligan. Pero indi lang ina. Ang Cristiano nga si apostol Pablo nagsulat: “Ang pulong sang Dios buhi kag gamhanan kag matalom pa sa bisan ano nga espada nga duha sing sulab kag nagadulot tubtob  sa paghamulag sang kalag kag espiritu, kag sang mga lutalutahan sa utok sa tul-an, kag sarang makahantop sang mga panghunahuna kag mga tinutuyo sang tagipusuon.”—Hebreo 4:12.

19, 20. (a) Paano ang Biblia makabulig sa imo nga mausisa ang imo kaugalingon? (b) Paano mo mapakita nga ginapasalamatan mo ang espesyal nga regalo sang Dios, ang Biblia?

19 Ang pagbasa naton sang “pulong,” ukon mensahe sang Dios sa Biblia, makapabag-o sang aton kabuhi. Makabulig ini sa aton nga mausisa sing maayo ang aton kaugalingon. Ayhan nagasiling kita nga ginahigugma naton ang Dios, pero ano ang aton reaksion sa ginatudlo sang iya Pulong, ang Biblia? Ang aton reaksion magapakita sang aton matuod nga ginahunahuna, kag bisan sang mga intension sang aton tagipusuon.

20 Matuod gid nga ang Biblia libro halin sa Dios. Dapat gid ini basahon, tun-an, kag higugmaon. Pasalamati ini nga regalo sang Dios paagi sa sigesige nga pagtuon sa sini. Kon himuon mo ini, magadalom ang imo apresasyon sa katuyuan sang Dios para sa mga tawo. Ini nga katuyuan kag kon paano ini matuman tun-an sa masunod nga kapitulo.

^ par. 6 Bisan pa may mga nagasiling nga ang pila ka bahin sang Biblia wala nagasantu sa iban nga bahin sini, ang ila ginasiling wala mapamatud-an. Tan-awa ang kapitulo 7 sang libro nga The Bible—God’s Word or Man’s? nga ginbalhag sang mga Saksi ni Jehova.

^ par. 9 Halimbawa, ang mga katigulangan ni Jesus detalyado nga mabasa sa Lucas 3:23-38.

^ par. 16 Para sa dugang nga impormasyon parte sa tagna sa Biblia, tan-awa ang pahina 27-29 sang brosyur nga Isa ka Libro Para sa Tanan nga Tawo, nga ginbalhag sang mga Saksi ni Jehova.

^ par. 17 Ang kalaglagan sang Babilonia isa lamang ka halimbawa sang mga tagna sa Biblia nga natabo na. Upod sa iban pa nga halimbawa amo ang kalaglagan sang Tiro kag Ninive. (Ezequiel 26:1-5; Sofonias 2:13-15) Gintagna man ni Daniel ang pagsundanay sang mga emperyo sa kalibutan, pareho sang Medo-Persia kag Gresya, nga magagahom pagkatapos sang Babilonia. (Daniel 8:5-7, 20-22) Tan-awa ang artikulo sa Apendise nga “Si Jesucristo—Ang Ginsaad nga Mesias,” para matun-an mo pa ang madamo nga tagna parte sa Mesias nga natuman kay Jesucristo.

Magtuon sing Dugang Pa

Ngaa Dapat Tun-an ang Biblia?

Minilyon karon sa bilog nga kalibutan ang nakakita sang sabat sa importante nga mga pamangkot sa kabuhi sa bulig sang Biblia. Gusto mo man bala?