Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ano Gid ang Ginatudlo sang Biblia?

Amo Bala Ini ang Gintuyo sang Dios?

Amo Bala Ini ang Gintuyo sang Dios?

MAGBASA ka sang bisan ano nga pamantalaan. Magtan-aw sang telebisyon, ukon magpamati sa radyo. Madamo gid sing balita parte sa krimen, inaway, kag terorismo! Hunahunaa ang imo mismo mga problema. Mahimo nga grabe ang imo kasubo bangod nagamasakit ukon napatay ang imo pinalangga. Siguro nagabatyag ka man pareho sa maayo nga tawo nga si Job, nga nagsiling nga ‘daku ang iya kahuya kag pag-antos.’Job 10:15.

Pamangkuta ang imo kaugalingon:

  • Amo bala sini ang gintuyo sang Dios para sa akon kag sa tanan nga tawo?

  • Sa diin ako makakita sing bulig para masolbar ko ang akon mga problema?

  • May paglaum pa bala nga maglinong ang duta?

Ang Biblia nagahatag sing makalilipay nga mga sabat sa sini nga mga pamangkot.

 GINATUDLO SANG BIBLIA NGA HIMUON SANG DIOS INI NGA MGA PAGBAG-O SA DUTA.

“Pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa.”Bugna 21:4

“Ang mga piang magalukso kaangay sang usa.”Isaias 35:6

“Ang mga mata sang mga bulag makakita.”Isaias 35:5

 “Ang tanan nga yara sa handumanan nga mga lulubngan . . . magagua.”—Juan 5:28, 29

“Wala sing pumuluyo nga magasiling: ‘Nagamasakit ako.’”Isaias 33:24

“Mangin bugana ang mga uyas sa duta.”Salmo 72:16

 MAGBENEPISYO SA MGA GINATUDLO SANG BIBLIA

Indi magsiling dayon nga indi mapatihan ang ginpakita sa nagligad nga mga pahina. Ginsaad ini sang Dios, kag ginapaathag sang Biblia kon paano niya ini himuon.

Pero indi lang ina. Ginasugid man sang Biblia kon paano mangin malipayon ang imo kabuhi bisan subong. Hunahunaa sing makadali ang imo mga problema kag mga ginakabalak-an. Ayhan parte ini sa kuarta, problema sa pamilya, balatian, ukon kamatayon sang isa mo ka pinalangga. Makabulig ang Biblia para maatubang mo ang mga problema subong, kag makapaumpaw gid ini kay masabat sini ang mga pamangkot pareho sang:

  • Ngaa nagaantos kita?

  • Paano naton maatubang ang mga kabalaka?

  • Paano mangin mas malipayon ang aton pamilya?

  • Ano ang nagakatabo sa aton kon mapatay kita?

  • Makita pa bala naton liwat ang aton mga pinalangga nga napatay na?

  • Ngaa makasiguro kita nga tumanon sang Dios ang iya mga saad sa palaabuton?

 Ang imo pagbasa sini nga libro nagapakita nga gusto mo gid mabal-an ang ginatudlo sang Biblia. Ini nga libro makabulig sa imo. Makita mo nga ang mga parapo may mga pamangkot. Minilyon ka tawo ang nanamian sa pamangkot kag sabat nga paagi sang mga Saksi ni Jehova sa pagtuon sa Biblia. Tani ikaw man. Kabay nga mabaton mo ang pagpakamaayo sang Dios samtang ginahimo mo ang makalilipay nga pagtuon sa kon ano gid ang ginatudlo sang Biblia!

Magtuon sing Dugang Pa

Paano Ginahimo ang Pagtuon sa Biblia?

Sa bilog nga kalibutan, ang mga Saksi ni Jehova kilala sa ila ginatanyag nga libre nga pagtuon sa Biblia. Tan-awa kon paano ini ginahimo.