Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 114: Ang Katapusan sang Tanan nga Kalainan

Sugilanon 114: Ang Katapusan sang Tanan nga Kalainan

MAKITA mo bala ining hangaway sa puti nga mga kabayo? Sa diin sila naghalin? Huo, ang mga kabayo naghalin sa langit sa mga panganod. Mga kabayo gid bala sila sa langit?

Si Jesus subong Hari sa langit

Indi, indi ini matuod nga mga kabayo. Ang mga kabayo indi makadalagan sa mga panganod, indi bala? Gani ngaa nagahambal ang Biblia tuhoy sa mga kabayo sa langit?

Daku ang magamit sa kabayo sa inaway. Gani, ang Biblia nagahambal sang mga tao nga nagapangabayo gikan sa langit sa pagpakita nga ang Dios makig-away sa kataohan sa duta. Nahibal-an mo bala ang duog sang amo nga inaway? Ang Armagedon. Ang inaway magalaglag sing tanan nga kalainan sa duta.

Si Jesus ang manguna sa sining inaway. Dumdoma, sia ang ginpili ni Jehova nga magahari. Amo kon ngaa may korona sia. Ang espada nagapakita nga pamatyon niya ang tanan nga kaaway sang Dios. Makibot bala kita nga laglagon sang Dios ang mga kaaway?

Tan-awa ang Sugilanon 10. Nadumdoman mo bala ang Anaw nga naglaglag sa malain nga kataohan? Tan-awa ang Sugilanon 15. Ang Sodoma kag Gomora ginsunog. Gintuga ini tanan sang Dios.

Kamusta naman ang kalaglagan sang hangaway sang Egipto sa Sugilanon 33? Kag ang silot sa malauton nga mga Israelinhon sa Sugilanon 76? Huo, si Jehova ang nagtuga sini man.

Gani indi kita dapat makibot nga tapuson ni Jehova ang tanan nga kalainan diri sa duta. Apang hunahonaa lamang ang mangin kahulogan sina. Buksi ang dason nga pahina kag tan-awon naton.



Mga Pamangkot:

  • Ngaa nagapatuhoy ang Biblia sa mga kabayo sa langit?
  • Ano ang tawag sa pagpakig-away sang Dios batok sa malaut nga mga tao sa duta, kag ano ang katuyoan sini nga inaway?
  • Sa laragway, sin-o ang Isa nga manguna sa inaway, ngaa may korona sia, kag ano ang kahulogan nga may espada sia?
  • Sa pagpatuhoy liwat sa Sugilanon 10, 15 kag 33, ngaa indi kita dapat makibot nga laglagon sang Dios ang malaut nga mga tao?
  • Paano ginapakita sang Sugilanon 36 kag 76 nga laglagon sang Dios ang malaut nga mga tao bisan pa kon nagapangangkon sila nga nagasimba sila sa iya?

Dugang pa nga mga pamangkot

  • Basaha ang Bugna 19:11-16.

    Paano ginaathag sang Kasulatan nga si Jesucristo amo ang nagasakay sa kabayo nga maputi? (Bug. 1:5; 3:14; 19:11; Isa. 11:4)

    Paano ang dugo nga nawisik sa kunop ni Jesus nagapamatuod nga ang iya kadalag-an sigurado kag bug-os? (Bug. 14:18-20; 19:13; Isa. 63:1-6)

    Sin-o ang mahimu gid nga nalakip sa mga hangaway nga nagasunod kay Jesus sa iya maputi nga kabayo? (Bug. 12:7; 19:14; Mat. 25:31, 32)