Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 111: Ang Bata nga Natulogan

Sugilanon 111: Ang Bata nga Natulogan

ABAW! ABAW! Ano ang nagakatabu diri? Nabalda gid bala ang bata nga nagahigda sa duta? Toloka! Si Pablo nagapagua sa balay. Makita mo man bala si Timoteo didto? Ano ang natabu?

Nagapalapit si Pablo para banhawon si Eutico

Nagapamulongpulong si Pablo sa mga disipulo diri sa Troas. Nahibal-an niya nga madugay-dugay pa nga makita niya sila liwat. Gani naghambal sia tubtob sa tungang-gab-i.

Ining bata nga lalaki nga si Eutico nagapungko sa bintana, kag natulogan sia. Nahulog sia sa bintana, tatlo ka panalgan tubtob sa duta. Gani nahangpan mo nga nabalaka gid ang mga tao. Sang ginhakwat sang tao ang bata, nakita nila nga patay na sia.

Sang makita ni Pablo nga patay na ang bata, ginhap-an niya sia. Nian nagsiling sia: ‘Dili magkasubo. Wala sia maano!’ Kag matuod gid! Isa ka milagro. Nalipay gid ang kadam-an.

Nagsalaka sila liwat kag nagkaon. Naghambal pa si Pablo tubtob sang pamanagbanag. Apang mapat-od mo nga wala liwat magtulog si Eutico! Nian si Pablo, si Timoteo kag ang ila mga kaupod nagsakay sa sakayan. Nahibal-an mo bala kon diin sila pakadto?

Si Pablo manugpauli gikan sa iya ikatlo nga paglakbay nga nagabantala. Sa sining paglakbay si Pablo nagtener sing 3 ka tuig sa Efeso lamang. Gani mas malawig ini sa iya ikaduha nga paglakbay.

Sang makahalin sa Troas, ang sakayan nagdungka sa Mileto sa makadali. Ang mga gulang sa kongregasyon sang Efeso nagkadto agod mamati kay Pablo sa hingapusan nga tion. Nian, sang inuglakat na, nasuboan gid sila sa pagtan-aw kay Pablo nga manuglakat.

Sang ulihi ang sakayan nagbalik sa Cesarea. Diri, ginpaandaman ni manalagna Agabo si Pablo nga bilangguon sia kon magkadto sia sa Jerusalem. Sing pat-od gid, natabu ini. Nian, sang mabilanggu sing duha ka tuig sa Cesarea, ginpadala si Pablo sa Roma agod mag-atubang sa kasaba. Tan-awon ta kon ano ang natabu sa paglakbay pa Roma.

Binuhatan kapitulo 19 tubtob 26.



Mga Pamangkot:

  • Sa laragway, sin-o ang bata nga nagahigda sa duta, kag ano ang natabu sa iya?
  • Ano ang ginhimu ni Pablo sang makita niya nga patay na ang bata?
  • Diin manugpakadto si Pablo, si Timoteo, kag ang mga nagalakbay upod sa ila, kag ano ang natabu sang naghapit sila sa Mileto?
  • Ano nga paandam ang ginhatag ni manalagna Agabo kay Pablo, kag paano ini natabu subong sang ginsiling sang manalagna?

Dugang pa nga mga pamangkot

  • Basaha ang Binuhatan 20:7-38.

    Paano kita makapabilin nga ‘matinlo sa dugo sang tanan nga tao,’ suno sa mga pulong ni Pablo nga nasulat sa Binuhatan 20:26, 27? (Ezeq. 33:8; Bin. 18:6, 7)

    Ngaa ang mga gulang dapat ‘manguyapot sing malig-on sa matutom nga pulong’ kon nagapanudlo? (Bin. 20:17, 29, 30; Tito 1:7-9; 2 Tim. 1:13)

  • Basaha ang Binuhatan 26:24-32.

    Paano gingamit ni Pablo ang iya Romano nga pagkabanwahanon agod mahimu niya ang pagbantala nga hilikuton nga ginsugo sa iya ni Jesus? (Bin. 9:15; 16:37, 38; 25:11, 12; 26:32; Luc. 21:12, 13)