Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 106: Ginpagua sa Bilangguan

Sugilanon 106: Ginpagua sa Bilangguan

TAN-AWA ang anghel diri nga naga-uyat sang ganhaan sang bilangguan nga bukas. Ginapagua niya ang mga apostoles ni Jesus. Ngaa ginbilanggu sila?

Ginpagua sang anghel ang mga apostoles

Bueno, isa ka hapon, sa tapos mabubo ang balaan nga espiritu sa mga disipulo ni Jesus, si Pedro kag si Juan nagkadto sa templo sa Jerusalem. May isa ka manugpakilimos sa tupad sang ganhaan, nga piang sa bug-os niya nga kabuhi. Sang makita niya si Pedro kag si Juan, nagpakilimos sia. Ano ang himuon sang mga apostoles?

Si Pedro nagsiling: ‘Wala ako sing kuarta, apang ihatag ko sa imo ang yari sa akon. Sa ngalan ni Jesus, tindog ka kag maglakat!’ Sa gilayon, nagtumbo ang tao kag naglakat. Sang makita ini sang mga tao, natingala sila kag nalipay gid.

‘Ginhimu namon ini sa gahom sang Dios, nga nagbanhaw kay Jesus,’ siling ni Pedro. Sadto gid, nag-abot ang pila ka relihiosong lider. Naakig sila bangod nagsiling si Pedro kag si Juan nga ginbanhaw si Jesus. Gani ginpabilanggu nila sila.

Sang masunod nga adlaw, si Pedro kag si Juan, upod sa tao nga gin-ayo nila, ginpaatubang sa relihiosong mga lider. ‘Sa anong gahom ginhimu ninyo ining milagro?’ pamangkot nila.

Ginsugiran sila ni Pedro nga sa gahom sang Dios, nga nagbanhaw kay Jesus. Indi mahibal-an sang mga saserdote ang himuon, kay indi nila mapanghiwala nga natabu gid ang milagro. Gani ginpaandaman nila ang mga apostoles nga indi maghambal na tuhoy kay Jesus, kag ginpalakat sila.

Samtang nagaligad ang inadlaw, nagbantala ang mga apostoles tuhoy kay Jesus kag nang-ayo sa masakiton. Naglapnag ini nga balita, kag ang mga tao sa palibot sang Jerusalem nagdala sing masakiton agod ayuhon nila. Naimon ang relihiosong mga lider, gani ginpabilanggu nila ang mga apostoles. Apang wala sila maglawig didto.

Sang kagab-ihon, ginbuksan sang anghel sang Dios ang ganhaan sang bilangguan, subong imo makita diri. Sia nagsiling: ‘Lakat kamo kag maghambal sa kataohan sa templo.’ Pagkaaga, nasapwan sang relihiosong mga lider nga wala na ang mga apostoles. Sang ulihi, nakita sila nga nagapanudlo sa templo, kag gindala sa Sanhedrin.

‘Ginmanduan gid namon kamo nga indi na magpanudlo tuhoy kay Jesus,’ siling sang relihiosong mga lider. ‘Apang ginpuno ninyo ang Jerusalem sang inyo panudlo.’ Ang mga apostoles nagsabat: ‘Dapat namon tumanon ang Dios subong manuggahom sa baylo sang mga tao.’ Gani nagpadayon sila sa pagpanudlo sing “maayong balita.” Indi bala ina isa ka maayong huaran nga sundon naton?

Binuhatan kapitulo 3 tubtob 5.



Mga Pamangkot:

  • Ano ang natabu kay Pedro kag kay Juan isa ka hapon sang nagapakadto sila sa templo?
  • Ano ang ginsiling ni Pedro sa tao nga piang, kag ano ang ginhatag ni Pedro sa iya nga mas bilidhon sangsa kuarta?
  • Ngaa naakig ang relihiosong mga lider, kag ano ang ginhimu nila kay Pedro kag kay Juan?
  • Ano ang ginsiling ni Pedro sa relihiosong mga lider, kag ano nga paandam ang nabaton sang mga apostoles?
  • Ngaa naimon ang relihiosong mga lider, apang ano ang natabu sang ginbilanggu ang mga apostoles sa ikaduha nga tion?
  • Ano ang ginsabat sang mga apostoles sang gindala sila sa atubangan sang Sanhedrin?

Dugang pa nga mga pamangkot

  • Basaha ang Binuhatan 3:1-10.

    Bisan pa wala kita ginhatagan sing gahom nga maghimu sing mga milagro karon, paano ang mga pulong ni Pedro nga nasulat sa Binuhatan 3:6 nagabulig sa aton sa pag-apresyar sa balor sang mensahe sang Ginharian? (Juan 17:3; 2 Cor. 5:18-20; Fil. 3:8)

  • Basaha ang Binuhatan 4:1-31.

    Kon ginapamatukan kita sa ministeryo, paano naton mailog ang aton Cristianong mga kauturan sang nahauna nga siglo? (Bin. 4:29, 31; Efe. 6:18-20; 1 Tes. 2:2)

  • Basaha ang Binuhatan 5:17-42.

    Paano ang pila nga indi mga Saksi, sang una kag karon, nagpakita sing pagkarasonable tuhoy sa pagbantala nga hilikuton? (Bin. 5:34-39)

Magtuon sing Dugang Pa

BIBLE CARD

Bible Card: Pedro

Kilalaha pa gid ining matutom nga apostol.