Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 105: Nagahulat sa Jerusalem

Sugilanon 105: Nagahulat sa Jerusalem

INING mga tao diri mga sumolunod ni Jesus. Nagpabilin sila sa Jerusalem, subong ginsiling ni Jesus. Karon, samtang nagahulat sila, ang balay ginhil-ob sing mabaskog nga gahod. Daw subong ini sang mabaskog nga hangin. Nian, ang mga dila sang kalayo nagtungtong sa mga ulo sang mga disipulo. Makita mo bala sila? Ano ang buot silingon sini?

Ang balaan nga espiritu sa unang siglo nga mga dispulo

Milagro ini! Si Jesus nagbalik na sa langit, kag ginbubo niya ang balaan nga espiritu sang Dios sa iya mga sumolunod. Nahibal-an mo bala kon ano ang mahimu nila bangod sa balaan nga espiritu? Naghambal sila tanan sing tuhay nga pamulong!

Madamu nga tao sa Jerusalem ang nakabati sing gahod, kag nagkari agod makita ang nagakatabu. Ang iban sa ila gikan sa iban nga mga pungsod. Daw ano ang kakibot nila! Nabatian nila ang mga disipulo nga nagahambal sang ila hambal, kag nagasugid sang makatilingala nga mga butang nga nahimu sang Dios.

Natingala ang mga dumoloaw nga makahambal ang mga taga-Galilea sing madamu nanuhaytohay nga pamulong. Gani nagpaathag si Pedro. Nagsugid sia kon paano ginpatay si Jesus, kag nga ginbanhaw sia ni Jehova. ‘Karon si Jesus didto sa langit sa tuohan sang Dios,’ siling ni Pedro. ‘Kag ginbubo niya ang ginsaad nga balaan nga espiritu. Amo kon ngaa inyo nakita kag nabatian ining mga milagro.’

Bueno, sang ginahambal ni Pedro ining butang, madamu ang naghinulsol sa ginhimu kay Jesus. ‘Ano ang himuon namon?’ pamangkot nila. Si Pedro nagsiling sa ila: ‘Dapat ninyo bag-uhon ang inyo kabuhi kag magpabautismo.’ Sadto nga adlaw, mga 3,000 ka tao ang nagpabautismo kag nangin mga sumolunod ni Jesus.

Binuhatan 2:1-47.



Mga Pamangkot:

  • Subong ginapakita sa laragway, ano ang natabu sa mga sumolunod ni Jesus nga nagahulat sa Jerusalem?
  • Ngaa nakibot ang mga tao nga nagkadto sa Jerusalem?
  • Ano ang ginpaathag ni Pedro sa kataohan?
  • Ano ang ginbatyag sang kataohan sa tapos sila namati kay Pedro, kag ano ang ginsiling niya nga himuon nila?
  • Pila ka tao ang nagpabautismo sadto nga adlaw sang Pentecostes, 33 C.E.?

Dugang pa nga mga pamangkot

  • Basaha ang Binuhatan 2:1-47.

    Paano ginapakita sang mga pulong ni Pedro nga masapwan sa Binuhatan 2:23, 36 nga may salabton man ang bug-os nga pungsod sang mga Judiyo sa kamatayon ni Jesus? (1 Tes. 2:14, 15)

    Paano si Pedro naghatag sing maayong halimbawa sa pagpangatarungan gikan sa Kasulatan? (Bin. 2:16, 17, 29, 31, 36, 39; Col. 4:6)

    Paano gingamit ni Pedro ang una sa “mga yabi sang ginharian sang langit,” nga ginsaad ni Jesus nga ihatag sa iya? (Bin. 2:14, 22-24, 37, 38; Mat. 16:19)

Magtuon sing Dugang Pa

Madamo ang Nakakita sa Iya Antes sang Pentecostes

Pagkatapos mabanhaw si Jesus asta magkayab sia sa langit, sulitsulit niya nga ginsiling kon ano ang mabaton sang iya mga disipulo kag kon paano nila ini gamiton.