Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 104: Nagbalik si Jesus sa Langit

Sugilanon 104: Nagbalik si Jesus sa Langit

SAMTANG nagaligad ang inadlaw, nagpakita si Jesus sa iya mga sumolunod sing makapila. Isa ka bes mga 500 ka disipulo ang nakakita sa iya. Naghambal sia sa ila tuhoy sa ginharian sang Dios. Ginpadala ni Jehova si Jesus agod magtudlo tuhoy sa Ginharian. Kag ginhimu niya ini bisan sa tapos sia ginbanhaw.

Nagakayab si Jesus

Dumdoma, yadtong Ginharian isa ka matuod nga pangulohan sang Dios sa langit, kag si Jesus ang ginpili sang Dios nga magahari. Subong aton naton-an, ginpakita ni Jesus nga mangin dalayawon sia nga hari paagi sa pagpakaon sa gutom, pag-ayo sa masakiton, kag pagbanhaw pa sa minatay.

Gani kon maghari si Jesus sa langit sa isa ka libo ka tuig, mangin ano ang duta? Huo, ang bilog nga duta mangin matahom nga paraiso. Wala na sing mga inaway, ukon krimen, balatian, ukon kamatayon pa.

Ang tion nag-abot karon nga magbalik si Jesus sa langit. Nagpakita sia sa iya mga disipulo sa 40 ka adlaw, gani nakapat-od sila nga buhi sia liwat. Antes sia magbiya sa ila, nagsiling sia sa ila nga magpabilin sa Jerusalem tubtob mabaton nila ang balaan nga espiritu. Ang balaan nga espiritu amo ang aktibo nga puersa sang Dios nga magabulig sa iya mga sumolunod sa paghimu sang kabubot-on sang Dios. Sang hingapusan, si Jesus nagsiling: ‘Ibantala ninyo ako tubtob sa kaukbongan sang duta.’

Natabu ang makatilingala nga butang. Nagapaibabaw si Jesus sa langit, subong imo makita diri. Nian gintakpan sia sang panganod, kag wala na sia makita sang iya mga disipulo. Nagpalangit si Jesus, kag naggahom sa iya mga sumolunod sa duta gikan didto.

Ang mga disipulo nagatangla sa langit

1 Corinto 15:3-8; Bugna 21:3, 4; Binuhatan 1:1-11.



Mga Pamangkot:

  • Pila ka disipulo ang nakakita kay Jesus sang isa ka bes, kag ano ang ginhambal niya sa ila?
  • Ano ang Ginharian sang Dios, kag ano ang mangin kahimtangan sang kabuhi sa duta kon magahari na si Jesus sa sulod sang isa ka libo ka tuig?
  • Pila ka adlaw nga nagpakita si Jesus sa iya mga disipulo, apang tion na karon nga himuon niya ang ano?
  • Antes biyaan ang iya mga disipulo, ano ang ginsiling ni Jesus sa ila nga himuon nila?
  • Ano ang nagakatabu sa laragway, kag paano si Jesus nadula sa panulok sang iya mga disipulo?

Dugang pa nga mga pamangkot

  • Basaha ang 1 Corinto 15:3-8.

    Ngaa may pagsalig gid nga nakahambal si apostol Pablo tuhoy sa pagkabanhaw ni Jesus, kag tuhoy sa anong mga butang may pagsalig gid nga makahambal ang mga Cristiano karon? (1 Cor. 15:4, 7, 8; Isa. 2:2, 3; Mat. 24:14; 2 Tim. 3:1-5)

  • Basaha ang Binuhatan 1:1-11.

    Daw ano ka lapnag nga ginhimu ang pagbantala, subong sang gintagna sa Binuhatan 1:8? (Bin. 6:7; 9:31; 11:19-21; Col. 1:23)

Magtuon sing Dugang Pa

Ang Cristo sa Tuo sang Dios

Ano ang himuon ni Jesus samtang ginahulat niya ang tion nga manghikot sia batok sa iya mga kaaway?