Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 98: Sa Bukid sang Olivo

Sugilanon 98: Sa Bukid sang Olivo

SI Jesus ini sa Bukid sang Olivo. Ang apat ka tao nga upod niya mga apostoles niya. Sila sanday Andres, Pedro, Santiago kag Juan. Makita mo bala ang templo sang Dios sa Jerusalem sa malayo?

Martes ini, duha ka adlaw ang nakaligad sa tapos si Jesus nagsakay sa tinday nga asno pa-Jerusalem. Sang temprano pa, nagtinguha ang mga saserdote sa pagbutong kay Jesus kag patyon sia. Apang nahadlok sila sa paghimu sini kay luyag sang kataohan si Jesus.

Si Jesus ka ang iya mga apostoles

Ginsingganan ni Jesus ang relihiosong mga lider nga silotan sila sang Dios bangod sang tanan nila nga kalainan. Sa tapos sadto, nagtaklad si Jesus sa Bukid sang Olivo, kag ining apat ka apostoles namangkot sa iya. Luyag nila mahibal-an kon san-o tapuson ni Jesus ang tanan nga kalainan kag magkari liwat sa paggahom subong hari.

Nahibal-an ni Jesus nga indi na sia makita sang iya mga sumolunod sa duta kon magkari sia liwat. Bangod sa langit na sia. Gani ginsugid ni Jesus sa iya mga apostoles ang pila ka butang nga mahanabu sa duta kon maggahom sia subong Hari sa langit.

Nagsiling si Jesus nga may dalagku nga inaway, madamu ang magabalatian kag gutomon, ang krimen magalala kag may dalagku nga mga linog. Nagsiling man si Jesus nga ang maayong balita sang ginharian sang Dios pagaibantala bisan diin sa duta. Nakita na bala naton ining mga butang nga nagakatabu sa aton tion? Huo! Gani makapat-od kita nga si Jesus nagagahom karon sa langit. Sa dili madugay untaton niya ang tanan nga kalainan sa duta.

Mateo 21:46; 23:1-39; 24:1-14; Marcos 13:3-10.



Mga Pamangkot:

  • Sa laragway, diin si Jesus, kag sin-o ang mga kaupod niya?
  • Ano ang gintinguhaan sang mga saserdote nga himuon kay Jesus, kag ano ang ginsiling niya sa ila?
  • Ano ang ginpamangkot sang mga apostoles kay Jesus?
  • Ngaa ginsugid ni Jesus sa iya mga apostoles ang pila ka butang nga mahanabu sa duta kon maggahom na sia subong Hari sa langit?
  • Ano ang ginsiling ni Jesus nga mahanabu anay antes niya untaton ang tanan nga kalainan sa duta?

Dugang pa nga mga pamangkot

  • Basaha ang Mateo 23:1-39.

    Bisan pa ginapakita sang Kasulatan nga nagakaigo maggamit sing sekular nga mga titulo, ano ang ginapakita sang mga pulong ni Jesus sa Mateo 23:8-11 tuhoy sa paggamit sing madayawdayawon nga mga titulo sa sulod sang Cristianong kongregasyon? (Bin. 26:25; Roma 13:7; 1 Ped. 2:13, 14)

    Ano ang gingamit sang mga Fariseo agod punggan ang mga tao nga mangin mga Cristiano, kag paano ang relihioso nga mga lider naggamit sing pareho man nga mga taktika sa modernong mga tion? (Mat. 23:13; Luc. 11:52; Juan 9:22; 12:42; 1 Tes. 2:16)

  • Basaha ang Mateo 24:1-14.

    Paano ginapadaku sa Mateo 24:13 ang importansia sang pagbatas?

    Ano ang kahulogan sang ekspresyon nga “katapusan” sa Mateo 24:13? (Mat. 16:27; Roma 14:10-12; 2 Cor. 5:10)

  • Basaha ang Marcos 13:3-10.

    Ano nga ekspresyon sa Marcos 13:10 ang nagapakita nga hilingagawon ang pagbantala sa maayong balita, kag paano kita dapat maapektuhan sang mga pulong ni Jesus? (Roma 13:11, 12; 1 Cor. 7:29-31; 2 Tim. 4:2)

Magtuon sing Dugang Pa

SI JESUS—ANG DALAN, ANG KAMATUORAN, ANG KABUHI

Nangayo sing Tanda ang mga Apostoles

Ang iya tagna natuman una sang unang siglo. May daku man bala ini nga katumanan?

ANG LALANTAWAN

Malapit Na Bala ang Katapusan?

Binagbinaga ang apat ka kahimtangan nga nagahuman sang tanda sang katapusan nga ginlaragway sang Biblia nga nagahatag sing sabat.