Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 94: Palangga Niya ang Diutay nga Kabataan

Sugilanon 94: Palangga Niya ang Diutay nga Kabataan

TAN-AWA diri si Jesus nga nagahakos sa bata nga lalaki. Luyag gid niya ang kabataan. Ang mga tao nga nagatan-aw mga apostoles niya. Ano ang ginasiling sa ila ni Jesus?

Si Jesus kag ang iya mga apostoles bag-o lang makabalik gikan sa malawig nga paglakbay. Sa dalanon, nagabaisay ang mga apostoles. Gani ginpamangkot sila karon ni Jesus: ‘Ano ang inyo ginbaisan?’ Matuod, nahibal-an ni Jesus ang ginbaisan, apang luyag niya tan-awon kon manugid sila.

Si Jesus kag ang isa ka diutay nga bata

Wala magsabat ang mga apostoles, kay ginbaisan nila kon sin-o sa ila ang pinakadaku. Luyag sang iban nga apostoles nga mangin kapin ka importante sang sa iban.

Gani gintawag ni Jesus ang diutay nga bata nga lalaki, kag ginpatindog sia sa atubangan sang tanan. Nian nagsiling sia sa ila: ‘Kon indi kamo mangin kaangay sang diutay nga kabataan, indi gid kamo makasulod sa ginharian sang Dios. Ang labing daku sa ginharian amo ang isa nga mangin kaangay sining bata.’

Sa pagkamatuod, ang kabataan wala nagakabalaka nga mag-importante sang sa iban. Gani dapat makatuon ang mga apostoles nga indi mag-inaway tuhoy sa pagkaimportante.

Sa liwat ginpakita ni Jesus nga nagaulikid sia sa kabataan. Gindala sang iban nga tao ang ila kabataan kay Jesus, kag gintabog sila sang mga apostoles. Apang si Jesus nagsiling: ‘Pakariha ang kabataan sa akon, kay ang ginharian sang Dios ila sang mga tao nga kasubong nila.’ Indi bala maayo mahibal-an nga palangga ni Jesus ang diutay nga kabataan?

Mateo 18:1-4; 19:13-15; Marcos 9:33-37; 10:13-16.



Mga Pamangkot:

  • Ano ang ginbaisan sang mga apostoles sa ila pagbalik gikan sa isa ka malawig nga paglakbay?
  • Ngaa gintawag ni Jesus ang diutay nga bata nga lalaki kag ginpatindog sia sa atubangan sang mga apostoles?
  • Ano ang dapat maton-an sang mga apostoles gikan sa kabataan?
  • Mga pila ka bulan sang ulihi, paano sa liwat ginpakita ni Jesus nga nagaulikid sia sa kabataan?

Dugang pa nga mga pamangkot

  • Basaha ang Mateo 18:1-4.

    Ngaa naggamit si Jesus sing mga ilustrasyon sa pagpanudlo? (Mat. 13:34, 36; Mar. 4:33, 34)

  • Basaha ang Mateo 19:13-15.

    Ano nga mga kinaiya sang mga bata ang dapat naton ilugon agod makaambit kita sa mga pagpakamaayo sang Ginharian? (Sal. 25:9; 138:6; 1 Cor. 14:20)

  • Basaha ang Marcos 9:33-37.

    Ano ang gintudlo ni Jesus sa iya mga disipulo tuhoy sa paghandum sa prominente nga mga posisyon? (Mar. 9:35; Mat. 20:25, 26; Gal. 6:3; Fil. 2:5-8)

  • Basaha ang Marcos 10:13-16.

    Daw ano ka madali palapitan si Jesus, kag ano ang maton-an sang Cristianong mga gulang gikan sa iya halimbawa? (Mar. 6:30-34; Fil. 2:1-4; 1 Tim. 4:12)

Magtuon sing Dugang Pa

Nagpanudlo Parte sa Diborsio kag Gugma sa mga Bata

Tuhay ang pagtamod ni Jesus sa mga bata sangsa iya mga disipulo. Ngaa?