Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 92: Ginbanhaw ni Jesus ang Patay

Sugilanon 92: Ginbanhaw ni Jesus ang Patay

ANG bata nga babae nga makita mo diri 12 años. Ginauyatan ni Jesus ang iya kamut, kag ang iya iloy kag amay nagatindog sa malapit. Nahibal-an mo bala kon ngaa malipayon gid sila? Hibaluon ta.

Ginbanhaw ni Jesus ang bata ni Jairo

Ang amay sang bata nga babae isa ka importante nga tao nga nagahingalan kay Jairo. Isa ka adlaw nagmasakit ang iya bata nga babae, kag naghigda. Naglala ang iya balatian, kag si Jairo kag ang iya asawa nabalaka gid. Bugtong sia nga anak kag daw subong bala nga mapatay sia.

Gani ginpangita ni Jairo si Jesus.

Nakit-an ni Jairo si Jesus sa tunga sang daku nga kadam-an. Naghapa sia sa tiilan ni Jesus kag nagpakiluoy nga magkari kag ayuhon ang iya anak. Nagsiling si Jesus nga makadto sia.

Samtang nagaagi sila sa kadam-an, sa hinali nagdulog si Jesus. ‘Sin-o ang nagtandog sa akon?’ pamangkot niya. Nabatyagan ni Jesus nga may naggua sa iya nga gahom, gani nahibal-an niya nga may nagtandog sa iya. Apang sin-o? Amo ang babae nga nagamasakit sa 12 ka tuig. Gintandog niya ang panapton ni Jesus, kag nag-ayo sia!

Nalipay si Jairo sa pagtan-aw sa mahapos nga pag-ayo ni Jesus. Apang nian nag-abot ang mensahero kag nagsiling nga ang iya anak patay na. Nabatian ini ni Jesus kag nagsiling: ‘Dili magkasubo, magaayo sia.’

Sang pag-abot nila sa balay ni Jairo, nagahibi ang tanan. Apang si Jesus nagsiling: ‘Dili maghibi. Ang bata nagakatulog lamang.’ Apang nagkinadlaw sila, bangod patay ang bata.

Nian ginpasulod ni Jesus ang amay kag iloy sang bata kag ang tatlo niya ka apostoles sa hulot nga nahamtangan sang bata. Iya gin-uyatan sia sa kamut kag nagsiling: ‘Bangon ka!’ Kag nabuhi sia. Amo kon ngaa malipayon gid ang iya iloy kag amay.

May iban pa nga ginbanhaw si Jesus. Ang una nga ginasugid sang Biblia amo ang anak sang balo nga babae nga nagapuyo sa siudad sang Nain. Kon maggahom si Jesus subong hari sang Dios, banhawon niya ang madamu nga patay. Dili bala kita malipay sa sina?

Lucas 8:40-56; 7:11-17; Juan 11:17-44.



Mga Pamangkot:

  • Sin-o ang amay sang bata nga babae sa laragway, kag ngaa nabalaka gid sia kag ang iya asawa?
  • Ano ang ginhimu ni Jairo sang nakita niya si Jesus?
  • Ano ang natabu sang si Jesus nagapakadto sa puloy-an ni Jairo, kag ano nga mensahe ang nabaton ni Jairo sa dalanon?
  • Ngaa nagkinadlaw kay Jesus ang mga tao sa puloy-an ni Jairo?
  • Sa tapos ginpasulod ni Jesus sa hulot sang bata nga babae ang tatlo ka apostoles kag ang amay kag iloy sang bata nga babae, ano ang ginhimu ni Jesus?
  • Sin-o pa ang ginbanhaw ni Jesus, kag ano ang ginapakita sini?

Dugang pa nga mga pamangkot

  • Basaha ang Lucas 8:40-56.

    Paano si Jesus nagpakita sing kaawa kag pagkarasonable sa babae nga may tagas sang dugo, kag ano ang maton-an gikan sa sini sang Cristianong mga gulang karon? (Luc. 8:43, 44, 47, 48; Lev. 15:25-27; Mat. 9:12, 13; Col. 3:12-14)

  • Basaha ang Lucas 7:11-17.

    Ngaa ang mga namatyan sing mga hinigugma makasapo sing daku nga lugpay sa ginsabat ni Jesus sa balo nga babae gikan sa Nain? (Luc. 7:13; 2 Cor. 1:3, 4; Heb. 4:15)

  • Basaha ang Juan 11:17-44.

    Paano ginpakita ni Jesus nga normal lamang ang magkasubo kon mamatyan sing hinigugma? (Juan 11:33-36, 38; 2 Sam. 18:33; 19:1-4)

Magtuon sing Dugang Pa

Nagpili si Jesus sang Dose ka Apostoles

Ano ang kinatuhayan sang apostol sa disipulo?

Ginbanhaw ni Jesus ang Anak sang Balo

Nahangpan sang mga nakakita sang milagro ang katuyuan sini.

Ginbanhaw si Lazaro

May duha ka pamatuod nga imposible ipanghiwala sang mga nagapamatok kay Jesus nga natabo ang milagro.