Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 90: Upod sa Babae sa Bubon

Sugilanon 90: Upod sa Babae sa Bubon

NAGDULOG si Jesus agod magpahuway sa higad sang bubon sa Samaria. Ang iya mga disipulo nagpabanwa agod magbakal sing pagkaon. Ang babae nga ginahambal ni Jesus nagkari sa pagkuha sing tubig. Nangayo sia sa iya sing tubig nga mainum.

Nagapakighambal si Jesus sa isa ka Samaritana

Ang kalabanan sang mga Judiyo indi luyag sa mga Samaritano. Gani nakibot ang babae sang ginhambal sia ni Jesus. Apang ginahigugma ni Jesus ang tanan nga sahi sang tao. Sia nagsiling: ‘Kon kilala mo ang nagapangayo sing mainum, mangayo ka sa iya kag hatagan ka niya sing nagahatag-kabuhi nga tubig.’

‘Ginuo,’ siling sang babae, ‘Wala ka gani sing balde kag ang bubon madalom. Diin mo kuhaon ining nagahatag-kabuhi nga tubig?’

Si Jesus nagsiling: ‘Kon mag-inum ka sa sining bubon, uhawon ka liwat. Apang magahatag ako sing tubig nga makapabuhi sa isa ka tao tubtob sa walay katubtoban.’

‘Ginuo,’ siling sang babae, ‘Hatagi ako sining tubig! Agod indi na ako magkuha pa diri sing tubig.’

Naghunahona ang babae nga matuod nga tubig ang ginahambal ni Jesus. Apang ang iya ginahambal amo ang kamatuoran tuhoy sa Dios kag sa iya ginharian. Ining kamatuoran kaangay sang nagahatag-kabuhi nga tubig.

Ginsingganan karon ni Jesus ang babae: ‘Lakat ka kag tawga ang imo bana.’

‘Wala ako sing bana,’ sabat niya.

‘Matuod ina,’ siling ni Jesus. ‘Apang may lima ikaw ka bana. Kag ang imo ginapuyo karon indi mo bana.’

Natingala ang babae, bangod matuod ini. Nahibal-an ini ni Jesus bangod sia ang Ginsaad nga ginpadala sang Dios. Ang Dios ang naghatag sa iya sining impormasyon. Nagbalik na karon ang mga disipulo ni Jesus, kag nakibot nga si Jesus nagapakighambal sa isa ka Samaritana.

Gikan sa sini aton makita nga si Jesus malulo sa tanan nga rasa sang tao. Kag dapat amo man kita. Luyag ni Jesus nga ang tanan makahibalo sing kamatuoran nga nagadul-ong sa kabuhi nga dayon. Kag dapat luyag man naton buligan ang kataohan nga makatuon sing kamatuoran.

Juan 4:5-43; 17:3.



Mga Pamangkot:

  • Ngaa nagdulog si Jesus sa higad sang bubon sa Samaria, kag ano ang ginsiling niya sa isa ka babae didto?
  • Ngaa natingala ang babae, ano ang ginsiling ni Jesus sa iya, kag ngaa?
  • Ano nga tubig ang pagdumdom sang babae amo ang ginapatuhuyan ni Jesus, apang ano gali ini nga tubig?
  • Ngaa natingala ang babae sa nahibaluan ni Jesus sa iya, kag paano niya natigayon ini nga impormasyon?
  • Ano nga mga leksion ang maton-an naton gikan sa rekord tuhoy sa babae sa higad sang bubon?

Dugang pa nga mga pamangkot

  • Basaha ang Juan 4:5-43.

    Bilang pag-ilug sa halimbawa ni Jesus, paano naton dapat pakig-angutan ang mga tao nga may tuhay nga rasa ukon gindak-an nga katilingban? (Juan 4:9; 1 Cor. 9:22; 1 Tim. 2:3, 4; Tito 2:11)

    Anong espirituwal nga mga kaayuhan ang matigayon sang isa ka tao nga mangin disipulo ni Jesus? (Juan 4:14; Isa. 58:11; 2 Cor. 4:16)

    Paano kita makapakita sing apresasyon kaangay sadtong Samaritana, nga nalangkag sa pagpaambit sang iya naton-an? (Juan 4:7, 28; Mat. 6:33; Luc. 10:40-42)

Magtuon sing Dugang Pa

Gintudluan ang Samaritana

Ginsugid sa iya ni Jesus ang wala pa niya ginsugid sa iban.