Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 89: Gintinloan ni Jesus ang Templo

Sugilanon 89: Gintinloan ni Jesus ang Templo

AKIG gid diri si Jesus, indi bala? Nahibal-an mo bala kon ngaa? Bangod ining mga tao sa templo sang Dios sa Jerusalem tuman kakagud. Nagapanguarta sila sing daku gikan sa mga tao nga nagkari diri agod magsimba sa Dios.

Ginpamaliskad ni Jesus ang mga lamesa nga may kuarta

Ang mga tao nagabaligya sadtong mga sapat nga imo makita, diri mismo sa templo. Nahibal-an mo bala kon ngaa? Bangod kinahanglan sang mga Israelinhon ang mga sapat kag pispis sa paghalad sa Dios. Nahisuno ini sa sugo sang Dios. Apang sa diin makakuha ang isa ka Israelinhon sing mga pispis kag sapat nga ihalad sa Dios?

Ang iban nga Israelinhon may mga pispis kag sapat. Apang madamu ang wala. Ang iban nagapuyo malayo sa Jerusalem nga indi nila madala ang ila sapat sa templo. Gani nagkadto sila diri kag nagabakal sing sapat ukon pispis nga kinahanglan nila. Apang ginadayaan sining mga tao ang kataohan. Luas pa, indi sila dapat magbaligya sa templo mismo sang Dios.

Amo ini ang nagpaakig kay Jesus. Gani ginpamaliskad niya ang mga lamesa sang mga tao nga may kuarta. Ginpanabog man niya ang tanan nga sapat sa templo. Ginmandoan niya ang mga tao nga nagabaligya sing mga salampati: ‘Paguaa sila diri! Dili paghimua ang balay sang akon Amay nga duog sa pagpanguarta!’

Nakibot ang mga sumolunod ni Jesus sa iya ginahimu. Nian nadumdoman nila ang ginasiling sang Biblia tuhoy sa anak sang Dios: ‘Ang gugma para sa balay sang Dios magadabdab sa sulod niya kaangay sang kalayo.’

Samtang yari diri si Jesus sa Jerusalem nga nagatambong sa Paskua, naghimu sia sing madamung milagro. Nian, nagbalik sia sa Galilea. Apang sa iya dalanon, nag-agi sia sa distrito sang Samaria. Tan-awon ta kon ano ang natabu didto.

Juan 2:13-25; 4:3, 4.



Mga Pamangkot:

  • Ngaa may mga sapat nga ginabaligya sa templo?
  • Ngaa naakig si Jesus?
  • Subong sang makita mo sa laragway, ano ang ginhimu ni Jesus, kag ano ang ginmandu niya sa mga tao nga nagabaligya sing mga salampati?
  • Sang makita sang mga sumulunod ni Jesus ang ginahimu niya, ano ang nadumduman nila?
  • Diin nga distrito nag-agi si Jesus sa iya pagbalik sa Galilea?

Dugang pa nga pamangkot

  • Basaha ang Juan 2:13-25.

    Bangod sang kaakig ni Jesus sa mga manugbaylo sang kuarta, ano ang nagakaigo nga pagtamod sa pagnegosyo sa sulod sang Kingdom Hall? (Juan 2:15, 16; 1 Cor. 10:24, 31-33)