Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 87: Ang Lamharon nga si Jesus sa Templo

Sugilanon 87: Ang Lamharon nga si Jesus sa Templo

TAN-AWA ang bata nga lalaki nga nagapakighambal sa mga gulang. Mga manunodlo sila sa templo sang Dios sa Jerusalem. Kag ang bata nga lalaki amo si Jesus. 12 años sia karon.

Nakibot ang mga manunodlo nga madamu sing nahibal-an si Jesus sa Biblia. Apang diin si Jose kag si Maria? Hibaluon ta.

Nagapakig-istorya si Jesus sa mga manunudlo

Kada tuig ginadala ni Jose ang iya pamilya sa Jerusalem para sa pinasahi nga pagsaulog sing Paskua. Malawig ini nga paglakbay gikan sa Nasaret pa Jerusalem. Sadtong mga adlaw wala sing salakyan ukon tren. Kag ang Jerusalem tatlo ka adlaw nga lalakton.

Sa karon si Jose may daku nga pamilya. Gani may mga manghod nga lalaki kag babae si Jesus nga talatapon. Bueno, sini nga tuig nagpauli si Jose kag si Maria upod sa ila kabataan pa Nasaret. Sa pagdumdom nila upod nila si Jesus, apang sang gab-i na, indi nila makita sia. Gani nagbalik sila sa Jerusalem agod pangitaon sia didto.

Sang ulihi nakita nila si Jesus diri upod sa mga manunodlo. Ang tanan nga tao natingala sa iya kaalam. Apang si Maria nagsiling: ‘Anak, ang imo amay kag ako nabalaka gid sa pagpangita sa imo.’

‘Ngaa ginpangita ninyo ako?’ pamangkot ni Jesus. ‘Wala bala kamo makahibalo nga dapat ako mangin sa balay sang akon Amay?’

Huo, luyag ni Jesus sa duog diin makatuon sia tuhoy sa Dios. Indi bala amo man sina ang pagbatyag naton? Sa Nasaret, si Jesus nagakadto sa mga miting sang pagsimba kada semana. Namati sia kag nakatuon sing madamu. Sundon naton si Jesus kag ang iya huaran.

Lucas 2:41-52; Mateo 13:53-56.



Mga Pamangkot:

  • Sa laragway, pila ang edad ni Jesus, kag diin sia?
  • Ano ang ginahimu ni Jose upod sa iya pamilya kada tuig?
  • Pagkatapos sang isa ka adlaw nga paglakbay pauli, ngaa nagbalik si Jose kag si Maria sa Jerusalem?
  • Diin nakita ni Jose kag ni Maria si Jesus, kag ngaa natingala ang mga tao didto?
  • Ano ang ginsiling ni Jesus sa iya iloy nga si Maria?
  • Paano naton mailug si Jesus sa pagtuon tuhoy sa Dios?

Dugang pa nga mga pamangkot

  • Basaha ang Lucas 2:41-52.

    Bisan pa suno sa Kasugoan, mga lalaki lamang ang makatambong sa tuigan nga mga kapiestahan, anong maayong halimbawa ang ginahatag ni Jose kag ni Maria para sa mga ginikanan karon? (Luc. 2:41; Deut. 16:16; 31:12; Hulu. 22:6)

    Paano si Jesus isa ka maayong halimbawa para sa mga pamatan-on karon sa pagpasakop sa ila mga ginikanan? (Luc. 2:51; Deut. 5:16; Hulu. 23:22; Col. 3:20)

  • Basaha ang Mateo 13:53-56.

    Sin-o ang apat ka utod sa iloy ni Jesus nga ginhingadlan sa Biblia, kag paano ang duha sa ila gingamit sang ulihi sa Cristianong kongregasyon? (Mat. 13:55; Bin. 12:17; 15:6, 13; 21:18; Gal. 1:19; Sant. 1:1; Jud. 1)

Magtuon sing Dugang Pa

Ang Pamilya ni Jesus Nagkadto sa Jerusalem

Kinulbaan si Jose kag si Maria sang indi nila makita si Jesus, samtang natingala si Jesus nga wala nila dayon mahibaluan kon diin sia pangitaon.