Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 86: Mga Tao nga Gintuytoyan sang Bituon

Sugilanon 86: Mga Tao nga Gintuytoyan sang Bituon
Mga astrologo

MAKITA mo bala ang masanag nga bituon nga ginatudlo sang isa sining mga tao? Ining mga tao naghalin sa Sidlangan. Nagapati sila nga ang bituon nagatuytoy sa ila sa isa nga importante.

Sang pag-abot sang mga tao sa Jerusalem, namangkot sila: ‘Diin ang bata nga mangin hari sang mga Judiyo? Una namon nga nakita ang iya bituon sang didto kami sa Sidlangan.’

Bueno, si Herodes, nga hari sang Jerusalem, indi luyag nga may magbulos sa iya nga hari. Gani ginpamangkot niya ang pangulong mga saserdote kon diin matao ang ginsaad nga hari. Sila nagsiling: ‘Ang Biblia nagasiling sa Betlehem.’

Nian ginpatawag niya ang mga tao gikan sa Sidlangan. Ginsilingan niya sila nga pahibal-on sia kon makita nila ang bata. Nagpakunokuno si Herodes nga luyag niya magsimba sa bata, apang sa pagkamatuod luyag niya nga patyon sia.

Ginsunod sang mga tao ang bituon sa Betlehem, kag nakita nila kon diin si Maria kag si Jesus. Naghatag sila sing mga dulot sa diutay nga si Jesus. Apang ginpaandaman sila ni Jehova nga indi magbalik kay Herodes, gani nagpauli sila sa tuhay nga dalan.

Naakig si Herodes sang mabatian niya nga ang mga tao gikan sa Sidlangan nakapauli na. Gani nagmandu sia nga patyon ang tanan nga bata nga lalaki sa Betlehem nga nagaedad sing 2 ka tuig paubos. Apang ginpaandaman ni Jehova si Jose, kag naglikaw sia pa Egipto. Sang mapatay si Herodes, nagbalik sila sa Nasaret. Diri nagdaku si Jesus.

Sin-o sa banta mo ang nagpasilak sadtong bag-ong bituon? Dumdoma, bangod gintuytoyan sang bituon ang mga tao una sa Jerusalem, diutayan lang mapatay si Jesus. Luyag ni Satanas patyon ang Anak sang Dios, gani mahimu gid nga sia ang nagpasilak sadtong bituon.

Mateo 2:1-23; Miqueas 5:2.



Mga Pamangkot:

  • Sin-o ang mga tao sa laragway, kag ngaa ang isa sa ila nagatudlo sa isa ka masanag nga bituon?
  • Bangod indi niya luyag nga may magbulos sa iya nga hari, ano ang ginhimu ni Hari Herodes?
  • Diin gintuytuyan sang masanag nga bituon ang mga tao, apang ngaa nag-agi sila sa tuhay nga dalan sang magpauli sila sa ila pungsod?
  • Ano ang ginmandu ni Herodes, kag ngaa?
  • Ano ang ginsugo ni Jehova kay Jose nga himuon niya?
  • Sin-o ang nagpasilak sa bag-o nga bituon, kag ngaa?

Dugang pa nga pamangkot

  • Basaha ang Mateo 2:1-23.

    Pila ang edad ni Jesus kag diin sia nagapuyo sang ginduaw sia sang mga astrologo? (Mat. 2:1, 11, 16)

Magtuon sing Dugang Pa

Ginduaw sang mga Astrologo si Jesus

Ngaa ang bituon nga nakita nila sa Sidlangan naggiya sa ila una sa manugpatay nga si Hari Herodes, kag indi kay Jesus?