Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 85: Natao si Jesus sa Kwadra

Sugilanon 85: Natao si Jesus sa Kwadra

KILALA mo bala ining diutay nga bata? Huo, sia si Jesus. Bag-o lang sia matao sa kwadra. Ang kwadra isa ka talagoan sing mga sapat. Ginkulan ni Maria si Jesus sa pasungan, nga amo ang bulotangan sing pagkaon para sa mga sapat.

Ngaa yari sila diri? Bueno, ang manuggahom sang Roma naghimu sing sugo nga ang tanan dapat magbalik sa siudad nga iya nataohan agod ipalista ang iya ngalan sa tolon-an. Si Jose natao diri sa Betlehem. Apang pag-abot nila ni Maria, wala sing lugar para sa ila bisan diin. Gani nag-upod sila diri sa mga sapat. Kag sa sini gid nga adlaw, ginbun-ag ni Maria si Jesus!

Sanday Jose, Maria, kag ang lapsag nga si Jesus

Makita mo bala ang mga manugbantay nga nagkadto sa pagtan-aw kay Jesus? Didto sila sa latagon nga nagatatap sang ila karnero, sang ang anghel nagpakita sa ila! Ang anghel nagsiling: ‘Dili mahadlok! May maayo ako nga balita para sa inyo. Karon sa Betlehem, natao si Cristo nga Ginuo.’ Sa hinali nag-inabot ang madamung anghel kag nagdayaw sa Dios. Gani sa gilayon ining mga manugbantay nagdalidali sa pagtan-aw kay Jesus, kag karon nakita nila sia.

Nahibaloan mo bala kon sin-o gid si Jesus? Dumdoma, sa una nga sugilanon sining libro ginsugiran kita tuhoy sa panganay nga Anak sang Dios. Ining Anak nagpangabudlay upod kay Jehova sa paghimu sing mga langit kag duta kag sing tanan. Bueno, amo ini si Jesus!

Huo, ginkuha ni Jehova ang kabuhi sang iya Anak gikan sa langit kag ginsulod ini kay Maria. Ang bata nagtubo sa sulod ni Maria, subong sa pagtubo sang iban nga bata sa sulod sang ila iloy. Apang anak ini sang Dios. Nahangpan mo bala kon ngaa malipayon gid ang mga anghel sa pagsugid sa kataohan nga natao si Jesus?

Lucas 2:1-20.



Mga Pamangkot:

  • Sin-o ang diutay nga bata sa laragway, kag diin sia ginkulan ni Maria?
  • Ngaa natao si Jesus sa isa ka kwadra upod sa mga sapat?
  • Sa laragway, sin-o ang mga tao nga nagsulod sa kwadra, kag ano ang ginsiling sa ila sang anghel?
  • Sin-o gid si Jesus?
  • Ngaa matawag si Jesus nga Anak sang Dios?

Dugang pa nga mga pamangkot

  • Basaha ang Lucas 2:1-20.

    Ano nga bahin ang gintungdan ni Cesar Agosto sa katumanan sang tagna tuhoy sa pagkabun-ag ni Jesus? (Luc. 2:1-4; Miq. 5:2)

    Paano ang isa ka indibidual malakip sa mga ginapatuhuyan subong “mga tao nga may maayong kabubut-on”? (Luc. 2:14; Mat. 16:24; Juan 17:3; Bin. 3:19; Heb. 11:6)

    Kon yadtong kubos nga Judeano nga mga manugbantay sang karnero may rason sa pagkasadya sa pagkabun-ag sang isa ka Manluluas, ano ang daku pa nga rason sa pagkalipay sang mga alagad sang Dios karon? (Luc. 2:10, 11; Efe. 3:8, 9; Bug. 11:15; 14:6)

Magtuon sing Dugang Pa

San-o Natawo si Jesus?

Hibalua kon ngaa Disiembre 25 ginaselebrar ang Krismas.