Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 79: Si Daniel sa Lungib sang Leon

Sugilanon 79: Si Daniel sa Lungib sang Leon

ABAW, ABAW! Daw yara sa dakung katalagman si Daniel. Apang wala sia ginatandog sang mga leon. Nahibaloan mo bala kon ngaa? Kag nahibaloan mo bala kon sin-o ang nagbutang diri kay Daniel? Hibaluon naton.

Ang hari karon sang Babilonia amo si Dario. Naluyagan niya si Daniel bangod mabuot sia kag maalam. Ginpili ni Dario si Daniel nga mangin pangulong manuggahom sa iya ginharian. Bangod sini, nahisa ang iban nga tao, gani amo ini ang ila ginhimu.

Si Dario

Nangabay sila kay Dario nga maghimu sing sugo nga sa 30 ka adlaw, wala sing isa nga mangamuyo sa iban nga dios kundi kay Dario lamang. Ang bisan sin-o nga maglapas ihaboy sa mga leon. Walay hinalung-ong si Dario kon ngaa luyag ipahimu sining mga tao ining sugo. Apang sa iya hunahona maayo yadto nga ideya. Nagsugot sia nga maghimu sing sugo.

Sang mahibal-an ni Daniel ang sugo, nagpauli sia kag nangamuyo, subong sang iya pirme ginahimu. Nahibaloan sang malain nga mga tao nga si Daniel indi mag-untat sa pagpangamuyo kay Jehova. Daw epektibo ang ila plano.

Naghinulsol gid si Hari Dario, apang indi niya mabag-o ang sugo. Gani dapat niya isugo ang paghaboy kay Daniel sa lungib sang mga leon. Apang ang hari nagsiling kay Daniel: ‘Nagalaum ako nga ang imo Dios, nga imo ginaalagad magaluas sa imo.’

Pagkaaga nagdalagan si Dario sa lungib sang mga leon. Makita mo sia didto. Nagsinggit sia: ‘Daniel, ginluas ka bala sang Dios nga imo ginaalagad gikan sa mga leon?’

Si Daniel sa lungib sang leon

Si Daniel nagsiling: ‘Ang anghel sang Dios nagtakop sang mga baba sang mga leon gani wala nila ako paghaliti.’ Nalipay ang hari. Nagsugo sia nga pagguaon si Daniel sa lungib. Kag ang malain nga mga tao nga nagtinguha sa pagpatay kay Daniel ginhaboy sa mga leon kag napatay.

Nian nagsugo si Dario sa iya bug-os nga ginharian nga tahuron ang Dios ni Daniel, bangod naghimu sia sining dakung milagro.

Daniel 6:1-28.



Mga Pamangkot:

  • Sin-o si Dario, kag ano ang pagtamod niya kay Daniel?
  • Ginhaylo sang pila ka mahisaon nga mga tao si Dario nga himuon ang ano?
  • Ano ang ginhimu ni Daniel sang mahibaloan niya ang tuhoy sa bag-o nga sugo?
  • Ano ang ginsabat ni Daniel kay Dario?
  • Ano ang natabu sa malain nga mga tao nga nagtinguha sa pagpatay kay Daniel, kag ano ang ginsugo ni Dario sa tanan nga kataohan sa iya ginharian?

Dugang pa nga mga pamangkot

  • Basaha ang Daniel 6:1-28.

    Paano ang paghimbon batok kay Daniel nagapahanumdom sa aton sang ginhimu sang mga nagapamatok agod punggan ang hilikuton sang mga Saksi ni Jehova sa modernong mga tion? (Dan. 6:7; Sal. 94:20; Isa. 10:1; Roma 8:31)

    Paano mailug sang mga alagad sang Dios karon si Daniel sa pagpasakop sa “superyor nga mga awtoridad”? (Dan. 6:5, 10; Roma 13:1; Bin. 5:29)

    Paano naton mailug ang halimbawa ni Daniel sa pag-alagad kay Jehova “sing dalayon”? (Dan. 6:16, 20; Fil. 3:16; Bug. 7:15)

Magtuon sing Dugang Pa

BIBLE CARD

Bible Card: Daniel

Ngaa gintagbong si Daniel sa buho sang mga leon? I-print ini nga Bible card kag kilalaha pa gid si Daniel.