Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 75: Ang Apat ka Pamatan-on nga Lalaki sa Babilonia

Sugilanon 75: Ang Apat ka Pamatan-on nga Lalaki sa Babilonia

GINDALA tanan ni Hari Nabokodonosor ang labing edukado nga Israelinhon sa Babilonia. Gikan sa sini, ginpili niya ang labing maambong kag labing maalam nga mga pamatan-on nga lalaki. Ang apat sini amo ang mga pamatan-on nga lalaki nga makita mo diri. Ang isa si Daniel, kag ang tatlo pa gintawag sang mga Babilonianhon nga Sadrac, Mesac kag Abednego.

Nagplano si Nabokodonosor nga hanason ang mga pamatan-on nga lalaki sa 3 ka tuig, nian pilion ang pinakamaalam agod magbulig sa iya sa paglubad sing mga palaligban. Nagmandu sia nga hatagan sila sing masustansia nga pagkaon kag alak gikan sa iya mismo latok agod nga magbaskog sila kag magpagros.

Ginapaathag nanday Daniel, Sadrac, Mesac, kag Abednego ang ila pagtuluohan

Tan-awa ang pamatan-on nga si Daniel. Nahibaloan mo bala kon ano ang iya ginasiling sa mayordomo ni Nabokodonosor nga si Aspenaz? Nagasiling si Daniel nga indi sia magkaon sing masustansia nga pagkaon. Apang nabalaka si Aspenaz. Kon indi mapagros ining apat subong sang iban, basi patyon sia sang hari.

Apang nagsiling si Daniel sa guardia nga gintangdu ni Aspenaz: ‘Palihug hatagi kami sing utan kag tubig sa 10 ka adlaw. Nian ipaanggid kami sa iban kag tan-awa kon sin-o ang mas maayo.’

Nagsugot ang guardia. Pagligad sing 10 ka adlaw, si Daniel kag ang iya tatlo ka abyan mas mapagros sang sa iban. Gani nagpadayon sila sa pagkaon sing utan sa baylo sang ginaaman sang hari.

Sa katapusan sang tatlo ka tuig, nasapwan sang hari nga si Daniel kag ang iya tatlo ka abyan amo ang pinakamaalam. Gani ginpabulig niya sila sa palasyo. Kada may pamangkot ang hari sa kanday Daniel, Sadrac, Mesac kag Abednego, makapulo ka beses ang ila kaalam sang sa bisan sin-o sang iya saserdote ukon mangin-alamon.

Daniel 1:1-21.



Mga Pamangkot:

  • Sin-o ang apat ka pamatan-on nga lalaki sa laragway, kag ngaa yara sila sa Babilonia?
  • Ano ang plano ni Nabokodonosor para sa apat ka pamatan-on nga lalaki, kag ano ang ginmandu niya?
  • Ano ang ginpangabay ni Daniel para sa iya kaugalingon kag sa iya tatlo ka abyan nga kaunon kag imnon nila?
  • Pagligad sang napulo ka adlaw nga pagkaon sing utan, ano ang kahimtangan ni Daniel kag sang iya tatlo ka abyan kon ipaanggid sa iban nga pamatan-on nga mga lalaki?
  • Ngaa nagdangat sa palasyo sang hari si Daniel kag ang iya tatlo ka abyan, kag sa anong paagi mas maayo sila sangsa mga saserdote kag mga mangin-alamon?

Dugang pa nga mga pamangkot

  • Basaha ang Daniel 1:1-21.

    Ano nga sahi sang panikasog ang kinahanglanon agod mabatuan naton ang mga pagsulay kag malandas ang mga kaluyahon? (Dan. 1:8; Gen. 39:7, 10; Gal. 6:9)

    Sa anong mga paagi mahimu masulay ukon mapilitan ang mga pamatan-on karon nga magpaayaw sa ginakabig sang iban nga “manamit nga mga pagkaon”? (Dan. 1:8; Hulu. 20:1; 2 Cor. 6:17-7:1)

    Ano ang ginabulig sa aton nga mahangpan sang rekord sang Biblia tuhoy sa apat ka Hebreong pamatan-on tuhoy sa pagkuha sing sekular nga ihibalo? (Dan. 1:20; Isa. 54:13; 1 Cor. 3:18-20)

Magtuon sing Dugang Pa

Ang Akon Libro sang mga Sugilanon sa Biblia

Sugilanon 79: Si Daniel sa Lungib sang Leon

Ang Akon Libro sang mga Sugilanon sa Biblia

Sugilanon 77: Indi Sila Magyaub