Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 74: Ang Tao nga Wala Nahadlok

Sugilanon 74: Ang Tao nga Wala Nahadlok

TAN-AWA ang mga tao nga nagayubit sa sining pamatan-on nga lalaki? Kilala mo bala sia? Si Jeremias ini. Sia isa ka tuman ka importante nga manalagna sang Dios.

Ginakadlawan sang mga tawo si Jeremias

Ginsilingan ni Jehova si Jeremias nga mangin manalagna samtang naghari pa si Josias. Nagdumdom si Jeremias nga bata pa sia agod mangin manalagna, apang nagsiling si Jehova nga Sia magabulig sa iya.

Ginsilingan ni Jeremias ang mga Israelinhon nga mag-untat sa paghimu sing kalautan. Apang madamung Israelinhon ang nagsimba sa mga idolo sa baylo ni Jehova. Nagsiling si Jeremias nga silotan sila sang Dios, apang nagkadlaw lamang sa iya ang mga tao.

Sang mapatay si Josias, ang iya anak nga si Joaquim naghari. Ginpaandaman ni Jeremias ang mga tao: ‘Ang Jerusalem laglagon kon indi ninyo pagbaylohan ang inyo malain nga dalanon.’ Ginbutong sang mga saserdote si Jeremias kag ginsilingan ang mga prinsipe: ‘Dapat patyon si Jeremias, bangod naghambal sia batok sa aton siudad.’

Ano karon ang himuon ni Jeremias? Wala sia nahadlok! Ginsilingan niya ang tanan: ‘Ginsilingan ako ni Jehova nga ihambal sa inyo ining mga butang. Laglagon niya ang Jerusalem kon indi kamo mag-untat sa paghimu sing kalautan.’

Wala pagpatya sang mga prinsipe si Jeremias, apang ang mga Israelinhon wala mag-untat sa paghimu sing malain. Sang ulihi, si Nabokodonosor, nga hari sang Babilonia nakig-away batok sa Jerusalem. Ginbihag niya ang madamung Judiyo agod mag-alagad sa Babilonia. Hunahonaa lamang kon ano ang kahimtangan kon kuhaon ka sa imo puloy-an padulong sa dumoluong nga duta!

Jeremias 1:1-8; 10:1-5; 26:1-16; 2 Hari 24:1-17.



Mga Pamangkot:

  • Sin-o ang pamatan-on nga lalaki sa laragway?
  • Ano ang pagdumdom ni Jeremias sang gintangdo sia nga mangin manalagna, apang ano ang ginsiling ni Jehova sa iya?
  • Ano nga mensahe ang ginsiling ni Jeremias sa kataohan?
  • Ano ang ginhimu sang mga saserdote agod punggan si Jeremias, apang paano niya ginpakita nga wala sia nahadlok?
  • Ano ang natabu sang wala ginbag-o sang mga Israelinhon ang ila malaut nga mga dalanon?

Dugang pa nga mga pamangkot

  • Basaha ang Jeremias 1:1-8.

    Subong sang ginapakita sang halimbawa ni Jeremias, paano ang isa ka tao mangin kalipikado sa pag-alagad kay Jehova? (2 Cor. 3:5, 6)

    Ano nga pagpalig-on ang ginahatag sang halimbawa ni Jeremias para sa Cristianong mga pamatan-on karon? (Man.12:1; 1 Tim. 4:12)

  • Basaha ang Jeremias 10:1-5.

    Anong mapuersa nga ilustrasyon ang gingamit ni Jeremias agod ipakita ang pagkawalay pulos sang pagsalig sa mga idolo? (Jer. 10:5; Isa. 46:7; Hab. 2:19)

  • Basaha ang Jeremias 26:1-16.

    Kon ginapalanog ang nagapaandam nga mensahe karon, paano ginasunod sang hinaplas nga mga nagkalabilin ang sugo ni Jehova kay Jeremias nga ‘indi mag-iban sing bisan isa ka pulong’? (Jer. 26:2; Deut. 4:2; Bin. 20:27)

    Anong maayong halimbawa ang ginahatag ni Jeremias para sa mga Saksi ni Jehova karon sa pagpahayag sang mga paandam ni Jehova sa mga pungsod? (Jer. 26:8, 12, 14, 15; 2 Tim. 4:1-5)

  • Basaha ang 2 Hari 24:1-17.

    Ano ang makapasubo nga mga resulta sang pagkadimatutom sang Juda kay Jehova? (2 Hari 24:2-4, 14)

Magtuon sing Dugang Pa

BIBLE CARD

Bible Card: Jeremias

San-o gintangdo si Jeremias nga mangin manalagna? Gamita ini nga Bible card para mahibaluan mo ang sabat.