Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 72: Ginbuligan sang Dios si Hari Ezequias

Sugilanon 72: Ginbuligan sang Dios si Hari Ezequias

NGAA nagapangamuyo ining tao kay Jehova? Ano yadtong mga sulat nga ginbutang niya sa atubangan sang altar ni Jehova? Ang tao amo si Ezequias. Hari sia sang nabagatnan nga duha ka tribu sang Israel. Kag yara sia sa daku nga kagamo.

Nagapangamuyo si Hari Ezequias

Ginlaglag na sang Asirianhon nga mga hangaway ang naaminhan nga 10 ka tribu. Gintugotan ni Jehova nga matabu ini bangod tuman kalaon ang mga tao. Karon ang Asirianhon nga mga hangaway nagkari sa pagpakig-away batok sa duha-ka-tribu nga ginharian.

Ang hari sang Asiria nagpadala sing mga sulat kay Hari Ezequias. Ginyubitan niya sa sini si Jehova kag ginsilingan si Ezequias nga mag-ampo. Amo ini ang mga sulat nga ginbutang ni Ezequias sa atubangan sang altar ni Jehova. Nagapangamuyo si Ezequias: ‘O Jehova, luasa kami gikan sa hari sang Asiria.’

Si Ezequias isa ka maayong hari. Gintuman niya ang kasugoan ni Jehova. Gani, sang makapangamuyo na sia, si manalagna Isaias nagpadala sa iya sing mensahe gikan kay Jehova: ‘Ang hari sang Asiria indi makasulod sa Jerusalem. Ang iya mga soldado indi gani makapalupad sing isa ka pana sa siudad.’

Tan-awa ang laragway sa sining pahina. Ang patay nga mga soldado amo ang mga Asirianhon. Sa isa ka gab-i, ang anghel ni Jehova nakapatay sing 185,000 sa ila. Gani nagpauli ang hari sang Asiria.

Ang napatay nga Asirianhon nga mga soldado

Naluas ang duha-ka tribu ng aginharian, kag may paghidait ang mga tao. Apang sang mapatay si Ezequias, ang masunod nga duha ka hari tuman kalain kag ang duta napuno sing kalautan. Nian si Josias ang apo sa tuhod ni Ezequias, ginhimu nga hari.

2 Hari 18:1-36; 19:1-37; 21:1-25.



Mga Pamangkot:

  • Sin-o ang tao sa laragway, kag ngaa yara sia sa daku nga kagamo?
  • Ano ang mga sulat nga ginbutang ni Ezequias sa atubangan sang altar ni Jehova, kag ano ang ginpangamuyo ni Ezequias?
  • Ano nga sahi sang hari si Ezequias, kag ano nga mensahe ang ginpadala ni Jehova sa iya paagi kay manalagna Isaias?
  • Ano ang ginhimu sang anghel ni Jehova sa mga Asirianhon, subong sang ginapakita sa laragway?
  • Bisan pa may paghidait ang duha-ka-tribu nga ginharian sa malip-ot nga tion, ano ang natabu sang napatay na si Ezequias?

Dugang pa nga mga pamangkot

  • Basaha ang 2 Hari 18:1-36.

    Paano ang Asirianhon nga humalambal nga si Rabsaces nagtinguha sa pagpaluya sa pagtuo sang mga Israelinhon? (2 Hari 18:19, 21; Ex. 5:2; Sal. 64:3)

    Kon nagapakig-angot sa mga nagapamatok, paano ginasunod sang mga Saksi ni Jehova ang halimbawa ni Ezequias? (2 Hari 18:36; Sal. 39:1; Hulu. 26:4; 2 Tim. 2:24)

  • Basaha ang 2 Hari 19:1-37.

    Paano ginailug karon sang kataohan ni Jehova si Ezequias kon may problema sila? (2 Hari 19:1, 2; Hulu. 3:5, 6; Heb. 10:24, 25; Sant. 5:14, 15)

    Sa anong tatlo ka paagi nalutos si Hari Senaquerib, kag sin-o ang matagnaon nga ginalaragway niya? (2 Hari 19:32, 35, 37; Bug. 20:2, 3)

  • Basaha ang 2 Hari 21:1-6, 16.

    Ngaa masiling nga si Manases isa sa pinakamalain nga mga hari nga naggahom sa Jerusalem? (2 Cron. 33:4-6, 9)