Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 69: Ang Bata nga Babae Nagbulig sa Gamhanan nga Tao

Sugilanon 69: Ang Bata nga Babae Nagbulig sa Gamhanan nga Tao

NAHIBALOAN mo bala kon ano ang ginasugid sining bata nga babae? Ginasugiran niya ang babae tuhoy sa manalagna ni Jehova nga si Eliseo, kag sing makatilingala nga mga butang nga ginahimu niya sa bulig ni Jehova. Ang babae indi Israelinhon. Tan-awon naton kon ngaa yara sa balay sang babae ining bata.

Ang babae Sirianhon. Bana niya si Naaman, nga pangulo sang Sirianhon nga hangaway. Ginbihag sang mga Sirianhon ang diutay nga Israelinhon kag nangin alagad sang asawa ni Naaman.

Ang asawa ni Naaman kag ang iya alagad nga bata nga babayi

Si Naaman may balatian nga aro. Ang bata nga babae nagasugid sa asawa ni Naaman: ‘Kuntani makakadto ang agalon ko sa manalagna ni Jehova sa Israel. Ayuhon niya ang iya aro.’ Nian, ginsugid ini sa bana sang babae.

Namat-od si Naaman nga makadto sa Israel. Pag-abot niya didto, nagkadto sia sa balay ni Eliseo. Ginpagua ni Eliseo ang iya alagad kag ginsilingan si Naaman nga manghugas sa Suba sang Jordan sing makapito. Naakig si Naaman, kag naglakat sia. Sa hunahona niya maayo pa ang mga suba sang Siria sang sa suba sa Israel.

Apang ginhaylo si Naaman sang isa sa iya mga alagad nga himuon ang ginsiling ni Eliseo. Gani naglumoy si Naaman sa Suba sang Jordan sing makapito. Sang ginhimu niya ini, nag-ayo sia.

Malipayon gid si Naaman, gani nagbalik sia kay Eliseo kag luyag niya nga magregalo sa iya. Si Eliseo nagsiling: ‘Indi, indi ako magbaton sing dulot.’ Nahibaloan niya nga malain ang magbaton sing regalo, bangod si Jehova ang nag-ayo kay Naaman. Apang si Gehasi nga alagad ni Eliseo luyag sang regalo.

Gani amo ini ang ginhimu ni Gehasi. Sang makahalin na si Naaman, naglagas sia. Nagsiling sia nga luyag na karon ni Eliseo ang pila ka dulot ni Naaman para sa pila ka abyan nga bag-o lang mag-abot. Sa pagkamatuod, binutig ini. Apang wala makahibalo si Naaman nga binutig ini, gani ginhatagan niya si Gehasi sing pila ka butang.

Apang, ginsugid ni Jehova kay Eliseo ang ginhimu ni Gehasi. Sang pagpauli ni Gehasi, nasapwan niya nga ang aro ni Naaman nagsaylo sa iya subong silot.

Ano ang maton-an naton gikan sa sining tanan? Una, dapat kita mangin subong sang bata nga babae kag maghambal tuhoy kay Jehova. Ikaduha, dili kita magpahambog, subong ni Naaman sang primero. Kag ikatlo, dili kita magbinutig subong sang ginhimu ni Gehasi.

2 Hari 5:1-27.



Mga Pamangkot:

  • Sa laragway, ano ang ginsiling sang bata nga babae sa babae?
  • Sin-o ang babae sa laragway, kag ano ang ginahimo sang bata nga babae sa balay sang babae?
  • Ano ang ginsugo ni Eliseo sa iya alagad nga isiling kay Naaman, kag ngaa naakig si Naaman?
  • Ano ang natabu sang namati si Naaman sa iya mga alagad?
  • Ngaa wala ginbaton ni Eliseo ang regalo ni Naaman, apang ano ang ginhimu ni Gehasi?
  • Ano ang natabu kay Gehasi, kag ano ang maton-an naton gikan sa sini?

Dugang pa nga mga pamangkot

  • Basaha ang 2 Hari 5:1-27.

    Paano ang halimbawa sang Israelinhon nga bata nga babae makapalig-on sa mga pamatan-on karon? (2 Hari 5:3; Sal. 8:2; 148:12, 13)

    Ngaa maayo nga dumdumon ang halimbawa ni Naaman kon makabaton kita sing Makasulatanhon nga laygay? (2 Hari 5:15; Heb. 12:5, 6; Sant. 4:6)

    Ano nga mga leksion ang maton-an naton kon binagbinagon naton ang pagkatuhay sang mga halimbawa ni Eliseo kag ni Gehasi? (2 Hari 5:9, 10, 14-16, 20; Mat. 10:8; Bin. 5:1-5; 2 Cor. 2:17)

Magtuon sing Dugang Pa

MANGIN ABYAN NI JEHOVA

Buligan Ka ni Jehova nga Mangin Maisog

Ano ang makabulig sa imo nga mangin maisog sa pagsugid sa iban parte kay Jehova?

PARA SA PAGTUON SANG BIBLIA

Nag-ayo ang Aruon!

Hibalua kon ano dapat ang himuon ni Naaman para mag-ayo ang iya aro.

MGA PIKTYUR NGA HAMPANGAN

Nagbinutig si Gehazi

Ano ang duha ka butig nga ginhambal ni Gehazi? I-print ini nga piktyur, isugpon ang mga pintok, kag magtuon sa sini nga istorya sa Biblia.