Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 68: Duha ka Bata nga Lalaki nga Nabuhi Liwat

Sugilanon 68: Duha ka Bata nga Lalaki nga Nabuhi Liwat

KON napatay ka, ano ang batyagon sang imo iloy kon ginbanhaw ka? Mangin malipayon gid sia! Apang mabuhi bala liwat ang tao nga napatay? Natabu na bala ini sang una?

Tan-awa ang mga tao sa laragway. Ang lalaki amo si manalagna Elias. Ang babae amo ang babae nga balo sa siudad sang Sarepta, kag ang bata nga lalaki anak niya. Isa ka adlaw, nagmasakit ang bata. Sang ulihi napatay sia.

Si Elias upod sa balo kag sa ginbanhaw nga bata sini

Ginkuha ni Elias ang bata kag ginpahigda sia sa katre. Nangamuyo sia: ‘O Jehova, buhia ang bata liwat.’ Kag ang bata nagginhawa! Nian si Elias nagsiling sa babae: ‘Ang imo anak buhi!’ Amo kon ngaa tuman gid ka malipayon ang iloy.

Ang isa pa ka importante nga manalagna ni Jehova amo si Eliseo. Nangin kabulig sia ni Elias. Apang sang ulihi gingamit ni Jehova si Eliseo sa paghimu sing milagro. Sa siudad sang Sunem may isa ka babae nga maluloy-on gid kay Eliseo. Ining babae may anak nga lalaki.

Isa ka aga, sang daku na ang bata, didto sia sa latagon, sang sa hinali nagtiyabaw sia: ‘Ang ulo ko masakit!’ Sang madala sia sa balay, napatay sia. Masubo gid ang iya iloy. Sa gilayon naglakat sia kag gintawag si Eliseo.

Nagkadto si Eliseo sa patay nga bata kag nangamuyo kay Jehova. Nian nangatsi ang bata. Nabuhi sia liwat! Malipayon gid ang iloy!

Madamu na nga tao ang napatay. Nagpasubo ini sa ila pamilya kag mga abyan. Apang may gahom si Jehova sa pagbanhaw sing patay. Sa isa ka adlaw banhawon niya ang minilyon ka tao.

1 Hari 17:8-24; 2 Hari 4:8-37.


Mga Pamangkot:

  • Sin-o ang tatlo ka tao sa laragway, kag ano ang natabu sa bata nga lalaki?
  • Ano ang ginpangamuyo ni Elias tuhoy sa bata nga lalaki, kag ano ang masunod nga natabu?
  • Sin-o ang kabulig ni Elias?
  • Ngaa ginpakadto si Eliseo sa balay sang babae sa Sunem?
  • Ano ang ginhimu ni Eliseo, kag ano ang natabu sa patay na nga bata?
  • Ano ang gahom ni Jehova, subong sang ginpakita paagi kay Elias kag kay Eliseo?

Dugang pa nga mga pamangkot

  • Basaha ang 1 Hari 17:8-24.

    Paano gintilawan ang pagkamatinumanon kag pagtuo ni Elias? (1 Hari 17:9; 19:1-4, 10)

    Ngaa talalupangdon ang pagtuo sang babae nga balo sang Sarepta? (1 Hari 17:12-16; Luc. 4:25, 26)

    Paano ang naeksperiensiahan sang balo nga babae nga taga-Sarepta nagapamatuod nga husto ang ginsiling ni Jesus sa Mateo 10:41, 42? (1 Hari 17:10-12, 17, 23, 24)

  • Basaha ang 2 Hari 4:8-37.

    Ano ang ginatudlo sa aton sang taga-Sunem nga babae tuhoy sa pagkamaabiabihon? (2 Hari 4:8; Luc. 6:38; Roma 12:13; 1 Juan 3:17)

    Sa anong mga paagi makapakita kita sing kaayo sa mga alagad sang Dios karon? (Bin. 20:35; 28:1, 2; Gal. 6:9, 10; Heb. 6:10)

Magtuon sing Dugang Pa

Apini ang Matuod nga Pagsimba!

Sa ano nga mga sitwasyon mo mapakita ang kaisog sa pagpangapin sa matuod nga pagsimba?