Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 66: Jesabel—Ang Malaut nga Rayna

Sugilanon 66: Jesabel—Ang Malaut nga Rayna

SANG mapatay si Hari Jeroboam, ang kada hari nga naggahom sa naaminhan 10 ka tribu nga ginharian sang Israel malain. Si Hari Ahab ang pinakamalain. Nahibaloan mo bala kon ngaa? Ang dakung rason amo ang iya asawa, ang malauton nga si Rayna Jesabel.

Indi Israelinhon si Jesabel. Anak sia sang hari sang Sidon. Nagasimba sia sa butig nga dios nga si Baal kag ginhaylo niya si Ahab kag ang madamung Israelinhon sa pagsimba kay Baal. Si Jesabel nagadumot kay Jehova kag ginpatay niya ang madamung manalagna.

Isa ka adlaw tumam kasubo si Hari Ahab. Ginpamangkot sia ni Jesabel kon ngaa. Ginsugiran sia ni Ahab: ‘Luyag ko baklon ang ulobasan ni Nabot. Apang indi niya luyag.’

‘Dili magkasubo,’ siling ni Jesabel. ‘Kuhaon ko ini para sa imo.’

Gani ginhambal ni Jesabel ang pila ka lalaki nga butangbutangan si Nabot. Nagsiling sia nga ginpakamalaut ni Nabot ang Dios kag ang hari. Bangod sini, ginbato sa kamatayon si Nabot.

Sang mahibal-an ni Jesabel nga patay na si Nabot, nagsiling sia kay Ahab: ‘Kuhaa na karon ang iya ulobasan.’ Wala ka bala naga-ugyon nga si Jesabel dapat silotan sa amo nga kalainan?

Gani, sang ulihi, ginpadala ni Jehova si Jehu agod silotan sia. Sang mahibal-an ni Jesabel nga nagapakari si Jehu, nagpatahom sia. Apang sang makita ni Jehu si Jesabel sa palasyo sang bintana, nagsugo sia: ‘Ihulog sia!’ Nagtuman ang mga lalaki, subong makita mo sa laragway. Gani nahulog sia kag napatay. Amo ang katapusan sang malauton nga si Rayna Jesabel.

Si Rayna Jesabel

1 Hari 16:29-33; 18:1-4; 21:1-16; 2 Hari 9:30-37.



Mga Pamangkot:

  • Sin-o si Jesabel?
  • Ngaa masubo si Hari Ahab isa ka adlaw?
  • Ano ang ginhimu ni Jesabel agod makuha ang ulobasan ni Nabot para sa iya bana nga si Ahab?
  • Sin-o ang ginpadala ni Jehova agod silotan si Jesabel?
  • Subong sang makita mo sa laragway, ano ang natabu sang mag-abot si Jehu sa palasyo ni Jesabel?

Dugang pa nga mga pamangkot

  • Basaha ang 1 Hari 16:29-33 kag 18:3, 4.

    Daw ano kalain ang mga kahimtangan sa Israel sang panahon ni Hari Ahab? (1 Hari 14:9)

  • Basaha ang 1 Hari 21:1-16.

    Paano si Nabot nagpakita sing kaisog kag katutom kay Jehova? (1 Hari 21:1-3; Lev. 25:23-28)

    Pasad sa halimbawa ni Ahab, ano ang maton-an naton tuhoy sa paglandas sa kapaslawan? (1 Hari 21:4; Roma 5:3-5)

  • Basaha ang 2 Hari 9:30-37.

    Ano ang maton-an naton gikan sa kakugi ni Jehu sa paghimu sang kabubut-on ni Jehova? (2 Hari 9:4-10; 2 Cor. 9:1, 2; 2 Tim. 4:2)

Magtuon sing Dugang Pa

Isa ka Dios nga Nagadumot sa Inhustisya

I-download ini para mahibaluan mo kon ano ang imo matun-an sa istorya parte kanday Ahab, Jezebel, Nabot, kag Elias.