Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 65: Natunga ang Ginharian

Sugilanon 65: Natunga ang Ginharian

NAHIBALOAN mo bala kon ngaa ginakusnit sining tao ang iya panapton? Si Jehova ang nagsiling sa iya nga himuon ini. Ining tao amo ang manalagna sang Dios nga si Ahias. Ang manalagna isa ka tao nga pauna nga ginasugiran sang Dios sang matabu.

Si Ahias kag si Jeroboam

Nagapakighambal diri si Ahias kay Jeroboam. Si Jeroboam isa ka tao nga gintulinan ni Solomon sa pila ka pagtukod nga hilikuton. Sang makita ni Ahias si Jeroboam, gin-uba niya ang iya nga bag-ong panapton kag ginkusnit ini sa 12 ka gihay. Nian ginhatag niya kay Jeroboam ang 10 ka gihay. Nahibaloan mo bala kon ngaa?

Nagpaathag si Ahias nga kuhaon ni Jehova ang ginharian gikan kay Solomon. Ihatag ni Jehova ang 10 ka tribu kay Jeroboam, kag ibilin ang duha ka tribu lamang sa anak ni Solomon, nga si Rehoboam.

Naakig si Solomon sang mabatian niya ini, gani nalagyo si Jeroboam sa Egipto. Nian napatay si Solomon kag ang iya anak nga si Rehoboam naghari. Sang mabatian ni Jeroboam nga napatay si Solomon, nagbalik sia sa Israel.

Si Rehoboam indi maayo nga hari. Mapintas sia sa kataohan. Si Jeroboam kag ang pila ka lalaki nagkadto sa hari kag nangabay sa iya nga magmaluloy-on, apang tapat pa nga nagpintas sia. Gani ginhimu sang kataohan si Jeroboam nga mangin hari sa 10 ka tribu, apang ang duha ka tribu ni Benjamin kag ni Juda naghupot kay Rehoboam nga ila hari.

Indi luyag ni Jeroboam nga magsimba ang iya kataohan sa templo sa Jerusalem, gani nagpahimu sia sing duha ka bulawan nga tinday kag ginpasimba sa sini ang kataohan. Wala madugay napuno sing kalautan ang duta.

May kagamu man sa duha ka tribu nga ginharian. Sang maghari si Rehoboam, ang hari sang Egipto nakig-away batok sa Jerusalem. Nagkuha sia sing madamung bahandi gikan sa templo ni Jehova.

1 Hari 11:26-43; 12:1-33; 14:21-31.



Mga Pamangkot:

  • Sin-o ang duha ka lalaki sa laragway, kag ano sila?
  • Ano ang ginhimu ni Ahias sa panapton nga iya ginasul-ob, kag ano ang buot silingon sini?
  • Ngaa ginhimu sang kataohan si Jeroboam nga mangin hari sa napulo ka tribu?
  • Ngaa nagpahimu si Jeroboam sing duha ka bulawan nga tinday, kag ano ang natabu sa duta pagkatapos sini?
  • Ano ang natabu sa duha ka tribu nga ginharian kag sa templo ni Jehova sa Jerusalem?

Dugang pa nga mga pamangkot

  • Basaha ang 1 Hari 11:26-43.

    Ano nga sahi sang tao si Jeroboam, kag ano ang ginsaad sa iya ni Jehova kon tumanon niya ang mga sugo sang Dios? (1 Hari 11:28, 38)

  • Basaha ang 1 Hari 12:1-33.

    Pasad sa malain nga halimbawa ni Rehoboam, ano ang maton-an sang mga ginikanan kag mga gulang tuhoy sa pag-abuso sa awtoridad? (1 Hari 12:13; Man. 7:7; 1 Ped. 5:2, 3)

    Kay sin-o ang mga pamatan-on karon makapangayo sing masaligan nga panuytoy kon nagahimu sing mabug-at nga mga desisyon sa kabuhi? (1 Hari 12:6, 7; Hulu. 1:8, 9; 2 Tim. 3:16, 17; Heb. 13:7)

    Ngaa nagtukod si Jeroboam sing duha ka sentro para sa pagsimba sa tinday, kag paano ini nagpakita sing daku nga kakulang sing pagtuo kay Jehova? (1 Hari 11:37; 12:26-28)

    Sin-o ang nagpanguna sa kataohan sang napulo ka tribu nga ginharian sa pagrebelde batok sa matuod nga pagsimba? (1 Hari 12:32, 33)