Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 63: Ang Maalam nga si Hari Solomon

Sugilanon 63: Ang Maalam nga si Hari Solomon

SI Solomon isa ka tin-edyer sang maghari sia. Ginahigugma niya si Jehova, kag ginsunod niya ang maayong laygay ni David nga iya amay. Nahamuot si Jehova kay Solomon. Isa ka gab-i nagsiling sia sa iya sa damgo: ‘Solomon, ano ang luyag mo nga ihatag ko sa imo?’

Sa sini, si Solomon nagsabat: ‘Jehova nga akon Dios, bata pa ako, kag indi ako makahibalo maggahom. Gani hatagi ako sing kaalam sa paggahom sa imo kataohan sa matarong nga paagi.’

Nahamuot si Jehova sa ginpangayo ni Solomon. Gani Sia nagsiling: ‘Bangod nangayo ka sing kaalam kag indi sing malawig nga kabuhi ukon manggad, hatagan ko ikaw sing kaalam labi sa tanan. Kag hatagan ko ikaw sing manggad kag himaya.’

Wala madugay, duha ka babae ang nagkadto kay Solomon nga may mabudlay nga problema. Ang isa ka babae nagpaathag: ‘Isa kami ka balay. Nagbun-ag ako sing lalaki, kag duha ka adlaw sang ulihi nagbun-ag man sia sing lalaki. Isa ka gab-i napatay ang iya bata, apang sang nagakatulog ako, ginbaylo niya ini sa akon bata.’

Nian ang isa pa ka babae nagsiling: ‘Indi! Ang buhi nga bata akon, kag ang patay iya!’ Kag gani nagbaisay ang mga babae. Ano ang himuon ni Solomon?

Nangayo sia sing espada, kag nagsiling: ‘Tungaa ang bata, kag tungaa ini sa duha ka babae!’

Ang matuod nga iloy naghibi: ‘Indi! Palihug dili pagpatya ang bata. Ihatag ini sa iya!’ Apang ang isa nagsiling: ‘Dili ini pag-ihatag sa amon; sige tungaa ini.’

Si Hari Solomon nga nagalubad sang mabudlay nga problema

Nian, si Solomon nagsiling: ‘Dili pagpatya ang bata! Ihatag sia sa unang babae. Sia ang matuod nga iloy.’ Nahibal-an ini ni Solomon kay ginahigugma gid sang matuod nga iloy ang bata sa bagay nga handa sia nga ihatag ini, indi lang mapatay ini. Sang mabatian ini sang kataohan, nalipay sila nga may maalam sila nga hari.

Sang paggahom ni Solomon, ginpakamaayo sang Dios ang kataohan. May bugana nga pagkaon. Ang kataohan may maayo nga panapton kag maayo nga balay. May sobra sa nagakaigo para sa tanan.

1 Hari 3:3-28; 4:29-34.



Mga Pamangkot:

  • Ano ang ginpamangkot ni Jehova kay Solomon, kag ano ang ginsabat niya?
  • Bangod nahamuot sia sa ginpangayo ni Solomon, ano ang ginsaad ni Jehova sa iya?
  • Anong mabudlay nga problema ang gindangop sang duha ka babae kay Solomon?
  • Subong sang makita mo sa laragway, paano ginhusay ni Solomon ang problema?
  • Ano ang kahimtangan sang maggahom si Solomon, kag ngaa?

Dugang pa nga mga pamangkot

  • Basaha ang 1 Hari 3:3-28.

    Ano ang matun-an sang mga lalaki nga may mga responsibilidad sa organisasyon sang Dios karon gikan sa tinagipusuon nga ginsiling ni Solomon sa 1 Hari 3:7? (Sal. 119:105; Hulu. 3:5, 6)

    Paano ang pangabay ni Solomon isa ka maayong halimbawa sang nagakaigo nga mga butang nga ipangamuyo? (1 Hari 3:9, 11; Hulu. 30:8, 9; 1 Juan 5:14)

    Ang paghusay ni Solomon sa problema sang duha ka babae nagahatag sa aton sing ano nga pasalig tuhoy sa palaabuton nga paggahom sang Daku Pa nga Solomon nga si Jesucristo? (1 Hari 3:28; Isa. 9:6, 7; 11:2-4)

  • Basaha ang 1 Hari 4:29-34.

    Paano ginsabat ni Jehova ang ginpangabay ni Solomon nga hatagan sia sing isa ka matinumanon nga tagipusuon? (1 Hari 4:29)

    Bangod sang mga panikasog nga ginhimu sang kataohan agod mamati sa kaalam ni Solomon, ano ang dapat mangin panimuot naton sa pagtuon sa Pulong sang Dios? (1 Hari 4:29, 34; Juan 17:3; 2 Tim. 3:16)

Magtuon sing Dugang Pa

Si Solomon Naghimo sing Maayo nga Desisyon

Pangitaa ang kulang sa sini nga piktyur, isugpon ang mga pintok, kag kolori ini.

Bible Card: Solomon

I-download ini nga Bible card, kag kilalaha pa gid ang maalam nga si Hari Solomon.