Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Akon Libro sang mga Sugilanon sa Biblia

Sugilanon 62: Ang Kagamo sa Balay ni David

Sugilanon 62: Ang Kagamo sa Balay ni David

SANG maggahom si David sa Jerusalem, ginhatagan ni Jehova ang iya hangaway sing madamung pagdaug. Sang ulihi, sa bulig ni Jehova, ang tanan nga duta nga ginsaad sa ila nangin ila.

Si David isa ka maayong manuggahom. Ginahigugma niya si Jehova. Gani ang una nga ginhimu niya sang mabihag ang Jerusalem amo ang dalhon didto ang kaban sang katipan ni Jehova.

Sang nagatigulang na si David nakasala sia. Nahibal-an niya nga malain ang magkuha sang indi iya. Apang isa ka gab-i, nakakita sia sing matahom gid nga babae. Sia amo si Bat-seba, kag ang iya bana nga si Uria isa sang iya mga soldado.

Naluyag gid si David kay Bat-seba nga ginpadala niya sia sa iya palasyo. Ang iya bana nagapakig-away sa malayo. Naghulid si David sa iya, kag nagmabdos sia. Nabalaka gid si David, gani nagpasugo sia sa pangulo sang hangaway nga si Joab nga ibutang sa unahan sang inaway si Uria diin mapatay sia. Sang mapatay si Uria, ginpangasawa ni David si Bat-seba.

Naakig gid si Jehova kay David. Ginpadala niya ang iya alagad nga si Natan agod isugid sa iya ang iya mga sala. Makita mo diri si Natan nga nagapakighambal kay David. Naghinulsol gid si David sa iya nahimu, gani wala sia pagpatya ni Jehova. Apang nagsiling si Jehova: ‘Bangod nahimu mo ining malain nga butang, magaabot ang madamu nga kagamo sa imo balay.’ Kag daw ano nga kagamo ang nag-abot kay David!

Ginalaygayan ni Natan si David

Una, napatay ang anak ni Bat-seba. Nian ginpatay sang anak ni David nga si Absalom ang iya utod nga si Amnon, bangod ginhimuslan niya ang ila utod nga babae nga si Tamar. Nian ginhimu ni Absalom ang iya kaugalingon nga hari. Nakig-away si David batok kay Absalom, nga napatay.

Sa ulot sining tanan, si Bat-seba nagbun-ag kay Solomon. Sang tigulang na si David kag masakiton, ang iya anak nga si Adonias nagtinguha sa paghari. Apang, ginhaplas ni David si Solomon nga mangin hari. Sa tapos sini, napatay si David sa edad nga 70 ka tuig. Naggahom sia sing 40 ka tuig. Karon si Solomon amo ang hari sang Israel.

2 Samuel 11:1-27; 12:1-18; 1 Kings 1:1-48.



Mga Pamangkot:

  • Sa bulig ni Jehova, ano ang natabu sang ulihi sa duta sang Canaan?
  • Ngaa naakig gid si Jehova kay David?
  • Sa laragway, sin-o ang ginpadala ni Jehova agod isugid kay David ang iya mga sala, kag ano ang ginsiling sina nga tao nga matabu kay David?
  • Ano nga kagamo ang nag-abot kay David?
  • Sang mapatay si David, sin-o ang naghari sa Israel?

Dugang pa nga mga pamangkot

  • Basaha ang 2 Samuel 11:1-27.

    Paano ang pagpabilin nga masaku sa pag-alagad kay Jehova isa ka pangamlig para sa aton?

    Ngaa nakasala si David, kag ano nga paandam ang ginahatag sini para sa mga alagad ni Jehova karon? (2 Sam. 11:2; Mat. 5:27-29; 1 Cor. 10:12; Sant. 1:14, 15)

  • Basaha ang 2 Samuel 12:1-18.

    Ano nga leksion ang matun-an sang mga gulang kag mga ginikanan gikan sa paagi nga gingamit ni Natan sa pagpalapit kay David agod laygayan sia? (2 Sam. 12:1-4; Hulu. 12:18; Mat. 13:34)

    Ngaa ginkaluy-an ni Jehova si David? (2 Sam. 12:13; Sal. 32:5; 2 Cor. 7:9, 10)